ការវិនិយោគអចលនវត្ថុ នៅពេលដែលឮពាក្យនេះ ខ្ញុំជឿជាក់ថា អ្នកនឹងគិតដល់ការទិញដីទុកចំណេញ ទុកជួលធ្វើឃ្លាំង សាងសង់អាគារ សាងសង់ខុនដូ សាងសង់ផ្ទះអាជីវកម្ម ឬក៏មជ្ឈមណ្ឌលពាណិជ្ជកម្មជាដើម។ ប៉ុន្តែ នាសម័យកាលឌីជីថលនេះ ការវិនិយោគអចលនវត្ថុក៏ចាប់ផ្តើមមានការវិវឌ្ឍផងដែរ ដោយបច្ចុប្បននេះ ការវិនិយោគអចលនវត្ថុដើម្បីធ្វើជាទីន្លែងអភិវឌ្ឍមជ្ឈមណ្ឌលទិន្នន័យគឺចាប់ផ្តើមមានភាពទាក់ទាញ។
មជ្ឈមណ្ឌលទិន្នន័យគឺជាការវិនិយោគអចលនទ្រព្យថ្មី និងទាក់ទាញដែលកំពុងទទួលបានប្រជាប្រិយភាព និងការចាប់អារម្មណ៍។ នេះគឺដោយសារតែតម្រូវការកើនឡើងឥតឈប់ឈរសម្រាប់កន្លែងផ្ទុកឌីជីថល ជាពិសេសសម្រាប់បច្ចេកវិទ្យា AIដែលត្រូវការទិន្នន័យធំ និងថាមពលដើម្បីដំណើរការខ្ពស់ ដែលជំរុញឱ្យមានតម្រូវការសម្រាប់មជ្ឈមណ្ឌលទិន្នន័យកើនឡើងកាន់តែច្រើន។
នេះគឺជាទំនោររបស់ពិភពលោកថ្មី ជាពិសេសនៅសហរដ្ឋអាមេរិកដែលជាទីតាំងដ៏ធំមួយសម្រាប់មជ្ឈមណ្ឌលទិន្នន័យភាគច្រើនរបស់ពិភពលោក។ ក្រុមហ៊ុនបច្ចេកវិទ្យាយក្សដូចជា Amazon និង Microsoft កំពុងវិនិយោគរាប់ពាន់លានដុល្លារក្នុងការសាងសង់មជ្ឈមណ្ឌលទិន្នន័យថ្មី។ ទំនោរនេះគឺដោយសារតែការកើនឡើងគួរឱ្យកត់សម្គាល់នៃតម្រូវការសម្រាប់មជ្ឈមណ្ឌលទិន្នន័យ ដែលជំរុញឱ្យតម្លៃអចលនវត្ថុប្រភេទនេះកើនឡើង និងធ្វើឱ្យមជ្ឈមណ្ឌលទិន្នន័យក្លាយជាការវិនិយោគដ៏គួរឱ្យទាក់ទាញ។
ហេតុអ្វីបានជាមជ្ឈមណ្ឌលទិន្នន័យគឺជាការវិនិយោគដ៏ល្អ
មានហេតុផលមួយចំនួនដែលមជ្ឈមណ្ឌលទិន្នន័យគឺជាការវិនិយោគដ៏ល្អ៖
តម្រូវការខ្ពស់៖ តម្រូវការសម្រាប់ទំហំមជ្ឈមណ្ឌលទិន្នន័យគឺធំធេងណាស់ ហើយមិនមានសញ្ញាណាមួយដែលបង្ហាញថាថយចុះនោះទេ។ នេះគឺដោយសារតែការបន្តរីកចម្រើននៃទិន្នន័យឌីជីថល ក៏ដូចជាការកើនឡើងនៃការប្រើប្រាស់ cloud computing និងបច្ចេកវិទ្យាផ្សេងទៀតដែលត្រូវការមជ្ឈមណ្ឌលទិន្នន័យ។
ប្រាក់ចំណូលមានស្ថេរភាព៖ មជ្ឈមណ្ឌលទិន្នន័យគឺជាការវិនិយោគដែលមានស្ថេរភាព។ នេះគឺដោយសារតែវាអាចបង្កើតលំហូរសាច់ប្រាក់ដែលអាចព្យាករណ៍បានពីការជួលរយៈពេលវែង។
ការធ្វើពិពិធកម្ម៖ មជ្ឈមណ្ឌលទិន្នន័យអាចជួយធ្វើពិពិធកម្មផលប័ត្រវិនិយោគរបស់អ្នក។ ពួកគេជាប្រភេទទ្រព្យសកម្មខុសពីការវិនិយោគអចលនទ្រព្យបែបប្រពៃណី ដូចជាអគារការិយាល័យ និងអាផាតមិន។
ប៉ុន្តែ ការវិនិយោគសម្រាប់កសាងមជ្ឈមណ្ឌលទិន្នន័យនេះ គឺមានតម្លៃថ្លៃ ដែលអ្នកធម្មតាពិបាកនឹងប្រឡូកចូលក្នុងវិស័យនេះខ្លាំងណាស់។ ម្យ៉ាងទៀត ដើម្បីអាចកសាងមជ្ឈមណ្ឌនេះបាន គឺត្រូវការដីនៅជិតទីតាំងដែលអាចផ្តល់កម្លាំងថាមពលពលអគ្គិសនីដែលមានទំហំធំទើបអាចសម្រេចទៅបាន។
សម្រាប់នៅកម្ពុជាវិញ ទោះបីជាតម្រូវការបែបនេះនៅមិនទាន់មានទីផ្សារក៏ដោយ តែមិនយូរមិនឆាប់ មជ្ឈមណ្ឌលបែបនេះនឹងចាប់ផ្តើមកកើតឡើងដើម្បីឲ្យស្របនឹងសម័យកាលឌីជីថល ដែលមនុស្ស និងស្ថាប័នរស់នៅជាមួយនឹងពិភពទិន្នន័យ។
តើអ្នកគិតថា កម្ពុជានឹងមានទីផ្សារបែបនេះនៅពេលណា?
