នាពេលបច្ចុប្បន្ននេះ ច្បាស់ជាមានមនុស្សមិនតិចទេដែលកំពុងមានការយល់ច្រលំគ្នារវាងទីផ្សារឌីជីថល និងទីផ្សារ។ ដូច្នេះនៅក្នុងខ្លឹមសារខាងក្រោមនេះនឹងពន្យល់បែបខ្លីៗដើម្បីកុំឱ្យមានការយល់ច្រលំ និងមានការបែងចែកមិនដាច់រវាងទីផ្សារឌីជីថល និងទីផ្សារបន្តទៀត។
1. ឈ្វេងយល់អំពី “ទីផ្សារឌីជីថល”
ទីផ្សារឌីជីថល សំដៅលើសកម្មភាពនៃការផ្សព្វផ្សាយផលិតផល និងសេវាកម្ម តាមរយៈបណ្តាញឌីជីថល ដូចជាប្រព័ន្ធផ្សព្វផ្សាយសង្គម SEO អ៊ីមែល និងកម្មវិធីទូរស័ព្ទ។ ចំពោះទម្រង់នៃការធ្វើទីផ្សារណាមួយដែលពាក់ព័ន្ធនឹងឧបករណ៍អេឡិចត្រូនិក គឺត្រូវបានចាត់ទុកថា ជាទីផ្សារឌីជីថល។
ទីផ្សារឌីជីថល មានសារៈសំខាន់ ដូចជាជួយម្ចាស់អាជីវកម្មឱ្យឆាប់ឈានដល់អតិថិជនគោលដៅជាងការធ្វើទីផ្សារបែបប្រពៃណី និងអាចកំណត់អតិថជនគោលដៅអនាគតដែលនឹងអាចទិញផលិតផល ឬសេវាកម្ម ព្រមទាំងអាចវាស់វែងប្រសិទ្ធភាពនៃការធ្វើទីផ្សារប្រចាំថ្ងៃបានទៀតផង។
2. ឈ្វេងយល់អំពី “ទីផ្សារ”
ទីផ្សារ សំដៅលើសកម្មភាពទាំងឡាយណាដែលក្រុមហ៊ុនធ្វើ ដើម្បីទាក់ទាញចិត្តអតិថិជនមកលើផលិតផល ឬសេវាកម្មរបស់ក្រុមហ៊ុន តាមរយៈការផ្ញើសារដែលមានគុណភាពខ្ពស់ រួមទាំងមានការស្រាវជ្រាវទីផ្សារ ការវិភាគ ការយល់ដឹងពីចំណាប់អារម្មណ៍របស់អតិថិជន និងការផ្សាយពាណិជ្ជកម្ម។ ទីផ្សារ មានគោលបំណងផ្តល់នូវគុណតម្លៃដាច់ដោយឡែកពីគូប្រជែង ធ្វើឱ្យអតិថិជនបានស្គាល់ និងមានទំនុកចិត្តតាមរយៈខ្លឹមសារដែលបានផ្សព្វផ្សាយ ជាមួយនឹងគោលដៅរយៈពេលវែងនៃការបង្ហាញពីគុណតម្លៃផលិតផល ការពង្រឹងភាពស្មោះត្រង់នៃម៉ាកយីហោ និងចុងក្រោយ គឺការបង្កើនការលក់។
ប្រភេទទីផ្សារដែលពេញនិយមប្រើប្រាស់ គឺ 4Ps រួមមាន
- Product (ផលិតផល)
- Price (តម្លៃ)
- Place (ទីកន្លែង)
- Promotion (ប្រម៉ូសិន)
សិក្សាលម្អិតបន្ថែមពីប្រភេទទីផ្សារទាំងបួននេះ តាមតំណភ្ជាប់មួយនេះ៖ https://kumnit.com/ឈ្វេងយល់លម្អិតអំពី-យុទ្/
