Facebook បានចូលរួមចំណែកជាច្រើនក្នុងពិភពអាជីវកម្ម និងសហគ្រិនភាព ដោយសារតែបណ្តាញសង្គមយក្សមួយនេះបានផ្តល់ឱកាសឱ្យមនុស្សគ្រប់ៗគ្នា ម្ចាស់អាជីវកម្មគ្រប់ៗគ្នាមិនថាតូចធំ អាចធ្វើការផ្សព្វផ្សាយលើបណ្តាញរបស់ខ្លួនដោយមិនរើសអើង និងអាចចាប់ផ្តើមការចំណាយតិចតួចបំផុត ដែលអនុញ្ញាតិឱ្យអាជីវកម្មតូចៗ និងមធ្យមអាចមានលទ្ធភាពធ្វើការបង្ហាញខ្លួននៅលើទីផ្សារ និងមានប្រសិទ្ធភាពបំផុត។ មិនត្រឹមតែសហគ្រិនប៉ុណ្ណោះទេ សូម្បីតែបុគ្គលមួយចំនួនបានទទួលភាពល្បីល្បាញដោយសារFacebook ហើយអ្នកខ្លះអាចរកចំណូលពីភាពល្បីល្បាញដោយសារការបង្ហោះមាតិការ (ក្លាយជាការងារពេញម៉ោង) ហើយអ្នកខ្លះបានកសាងខ្លួនឱ្យទៅជាជនឥទ្ធមន្ត (Influencer)ទៀតផង។ តើឆ្នាំ២០១៩នេះ ដែលបច្ចុប្បន្នស្ថិតនៅក្នុងឆ្នាំកុរនេះ មានអ្វីខ្លះដែលអាចកើតឡើង?
២០១៩នេះគឺជាឆ្នាំសម្រាប់វីដេអូ
មិនខុសពីឆ្នាំ២០១៨នោះទេ វីដេអូនឹងក្លាយជាមាតិកាដែលពេញនិយម និងមានប្រសិទ្ធភាពបំផុត (អាចទៅដល់មនុស្សច្រើនជាងរូបភាពឬអក្សរ)សម្រាប់ឆ្នាំកុរនេះ។ ហេតុអ្វី? Facebook ចង់ធ្វើការប្រកួតប្រជែងជាមួយនឹង Youtubeដែលជាបណ្តាញមើលវីដេអូធំជាងគេនៅលើពិភពលោក ដូចនេះមិនមានអ្វីចម្លែកទេដែលFacebookចង់លើកទឹកចិត្តអ្នកដែលបង្ហោះវីដែអូ ឬមាតិការជាបែបវីដេអូដើម្បីអាចទទួលបានផលខ្ពស់ជាងប្រភេទមាតិការផ្សេងៗទៀត។ ថ្មីៗនេះអ្នកក៏ប្រហែលជាឃើញការផ្លាស់ប្តូរនៅលើAPP របស់ Facebook ផងដែរដោយមានបន្ថែមប៊ូតុងខាងក្រោមមួយសម្រាប់ផ្តាច់វីដេអូពី Newsfeedសម្រាប់ឱ្យអ្នកប្រើប្រាស់អាចមើលវីដែអូសុទ្ធដាច់ដោយឡែកបាន។
ក៏ប៉ុន្តែ មិនមែនវីដេអូទាំងអស់សុទ្ធតែទទួលបានប្រសិទ្ធភាព និងទទួលបានផលខ្ពស់នោះទេ។ វីដេអូមានលក្ខណៈពាណិជ្ជកម្មសុទ្ធសាធ នឹងនៅតែត្រូវបានគេអូសរំលង ហើយបានផលតិចតួចដោយសារតែអ្នកប្រើប្រាស់បច្ចុប្បន្នមិនចូលចិត្តមើលការផ្សាយពាណិជ្ជកម្មនោះទេ។ ប្រៀបដូចជាយើងកំពុងមើលទូរទ្សន៍អញ្ចឹង នៅពេលដែលដល់ពេលផ្សាយពាណិជ្ជកម្ម យើងនឹងចុចដូរប៉ុស្តិ៍មិនខាន។
ក្រៅពីការបង្ហោះវីដេអូ ប្រភេទវីដេអូមួយទៀតដែលមានប្រសិទ្ធភាពខ្ពស់នោះគឺជាការ Live វីដេអូដើម្បីទាក់ទាញអ្នកប្រើប្រាស់ឱ្យចូលមើលកាន់តែច្រើន និងមានការ Comment ឬ Likeច្រើនជាងមាតិការផ្សេងៗទៀត។
Facebook Page ដែលមានម៉ាកសញ្ញាត្រឹមត្រូវ និងមានគុណតម្លៃនិងកាន់តែប្រសើរ
ដើមឆ្នាំ២០១៩ គឺជាឆ្នាំដែលមានការជជែកយ៉ាងច្រើនអំពីព័ត៌មានក្លែងក្លាយ ព័ត៌មានបំប៉ោងដែលកើតមានឡើងព្រោងព្រាតនៅលើបណ្តាញសង្គមមួយនេះ។ ហេតុនេះហើយ Facebook បានខិតខំយ៉ាងខ្លាំងដើម្បីដោះស្រាយបញ្ហានេះដើម្បីទប់ស្កាត់បញ្ហានានាដែលអាចកើតមានឡើងពីការចែកចាយព័ត៌មានឥតមានប្រភពច្បាស់លាស់នេះ។ ដូចនេះហើយ មួយរយៈចុងក្រោយនេះ យើងឃើញមានPage និងគណនីមួយចំនួនធំត្រូវបានលុបចោល ជាពិសេសគណនី និងPage ដែលមានការបង្ហោះមាតិការមិនសមរម្យ និងក្លែងក្លាយ ឬគណនី និងPageដែលប្រើប្រាស់មាតិការរបស់អ្នកផ្សេងយកមកបង្ហោះដែលគ្មានការអនុញ្ញាតិ សម្រាប់បម្រើប្រយោជ៍របស់ខ្លួន (ដើម្បីបង្កើនចំនួន Like)។ នៅពេលដ៏ខ្លីខាងមុខនេះ នៅពេលដែលបច្ចេកវិទ្យាបញ្ញាសុប្បនិម្មិតកាន់តែប្រសើរ Pageដែលគ្មានម៉ាកសញ្ញាត្រឹមត្រូវ ឬ Page ដែលបង្ហោះមាតិការមិនបានការទាំងនោះនឹងត្រូវបាត់សូន្យចេញពីពិភពគុននេះ ហើយPageដែលបង្កើតឡើងដើម្បីម៉ាកសញ្ញាឬគោលបំណងច្បាស់លាស់នឹងអាចឋិតឋេរ ហើយទទួលបានផលប្រសើរជាង។
Like, Share & Comment គឺកាន់តែតិចទៅៗ
ប្រសិនបើអ្នកមាន Page ហើយនៅពេលដែលបង្ហោះម្តងៗកាន់តែមានការ Like Share ឬ Commentកាន់តែតិចទៅៗនោះ មិនបាច់ឆ្ងល់ទេ ព្រោះថាតាំងពីឆ្នាំ២០១៧មក ចំនួនខាងលើនេះគឺធ្លាក់ចុះជាលំដាប់ដោយសារការកែប្រែការកំណត់របស់ Facebook ហើយបណ្តាញសង្គមមួយនេះចង់ជម្រុញឱ្យម្ចាស់ Pageបង្កើតមាតិការដែលមានភាពច្នៃប្រឌិត និងគួរឱ្យទាក់ទាញដើម្បីទទួលបានការ Like Share និងComment ច្រើន ហើយមួយវិញទៀត បណ្តាញមួយនេះចង់ជម្រុញឱ្យយើងចាយលុយផ្សព្វផ្សាយដើម្បីអាចទៅដល់មនុស្សកាន់តែច្រើនដើម្បីទទួលបាន Like Share និងCommentច្រើន។
ដូចនេះ ប្រសិនបើអ្នកចង់បានLike Comment និងShareច្រើននោះ អ្នកត្រូវតែខិតខំបង្កើតមាតិការណាដែលល្អ ទាក់ទាញ និងមានប្រយោជន៍សម្រាប់អ្នកប្រើប្រាស់Facebookដើម្បីអាចទៅដល់មនុស្សកាន់តែច្រើន។
ការចាយលុយផ្សព្វផ្សាយគឺកាន់តែចំណាយច្រើន
អ្នកបង្កើតPageគឺមានកាន់តែច្រើន អ្នករកស៊ីតាមFacebookមានការកើនឡើងយ៉ាងគំហុក ហើយអ្នកមានលុយចាយសម្រាប់ផ្សព្វផ្សាយវិញគឺរាប់សិបម៉ឺននាក់ ដែលធ្វើឱ្យការផ្សព្វផ្សាយកាន់តែមានការប្រកួតប្រជែង និងកាន់តែថ្លៃទៅៗ។ កាលពីឆ្នាំ២០១២-២០១៥ ការផ្សព្វផ្សាយគឺមានតម្លៃទាប និងមិនមានការប្រកួតប្រជែងច្រើននោះទេ ហើយប្រសិនប្រៀបធៀបជាមួយនឹងបច្ចុប្បន្នវិញ ការចំណាយលើការផ្សព្វផ្សាយលើFacebookគឺឡើងថ្លៃជាងមុនពី៣ ទៅ៥ដងឯណោះ ហើយវានឹងបន្តកើនឡើងនៅថ្ងៃខាងមុខ។
ដូចនេះ ដើម្បីកាត់បន្ថយថ្លៃចំណាយផ្សព្វផ្សាយជាអតិបរិមា អ្នកផ្សព្វផ្សាយ ឬម្ចាស់អាជីវកម្មត្រូវមានភាពវៃឆ្លាតក្នុងការបង្កើតមាតិការផ្សព្វផ្សាយឱ្យមានភាពទាក់ទាញ ដើម្បីជម្រុញឱ្យមានការ Like Share និង Commentពីសំណាក់អ្នកប្រើប្រាស់ Facebook ព្រោះថាទីនេះគឺជាបណ្តាញសង្គមដែលទាមទារឱ្យមានទំនាក់ទំនងរវាងមនុស្សនិងមនុស្ស រវាងPageនិងFan ឬអ្នកប្រើប្រាស់គណនីបណ្តាញសង្គមមួយនេះ។
ការផ្សព្វផ្សាយតាម Facebook Messengerចាប់ផ្តើមកម្រើកឡើង
មានម្ចាស់អាជីវកម្ម និងអ្នកទីផ្សារតិចតួចប៉ុណ្ណោះដែលដឹងឬស្គាល់ការផ្សព្វផ្សាយតាមMessengerមួយនេះ។ បើនិយាយទៅ វាស្រដៀងនឹងការធ្វើទីផ្សារដោយការផ្ញើរអ៊ីម៉ែល (Email Marketing) តែវាមានប្រសិទ្ធភាពខ្ពស់ជាងឆ្ងាយណាស់ដោយសារតែនៅក្នុងសង្គមខ្មែរយើងមិនសូវមានអ្នកប្រើប្រាស់អ៊ីម៉ែលនោះទេ តែភាគច្រើនគឺមាន Messengerដើម្បីធ្វើការទំនាក់ទំនងគ្នា។ វានឹងក្លាយជាឧបករណ៍ផ្សព្វផ្សាយនៅដែលFacebookដែលអស្ចារ្យ និងមានប្រសិទ្ធភាពខ្ពស់សម្រាប់នៅឆ្នាំនេះ ហើយអាជីវកម្មកាន់តែច្រើនឡើងៗនឹងចាប់ផ្តើមបញ្ចូលការផ្សព្វផ្សាយនេះនៅក្នុងគម្រោងផ្សព្វផ្សាយរបស់ខ្លួន។
