ការដាក់តម្លៃផលិតផលឲ្យបានត្រឹមត្រូវគឺជាការបង្កើតតុល្យការសម្រាប់អាជីវកម្ម។ ការដាក់តម្លៃទាបមិនមែនជាវិធីសាស្រ្តល្អបំផុតទេ ទោះបីជាចំនួននៃការលក់មានច្រើនប៉ុន្តែអាចនឹងមិនចំណេញប៉ុន្មានទេ។ ដូចគ្នាដែរ ចំពោះការដាក់តម្លៃខ្ពស់អាចមានចំនួនលក់តិច ហើយជម្រុះចេញ “អតិថិជនដែលការចំណាយមានកំណត់” ដូច្នេះនាំឲ្យបាត់បង់ចំណែកទីផ្សារខ្លះ។
ភាគមុនយើងបានមើលទៅលើវិធីសាស្ត្រ ចំនួន៣ ដែលមានដូចជា”ការជ្រើសរើសយុទ្ធសាស្រ្តតម្លៃដែលត្រឹមត្រូវ” “តម្លៃលក់រាយចេញដោយរោងចក្រផលិត MSRP” និង “ការដាក់តម្លៃ ឃីស្តូន (Keystone pricing)” រួមទាំងគុណសម្បត្តិនិងគុណវិបត្តិនៃការដាក់តម្លៃនីមួយៗ។ ថ្ងៃនេះយើងបន្តជាមួយវិធីសាស្រ្ត2ទៀត។
៤/ តម្លៃជាឈុត (bundle pricing)
អ្នកប្រាកដជាបានឃើញយុទ្ធសាស្រ្តនេះប្រើក្នុងហាងច្រើននៅក្នុងផ្សារទំនើប។ ទូទៅគេប្រើវាច្រើនទៅលើផលិតផលសម្លៀកបំពាក់ ដូចជាស្រោមជើង ខោអាវក្នុង និងក្នុងហាងអាហារ ជាដើម។ ជាមួយវិធីសាស្រ្តនេះ ហាងអាចលក់ទំនិញបានច្រើនមុខក្នុងការទិញម្តងរបស់អតិថិជន ។
គុណសម្បត្តិ៖ យុទ្ធសាស្រ្តនេះជួយបង្កើនតម្លៃផលិតផលនិងកាត់បន្ថយតម្លៃទំនិញមួយមុខៗ សម្រាប់អតិថិជន។ ដូច្នេះនាំឲ្យ ចំនួនការលក់ បានច្រើន។
គុណវិបត្តិ៖ ពេលអ្នកចាប់ផលិតផលដាក់លក់ជាឈុតបែបនេះ ការលក់ទំនិញមួយៗដោយឡែកៗ នឹងពិបាកដោយសារតម្លៃថ្លៃជាងឈុត។
៥/បញ្ចុះតម្លៃ
អ្នកលក់ណាមិនដឹងថា អតិថិជនស្រលាញ់ ការលក់បញ្ចុះតម្លៃ មែនទេ? ហ្នឹងហើយទើប ការបញ្ចុះតម្លៃគឺជាយុទ្ធសាស្រ្តកំពូល សម្រាប់អាជីវកម្មលក់រាយសឹងគ្រប់វិស័យទាំងអស់។ វីធីនេះផ្តល់ប្រយោជន៍ច្រើនសម្រាប់ហាង ដូចជាការកើនឡើងចំនួនអតិថិជនមកហាងផ្ទាល់ បញ្ចេញស្តុកចាស់ និងទាក់ទាញក្រុម “អតិថិជនដែលការចំណាយមានកំណត់”។
គុណសម្បត្តិ៖ មានប្រសិទ្ធភាពក្នុងការទាញអតិថិជនមកកាន់ហាងនិងបញ្ចេញស្តុកចាស់។
គុណវិបត្តិ៖ ប្រសិនបើប្រើញឹកញាប់ពេក អតិថិជននឹងមិនទិញពេលដែលគ្មានកម្មវិធីបញ្ចុះតម្លៃ។
សូមអរគុណសម្រាប់ការតាមដានសិក្សាស្វែងយល់អំពីយុទ្ធសាស្រ្តដាក់តម្លៃ។ ភាគបន្តយើងនឹងមើលទៅលើយុទ្ធសាស្រ្ត “ដាក់តម្លៃបែបចិត្តសាស្រ្ត” “តម្លៃប្រជែងគ្នា (Competitive pricing)” “តម្លៃថ្លៃដាច់គេ (Premium pricing)” និង “តម្លៃយុទ្ធការ (Anchor pricing)”។
សូមរង់ចាំតាមដានអានទាំងអស់គ្នាចាស!
