អ្វីនឹងកើតឡើងចំពោះគណនី និងកម្មសិទ្ធិឌីជីតាល់ក្រោយមរណភាព ?

911

តើ​អ្នក​មាន​ដែល​ចំណាញ​ពេល​សញ្ជឹង​គិត​អំពី​បណ្តាំ​មរតក​ដែរ​ឬទេ ? វា​ហាក់ដូចជា​នៅ​ឆ្ងាយ​អនេក តែសាក​គិត​ទៅ​មើល នៅ​ពេល​ដែល​អ្នក​គិត​ចង់សរសេរ​បណ្តាំ​មរតក​នោះ​ តើ​អ្នក​នឹង​បញ្ចូល​អ្វី​ខ្លះ ?

ទ្រព្យឌីជីតាល់ក្រោយស្លាប់
ខ្មោច​ឌីជីតាល់!

​នៅ​ពេល​​នោះ​ ​យើងតែង​​គិត​ដល់សារ​សម្រាប់​សមាជិក​គ្រួសារ​ និង​អ្នក​ជា​ទី​ស្រលាញ់​រួម​ជា​មួយ​​ទ្រព្យ​សម្បត្តិ​ដែល​យើង​មាន​ គឺ​យើង​គិត​ដល់​ទ្រព្យ​រូបី​ ដូចជា​ប្រាក់​ អចលនទ្រព្យ​ សម្ភារៈ​ផ្សេងៗ​ជាដើម ។

ចុះ​​ទ្រព្យ​អរូបី និង​កម្មសិទ្ធិ​ទាំងឡាយ​លើ​បណ្តាញ​អ៊ិនធើណិត​ ? យើង​ប្រើប្រាស់​បណ្តាញ​អ៊ិនធើណិត​ជា​ប្រចាំ ហើយ​អាច​សម្រាច់​ប្រតិបត្តិការ​នានា​ដូចជា​ផ្ញើរ​សារ​អេឡិចត្រូនិក ចូល​ក្នុង​បណ្តាញ​សង្គមមាន​ហ្វេសប៊ុក ធ្វីតធ័រ ហ្វ្លីកឃ័រ ឬ​យូធូបចែករំលែក​ឯកសារ ពត៌មាន រូបថត និង​វីដេអូ​ ឬក៏​ធ្វើការ​លើ​បណ្តាយ​អាជីវកម្ម​ និង​គណនី​ជួញដូរ​លើ​អ៊ិនធើណិត ​ដោយ​ទាំងនេះ​ចំណាយ​រយៈពេល​យ៉ាង​ខ្លី​ ដូចនេះ​ទើប​យើង​ជាទូទៅ​មិន​គិតគូរ​ខ្លាំង​ថា​ពេល​ឆ្ងាយ​ទៅមុខទៀត​ វត្ថុ​កម្មសិទ្ធិទាំង​នោះ​នឹង​ទៅជា​យ៉ាងណា​ឡើយ ។

ច្បាស់​ណាស់​ថា​គ្រប់​ក្រុមហ៊ុន​ប្រព័ន្ធ​ទាំង​នេះ​ដាក់​ការ​រក្សា​ការ​សម្ងាត់​របស់​អតិថិជន​ជា​ចម្បង ។ តែ​គណនី និង​ការ​សម្ងាត់​ទាំង​នេះ​នឹង​ក្លាយ​ទៅ​ជា​យ៉ាងណា​នៅ​ពេល​ដែល​ម្ចាស់​គណនី​នៃ​បណ្តាញ​ទាំងនោះ​ទទួល​​មរណៈភាព​ទៅ ? ទាំង​នេះ​កាន់​តែ​មាន​ភាព​សាំញ៉ាំ​ទៅទៀត​ប្រសិន​បើ​វា​ស្ឋិត​នៅ​លើ​បណ្តាញ​​ខ្លោត(Cloud Storage)​ ។ នេះ​គឺ​ជា​ប្រធាន​បទ​មួយ​ថ្មី​ដែល​កំពុង​ចោទឡើង​នា​ឯ​បស្ចិមប្រទេស ហើយ​ក៏​នឹង​ទទួល​ការ​ចាប់​អារម្មណ៍​ជា​បន្តបន្ទាប់ដែរ​នា​បូព៌ា​ប្រទេស​ក៏ដូចជា​ប្រទេស​កម្ពុជា​យើង ។

ហេតុការណ៍​មួយចំនួនកើតឡើង​​ ​កាន់​តែ​ធ្វើ​ឲ្យ​វា​ក្លាយ​ជាប្រធានបទ​ក្តៅ​កគុក ។ នោះ​គឺ​ពេល​ដែល​ឳពុក​ម្តាយ​​កូនទាហាន​ម៉ារីន​អាមេរិក​ម្នាក់​​ដែល​ស្លាប់​នៅ​ក្នុង​សមរភូមិ​ត្រូវ​ឡើង​រហូត​ដល់​តុលាការ​ ដើម្បី​គ្រាន់តែ​អាច​ចូល​ក្នុង​គណនី​សារ​អេឡិចត្រូនិក​របស់​កូន​ពួក​​គាត់​បាន ។ ឯ​ហេតុ​មួយ​ទៀត​គឺ​បុគ្គល​ម្នាក់​បាន​ស្លាប់​ដោយ​ការ​ប្រើប្រាស់​គ្រឿងញៀន​ហួស​ប្រមាណ ហើយ​ត្រូវ​បាន​អ្នក​ដែល​ស្គាល់​សរសេរឲ្យយោបល់​ បក​អាក្រាត​ តិះដៀល​យ៉ាង​ចាស់​ដៃ​ដាក់​លើ​ទំព័រ​ហ្វេសប៊ុក​របស់គាត់ ។ អ្នក​គិត​មើល​ថា​សមាជិក​គ្រួសារ​រង​ទុក្ខសោក​ និង​ការ​អាម៉ាស់​យ៉ាង​ណា​ ដែល​ត្រូវ​ចំណាយ​ពេល​ជា​ច្រើន​សប្តាហ៍​ទំរាំ​​​ពួកគាត់​​អាច​ដាក់​ពាក្យសុំ​​ និង​អាច​បិទ​គណនី​មួយនោះ​បាន​ ។

ឯកសារ និងកម្មសិទ្ធិលើបណ្តាញ

ចុះ​បើ​គេ​ម្នាក់​ជា​អ្នកគ្រប់គ្រង​គេហទំព័រ​ ឬ​ឃ្លាំងទិន្នន័យដាតាបេស​ដែល​មាន​សារៈសំខាន់ចំពោះ​ដំណើរការក្រុមហ៊ុន ឬ​សភាព​​គ្រួសារ​ តែ​សំណាង​អាក្រក់​គាត់​ជួប​ឧប្បតិ្តវហេតុ​ស្លាប់​បាត់​បង់​ជីវិត​ ហើយ​គ្មាន​នរណា​ផ្សេង​ដឹង​អំពី​កូដ​សម្ងាត់​នៃ​ប្រព័ន្ធ​ទាំង​នោះ​ឡើយ ។ ពេលនេះ​ការ​រក្សា​ទុក​ និង​ការប្រាប់​កូដសម្ងាត់​ដល់​អ្នក​តំណាង​ម្នាក់​ពិត​មាន​សារៈសំខាន់​យ៉ាង​ខ្លាំង ។ ដោយ​ហេតុនេះ​ហើយ​ទើប​មាន​ក្រុមហ៊ុន​មួយ​បែប​ថ្មី​ចាប់កំណើតឡើង​ សម្រាប់​ផ្តល់​សេវាកម្ម​បង្កើត​​វិធាន​ការ និង​ផ្តល់​ជា​ជម្រើស​ដល់​អតិថិជន​ក្នុង​​ការ​គ្រប់គ្រង​ទិន្នន័យ និង​គណនី​​​ក្រោយ​ពេល​​ស្លាប់​ ដោយ​មាន​ជម្រើស​ឥត​គិត​ថ្លៃ​ និង​បង់​ប្រាក់​ ។ គេ​ក៏​បាន​បង្កើត​គំនិត​​ចាត់​ “អ្នក​ប្រតិបត្តិន៍​ឌីជីតាល់”​ ជាអ្នក​ដែល​ខ្លួន​ទុក​ចិត្ត​ឲ្យមាន​សិទ្ធិ​ចូល​ក្នុង​គណនី​ផ្សេងៗ និង​អនុវត្ត​​តាម​ដែល​ម្ចាស់​នោះ​ចង់​បាន​នៅ​ពេលគេ​ស្លាប់ ថា​អ្វី​ត្រូវ​លុបចោល អ្វី​ត្រូវ​ឋិតនៅ​ដដែល ។ ទាំង​នេះ​សុទ្ធ​តែ​​ថ្មីដែល​កាល​ពី​ ៣ឆ្នាំ​មុន​ត្រូវ​បាន​មហាជន​សើច​លេប​ខាយដាក់ តែ​ត្រូវ​បាន​ទទួល​ស្គាល់​ថា​មាន​តម្លៃ​បន្តិច​ម្តងៗ​នា​ពេល​បច្ចុប្បន្ន ។

ឧទាហរណ៍​មួយ​ចំនួន​នៃ​ជំហាន​ដែល​បណ្ដាញ​​សង្គម​ល្បីៗ​អនុវត្ត​ពេល​មាន​អ្នក​ប្រើប្រាស់​ស្លាប់​បាត់បង់ជីវិត ៖

ហ្វេសប៊ុក៖ ទទួល​យក​សំណូមពរ​របស់​គ្រួសារ​អ្នកស្លាប់​ក្នុង​ការ​បិទ ឬ​ទុកប្រូហ្វីល​ជា “ការរំលឹក”​ ដល់​អ្នល​ស្លាប់​គ្រាន់​ជា​ទី​សម្រាប់​មិត្ត​សរសេរ​សេចក្ដី​នឹក​រលឹក និង​ចែករំលែក​ទុក្ខសោក ដោយ​បិទ​ផ្នែក​មួយ​ចំនួន​ដូចជា​បច្ចុប្បន្នកាលកម្ម​ស្តេធឺស​ជាដើម​ ។ គេ​ត្រូវ​បង្ហាញ​អត្តសញ្ញាណ និង​លិខិត​មរណៈភាព ។​

គណនីហ្វេសប៊ុកក្រោយមរណភាព

ជីម៉ែល និង​យូធូប​៖ ក្រុម​ការងារ​ហ្គូហ្គល​នឹង​ចូលរួម​ចែក​រំលែក​ទុក្ខ តែ​មិន​ធានា​ថា​នឹង​ផ្តល់​សិទ្ធិ​ចូល​ទៅ​ក្នុង​គណនីអ្នកស្លាប់​ឡើយ ។ ឯកសារ​ប្រហាក់​ប្រហែល​នឹង​ខាងលើ​ក៏​ត្រូវការ​ដែរ រួមថែមអាស័យដ្ឋាន​អ៊ីម៉ែលរបស់​អ្នក​ស្នើរ និង​អ្នក​ដែល​បាន​ស្លាប់ និង​លក្ខណៈលំអិត​នៃ​គណនី​នោះ​។

ហត់​ម៉ែល​៖ អាច​ផ្តល់​នូវ​ចម្លង​នៃ​អ៊ីម៉ែល​ទាំង​អស់​របស់​អ្នក​ស្លាប់​ជា​ថាស​ស៊ីឌី ក្រោម​ការ​ប្រកាស​អំពី​ទំនាក់ទំនងជាមួយ​អ្នក​ស្លាប់ និង​លិខិត​ផ្តល់សិទ្ធិ​តាមផ្លូវ​ច្បាប់ ។

ទោះ​ជា​យ៉ាងណា​ក្តី​ មេធាវី​ល្បី​ៗ​ជាច្រើន​បាន​ផ្តល់​ជា​ដំបូន្នាន​ដល់​ការ​រក្សាទុក​ និង​បន្ទេរ​នៃ​កូដ​សម្ងាត់​នានា​ ជាច្រើន​បែប​យ៉ាង ដោយ​រួម​មាន​ការ​សរសេរ​កូដ​គណនី​ឌីជីតាល់​ ពាក្យសម្ងាត់ សំណួរ​សុវត្ថិភាព​ទាំងនេះ​ក្នុង​បណ្តាំ​មរតក​តាម​បែប​បុរាណដល់​មនុស្ស​ដែល​ទុកចិត្ត និង​ការប្រើប្រាស់​សេវាកម្ម​ក្រុមហ៊ុន​គ្រប់គ្រង​បណ្ដាំ​ឌីជីតាល់ជាដើម ។

ដែល​ប្លែក​ខុស​ពី​ធម្មតា​ទាំង​នេះ​គឺ​ «គំនិត» ចង់​ចែក​រំលែក​ជូន​ប្រិយមិត្ត​គ្រាន់​ជា​ការ​រិះគិត​ប្រចាំ​សប្តាហ៍​ ។​ ចុះ​​អ្នក​វិញ​គិត​យ៉ាង​ណា​ដែរ​ចំពោះ​ប្រធាន​បទ​មួយនេះ ។

 

ឯកសារ​យោង៖

http://www.theage.com.au/digital-life/digital-life-news/what-happens-to-your-facebook-when-you-die-20111220-1p3b3.html

http://www.metro.co.uk/news/newsfocus/892795-what-happens-to-your-online-life-after-you-die

http://www.time.com/time/specials/packages/article/0,28804,1920156_1920150_1920148,00.html

http://www.nj.com/cumberland/index.ssf/2012/03/what_happens_to_your_facebook.html

http://bucks.blogs.nytimes.com/2011/01/20/managing-online-accounts-after-death/

ដកស្រង់​ថ្ងៃទី ០១​ ខែមេសា ឆ្នាំ២០១២

Previous articleតើ​មនុស្ស​យើង​ប្រិចភ្នែក​ប៉ុន្មាន​ដង​ក្នុង​១ថ្ងៃ?
Next articleតើផ្លែដូងមានសារៈប្រយោជន៍អ្វីខ្លះនៅក្នុងវេជ្ជសាស្ត្រ?
លោក ហាក់គីមថុង គឺជា ស្ថាបនិក និងនាយក KUMNIT CREATIVE ដែលជា ស្ថាប័ន ផ្តល់សេវាកម្ម និងវគ្គសិក្សាយុទ្ធសាស្ត្រអាជីវកម្មសម័យទំនើប (Digital Marketing) ជាសហស្ថាបនិកគេហទំព័រគំនិត និង​ជា​ប្រធាន​ទីផ្សារ​របសក្រុមហ៊ុនអចលនទ្រព្យ​Century 21 Dream Property។ គាត់ មាន បទពិសោធន៍ការងារជាច្រើន ទាំង​ក្នុង​និង​ក្រៅប្រទេស​ទាក់ទង​ នឹង​វិស័យ​អចលនទ្រព្យ សិក្សា​​ស្រាវជ្រាវ​​ទីផ្សារ​ អាហារ​និង​ភោជនីយដ្ឋាន គ្រឿង​សម្អាង​ និង​ Retail ព្រមទាំង​​ជា​​អ្នក​ប្រឹក្សា​យុទ្ធសាស្ត្រ​អាជីវកម្ម​សម្រាប់​ក្រុមហ៊ុន​មួយចំនួន​ផងដែរ។  គាត់បានចុះកម្មសិក្សា នៅតាមបណ្តាក្រុមហ៊ុនផ្សេងៗ ទាំងក្នុង និងក្រៅប្រទេស ធ្លាប់ចូលរួមកម្មវិធីផ្លាស់ប្តូរវប្បធម៌ សិក្ខាសាលាធុរកិច្ច និង ធ្វើដំណើរ កម្សាន្ដ ទៅប្រទេស​ក្រៅជាច្រើន ដែលនេះសុទ្ធតែជាបទពិសោធ មួយដ៏ល្អសម្រាប់ចែករំលែក និងធ្វើការផ្សព្វផ្សាយបន្ត។