លោក Jeff Bezos ស្ថាបនិកក្រុមហ៊ុន Amazon គ្រោងនឹងផ្ដល់ការបរិចា្ចគភាគច្រើននៃទ្រព្យសម្បត្តិសុទ្ធសរុបចំនួន 124 ពាន់លានដុល្លាររបស់គាត់ទៅកាន់អង្គការសប្បុរសធម៌ ដើម្បីក្លាយជាមហាសេដ្ឋីចុងក្រោយគេដែលសន្យាបរិច្ចាគទ្រព្យសម្បត្តិដ៏ច្រើនរបស់គាត់។ ហើយនេះបើយោងតាមកិច្ចសម្ភាសន៍រវាងលោក Bezos ជាមួយសារព័ត៌មាន CNN។ គួរបញ្ជាក់ផងដែរថា នេះជាលើកដំបូងដែល Bezos បានប្រកាសថាគាត់គ្រោងនឹងផ្តល់ប្រាក់ភាគច្រើនរបស់គាត់។
កាលពីប៉ុន្មានឆ្នាំមុន លោក Bezos ត្រូវបានគេរិះគន់យ៉ាងខ្លាំងដោយសារការមិនចុះហត្ថលេខានៅលើ Giving Pledge ដែលជាយុទ្ធនាការដែលធ្វើឡើងដោយ Bill Gates, Melinda French Gates និងWarren Buffet ដើម្បីលើកទឹកចិត្តមហាសេដ្ឋីទាំងអស់ឱ្យបរិច្ចាគទ្រព្យសម្បត្តិភាគច្រើនរបស់ពួកគេ។
ទោះបីជាយ៉ាងនេះក្ដី នៅក្នុងឆ្នាំ 2022 នេះ លោក Bezos ជាមួយនឹងមិត្តស្រីរបស់គាត់ បានសម្រេចចិត្តបរិច្ចាគទ្រព្យសម្បត្តិភាគច្រើនទៅកាន់អង្គការសប្បុរសធម៌ ដោយផ្ដោតលើការទប់ទល់នឹងការប្រែប្រួលអាកាសធាតុ និងផ្ដល់ប្រាក់ដល់អ្នកដែលគាំទ្រក្នុងការជួយដល់មនុស្សជាតិ តាមរយៈការផ្តល់ពានរង្វាន់ Bezos Courage និង Civility Award។
ការបរិចា្ចគនេះ Jeff Bezos ក៏បានប្រកាសបញ្ជាក់ដែរថាគាត់នឹងបរិច្ចាគ 100 លានដុល្លារដល់ អ្នកនាងDolly Parton ដែលជាតារាចម្រៀង និងសប្បុរសជន ដើម្បីផ្តល់ឱ្យទៅក្រុមសប្បុរសធម៌ដែលនាងជ្រើសរើស ឬពេញចិត្ត។ Bezos បានចែករំលែកព័ត៌មាន និងវីដេអូខ្លីមួយនៅលើ Twitter កាលពីថ្ងៃសៅរ៍ ទី12 ខែវិច្ឆិកានេះនៃព្រឹត្តិការណ៍មួយដែលគាត់ និងដៃគូរបស់គាត់ Lauren Sanchez បានផ្តល់ពានរង្វាន់ Bezos Courage និង Civility Award ឆ្នាំ 2022 ដល់អ្នកនាង Parton។
Dolly Parton ត្រូវបានគេស្គាល់ជាច្រើនតាមរយៈការងារសប្បុរសធម៌របស់នាង ដូចជាការជួយបង្កើតវ៉ាក់សាំងរបស់ Moderna សម្រាប់ COVID-19 និងបង្កើតមូលនិធិ Dollywood ដែលជាអង្គការសប្បុរសធម៌សាធារណៈ។
