មួយរយៈចុងក្រោយនេះ យើងឃើញមានប្រជាជនមិនតិចទេដែលទទួលរងជាជនរងគ្រោះដោយសារតែមិនសូវយល់ច្បាស់ពីហានិភ័យដែលអាចកើតមានឡើងពីការវិនិយោគ ឬក៏ឈរឈ្មោះឲ្យគេដើម្បីទទួលបានប្រាក់កម្រៃបន្តិចបន្តួចជាថ្នូរ។ នៅលើបណ្តាញសង្គមរបស់ លោក ង៉ែតជូ ជាអ្នកជំនាញហិរញ្ញវត្ថុជាន់ខ្ពស់ និងជាអ្នកវិនិយោគ និងជាស្ថាបនិកក្រុមហ៊ុន F.I Vision Capital បានលើកឡើងអំពីប្រការ៣យ៉ាងដែលជាហានិភ័យហិរញ្ញវត្ថុ គួរចៀសវាងចំពោះកម្ចីធនាគារ ដែលអាចឲ្យអ្នកជួបគ្រោះថ្នាក់ដល់ខ្លួនសម្រាប់ចែករំលែកអ្នកទាំងអស់គ្នាឲ្យប្រយ័ត្នប្រយែង៖
១) យកប្លង់ដី ឬប្លង់ផ្ទះទៅបញ្ចាំធនាគារជំនួសអ្នកដទៃហើយយល់ថាខ្លួនឯងឆ្លាតព្រោះគេផ្តល់ផលប្រយោជន៍ជាកំរៃជាដើម។
២) ខ្ចីប្រាក់ធនាគារដើម្បីយកមកចែកគ្នាប្រើ ឬចងការប្រាក់បន្តជាមួយអ្នកដទៃដើម្បីបានការប្រាក់ខ្ពស់។
៣) ចុះកិច្ចសន្យាធានាកម្ចី ឬខ្ចីប្រាក់ជំនួសអ្នកដទៃ។
ថ្មីៗនេះមានអ្នកមិនមានចំណេះដឹងហិរញ្ញវត្ថុ ឬមានចំណេះដឹងតិចតួចជាច្រើននាក់ធ្លាក់ក្នុងហានិភ័យនៃចំនុចទី១ និងទី២។ ពួកគេមិនយល់ពីហានិភ័យ គិតតែពីឱកាសចំណេញ និងគិតថាខ្លួនឯងជាមនុស្សឆ្លាត។
