គ្រប់ក្រុមហ៊ុន និង ស្ថាប័នអាជីវកម្ម ទាំងអស់នៅពេលដែលប្រកាសជ្រើសរើសបុគ្គលិក ពួកគេប្រាកដជាសម្រាំងយកតែអ្នកដែលមានលក្ខណៈសម្បត្តិដែលសិក្តសមនឹងតួនាទី មានសមត្ថភាពខ្ពស់ ពូកែ ឈ្លាសវៃ រហ័សរហួន និងចេះដោះស្រាយបញ្ហាទៅតាមកាលៈទេសៈ។ ការជ្រើសរើសបុគ្គលិកល្អ អ្នកត្រូវផ្ដោតសំខាន់ទៅលើបែបបទដែលពួកគេទាំងនោះបានដាក់ស្នើមក។ អ្នកត្រូវមើលពីប្រវត្តិរូបសង្ខេប បទពិសោធន៍ការងារ និង ជំនាញដែលមានជាដើម ជាពិសេសអ្នកត្រូវមើលទៅលើ Cover Letter របស់បេក្ខជននេះតែម្ដង ព្រោះការសរសេរ Cover Letterរបស់បេក្ខជនអាចឲ្យអ្នកដឹងពីសមត្ថភាពរបស់ពួកគេបាន។ខាងក្រោមនេះគឺជាគន្លឺះមួយចំនួនដើម្បីធ្វើឲ្យអ្នកងាយស្រួលក្នុងការរើសបុគ្គលិកណាដែលមានសមត្ថភាពខ្ពស់មកធ្វើការឲ្យអ្នក៖
១ រកមើលអ្វីដែលជម្រុញពួកគេឲ្យចូលរួមក្រុមជាមួយអ្នក
បើសិនជាCover Letterរបស់បេក្ខជនមើលទៅធម្មតាពេកឬសាមញ្ញពេក ដោយមិនមានព័ត៌មានលម្អិតជាក់លាក់ទាក់ទងនឹងក្រុមហ៊ុនអ្នកទេ មានន័យថាCover Letterរបស់បេក្ខជននោះ តែងតែផ្ញើរទៅគ្រប់ក្រុមហ៊ុនដូចៗគ្នាទាំងអស់។ ដូចនេះអ្នកគួរតែពិនិត្យមើលទៅលើCover Letterដោយយកចិត្តទុកដាក់លើខ្លឹមសារដែលធ្វើឲ្យវាច្បាស់ថាបេក្ខជនពិតជាចង់ធ្វើការសម្រាប់អង្គភាពរបស់អ្នកមែន។ការចែករំលែកព័ត៌មានប្រភេទនេះនៅក្នុងCover Letterមានន័យថាបេក្ខជនពិតជាបានធ្វើការស្រាវជ្រាវនិងចង់ចូលរួមជាមួយក្រុមហ៊ុនរបស់អ្នកប្រាកដមែន ហើយពួកគេក៏ជាប្រភេទបេក្ខជនដែលយើងគួរជួលមកដែរ។
២ ប្រៀបធៀបពីបទពិសោធន៍និងគោលដៅរបស់បេក្ខជនជាមួយនឹងអ្វីដែលអ្នកត្រូវការ
ដូចគ្នាទៅនឹងការលម្អិតអំពីមូលហេតុដែលពួកគេចាប់អារម្មណ៍ចង់ចូលធ្វើការនៅក្នុងក្រុមហ៊ុនរបស់អ្នក បេក្ខជនដែលចូលរួមច្រើនបំផុតនឹងរកវិធីដើម្បីតម្រឹមបទពិសោធន៍និងគោលបំណងអាជីពពីមុនរបស់គេ ឲ្យស៊ីទៅនឹងអ្វីដែលក្រុមហ៊ុនអ្នកត្រូវការ។ ឧទាហរណ៍ដូចជា បើសិនជាអ្នកកំពុងជ្រើសរើសបុគ្គលិកផ្នែកលក់ដែលពូកែខាងបញ្ចុះបញ្ចូល និងមានជំនាញចរចាខ្លាំង នោះប្រាកដជាមានបេក្ខជនដាក់ពាក្យមកកាន់ក្រុមហ៊ុនអ្នកដោយនិយាយទាក់ទងទៅនឹងបទពិសោធន៍ដែលពួកគេធ្លាប់ជាអ្នកលក់ដ៏ពូកែ មានជំនាញចរចា និងស្វាហាប់ម្នាក់ដែលពួកគេធ្លាប់មានពីមុនមក។ឬប្រសិនបើអ្នកជួលអ្នកគ្រប់គ្រងការិយាល័យអ្នកប្រាកដជាយកបេក្ខជនខ្លាំងម្នាក់ឲ្យចូលបម្រើការងារជាជំនួយរដ្ឋបាលដែលមានបទពិសោធន៍ប្រហែលជាពីរទៅបីឆ្នាំ ដើម្បីជួយលើកស្ទួយក្រុមហ៊ុនឲ្យរីកចម្រើន។
៣ លើកយកបញ្ហា ដើម្បីឱ្យបេក្ខជនសាកល្បងរកដំណោះស្រាយ
ការលើកយកបញ្ហា ឬលំហាត់ណាមួយឱ្យបេក្ខជនដោះស្រាយគឺជាវិធីល្អមួយស្វែងយល់ពីសមត្ថភាពដោះស្រាយបញ្ហា និងភាពរហ័សរហួនរបស់គេក្នុងការបំបែកបញ្ហា ឬលើកដំណោះស្រាយនានាដែលមានលក្ខណៈសមហេតុផល និងការគិតបែបស៊ីជម្រៅ។ ជាទូទៅ ទោះបីជាបញ្ហានោះថ្មីសម្រាប់គេក៏ដោយ តែបើគេមានសមត្ថភាពខ្ពស់ និងពូកែ គេអាចលើកយកដំណោះស្រាយដោយប្រើអំណះអំណាងសមហេតុផល និងរបៀបគិតបែបវិភាគបានយ៉ាងល្អ។
