វិបត្តិCovid-19 គឺជា​ឱកាសសម្រាប់ស្ថាប័នហិរញ្ញវត្ថុដើម្បីជួយ និងឆក់យកបេះដូងអតិថិជន

6722

ស្ថានភាព​​រីករាលដាលនៃជម្ងឺCovid-19នៅតែជា​ព័ត៌មានក្តៅនៅទូទាំងពិភពលោក។ ថ្វីត្បិតតែបណ្តាប្រទេសមួយចំនួន​ដូចជាប្រទេសចិន ជប៉ុន និងកូរ៉េខាងត្បូង​មានសភាពធូរស្រាល ប្រទេស​ជាច្រើនទៀតនៅអឺរ៉ុប សហរដ្ឋអាមេរិច អ៊ីរ៉ង និងប្រទេសក្នុងតំបន់អាស៊ីអាគ្នេយ៍កំពុងដុតដៃដុតជើងប្រយុទ្ធប្រឆាំង​នឹងជម្ងឺនេះទាំងថ្ងៃទាំងយប់។

ប្រទេសចិនដែលជាប្រភព​នៃការផ្ទុះនៃមេរោគកូរ៉ូណានេះកាលពីខែ​មករាកន្លងទៅ បានប្រកាស​ពីភាពជោគជ័យ​លើការយកឈ្នះមេរោគដ៏កាចសាហាវនេះ ហើយបានចាប់ផ្តើម​សកម្មភាព​ការងារឡើងវិញជាធម្មតាស្ទើរតែពេញលេញវិញទៅហើយ។ ប្រទេសជប៉ុន បន្ទាប់ពីប្រកាសអាសន្នបិទសាលារៀន​មួយរយៈមក ឥឡូវនេះ អ្វីៗបានខិតទៅរកប្រក្រតីភាព និងទីផ្សារភាគហ៊ុនរបស់ប្រទេសនេះក៏បានកើនឡើងវិញផងដែរ។

ចំណែកឯប្រទេសកម្ពុជាវិញ វិបត្តិនេះទើបតែចាប់ផ្តើម​កើតឡើងចាប់ពីដើមខែ​មីនានេះ ហើយ​រហូតមកទល់ពេលនេះ នៅមិនទាន់មានសភាពស្រាកស្រាននៅឡើយទេ ដោយសារតែករណីឆ្លងត្រូវបានរកឃើញជាបន្តបន្ទាប់ ហើយរហូតមកដល់ពេលនេះមានជិត១០០ករណី និងជាសះស្បើយ១១ករណីផងដែរ។ ទោះបីជា​ការឆ្លងនៅមិនទាន់រីករាលដាលដល់សហគមន៍ ហើយភាគច្រើននៃអ្នកឆ្លងជាជនជាតិបរទេស និងជនជាតិខ្មែរមកពីខាងក្រៅក៏ដោយ ក៏ភាពភ័យខ្លាចគឺមិនអាចដកចេញ​ពីបេះដូងប្រជាជនទូទៅឡើយ។ ភាពភ័យខ្លាចឆ្លងរាលដាល និងការអំពាវនាវរបស់រាជរដ្ឋាភិបាលមិនឱ្យចេញពីផ្ទះប្រសិនបើមិនមានករណីចាំបាច់ ធ្វើឱ្យ​ទីក្រុងដែលធ្លាប់តែកកស្ទះ​ហាក់មានសភាពស្ងប់ស្ងាត់ជាងសព្វមួយដង អាជីវកម្ម​ជាច្រើន​បានជួបប្រទះ​នឹងការធ្លាក់ចុះភ្ញៀវយ៉ាងគំហុក និងខ្លះបិទទ្វារបណ្តោះអាសន្ន​ដោយសារតែផលប៉ះពាល់នេះ។

ប្រសិនបើស្ថានភាពនេះនៅតែបន្ត​ទៅមុខទៀត ផលលំបាកជាច្រើននឹងអាចកើតមានសម្រាប់សេដ្ឋកិច្ចទាំងមូល អាជីវកម្មជាច្រើននឹងរងផលប៉ះពាល់ ហើយប្រាកដណាស់ ប្រសិនបើអាជីវកម្មប៉ះពាល់ បុគ្គលិកក្នុងស្ថាប័ននោះក៏មិនអាចចៀសរួចផងដែរ។ ហេតុនេះហើយ រាជរដ្ឋាភិបាលបានដាក់ចេញនូវយន្តការជាច្រើនដើម្បីសម្រាលបញ្ហា ដូចជាការលើកលែងពន្ធសម្រាប់អាជីវកម្មដែលពាក់ព័ន្ធនឹងវិស័យទេសចរណ៍ លើកលែងពន្ធសម្រាប់ពន្ធប្រថាប់ត្រាលើការទិញផ្ទះទាបជាង​៧ម៉ឺន​ដុល្លារ និងធ្វើការអំពាវនាវដល់បណ្តា​គ្រឹស្ថានហិរញ្ញវត្ថុ​ឱ្យសម្រួលដល់ការបង់ប្រាក់កម្ចីដល់អតិថិជនដែលរងផលប៉ះពាល់នេះជាដើម។

ការដាក់ចេញនូវគោលការរបស់រដ្ឋាភិបាល​ខាងលើ ខ្ញុំជឿជាក់ថានឹងអាចជួយសម្រួលស្ថានភាពបានមួយចំនួនសម្រាប់បងប្អូនប្រជាពលរដ្ឋដែលកំពុងរងផលប៉ះពាល់។ ប៉ុន្តែ ក្រៅពីការចូលរួម​ចំណែកជួយរបស់រាជរដ្ឋាភិបាល ខ្ញុំជឿជាក់ថា ស្ថាប័នហិរញ្ញវត្ថុទាំងអស់ដែលមានទុនអាចបញ្ចេញបាន នឹងអាចចូលរួម​ជួយលើក​ស្ទួយសេដ្ឋកិច្ចឱ្យរក្សាលំនឹងបានក្នុងគ្រាដែលចំបាច់(ប្រសិនបើស្ថានភាពនេះអូសបន្លាយ ប្រែក្លាយជាវិបត្តិ)ជូនដល់​ម្ចាស់សហគ្រាស និងម្ចាស់អាជីវកម្ម។ ​ប្រសិនបើស្ថានភាពកាន់តែធ្ងន់ធ្ងរ ដោយសារតែបញ្ហាឆ្លងរីករាលដាលនៅតែមាន អាជីវកម្មត្រូវបង្ខំ​ចិត្តបិទទ្វារដោយសារតែមិនមានភ្ញៀវ ច្បាស់ណាស់ បញ្ហាបង្វិលសាច់ប្រាក់នឹងកើតមានឡើង។ ប្រសិនបើអាជីវកម្មរបួសស្រាល  ម្ចាស់អាជីវកម្មមានទុនបម្រុងទប់ទល់ការចំណាយមួយរយៈនោះ គឺវាគ្រាន់តែជាការបិទទ្វារបណ្តោះអាសន្ន​រង់ចាំសភាព​ការណ៍ប្រសើរ ដើម្បីបើកដំណើរការឡើងវិញ។ ប៉ុន្តែបើក្នុងករណីរបួសធ្ងន់ ម្ចាស់អាជីវកម្មនិងសហគ្រាស​មិនមានទុនទប់ការខាតបង់ដោយសារតែមិនមានដំណើរការអាជីវកម្មនោះ ប្រាកដណាស់ អាជីវកម្មនឹងក្ស័យធន់ព្រោះគ្មានប្រាក់បង្វិល ហើយបុគ្គលិក​នៃស្ថាប័ននោះក៏មិនអាចគេផុតពីវិបត្តិផងដែរ។

https://www.facebook.com/221799271349788/videos/2832809393476485/

ពេលវេលាវិបត្តិនេះហើយគឺជាពេលវេលាដែលគ្រឹះស្ថានហិរញ្ញវត្ថុនានាបញ្ចេញភាពក្លាហានរបស់ខ្លួនក្នុងការជួយជ្រោង​អាជីវកម្មនោះឡើងវិញ ដោយបញ្ចេញទុនរបស់ខ្លួន​បង្កើត​កញ្ចប់កម្ចីរយៈពេលខ្លីពិសេស​មួយ ​ជួយស្តារវិបត្តិ​Covid-19ដែលប៉ះពាល់ដល់ម្ចាស់អាជីវកម្មប្រសិនបើវាកើតមានឡើងមែននោះ។ កញ្ចប់កម្ចីនេះ គឺបង្កើតពិសេសសម្រាប់ម្ចាស់អាជីវកម្មដែលមានបញ្ហាលើការបង្វិលសាច់ប្រាក់ និងការទប់ទល់​ការចំណាយប្រតិបត្តិនានារយៈពេល៦ ខែដល់០១ឆ្នាំក្នុងកំឡុងពេល​មានវិបត្តិនេះ ជាមួយ​នឹងអាត្រាការប្រាក់ពិសេសមួយ។

កញ្ចប់កម្ចីនេះ នឹងជួយបន្ត​ជីវិត​ដល់អាជីវកម្មដែលឈឺ​ពេលមានវិបត្តិ ហើយត្រឡប់ជាប្រសើរវិញនៅពេលស្ថានភាព​ប្រែមកល្អឡើងវិញ។

ប្រសិនបើគ្រឹះស្ថានហិរញ្ញវត្ថុអាចបញ្ចេញ​កម្ចីពិសេសនេះក្នុងដំណាក់កាលដែលម្ចាស់អាជីវកម្ម និងសហគ្រាសរងទុក្ខនេះ និងត្រូវការបំផុត ប្រាកដណាស់គ្រឹះស្ថានហិរញ្ញវត្ថុនោះនឹងដក់ជាប់បេះដូងអតិថិជនជាអ្នកខ្ចី ដែលនឹងធ្វើឱ្យគាត់ដកហរទ័យមិនបានពីគ្រឹះស្ថាននោះ ដូចពាក្យស្លោកមួយបានពោលថា “ជួយគ្នាក្នុងគ្រាក្រ ស្គាល់មិត្តល្អក្នុងគ្រាលំបាក”ដូច្នេះឯង ដែលពិបាកនឹងធ្វើឱ្យគាត់ភ្លេចពីជំនួយដែលបានផ្តល់ឱ្យនេះ។ ហើយប្រាកដណាស់ កេរ្តិ៍ឈ្មោះ​របស់ស្ថាប័ននោះនឹងត្រូវបាននិយាយតៗគ្នា ដែលអាចក្លាយជាយុទ្ធសាស្ត្រទីផ្សារដ៏ល្អមួយ​ ឆ្វាមក្រសោបអតិថិជនក្នុងគ្រាដែលគេត្រូវការជំនួយបំផុត។

ប្រសិនបើគ្រឹះស្ថានហិរញ្ញវត្ថុអាចបញ្ចេញ​កម្ចីពិសេសនេះក្នុងដំណាក់កាលដែលម្ចាស់អាជីវកម្ម និងសហគ្រាសរងទុក្ខនេះ និងត្រូវការបំផុត ប្រាកដណាស់គ្រឹះស្ថានហិរញ្ញវត្ថុនោះនឹងដក់ជាប់បេះដូងអតិថិជនជាអ្នកខ្ចី ដែលនឹងធ្វើឱ្យគាត់ដកហរទ័យមិនបានពីគ្រឹះស្ថាននោះ

ប្រាកដណាស់ ការបញ្ចេញ​ប្រាក់កម្ចីទៅឱ្យអាជីវកម្មដែលជួបនឹងបញ្ហាក្នុងដំណាក់កាលនេះគឺប្រាកដជាមានហានិភ័យដល់គ្រឹះស្ថានដែលផ្តល់ប្រាក់កម្ចីនោះ។ ប៉ុន្តែ ប្រសិនបើអាចមានបង្កើតគណៈកម្មការផ្តល់កម្ចីពិសេសនេះជូនដល់ម្ចាស់អាជីវកម្ម និងសហគ្រាសដែលសាកសម​នឹងទទួលបានដោយការសិក្សា​លម្អិតនិងហ្មត់ចត់នោះ ហានិយភ័យ​នឹងអាច​កាត់បន្ថយបានកម្រិតខ្ពស់ ព្រោះថា អាជីវកម្មមិនតិចទេដែលឈឺរយៈពេលខ្លីក្នុងពេលមានវិបត្តិ ហើយនឹងជាវិញបន្ទាប់ពីស្ថានការណ៍ប្រែមកប្រសើរឡើងវិញ។ ហើយគ្រឹះស្ថានដែលអាចបំពេញភារកិច្ចនេះបានល្អ និងអាចសាងកេរ្តិ៍ឈ្មោះយ៉ាងល្អជាងការចំណាយលើការធ្វើទីផ្សារបែបប្រពៃណីទៅទៀត។ ខ្ញុំជួបមិនតិចទេនូវម្ចាស់អាជីវកម្មជាច្រើនដែលបន្តយកជ្រើសរើសសេវាពីគ្រឹះស្ថានផ្តល់កម្ចីហិរញ្ញវត្ថុមួយដោយសារតែមនោសញ្ចេតនាដែលគ្រឹះស្ថាននោះធ្លាប់ជួយគាត់នៅពេលដែលគាត់ត្រូវការ ទោះបីជាដៃគូប្រកួតប្រជែងនោះមានអាត្រាការប្រាក់ទាបជាងក៏ដោយ។ ​ក្នុងករណីមិនមានគ្រឹះស្ថានណាមួយផ្តល់កញ្ចប់ពិសេសនេះ លទ្ធផលដែលអាចនឹងកើតមានគឺឥទ្ធិពលដូមីណូ ដែលនឹងប៉ះតៗគ្នា ព្រោះថាសេដ្ឋកិច្ចបច្ចុប្បន្ននេះគឺមានភាពស្មុគស្មាញ និងពឹងពាក់គ្នាទៅវិញទៅមក ហើយបើរងប៉ះពាល់មួយ ស្ថាប័នផ្សេងក៏ចៀសមិនរួចផងដែរ។