ការដែលអាចធ្វើឱ្យអាជីវកម្មកាន់តែរីកចម្រើន ក៏ដូចជាអាចពង្រីកឱ្យកាន់តែធំជាងមុន គឺទាមទារឱ្យមានផែនការនិងជំនាញធំទូលាយ ដូច្នេះក្នុងនាមជាម្ចាស់អាជីវកម្ម អ្នកត្រូវតែពង្រីកសកម្មភាពអាជីវកម្មរបស់អ្នក និងបង្កើតបណ្តាញអាជីវកម្មមួយចំនួនធំបន្ថែមទៀត ដើម្បីប្រាកដថាអ្នកកំពុងជំរុញកំណើនអាជីវកម្មរបស់អ្នកក្នុងទិសដៅដ៏ត្រឹមត្រូវ។​​​​

បន្ថែមពីនេះ ដើម្បីកាន់តែស៊ីជម្រៅក្នុងការធ្វើយ៉ាងណាឱ្យអ្នកអាចបម្លែងអាជីវកម្មខ្នាតតូច មកជាអាជីវកម្មខ្នាតធំបាន ក្នុងនាមជាម្ចាស់អាជីវកម្មខ្នាតតូចទាំងអស់អាចសាកល្បងអនុវត្តន៍តាមវិធីខាងក្រោម៖

1. កំណត់​គោលដៅដើម្បីរៀបចំផែនការអាជីវកម្ម

ការដែលមានគោលដៅច្បាស់លាស់ ជារឿងមួយសំខាន់ ដើម្បីអាចធ្វើឱ្យអាជីវកម្មរីកចម្រើនបាន ហើយនៅពេលមានការកំណត់គោលដៅ នោះច្បាស់ជាទាមទារឱ្យការរៀបចំផែនការបន្តទៀត។ លើសពីនេះ ក្នុងនាមជាម្ចាស់អាជីវកម្មខ្នាតតូច អ្នកត្រូវតែមានការយល់ដឹងគ្រប់គ្រាន់ដើម្បីស្គាល់ច្បាស់ពីឱកាសទីផ្សារដើម្បីអាចចាប់យកឱកាសនោះមកពង្រីកអាជីវកម្មបានលឿន។ លើសពីនេះ ផលិតផលរបស់អ្នកគួរតែផ្តល់អត្ថប្រយោជន៍ជាក់លាក់និងច្បាស់លាស់ដល់អតិថិជន ព្រមទាំងអនុវត្តន៍តាមផែនការដែលអ្នកបានកំណត់ទាំងរយៈពេលខ្លី និងរយៈពេលវែង ដើម្បីធ្វើយ៉ាងណាឱ្យអាជីវកម្មរបស់អ្នកដំណើរការបានរលូន រហូតអាចពង្រីកអាជីវកម្មកាន់តែធំជាងមុនទៅតាមផែនការ។

2. ផ្តោតលើការបែងចែកទីផ្សារ

អាជីវកម្មខ្នាតតូចតែងតែជួបការលំបាកក្នុងទីផ្សារធំ ដូច្នេះអាចពិបាកពង្រីក ពីព្រោះវាស្ទើរតែមិនអាចប្រកួតប្រជែងជាមួយម៉ាកធំៗបាន។ ហេតុនេះ អ្នកត្រូវតែវាយតម្លៃកន្លែងម៉ាកយីហោរបស់អ្នកឡើងវិញនៅក្នុងទីផ្សាររបស់អ្នក ហើយបង្រួមគោលដៅរបស់អ្នក ដើម្បីបែងចែកទីផ្សារ។

ការបែងចែកទីផ្សារ ពាក់ព័ន្ធនឹងការបែងចែកទីផ្សារទូលំទូលាយទៅជាក្រុមតូចៗ ដោយផ្អែកលើព័ត៌មានប្រជាសាស្រ្ត ឬទម្លាប់នៃការទិញរបស់អតិថិជនដែលមានស្រាប់។ បន្ទាប់មក អ្នកអាចជ្រើសរើសផ្នែកមួយក្នុងចំណោមផ្នែកទាំងនេះ ជាអតិថិជនគោលដៅរបស់អ្នក។ ធ្វើបែបនេះ ទើបកាន់តែងាយស្រួលក្នុងការធ្វើទីផ្សារទៅកាន់ក្រុមមនុស្សជាក់លាក់ខ្ពស់នៃអតិថិជនសក្តានុពល ថែមទាំងអាចផ្សព្វផ្សាយបានកាន់តែទូលំទូលាយទៅកាន់ក្រុមមនុស្សក្នុងទម្រង់ធំជាងមុន។

3. បង្កើតបណ្តាញអាជីវកម្មឱ្យបានច្រើន

ការបង្កើតបណ្ដាញអាជីវកម្មឱ្យបានច្រើនមានសារៈសំខាន់ណាស់សម្រាប់អាជីវកម្មខ្នាតតូច ដើម្បីមានឱកាសក្នុងការពង្រីកអាជីវកម្មឱ្យកាន់តែធំជាងមុន។

ដូច្នេះដើម្បីអាចបង្កើតបណ្ដាញឱ្យបានច្រើន ក្នុងនាមជាម្ចាស់អាជីវកម្មខ្នាតតូចទាំងអស់ ត្រូវតែ៖

• បង្ហាញថា អ្នកគឺជានរណា៖ អ្នកអាចចាប់ផ្ដើមផ្សព្វផ្សាយអំពីខ្លួនឯង និងអាជីវកម្មរបស់អ្នកនៅកន្លែងជួបជុំណាមួយ ដើម្បីឱ្យម្ចាស់អាជីវកម្មផ្សេងទៀតបានស្គាល់អំពីអ្នក និងបានស្គាល់អំពីសក្ដានុពលនៃអាជីវកម្មរបស់អ្នក។ លើសពីនេះ អ្នកក៏អាចចាប់ផ្ដើមបង្កើតបណ្ដាញតាមប្រព័ន្ធសង្គម ដូចជា Facebook, TikTok និងផ្សេងទៀត ដើម្បីធ្វើយ៉ាងណាឱ្យមនុស្សទទួលស្គាល់ពីម៉ាកយីហោរបស់អ្នក និងស្វែងរកអ្នកដើម្បីចាប់ដៃគូសហការជាមួយនឹងអ្នកជាដើម។
• កសាងកេរ្តិ៍ឈ្មោះអាជីវកម្មឱ្យរឹងមាំ៖ ទោះបីជាអាជីវកម្មរបស់អ្នកនៅតូចក៏ដោយ ក៏អ្នកត្រូវតែធ្វើឱ្យអាជីវកម្មមានគុណតម្លៃខ្លាំង និងមានអ្នកទទួលស្គាល់ច្រើន ជាពិសេសរំលេចនូវចំណុចខ្លាំង និងនិតិវិធីដ៏មានប្រសិទ្ធភាពនានាក្នុងអាជីវកម្ម។ ធ្វើបែបនេះ ក្នុងគោលបំណង បង្កើតការទាក់ទាញចិត្តមនុស្សកាន់តែខ្លាំង ហើយសហគ្រិនខ្លាំងៗមួយចំនួននឹងមករកអ្នកដើម្បីសហការគ្នា។
• ជួយមនុស្សជុំវិញអ្នក៖ ការជួយអ្នកដទៃក្នុងបណ្តាញអាជីវកម្មរបស់អ្នក នោះអ្នកកាន់តែរឹងមាំ ព្រោះអ្នកក៏អាចទទួលយកជំនួយពីពួកគេផងដែរ។
• ជួបមនុស្សថ្មីៗឱ្យបានច្រើន៖ ការដែលមានសមត្ថភាពក្នុងការជួបមនុស្សថ្មីៗ នោះវាក៏ជួយដល់ការពង្រីកបណ្តាញអាជីវកម្មរបស់អ្នកផងដែរ។ ហើយការជួបមនុស្សថ្មីៗនេះ អ្នកអាចចាប់ផ្ដើមដោយការសុំប្រឹក្សាយោបល់ពីពួកគេ និងធ្វើយ៉ាងណាឱ្យពួកគេបានមើលឃើញថា អ្នកមានប្រយោជន៍ខ្លាំងដល់គេនៅពេលចាប់ដៃគូសហការជាមួយអ្នក។ ហើយដើម្បីអាចជួបមនុស្សថ្មី អ្នកអាចជួបបាននៅតាមព្រឹត្តិការណ៍នានា កិច្ចប្រជុំអាជីវកម្ម និងសន្និសីទជាដើម។
• បង្កើតទំនាក់ទំនងជាមួយអ្នកពាក់ព័ន្ធឱ្យបានច្រើន៖ ត្រង់ចំណុចនេះ អ្នកត្រូវដឹងថា តើអាជីវកម្មរបស់អ្នកត្រូវការផ្នែកណាខ្លះដើម្បីជួយជ្រោមជ្រែងអ្នកឱ្យកាន់តែដំណើរអាជីវកម្មល្អ និងអាចពង្រីកអាជីវកម្មបានលឿនជាងមុន? ឧទាហរណ៍៖ អ្នកជំនាញផ្នែកច្បាប់ អ្នកជំនាញផ្នែកធ្វើទីផ្សារ និងអ្នកមានឥទ្ធិពលលើបណ្ដាញសង្គមជាដើម។

4. ជ្រើសរើសដៃគូសហការឱ្យត្រូវ

ក្រោយពីអាចបង្កើតបណ្ដាញបានច្រើនហើយ អ្វីដែលអ្នកត្រូវគិតបន្ទាប់ទៀតនោះ គឺការជ្រើសរើសដៃគូសហការឱ្យបានត្រឹមត្រូវ។ ប៉ុន្តែសំណួរសួរថា តើត្រូវធ្វើដូចម្ដេចទើបអាចជ្រើសរើសដៃគូឱ្យបានត្រឹមត្រូវ? ខាងក្រោមនេះ អ្នកអាចធ្វើការវាយតម្លៃលើដៃគូសហការរបស់អ្នកបាន ថាតើត្រឹមត្រូវ ឬមិនត្រឹមត្រូវ?

• តើបុគ្គលនោះមានជំនាញជាក់លាក់ដែលអាចជួយបំពេញនូវបេសកកម្មក្នុងអាជីវកម្មរបស់អ្នកឱ្យរីកចម្រើនទៅមុខឬទេ?
• តើបុគ្គលនោះមានបុគ្គលិកលក្ខណៈដូចនឹងអ្វីដែលយើងចង់បានកម្រិតណា?
• តើបុគ្គលនោះ ជាមនុស្សដែលអាចទុកចិត្តបានកម្រិតណា?

5. បន្តស្រាវជ្រាវ និងអភិវឌ្ឍន៍អាជីវកម្មជានិរន្ត

ម្ចាស់អាជីវកម្មខ្នាតតូចទាំងអស់ ត្រូវតែព្យាយាមសិក្សាស្រាវជ្រាវរកអ្វីថ្មីៗ ឬស្រាវជ្រាវលើផលិតផលសេវាកម្មរបស់ខ្លួន ដើម្បីដឹងថា តើគួរពង្រឹងត្រង់ចំណុចណា និងធ្វើបែបណាទើបឱ្យផលិតផលសេវាកម្មរបស់ខ្លួនមានការវិវត្តន៍ជាបន្តបន្ទាប់ ដោយធានាទាំងគុណភាពល្អជាងមុន និងមានភាពច្នៃប្រឌិតរហូត? ធ្វើបែបនេះ ទើបអាចធ្វើឱ្យអតិថិជនដែលមានស្រាប់កាន់តែមិនងាយដកចិត្តពីអាជីវកម្មរបស់អ្នក ថែមទាំងទាក់ទាញចិត្តអតិថិជនថ្មីៗបានកាន់តែច្រើន។

នៅពេលអតិថិជនមានកាន់តែច្រើន នោះតម្រូវការក៏កាន់តែមានច្រើនដែរ ដូច្នេះអ្នកនឹងមានឱកាសក្នុងពង្រីកអាជីវកម្មឱ្យកាន់តែធំ។

ការចាប់ផ្ដើមអាជីវកម្ម តែងតែចង់ទទួលបានប្រាក់ចំណេញខ្ពស់ ប៉ុន្តែដើម្បីសម្រេចគោលដៅមួយនេះ ទាល់តែលក់ដាច់ ហើយដើម្បីលក់ដាច់ ទាល់តែអាជីវកម្មរបស់អ្នកមានអ្នកស្គាល់ច្រើន និងមានភ្ញៀវចូលមកក្នុងក្រុមហ៊ុនឬហាងរបស់អ្នកដើម្បីទិញឱ្យច្រើនដូចគ្នា។

ត្រង់ចំណុចនេះ អ្វីដែលជាបញ្ហាចោទនោះគេថា ហេតុអ្វីបានជាអាជីវកម្មមួយចំនួន មិនសូវមានភ្ញៀវចូលមកទិញសោះ? ហើយខាងក្រោមនេះ ជាមូលហេតុមួយចំនួន ដើម្បីជួយម្ចាស់អាជីវកម្មទាំងអស់ដើម្បីកែតម្រូវ ដោយធ្វើយ៉ាងណាឱ្យអាជីវកម្មរបស់ខ្លួនកាន់តែមានភ្ញៀវចូលមកទិញច្រើនជាងមុន។

1. ផ្ដល់បទពិសោធន៍មិនល្អដល់អតិថិជន

នៅពេលអតិថិជនបានទៅទិញអ្វីមួយពីក្រុមហ៊ុនឬហាងរបស់អ្នក ប៉ុន្តែអ្នកបែរជាបង្កើតកំហុសមួយដោយផ្ដល់បទពិសោធន៍មិនល្អដល់ពួកគេ ដូចជាសេវាកម្មយឺត សម្ដីអ្នកលក់មិនសូវល្អ បរិយាកាសជុំវិញអាប់អួរ និងហេតុការណ៍ផ្សេងៗដែលធ្វើឱ្យអតិថិជនមានអារម្មណ៍មិនល្អ ហើយរៀងចាល់ដោយមិនចង់មកម្ដងទៀត។ ពេលខ្លះពួកគេបាននិយាយផ្សព្វផ្សាយពីចំណុចមិនល្អទាំងឡាយដែលក្រុមហ៊ុនរបស់អ្នកមាន ទៅកាន់មិត្តភក្តិ បងប្អូន និងអ្នកជុំវិញដែលពួកគេបានស្គាល់ទៀតផង។

2. ការផ្ដល់ផលិតផលឬសេវាកម្មមិនដូចការរំពឹងទុករបស់អតិថិជន

ពេលខ្លះក្រុមហ៊ុនរបស់អ្នកបានផ្សព្វផ្សាយរឿងរ៉ាវជាច្រើន ទាំងគុណប្រយោជន៍ និងចំណុចល្អៗលើផលិតផលសេវាកម្មរបស់អ្នកនៅលើបណ្ដាញសង្គម ប៉ុន្តែអ្វីដែលនឹកស្មានមិនដល់នោះ អតិថិជនបានទិញផលិតផល និងប្រើសេវាកម្មរបស់អ្នកហើយ បែរជាមិនដូចការរំពឹងទុករបស់ពួកគេទៅវិញ។ ហេតុនេះអតិថិជនដែលខកចិត្តលើបញ្ហានេះ ពួកគេទំនងជាចែករំលែកការខកចិត្តរបស់ពួកគេជាមួយមិត្តភក្តិនៅលើប្រព័ន្ធផ្សព្វផ្សាយសង្គម។ ហើយ​អតិថិជន​ដែល​ខឹងខ្លាំង ​នឹង​បង្ហោះ​ការ​វាយតម្លៃទាំងឡាយទៅកាន់មនុស្សជាច្រើនទៀត ជាពិសេស​​អនាគត​អតិថិជនថ្មីៗរបស់អ្នកផ្សេង​ទៀតឱ្យបាន​មើលនិងឃើញ។

3. អតិថិជនមិនពេញចិត្តនឹងតម្លៃដែលអ្នកបានកំណត់

ការកំណត់តម្លៃ ជារឿងសំខាន់ណាស់ ពីព្រោះបើយើងកំណត់តម្លៃមួយដែលធ្វើឱ្យអតិថិជនគោលដៅមានអារម្មណ៍ថាថ្លៃពេក ឬតម្លៃមិនល្អ ឬតម្លៃហួសពីការស្មានរបស់ពួកគេ នោះអាជីវកម្មរបស់អ្នកនឹងបាត់បង់អតិថិជនមួយចំនួនធំមិនខាន ហើយពួកគេក៏មិនហ៊ានចូលមកកាន់ក្រុមហ៊ុន ឬហាងរបស់អ្នកម្ដងទៀតដែរ (ករណីថាអតិថិជនធ្លាប់ចូលមកទិញម្ដងហើយ) ។

4. ជ្រើសរើសទីតាំងខុស

ការជ្រើសរើសទីតាំង ក៏ជារឿងមួយសំខាន់ដែរ ពីព្រោះបើអ្នកជ្រើសរើសទីតាំងខុស ដោយជាទីតាំងមិនសូវអំណោយផល ជាទីតាំងដែលមិនមែនសម្បូរអតិថិជនគោលដៅរបស់អ្នក និងជាទីតាំងមួយដែលពិបាករកជាដើម។ ហើយកត្តានេះហើយ ក៏ជាហេតុធ្វើឱ្យមនុស្សមិនសូវចូលហាង ឬក្រុមហ៊ុនរបស់អ្នកឡើយ។

5. ខ្សោយយុទ្ធសាស្រ្តធ្វើទីផ្សារ

ប្រសិនបើអាជីវកម្មរបស់អ្នក មិនសូវមានការធ្វើទីផ្សារឱ្យខ្លាំងទេ នោះមនុស្សក៏មិនសូវស្គាល់ពីម៉ាកយីហោរបស់អ្នកដែរ ដូច្នេះទាមទារឱ្យអ្នកត្រូវតែខ្លាំងក្នុងការធ្វើទីផ្សារលើអាជីវកម្ម ក្នុងគោលបំណងផ្សព្វផ្សាយឱ្យមនុស្សបានស្គាល់ច្រើន និងយល់ច្បាស់ថាអាជីវកម្មរបស់អ្នកកំពុងលក់អ្វី និងផ្ដល់តម្រូវការអ្វីដល់ពួកគេជាដើម។

នាពេលបច្ចុប្បន្ននេះ ​ពិភពលោកកំពុងមានការវិវត្តន៍ខ្លាំងលើបច្ចេកវិទ្យា ហើយមនុស្សជាច្រើនក៏បានស្គាល់ និងពេញនិយមប្រើប្រាស់ក៏កាន់តែច្រើនដែរ ក្រោយពីទទួលរងនូវផលប៉ះពាល់ពីជំងឺកូវីត-19 មក ដូច្នេះមានជំនាញថ្មីៗជាច្រើនដែលម្ចាស់អាជីវកម្មខ្នាតតូចត្រូវតែរៀន ដើម្បីទទួលបានភាពរីកចម្រើននៅក្នុងអាជីវកម្មផ្ទាល់ខ្លួននាពេលសម័យនេះ។

ម្ចាស់អាជីវកម្មខ្នាតតូចគ្រប់រូប ដែលចង់ជោគជ័យក្នុងការគ្រប់គ្រងប្រតិបត្តិការប្រចាំថ្ងៃនៅក្នុងក្រុមហ៊ុន ចាំបាច់ត្រូវមានជំនាញមូលដ្ឋានចំនួន 9 ហើយរៀនពីជំនាញនោះឱ្យបានត្រឹមត្រូវ។

នៅក្នុងខ្លឹមសារអត្ថបទមួយនេះ អ្នកដឹកនាំចំនួន 9 នាក់ មកពីក្រុមប្រឹក្សាសហគ្រិនវ័យក្មេងបានពិនិត្យមើលជំនាញដែលពួកគេចាត់ទុកថាសំខាន់បំផុតសម្រាប់ការគ្រប់គ្រងអាជីវកម្មខ្នាតតូចឱ្យបានត្រឹមត្រូវ និងមូលហេតុដែលជំនាញទាំងនោះមានសារៈសំខាន់ក្នុងការរក្សាក្រុមហ៊ុនឱ្យដំណើរការប្រកបដោយប្រសិទ្ធភាព។ ហើយនេះបើយោងតាមគេហទំព័រ Forbes។

1. ជំនាញគណៈប្រតិភូ

ម្ចាស់អាជីវកម្មខ្នាតតូចទាំងអស់ត្រូវតែអាចធ្វើជាគណៈប្រតិភូកម្ម (តំណាងឱ្យក្រុមហ៊ុនទាំងមូល) ដើម្បីឱ្យអាជីវកម្មរបស់ពួកគេទទួលបានជោគជ័យ ដោយធ្វើជាអ្នកដឹកនាំគ្រប់គ្រងចាត់ចែង និងត្រួតពិនិត្យព័ត៌មានលម្អិតទាំងអស់នៅក្នុងក្រុមហ៊ុន ប៉ុន្តែវាអាចរៀងពិបាកបន្ដិច។ ទោះបីជាយ៉ាង ក្នុងនាមជាម្ចាស់ ក៏ត្រូវបង្កើតឱ្យមានក្រុម និងបង្កើតដំណើរការសម្រាប់ក្រុមរបស់ពួកគេដើម្បីបំពេញតាមការរំពឹងទុកដោយជោគជ័យ។

2. សមត្ថភាពក្នុងការធ្វើតាម

ក្នុងនាមជាម្ចាស់អាជីវកម្ម ត្រូវតែមានគំនិតដ៏អស្ចារ្យ និងភាពវៃឆ្លាត ដើម្បីដឹកនាំក្រុមបុគ្គលិកឱ្យឆាប់ទទួលបានសមិទ្ធផល។ លើសពីនេះ ក៏អាចជ្រើសរើសសកម្មភាពណាមួយនៃការដឹកនាំក្រុមហ៊ុនរបស់បុគ្គលណាម្នាក់ ឬច្រើននាក់ ដើម្បីមកអនុវត្តន៍តាម ប៉ុន្តែដើម្បីធ្វើតាម អ្នកត្រូវជឿជាក់លើខ្លួនឯង និងមានក្រុមដ៏អស្ចារ្យនៅពីក្រោយអ្នក។

3. ជំនាញទំនាក់ទំនង

ម្ចាស់អាជីវកម្មខ្នាតតូចទាំងអស់ គួរតែដឹងឱ្យច្បាស់នូវចំណេះដឹងផ្នែកបច្ចេកវិទ្យា ប្រព័ន្ធគណនេយ្យ និងក្របខ័ណ្ឌច្បាប់ជាមូលដ្ឋាននៃអាជីវកម្មរបស់ខ្លួន។ ទោះយ៉ាងណាក៏ដោយ ជំនាញទំនាក់ទំនង គឺជាគន្លឹះក្នុងការគ្រប់គ្រងផ្នែកផ្លាស់ទីទាំងអស់។ ហេតុនេះ ប្រសិនបើម្ចាស់អាជីវកម្មខ្នាតតូចអាចមានសមត្ថភាពក្នុងការទំនាក់ទំនងដ៏ល្អនិងត្រឹមត្រូវ នោះវាអាចជួយដល់ដំណើរការ និងនិតិវិធីដែលត្រូវអនុវត្តន៍ជាមួយនឹងអ្នកជំនាញផ្សេងៗដែលពាក់ព័ន្ធជាមួយនឹងក្រុមហ៊ុនរបស់ខ្លួនមិនខាន ហើយនេះជាគន្លឹះមួយនៃការជួយឱ្យអាជីវកម្មជោគជ័យ។ លើសពីនេះ ការដែលមានជំនាញទំនាក់ទំនងឱ្យខ្លាំង វាជាតួនាទីរបស់ម្ចាស់អាជីវកម្ម ដើម្បីអាចរកមនុស្សជាច្រើនដើម្បីជួយពួកគេឱ្យកាន់តែរីកចម្រើន និងអាចទំនាក់ទំនងឱ្យអាជីវកម្មរបស់ខ្លួនកាន់តែមានទីផ្សារជាដើម។

4. ការច្នៃប្រឌិត

ការច្នៃប្រឌិត គឺជាជំនាញដែលសហគ្រិននិងម្ចាស់អាជីវកម្ម ចាំបាច់ត្រូវតែមាន ពីព្រោះការធ្វើអាជីវកម្ម តែងតែអាចរងនូវផលប៉ះពាល់គ្រប់កន្លែង ដូច្នេះទាមទារឱ្យម្ចាស់អាជីវកម្ម និងសហគ្រិនគ្រប់រូបមានគំនិតដែលច្នៃប្រឌិតនិងគិតបានលឿន ដើម្បីស្វែងរកដំណោះស្រាយដែលបង្កើតលទ្ធផលល្អបំផុតសម្រាប់ទាំងអតិថិជន និងអាជីវកម្មក្នុងរយៈពេលវែង។

5. ជំនាញប្រព័ន្ធផ្សព្វផ្សាយសង្គម

ប្រព័ន្ធផ្សព្វផ្សាយសង្គម គឺជាជំនាញមូលដ្ឋានមួយដែលម្ចាស់អាជីវកម្មខ្នាតតូចទាំងអស់គួរតែមាន ដើម្បីគ្រប់គ្រងប្រតិបត្តិការប្រចាំថ្ងៃនៅក្នុងក្រុមហ៊ុនឱ្យទទួលបានភាពជោគជ័យ។ ដូច្នេះក្នុងនាមជាម្ចាស់ ត្រូវតែដឹងអំពីប្រព័ន្ធផ្សព្វផ្សាយសង្គម របៀបភ្ជាប់ទំនាក់ទំនងជាមួយអ្នកដទៃ ការបង្ហោះ និងការចូលរួមនៅលើបណ្ដាញសង្គម។ ហើយដើម្បីអាចយល់ដឹងពីជំនាញនេះ អ្នកអាចរៀនអនុវត្តន៍ជាក់ស្ដែង និងរៀននៅក្នុងវគ្គសិក្សាខ្លីៗបាន ហើយអ្វីដែលកាន់តែសំខាន់ ម្ចាស់អាជីវកម្មទាំងអស់ អាចចាប់ផ្ដើមរៀនពីរបៀបដំណើរការប្រព័ន្ធផ្សព្វផ្សាយសង្គម របៀបចូលទៅកាន់ទំព័រអាជីវកម្មរបស់ខ្លួនឯង និងតាមដានវាជារៀងរាល់ថ្ងៃ។ នេះជារបៀបដែលអ្នកទៅដល់មនុស្សកាន់តែច្រើន និងជារបៀបដែលអ្នកធ្វើឱ្យអាជីវកម្មរបស់អ្នកកាន់តែមានសុពលភាព។

6. ការគិតបែបវិភាគ

ម្ចាស់អាជីវកម្មខ្នាតតូច គួរតែអាចគិតបែបវិភាគ ដើម្បីគ្រប់គ្រងប្រតិបត្តិការប្រចាំថ្ងៃរបស់ពួកគេដោយជោគជ័យ ដោយមានសមត្ថភាពក្នុងការសំយោគព័ត៌មានដែលបានមកពីអតិថិជន និងអ្នកលក់ បន្ទាប់មកគិតវិភាគដើម្បីស្វែងរកចំណុចក្នុងការអភិវឌ្ឍក្នុងក្រុមហ៊ុន។ លើសពីនេះ អាចគិតអំពីបញ្ហាប្រតិបត្តិការកើតឡើងដោយហេតុផលណាមួយ បន្ទាប់មកធ្វើការកំណត់ថា តើហេតុផលនោះជាអ្វី?ហើយអ្វីជាបញ្ហាឫសគល់របស់វា? បន្ទាប់មកស្វែងរកដំណោះស្រាយ។

ចូរចងចាំថា ការគិតវិភាគឱ្យបានត្រឹមត្រូវ (និងកែលម្អជាបន្តបន្ទាប់) ប្រតិបត្តិការប្រចាំថ្ងៃនឹងបង្កើនគុណតម្លៃនៃអាជីវកម្មរបស់អ្នកកាន់តែល្អប្រសើរដូចគ្នា។

7. ជំនាញគ្រប់គ្រងពេលវេលា

ការគ្រប់គ្រងពេលវេលា គឺជាជំនាញសំខាន់បំផុតដើម្បីធ្វើជាម្ចាស់សម្រាប់អ្នកដឹកនាំអាជីវកម្ម។ ពេលវេលា គឺជាធនធានមួយដែលយើងមិនអាចត្រឡប់មកវិញបានទេ។ ការចេះគ្រប់គ្រងពេលវេលារបស់អ្នកឱ្យមានប្រសិទ្ធភាព គឺជាកត្តាចាំបាច់សម្រាប់អ្នកដឹកនាំ។

ក្នុងនាមជាម្ចាស់អាជីវកម្ម និងជាអ្នកគ្រប់គ្រង ការងាររបស់អ្នកគឺដើម្បីសម្របសម្រួលក្រុមរបស់អ្នកដើម្បីធានាថាគោលដៅត្រូវបានសម្រេច និងបានបំពេញតាមកាលកំណត់។ លើសពីនេះ ដើម្បីឱ្យមានប្រសិទ្ធភាពក្នុងទិដ្ឋភាពនៃការគ្រប់គ្រងពេលវេលានេះ អ្នកត្រូវតែមានការគ្រប់គ្រងដ៏ល្អលើការប៉ាន់ស្មាននៃការបញ្ចប់គម្រោងណាមួយ ក៏ដូចជាឈ្វេងយល់ពីប្រភេទបុគ្គលិកលក្ខណៈផ្សេងៗនៃសមាជិកក្រុមរបស់អ្នក ពីព្រោះប្រសិនបើអ្នកមិនមានសមត្ថភាពក្នុងការប៉ាន់ស្មាន់នៃការបញ្ចប់គម្រោងណាមួយ ឬមិនស្គាល់ពីបុគ្គលិកលក្ខណៈរបស់សមាជិកក្រុមទេ នោះវានឹងអាចប៉ះពាល់ដល់សមត្ថភាពរបស់អ្នកក្នុងការធានាថា ពេលវេលាត្រូវបានចំណាយយ៉ាងមានប្រសិទ្ធភាពដូចដែលបានកំណត់ទុក។

8. សមត្ថភាពក្នុងការកំណត់អាទិភាព

ការដែលមានសមត្ថភាពក្នុងការកំណត់អាទិភាពការងារជាប្រចាំថ្ងៃ ជារឿងមួយដ៏សំខាន់ ពីព្រោះអ្នកអាចដឹងថា ការងារណាដែលសំខាន់ និងបន្ទាន់ ហើយអ្នកអាចកំណត់ពីផលប៉ះពាល់ប្រសិនបើមិនអាចបញ្ចប់តាមពេលកំណត់ ឬគុណប្រយោជន៍ដែលនឹងទទួលបានប្រសិនបើបញ្ចប់ការងារនោះទាន់ពេលវេលា។ ធ្វើបែបនេះ ទើបម្ចាស់អាជីវកម្ម អាចធ្វើឱ្យបុគ្គលិកដឹងថា គាត់ត្រូវធ្វើអ្វីមុននិងផ្ដោតសំខាន់លើអ្វី ទាំងកាព្វកិច្វ និងអ្វីដែលត្រូវសម្រេច។ លើសពីនេះ ក៏ត្រូវកំណត់ពេលដើម្បីប្រជុំក្រុមដែរ ដើម្បីតាមដានស្ថានភាព និងអាចដោះស្រាយលើបញ្ហាណាមួយឱ្យទាន់ពេលវេលា។

9. ចំណេះដឹងផ្នែកហិរញ្ញវត្ថុ

ជំនាញមួយដែលអ្នកដឹកនាំអាជីវកម្មមិនអាចខ្វះបាន គឺចំណេះដឹងផ្នែកហិរញ្ញវត្ថុ។ អ្នកដឹកនាំគ្រប់រូបត្រូវតែសិក្សាលំហូរសាច់ប្រាក់របស់ពួកគេ និងតាមដានការចំណាយ ព្រមទាំងធ្វើការសម្រេចចិត្តសំខាន់ៗសម្រាប់សុខភាពហិរញ្ញវត្ថុរបស់ក្រុមហ៊ុនរបស់ពួកគេដោយផ្អែកលើទិន្នន័យ។

លើសពីនេះ ម្ចាស់អាជីវកម្មក៏គួរតែជួលគណនេយ្យករ ឬអ្នកប្រឹក្សាពន្ធសម្រាប់ការងារបច្ចេកទេសខ្ពស់ ប៉ុន្តែក្នុងនាមជាម្ចាស់ក៏ត្រូវតែអាចយល់ពីអ្វីដែលពួកគេកំពុងធ្វើ និងរបៀបធ្វើការជាមួយពួកគេផងដែរ។

ចូរចងចាំថា ចំណេះដឹងផ្នែកហិរញ្ញវត្ថុមានសារៈសំខាន់ ប្រសិនបើអ្នកចង់ជួយអាជីវកម្មរបស់អ្នកឱ្យកាន់តែរីកចម្រើន។

នៅពេលគិតអំពីការចង់ចាប់ផ្តើមអាជីវកម្មផ្ទាល់ខ្លួន បញ្ហាប្រឈមដ៏ធំបំផុតមួយ គឺការខ្វះដើមទុន ហើយមិនដឹងថាស្វែងរកដើមទុនមកពីណាដើម្បីចាប់ផ្តើម។ ដូច្នេះនៅក្នុងអត្ថបទមួយនេះ នឹងបង្ហាញពីប្រភពដើមទុនមួយចំនួនដែលអ្នកអាចស្វែងរកដើមទុនដើម្បីចាប់ផ្ដើមគម្រោងអាជីវកម្មរបស់អ្នកបាន។

1. ការវិនិយោគផ្ទាល់ខ្លួន

នៅពេលដែលចាប់ផ្តើមអាជីវកម្ម ទុនវិនិយោគដំបូងបំផុត គឺជាទុនផ្ទាល់ខ្លួនរបស់អ្នក ទាំងសាច់ប្រាក់សុទ្ធ ឬទ្រព្យសម្បត្តិនានារបស់អ្នក។ លើសពីនេះ អ្នកក៏អាចបង្កើតលំហូរសាច់ប្រាក់ផ្ទាល់ខ្លួនដើម្បីធ្វើជាដើមទុនផងដែរ ដូចជាលក់សេវាកម្មផ្ទាល់ខ្លួនទៅកាន់អ្នកដទៃ មានន័យថា រាល់ចំណេះជំនាញដែលអ្នកមានស្រាប់ គឺអ្នកអាចប្រើការបានក្នុងការបង្កើតលុយ។ ឧទាហរណ៍៖ អ្នកមានជំនាញផ្នែកទីផ្សារ ដូច្នេះអ្នកអាចលក់សេវាកម្មប្រឹក្សាយោបល់ទៅកាន់ម្ចាស់អាជីវកម្មផ្សេងៗលើការធ្វើទីផ្សារជាដើម។

2. មិត្តភក្តិ និងក្រុមគ្រួសារ

អ្នកអាចបង្ហាញពីគំនិតអាជីវកម្មរបស់អ្នកទៅកាន់មិត្តភក្តិ និងក្រុមគ្រួសាររបស់អ្នក ដើម្បីធ្វើយ៉ាងណាឱ្យពួកគេមានចំណាប់អារម្មណ៍ និងជឿជាក់លើអ្នក បន្ទាប់មកពួកគេច្បាស់ជាសម្រេចចិត្តដាក់វិនិយោគជាមួយនឹងអ្នកមិនខាន។ សូមបញ្ជាក់ផងដែរថា អ្នកខ្លួនឯងក៏ត្រូវប្រាកដក្នុងចិត្តផងដែរក្នុងការចាប់ផ្ដើមអាជីវកម្មមួយនេះ ដើម្បីចៀសវាងក្នុងការចាប់ផ្ដើមទាំងគ្មានភាពជឿជាក់លើខ្លួនឯង និងគ្មានភាពច្បាស់លាស់ជាដើម។ ធ្វើបែបនេះ ទើបអាចមានភាគរយច្រើនក្នុងការចាប់ផ្ដើមអាជីវកម្មបានរលូន និងមិនធ្វើឱ្យទំនាក់ទំនងរវាងអ្នកជាមួយនឹងមិត្តភក្តិ ឬក្រុមគ្រួសារមានភាពមិនល្អ និងមិនទុកចិត្តគ្នា។

3. ប្រាក់កម្ចីធនាគារ

ប្រសិនបើអ្នកមានបំណងចង់ចាប់ផ្ដើមអាជីវកម្មខ្នាតតូច ឬមធ្យម ជម្រើសដ៏ល្អ គឺអ្នកអាចធ្វើការខ្ចីប្រាក់ពីធនាគារ ដើម្បីធ្វើជាដើមទុនក្នុងការចាប់ផ្ដើមបាន។ ប៉ុន្តែក្នុងចំណុចនេះ ទាមទារឱ្យអ្នកមានផែនការអាជីវកម្មមួយដ៏រឹងមាំ និងអ្នកខ្លួនឯងត្រូវតែប្រាកដថា អ្នកអាចមានលទ្ធភាពក្នុងការបង្វិលប្រាក់សំណងវិញជាមួយនឹងធនាគារ។ បន្ថែមពីនេះ អ្នកក៏ត្រូវជ្រើសរើសធនាគារណាដែលផ្ដល់អត្ថប្រយោជន៍ល្អសម្រាប់ការខ្ចីរបស់អ្នកក្នុងការចាប់ផ្ដើមអាជីវកម្មផងដែរ។

4. អ្នកវិនិយោគទុន

អ្នកអាចធ្វើគំរូអាជីវកម្មមួយដ៏ល្អសម្រាប់ការធ្វើអាជីវកម្មរបស់អ្នក ដើម្បីបង្ហាញទៅកាន់វិនិយោគិនណាម្នាក់ឬច្រើននាក់ ដោយធ្វើយ៉ាងណាឱ្យពួកគេបានមើលឃើញពីសក្ដានុពលក្នុងគំរូអាជីវកម្មរបស់អ្នក បន្ទាប់មកពួកគេនឹងចាប់ផ្ដើមដាក់វិនិយោគទុនជាមួយនឹងអ្នកមិនខាន។

5. ភាពជាដៃគូ

ភាពជាដៃគូ សំដៅលើបុគ្គលពីរនាក់ដែលប្រមូលផ្តុំធនធានគ្នា ឬចូលហ៊ុនគ្នាដើម្បីប្រើប្រាស់ក្នុងការផ្តល់ដើមទុនដល់គំនិតអាជីវកម្មរបស់ពួកគេ។ ប៉ុន្តែនៅពេលចាប់ដៃគូគ្នាក្នុងការរកស៊ី ក៏ទាមទារឱ្យមានភាពជឿជាក់លើគ្នា និងមានការចុះហត្ថលេខាលើកិច្ចព្រមព្រៀងគ្នាឱ្យបានត្រឹមត្រូវផងដែរ ដើម្បីចៀសវាងថ្ងៃក្រោយមានបញ្ហាជម្លោះគ្នាលើការបែងចែកប្រាក់ចំណេញ និងបញ្ហាផ្សេងៗទៀត។

 6. ដាក់សំណើរសុំជំនួយសម្រាប់អាជីវកម្មខ្នាតតូច

សំដៅលើ ការដាក់សំណើរសុំដើមទុនវិនិយោគ ប្រាក់កម្ចី ដោយទទួលបានការប្រាក់ទាប និងជំនួយឥតសំណង ពីរដ្ឋាភិបាលឬកន្លែងណាដែលផ្ដល់ជូនបែបនេះដល់អ្នកក្នុងការចាប់ផ្ដើមអាជីវកម្មខ្នាតតូចបាន។

ក្រុមហ៊ុន Startbucks ជាហាងកាហ្វេធំជាងគេនៅក្នុងពិភពលោក ហើយត្រូវបានបង្កើតឡើងនៅឆ្នាំ 1971 នៅទីក្រុង Seattle រដ្ឋ Washington សហរដ្ឋអាមេរិក ដែលមានស្ថាបនិកចំនួន 3 នាក់ គឺលោក Jerry Baldwin លោក Gordon Bowker និង លោក Zev Siegl។​ ក្រោយមក លោក Howard Schultz បានកាន់កាប់ក្រុមហ៊ុន Starbucks ក្នុងទសវត្សរ៍ឆ្នាំ 1980 ហើយបានប្រែក្លាយក្រុមហ៊ុនកាហ្វេក្នុងតំបន់ទៅជាម៉ាកយីហោកំពូលមួយរបស់ពិភពលោក។ ត្រង់ចំណុចនេះ អ្នកទាំងអស់គ្នាប្រហែលឆ្ងល់ហើយ ថាតើមានអ្វីជាអាថ៌កំបាំងទើបធ្វើឱ្យក្រុមហ៊ុន Starbucks មានភាពល្បីល្បាញទូទាំងពិភពលោក?

ដូច្នេះខ្លឹមសារខាងក្រោម នឹងបង្ហាញពីហេតុផលមួយចំនួនដែលធ្វើឱ្យក្រុមហ៊ុនលំដាប់មួយនេះមានភាពល្បីល្បាញខ្លាំង រួមមាន៖

1. កាហ្វេខ្លួនឯង

នៅពេល Starbucks មិនទាន់បង្កើតឡើង អំឡុងពេលនោះអ្នកដែលនិយមផឹកកាហ្វេ គឺកម្រមាននៅក្នុងសហរដ្ឋអាមេរិកណាស់ ហើយ espresso ក៏កម្ររកបាននៅខាងក្រៅភោជនីយដ្ឋានអ៊ីតាលីដែរ។ មានមនុស្សតិចណាស់ដែលដឹងពីភាពខុសគ្នារវាង espresso និងកាហ្វេ។ នៅតាមហាងកាហ្វេ អាហារថ្ងៃត្រង់ និងហាងនំដូណាត់ទូទាំងប្រទេស មនុស្សបានផឹកកាហ្វេធម្មតា ហើយជារឿយៗញ៉ាំកាហ្វេខ្សោយ។ ក្រោយមកនៅពេលបង្កើតឱ្យមានហាងកាហ្វេ Starbucks គឺបានផ្លាស់ប្ដូរជនជាតិអាមេរិកយ៉ាងខ្លាំងក្នុងការងាកមកចាប់អារម្មណ៍នឹងកាហ្វេរបស់ Starbucks។

ចាប់ពីពេលនោះមក ជនជាតិអាមេរិកជាច្រើនជំនាន់ ឥឡូវនេះបានជ្រើសរើស Starbucks ជាជម្រើសដ៏ល្អរបស់ខ្លួនក្នុងការផឹកកាហ្វេឆ្ងាញ់ៗ។

2. Starbucks App

ក្នុងឆ្នាំ 2011 Starbucks បានបើកដំណើរការ Starbucks App ដោយផ្តល់ឱ្យអតិថិជនរបស់ខ្លួនអាចបញ្ជាទិញ បង់ប្រាក់ និងទទួលយកភេសជ្ជៈរបស់ពួកគេដោយមិនចាំបាច់រង់ចាំក្នុងជួរ ឬត្រូវបានពន្យារពេលដោយសហការីដែលមិនច្បាស់លាស់។

ហើយការបង្កើតដំណើរការកម្មវិធីនេះឡើង គឺជាភាពជោគជ័យមួយផ្នែក ដោយនៅឆ្នាំ 2016 ប្រតិបត្តិការរបស់ Starbucks មានកំណើនច្រើនជាងមួយភាគប្រាំដែលត្រូវបានធ្វើឡើងតាមរយៈកម្មវិធីនេះ។

3. តារាល្បីៗ + Starbucks

តារាល្បីៗជាច្រើនរូប តែងតែបង្ហោះបទពិសោធន៍របស់ពួកគេអំពី Starbucks ឬគ្រាន់តែបង្ហោះរូប Selfie នៅលើទំព័រប្រព័ន្ធផ្សព្វផ្សាយសង្គមរបស់ពួកគេ ដែលបណ្តាលឱ្យមានការចូលរួមខ្ពស់ បង្កើនប្រជាប្រិយភាពរបស់យីហោ។

ការចែករំលែករបស់ Starbucks នៅលើប្រព័ន្ធផ្សព្វផ្សាយសង្គមដោយតារាល្បីៗគឺគ្មានអ្វីក្រៅពីវេទមន្តសម្រាប់ម៉ាកយីហោនោះទេ ហើយនោះហើយជាមូលហេតុដែល Starbucks មិនត្រូវបានគេស្គាល់ថាសម្រាប់ការសហការជាមួយតារាល្បីៗសម្រាប់ការផ្សាយពាណិជ្ជកម្ម ខណៈដែលមនុស្សជាច្រើនកំពុងផ្សព្វផ្សាយពួកគេដោយមិនចាំបាច់សួរ។ និយាយឱ្យត្រង់ទៅ តារាល្បីៗបានធ្វើឱ្យ Starbucks ក្លាយជានិមិត្តសញ្ញាឋានៈមួយ។

អាជីវកម្មខ្នាតតូច ជាប្រភេទអាជីវកម្មដែលមានកង្វះខាតលើចំណុចជាច្រើនជាងអាជីវកម្មដែលមានលក្ខណៈស្ដង់ដារ ដូច្នេះនៅក្នុងអត្ថបទមួយនេះ នឹងបង្ហាញពីបញ្ហាប្រឈមមួយចំនួន និងផ្ដល់ជាដំណោះស្រាយដើម្បីផ្ដល់ជាគំនិតនិងជាគន្លឹះសម្រាប់បងប្អូនដែលជាម្ចាស់អាជីវកម្មខ្នាតតូច ក្នុងការចៀសវាងរាល់បញ្ហាប្រឈមទាំងឡាយ និងអាចពង្រឹងអាជីវកម្មខ្នាតតូចឱ្យរីកចម្រើន ព្រមទាំងអាចបម្លែងអាជីវកម្មរបស់ខ្លួនឱ្យមានលក្ខណៈស្ដង់ដារជាងមុន។

ខាងក្រោមនេះ ជាបញ្ហាប្រឈមមួយចំនួនដែលអាជីវកម្មខ្នាតតូចអាចប្រឈមមុខ រួមមាន៖

1. ការស្វែងរកអតិថិជន

រាល់ការធ្វើអាជីវកម្ម តែងតែទាមទារឱ្យមានអតិថិជនមកចូលទិញឱ្យបានច្រើន ប៉ុន្តែអ្វីដែលជាបញ្ហាប្រឈមរបស់អាជីវកម្មខ្នាតតូច គឺពិបាកក្នុងការស្វែងរកអតិថិជនឱ្យបានច្រើន ដោយមនុស្សមិនសូវស្គាល់ និងសូវជឿទុកចិត្តលើម៉ាកយីហោ ព្រោះជាអាជីវកម្មខ្នាតតូច។

ជាដំណោះស្រាយ ម្ចាស់អាជីវកម្មគួរតែ៖

• កំណត់ប្រភេទអតិថិជនគោលដៅ
• សិក្សាស្រាវជ្រាវទីផ្សារបន្ថែម
• សម្រុកធ្វើទីផ្សារឱ្យសមស្របជាមួយនឹងក្រុមអតិថិជនគោលដៅ

2. ការកសាងការយល់ដឹងអំពីម៉ាកយីហោ

បន្ទាប់ពីទទួលបានការចាប់អារម្មណ៍ពីអតិថិជន ម្ចាស់អាជីវកម្មគ្រប់រូបក៏ចង់ធ្វើឱ្យប្រាកដថាពួកគេចងចាំអាជីវកម្មរបស់ខ្លួន ហើយត្រលប់មកម្តងទៀត។ ជំហាននេះ ការកសាងការយល់ដឹងអំពីម៉ាកយីហោ គឺជាកន្លែងដែលអាជីវកម្មជាច្រើនជួបការលំបាក ជាពិសេសនៅក្នុងទីផ្សារនៃអាជីវកម្មខ្នាតតូច។

ជាដំណោះស្រាយ ម្ចាស់អាជីវកម្មគួរតែ៖

• ធ្វើឱ្យម៉ាកយីហោអាជីវកម្មមានភាពរឹងមាំ
• អភិវឌ្ឍន៍អត្តសញ្ញាណម៉ាកយីហោ និងរឿងរ៉ាវរបស់អាជីវកម្ម ឬរបស់អ្នកផ្ទាល់
• ការធ្វើទីផ្សារដោយផ្សារភ្ជាប់នឹងការធ្វើទំនាក់ទំនងជាមួយអតិថិជន

3. ពិបាកជួលបុគ្គលិកខ្លាំងពូកែ

បញ្ហាសំខាន់បំផុតដែលប្រឈមមុខនឹងអាជីវកម្មខ្នាតតូច គឺគុណភាពការងារ ហើយនៅពេលអាជីវកម្មខ្នាតតូចមានភាពរីកចម្រើន នោះក៏តម្រូវឱ្យម្ចាស់អាជីវកម្មជ្រើសរើសបុគ្គលិកថ្មីម្នាក់ឬច្រើននាក់ ប៉ុន្តែអ្វីដែលជាបញ្ហាចោទនោះ គឺពិបាកស្វែងរកមនុស្សដែលមានសមត្ថភាពខ្លាំងឬសក្តិសមនឹងមុខតំណែងដែលកំពុងជ្រើសរើស។

ជាដំណោះស្រាយ ម្ចាស់អាជីវកម្មគួរតែ៖

• ស្វែងរកអ្នកដែលមានសមត្ថភាពនិងមានអាកប្បកិរិយាល្អៗឱ្យបានច្រើន ដោយធ្វើយ៉ាងណាឱ្យពួកគេមើលឃើញពីបេសកកម្មក្រុមហ៊ុនឬគុណតម្លៃដែលពួកគាត់ចង់បាន ព្រមទាំងធ្វើឱ្យពួកគាត់បានមើលឃើញថា គាត់អាចរីកចម្រើននៅកន្លែងក្រុមហ៊ុនរបស់អ្នក
• បង្កើតឱ្យមានដំណើរការជ្រើសរើសបុគ្គលិកដ៏ល្អ និងការចាប់ផ្តើមដែលមានគុណតម្លៃខ្ពស់
• កំណត់បុគ្គលិកលក្ខណៈសម្រាប់បុគ្គលិក ដើម្បីងាយស្រួលក្នុងការជ្រើសរើស

4. ការធ្វើផែនការហិរញ្ញវត្ថុ

ការដែលមានដើមទុនច្រើននៅក្នុងអាជីវកម្ម គឺជួយបង្កើនសមត្ថភាព ប្រសិទ្ធភាព និងគុណភាពនៅក្នុងអាជីវកម្ម។ ប៉ុន្តែអ្វីដែលជាបញ្ហាប្រឈមចំពោះអាជីវកម្មខ្នាតតូច គឺការពិបាកក្នុងការធ្វើផែនការហិរញ្ញវត្ថុឱ្យមានប្រសិទ្ធភាពខ្ពស់ ដូចជាពិបាកក្នុងការប្រើប្រាស់សាច់ប្រាក់ឱ្យបានល្អ និងពិបាកក្នុងការគ្រប់គ្រងលំហូរសាច់ប្រាក់។

ជាដំណោះស្រាយ ម្ចាស់អាជីវកម្មគួរតែ៖

• មានចំណេះដឹងផ្នែកគ្រប់គ្រងហិរញ្ញវត្ថុ និងជំនាញគណនេយ្យ
• ជ្រើសរើសបុគ្គលិកដែលជាអ្នកជំនាញផ្នែកគណនេយ្យ និងផ្នែកគ្រប់គ្រងហិរញ្ញវត្ថុ ឬអាចស្វែងរកអ្នកប្រឹក្សាហិរញ្ញវត្ថុ ដើម្បីអាចជួយក្នុងការវិភាគស្ថានភាពហិរញ្ញវត្ថុនិងជួយអ្នកឱ្យសម្រេចចិត្តបានល្អជាងមុន

5. កង្វះដើមទុន និងបញ្ហាលំហូរសាច់ប្រាក់

ការដែលមានដើមទុននិងលំហូរសាច់ប្រាក់នៅក្នុងអាជីវកម្មល្អ គឺជាសរសៃឈាមជីវិតរបស់អាជីវកម្ម ដោយផ្តល់ទាំងសាច់ប្រាក់ប្រតិបត្តិការ និងអាចពង្រីកឬច្នៃប្រឌិតបន្ថែមនៅក្នុងអាជីវកម្ម ប៉ុន្តែអ្វីដែលជាបញ្ហាប្រឈមដ៏ធំបំផុតដែលអាជីវកម្មខ្នាតតូចប្រឈមមុខ គឺកង្វះដើមទុននិងបញ្ហាលំហូរសាច់ប្រាក់។

ជាដំណោះស្រាយ ម្ចាស់អាជីវកម្មគួរតែ៖

• ស្វែងរកដើមទុនពីដៃគូសហការ ឬផ្សេងៗទៀត
• ចេះគ្រប់គ្រងដើមទុន និងលំហូរសាច់ប្រាក់ឱ្យមានដំណើរការល្អ

6. កង្វះបច្ចេកវិទ្យា

នៅក្នុងសម័យនេះ បច្ចេកវិទ្យាមានសារៈសំខាន់ណាស់សម្រាប់ប្រើប្រាស់នៅក្នុងគ្រប់ប្រភេទអាជីវកម្ម ដូច្នេះអាជីវកម្មខ្នាតតូច ក៏ត្រូវការបច្ចេកវិទ្យាសម្រាប់ប្រតិបត្តិការប្រចាំថ្ងៃដែរ។ ប៉ុន្តែអ្វីដែលជាបញ្ហាប្រឈមចំពោះអាជីវកម្មខ្នាតតូចនោះ គឺកង្វះបច្ចេកវិទ្យា ដែលជាហេតុធ្វើឱ្យបាត់បង់នូវការបង្កើតទំនាក់ទំនងដ៏មានប្រសិទ្ធភាពជាមួយអតិថិជន ធ្វើឱ្យប្រតិបត្តិការដំណើរការមិនរលូន ពិបាកបត់បែនក្នុងប្រតិបត្តិការអាជីវកម្ម និងមានការចំណាយច្រើនលើការធ្វើទីផ្សារជាដើម។

ជាដំណោះស្រាយ ម្ចាស់អាជីវកម្មគួរតែ៖

• ត្រូវតែមានចំណេះដឹងឱ្យបានច្រើនពាក់ព័ន្ធនឹងបច្ចេកវិទ្យា
• ជ្រើសរើសបុគ្គលិកដែលមានជំនាញខ្លាំងលើបច្ចេកវិទ្យា
• សេពគប់ជាមួយបុគ្គលដែលមានចំណេះដឹងផ្នែកបច្ចេកវិទ្យាឱ្យបានច្រើននិងអាចប្រឹក្សាឬសហការជាមួយនឹងពួកគេ