ផែនការអាជីវកម្ម គឺជាឯកសារដែលសរសេររៀបរាប់លម្អិតអំពីរបៀបចាប់ផ្ដើមអាជីវកម្ម គោលដៅ និងយុទ្ធសាស្ត្ររបស់ក្រុមហ៊ុនដើម្បីធ្វើឱ្យសម្រេចបាននូវគោលដៅនោះ។ ហើយវាត្រូវបានគេចាត់ទុកថាជា “ប្លង់មេនៃអាជីវកម្ម” ពីព្រោះវាសង្ខេបទិដ្ឋភាពសំខាន់ៗទាំងអស់របស់ក្រុមហ៊ុន ដូចជាហិរញ្ញវត្ថុ ទីផ្សារ និងប្រតិបត្តិការទាំងមូលនៅក្នុងក្រុមហ៊ុន។
ផ្នែកសំខាន់ៗនៅក្នុងផែនការអាជីវកម្ម រួមមានសង្ខេបប្រតិបត្តិ ការពិពណ៌នាអាជីវកម្ម ការវិភាគទីផ្សារ ពណ៌នាពីផលិតផល និងសេវាកម្ម យុទ្ធសាស្ត្រទីផ្សារ ផែនការទីផ្សារ ប្រតិបត្តិការ និងការគ្រប់គ្រង ផែនការហិរញ្ញវត្ថុ។
បន្ថែមពីនេះ ម្ចាស់អាជីវកម្មដែលត្រៀមនឹងចាប់ផ្ដើមអាជីវកម្ម ភាគច្រើនច្បាស់ជាមានចម្ងល់ច្រើនថាតើហេតុអ្វីចាំបាច់ត្រូវមានផែនការអាជីវកម្ម? ចុះបើមិនមានផែនការអាជីវកម្មវិញ តើនឹងមានគុណវិបត្តិអ្វី? ហេតុដូចនេះ ខ្លឹមសារខាងក្រោមនឹងបង្ហាញអំពីគុណសម្បត្តិសំខាន់ៗនៃការមានផែនការអាជីវកម្ម និងគុណវិបត្តិមួយចំនួនប្រសិនបើអ្នកមិនមានផែនការអាជីវកម្មវិញ។
គុណសម្បត្តិនៃការមានផែនការអាជីវកម្ម
- ប្រៀបដូចជាមានផែនការទីបង្ហាញផ្លូវពីមួយជំហានទៅមួយជំហានយ៉ាងជាក់លាក់ ដើម្បីដំណើរការអាជីវកម្មឱ្យទទួលបានភាពជោគជ័យស្របតាមគោលដៅដែលបានកំណត់។
- បង្កើនភាពច្បាស់លាស់លើដំណើរការធ្វើការសម្រេចចិត្តទាក់ទងនឹងទិដ្ឋភាពសំខាន់ៗនៃអាជីវកម្មដូចជាការវិនិយោគដើមទុន ការកំណត់ហិរញ្ញវត្ថុដែលត្រូវការចាំបាច់ ការជួល ការពង្រីក និងផ្សេងៗទៀត។
- បង្កើតឱ្យមានផែនទីបង្ហាញផ្លូវច្បាស់លើផ្នែកទីផ្សារ ដោយជួយកំណត់ទីផ្សារគោលដៅ អតិថិជនគោលដៅ និងរបៀបដែលអ្នកនឹងផ្សព្វផ្សាយឱ្យកាន់តែត្រឹមត្រូវលើផលិតផលឬសេវាកម្មរបស់អ្នក។
- បង្កើតឱ្យមានភាពងាយស្រួលក្នុងការស្វែងរកដើមទុន មិនថាស្វែងរកនៅធនាគារ ឬពីវិនិយោគិនណានោះឡើយ។
- ជំរុញឱ្យមានការបង្កើតប្រាក់ចំណូល និងប្រាក់ចំណេញដល់ក្រុមហ៊ុនបានញឹកញាប់ ជាពិសេសធ្វើឱ្យការគ្រប់គ្រងចរន្តសាច់ប្រាក់ក្នុងដំណើរការអាជីវកម្មបានល្អ។
- ជួយឱ្យស្គាល់ពីអាជីវកម្មខ្លួនឯងច្បាស់ ទាំងគោលដៅអាជីវកម្ម អតិថិជនគោលដៅ ទីផ្សារគោលដៅ ដៃគូប្រកួតប្រជែង និងជាច្រើនទៀត ដើម្បីងាយស្រួលវាយលុកក្នុងទីផ្សារ។
គុណវិបត្តិនៃការមិនមានផែនការអាជីវកម្ម
- ពិបាកពង្រីកអាជីវកម្មឱ្យកាន់តែធំនាពេលអនាគត ជាពិសេសពិបាកស្វែងរកដើមទុនពីវិនិយោគិននានាទាំងក្នុងស្រុក និងក្រៅស្រុក។
- ពិបាកបត់បែន ព្រមទាំងងាយទទួលរងនូវហានិភ័យខ្ពស់ ដូចជាជាប់គាំងសាច់ប្រាក់ភ្លាមៗ ពិបាកវាយលុកក្នុងទីផ្សារឱ្យចំគោលដៅ និងពិបាកដោះស្រាយបញ្ហានានាដែលកើតឡើងដោយគ្មានការគ្រោងទុកមុន។
- ត្រូវចំណាយរយៈពេលវែងដើម្បីអាចសម្រេចនូវគោលដៅដែលក្រុមហ៊ុនចង់បាន ជាពិសេសអ្នកត្រូវមានភាពស្រេ្តសច្រើន។
