ជាការពិតណាស់ សម្រាប់អ្នកដែលចូលចិត្តអាននៅពេលដែលពួកគេចាប់កាន់សៀវភៅ ប្រៀបបីដូចជាពួកគេទទួលបាននូវរបស់ដែលមានតម្លៃនៅក្នុងដៃអញ្ចឹង ព្រោះពួកគេយល់ថាមិនត្រឹមតែទទួលបានកម្សាន្តអារម្មណ៍នៅពេលដែលពួកគេធុញថប់ ប៉ុន្តែវាថែមទាំងផ្តល់នូវចំណេះដឹងផ្សេងៗជាច្រើនដែលពួកគេអាចយកវាទៅប្រើប្រាស់នៅក្នុងជីវិតប្រចាំថ្ងៃរបស់ពួកគេបាន។  តែសម្រាប់អ្នកដែលគិតថាខ្លួនឯងជាមនុស្សដែលមិនចូលចិត្តនូវការអានសៀវភៅ អ្វីដែលពួកគេយល់នោះគឺសៀវភៅជាថ្នាំងងុយដេកទៅវិញ ព្រោះសម្រាប់ពួកគេរាល់ពេលចាប់កាន់សៀវភៅហើយចាប់ផ្តើមអានមិនដល់៥នាទីក៏អាចធ្វើឲ្យពួកគេស្ងាបហើយចាប់ផ្តើមមានអារម្មណ៍ធុញទ្រាន់ នោះជាហេតុផលដែលធ្វើឲ្យពួកគេបោះបង់ចោលនូវការអាន តែអ្នកទាំងអស់គ្នាគួរគិតជាថ្មីថានោះមិនមែនជាឧបសគ្គសម្រាប់អ្នកក្នុងការអានសៀវភៅទៀតទេ ពួកយើងទាំងអស់គ្នាគួរបង្កើតទម្លាប់នៃការអានសៀវភៅ ព្រោះថាប្រទេសជឿនលឿនជាច្រើននៅលើសកលលោកអាចរីកចម្រើនទៅមុខបានត្រូវការៗចូលរួមពីអ្នកដែលមានចំណេះដឹងគ្រប់គ្នា។ ហើយដើម្បីជាជំនួយសម្រាប់អ្នកដែលចាប់ផ្តើមនូវការអានសៀវភៅ ពួកយើងនឹងចែកជូននូវវិធីសាស្ត្រខ្លះៗដល់អ្នកអ្នកទាំងអស់គ្នា ដែលយើងបានលើកនូវចំណុចដូចជា៖

• ជ្រើសរើសសៀវភៅដែលផ្តល់នូវគុណតម្លៃ

ការអានសៀវភៅឬអត្ថបទផ្សេងៗមិនខុសពីការដែលអ្នកតាមដានខ្សែរឿងភាគនោះទេ ព្រោះនៅពេលដែលអ្នកទស្សនាភាពយន្តនោះអ្នកប្រាកដជាបានសង្កេតឃើញថានៅក្នុងភាពយន្តនីមួយៗអ្នកនិពន្ធតែងតែបង្កប់នូវចំណេះដឹងក៏ដូចជាតម្លៃអប់រំផ្សេងៗតាមរយៈតួអង្គឬសាច់រឿងទាំងមូលផងដែរ ប៉ន្តែអ្នកក៏ត្រូវមើលដែរថាតម្លៃអប់រំទាំងអស់នោះបានជះឥទ្ធិពលអ្វីមកលើជីវិតរស់នៅបច្ចុប្បន្នរបស់អ្នក។  ចំពោះការអានសៀវភៅលើសពីការកម្សាន្តជាច្រើន ប៉ុន្តែវាជាគោលដៅមួយដែលនាំឲ្យអ្នកទទួលបាននូវអ្វីដែលល្អប្រសើរ។  អ្នកទាំងអស់គ្នាគប្បីជ្រើរើសសៀវភៅណាដែលផ្តល់នូដំណោះស្រាយក៏ដូចជាចំណេះដឹងដែលទាក់ទងនឹងមុខវិជ្ជាដែលអ្នកកំពុងសិក្សារ ឬមុខរបររកស៊ីរបស់អ្នកជាដើម។

• ចាប់ផ្តើមអានតាមពេលវេលាកំណត់មួយ

ជាទូទៅមនុស្សម្នាក់ៗមានកិច្ចការផ្សេងៗគ្នា ប៉ុន្តែអ្នកទាំងអស់គ្នាគួររៀបចំនូវកាលវិភាគមួយសម្រាប់ខ្លួនឯង ព្រោះថាការកំណត់ពេលវេលាជាក់លាក់មួយប្រៀបដូចជាកិច្ចការប្រចាំថ្ងៃមួយដែលអ្នកត្រូវតែអនុវត្តដោយខានមិនបាន។ អ្នកអាចចំណាយពេលវេលាណាមួយដែលអ្នកយល់ថាសក្តិសម។  អ្នកអាចចាប់ផ្តើមដោយការអាននៅវេលាសម្រាកពីការសិក្សានៅសាលា ចន្លោះពេលសម្រាកពីការងារ ឬក្រោយពេលបំពេញកិច្ចការប្រចាំថ្ងៃរួចរាល់។  ម៉្យាងវិញទៀត អ្នកគួរចំណាយពេល១ម៉ោងឬ២ម៉ោងក្នុងមួយថ្ងៃ ឬ៥ថ្ងៃក្នុងមួយសប្តាហ៍ តែបើសិនជាអ្នកអាចចំណាយពេលបានច្រើនជាងនេះតាមដែលអ្នកអាចធ្វើបាន។ ហើយបន្ទាប់មកព្យាយាមកត់ត្រានូវចំណុចសំខាន់ៗដែលអ្នកបានអានរួច។

• ជ្រើសរើសបរិយាកាស

ក្នុងការធ្វើអ្វីមួយ បរិយាកាសក៏ជាកត្តតាដែលជួយជម្រុញផ្លូវចិត្ត និងជាផ្នែកមួយដែលជះឥទ្ធិពលក្នុងការផ្តោតអារម្មណ៍ផងដែរ។ បន្ទាប់ពីអ្នកដឹងថាគួរអានសៀវភៅបែបណា និងក្នុងពេលវេលាបែបណាហើយនោះ អ្នកក៏ត្រូវដឹងពីទីកន្លែងដែលជួយអ្នកឱ្យអានឆាប់យល់ និងចងចាំបានល្អ។ ចំពោះទីតាំងដែលអ្នកគួរជ្រើសរើសនោះគួរតែជាកន្លែងដែលស្ងប់ស្ងាត់ និងមានសំលេងតិចមិនសូវរំខានដ៏ការអានសៀវភៅរបស់អ្នក ដែលស្របជាមួយនឹងបរិយាកាសមានសោភណភាព និងផាសុកភាពដែលមិនប៉ះពាល់ដល់ការផ្ចង់អារម្មណ៍របស់អ្នក។  ហើយចំពោះឧបករណ៍ផ្សេងៗដែលអាចបង្កការរំខាន់ដល់អ្នក គួរតែដាក់ទៅឲ្យឆ្ងាយពីខ្លួនរបស់អ្នក ព្រោះដើម្បីឲ្យអ្នកបានយកចិត្តទុកដាក់អានសៀវភៅបានល្អ។

• ឲ្យរង្វាន់ខ្លួនឯង

ចំពោះចំណុចនេះយើងត្រូវភ្ជាប់វាជាមួយចំណុចទីពីរ ព្រោះថាការកំណត់គោលដៅក្នុងការអាន គឺអាស្រ័យទៅលើអ្នកជាអ្នកកំណត់ខ្លួនឯង។ មានន័យថា អ្នកអាចកំណត់គោលដៅក្នុងការអានជាជំហ៊ានៗដូចជា តាមថេរវេលា ចំនួនទំព័រ ចំនួនមេរៀន និងចំនួនថ្ងៃ ខែ ឆ្នាំ។ ហើយបន្ទាប់ពីអ្នកបានសម្រេចគោលដៅរួចហើយអ្នកអាចលើកទឹកចិត្តខ្លួនឯងដោយនិយាយពាក្យអបអរសាទរ  ការចែករំលែកភាពជោគជ័យរបស់យើងជាមួយមិត្ត ក្រុមគ្រួសារ ឬមនុស្សពិសេសរបស់អ្នក ឬទៅទីកន្លែងកម្សាន្តផ្សេងផងដែរ។

• អនុវត្តអ្វីដែលបានរៀន

ចំណុចចុងក្រោយ ដើម្បីវាស់វែងថាតើអ្នកបានយល់ និងចេះចាំមេរៀនដែលអ្នកបានអានរួចបានប៉ុណ្ណា អ្នកត្រូវតែយកមេរៀនទាំងនោះមកអនុវត្តន៍ស្ថានភាពជាក់ស្ដែង សង្ខេបខ្លឹមសារសំខាន់ៗឡើងវិញ ឬអភិវឌ្ឍន៍ទ្រឹះស្តីដែលមានតម្លៃបន្ត ព្រោះបើអ្នកគ្រាន់តែអានដើម្បីឲ្យតែមានព័ត៌មាននៅក្នុងខួរក្បាល នោះថ្ងៃណាមួយអ្នកនឹងភ្លេចវិញ ដូច្នេះអ្វីដែលអ្នកបានសិក្សារកន្លងមក គួរយកវាមកប្រើប្រាស់ទៅលើជីវិតរស់នៅប្រចាំថ្ងៃរបស់អ្នក។

       ពិចារណាវិធី៨យ៉ាងនេះនឹងធ្វើឲ្យការងាររបស់អ្នកកាន់តែគួរឲ្យចាប់អារម្មណ៍ និង ពេញចិត្ត ហើយគំនិតទាំងនេះអាចមិនត្រឹមតែធ្វើឲ្យអ្នកសប្បាយចិត្តនៅកន្លែងធ្វើការប៉ុណ្ណោះទេ ប៉ុន្តែវាថែមទាំងជួយអ្នករក្សានូវនិរន្តរភាព អត្ថប្រយោជន៍ កម្រិតផាសុកភាព និង កេរ្តិ៍ឈ្មោះដែលអ្នកបានខិតខំយ៉ាងខ្លាដើម្បីរកប្រាក់ចំណូល។ដូចនេះចំណុចខាងក្រោម

១. ស្ម័គ្រចិត្តក្នុងការបំរើការងារថ្មីដែលវាទាក់ទងជាមួយនិងកិច្ចការស្រាវជ្រាវ

នៅក្នុងអង្គភាពអាជីវកម្មភាគច្រើន ពួកគេអាចនឹងត្រូវការបេក្ខជនស័្មគ្រចិត្ត ឬ បុគ្គលិកស្ម័គ្រចិត្តដើម្បីជួយសម្របសម្រួលការងារ ជួយធ្វើបទបង្ហាញដើម្បីបំផុសគំនិតជួយដល់បុគ្គលិកថ្មី ឬ ត្រូវជួយសរសេរអត្ថបទឲ្យក្រុមហ៊ុនជាដើម ដែលសកម្មភាពទាំងនេះគឺជាឱកាសដើម្បីហាត់ពត់ និង ពង្រឹងសមត្ថភាពរបស់អ្នកឲ្យកាន់តែរីកចម្រើនជាងមុន ហើយវាក៏ជាចំណុចមួយដែលធ្វើឲ្យការងាររបស់អ្នកកាន់តែរីកចម្រើនឡើង និង ទទួលបាននូវការសរសើរពីក្រុមហ៊ុនផងដែរ។ យ៉ាងណាមិញបើអ្នកដាក់ចិត្តដាក់កាយទៅលើការងារស្ម័គ្រចិត្តនោះហើយ អ្នកត្រូវតែច្បាស់ថា ការងារស្ម័គ្រចិត្តដែលអ្នកចង់ទៅធ្វើនោះគឺត្រូវទាក់ទងជាមួយជំនាញ និង អាជីពរប​ស់អ្នក។ដូចនេះបើសិនជាអ្នកចង់ដឹងព័ត៌មានទាក់ទងនឹងការងារស្ម័គ្រចិត្តនេះ អ្នកអាចសួរទៅកាន់ផ្នែក​គ្រប់គ្រងធនធានមនុស្ស ឬ អ្នកគ្រប់គ្រងស្ថាប័នផ្ទាល់ក៏បានដើម្បីដឹងពីដំណើរការនៃការជ្រើសរើសនេះ។

២. ផ្ដល់ជូនដើម្បីជួយមិត្តរួមការងាររបស់អ្នក

តាមការស្រាវជ្រាវបាន​បង្ហាញថាការជួយការងារដល់មិត្តរួមការងារអាចធ្វើឲ្យអ្នកទទួលបានចំណេះដឹង និង ចំណេះធ្វើបានច្រើន ព្រមទាំងជួយបង្កើនទំនាក់ទំនងបានកាន់តែជិតស្និទ្ធផងដែរ ដូចនេះអ្នកអាចសួរអ្នកគ្រប់គ្រងរបស់អ្នកពីរបៀបដែលអាចបង្កើនជំនាញនិង បទពិសោធន៍របស់អ្នកដើម្បីគាំទ្រសហការីដែលជាមិត្តរួមការងារជាមួយគ្នា។ ដោយពេលខ្លះអ្នកធ្វើការនៅជាន់ជាមួយអ្នកដែលត្រូវការអ្នកដើម្បីជួយក្នុងការបំពេញការងារ ដូចជា ជួយជួសជុលកុំព្យូទ័រ ជួយពិនិត្យឯកសារ ឬ ជួយសរសេរអត្ថបទជាដើម។ដូចនេះដើម្បីក្លាយឈ្មោះជាបុគ្គលិកល្អម្នាក់​អ្នកគួរតែចេះជួយយកអាសារមិត្តរួមការងាររបស់អ្នក និង ចែករំលែកចំណេះដឹងទៅឲ្យគ្នាទៅវិញទៅមកទើបជួយអភិវឌ្ឍសមត្ថភាពរបស់អ្នកឲ្យកាន់តែរីកចម្រើនបាន។

៣.​ ចំណាយពេលដើម្បីឲ្យតម្លៃចំពោះអ្នកដទៃដោយអត្ថន័យ

មនុស្សគ្រប់គ្នាសុទ្ធតែចង់បានការសរសើរ ការឲ្យតម្លៃចំពោះគ្នានិងគ្នា ជាពិសេសដូចដែលអ្នកបានដឹងរួចហើយថាការផ្ដល់ឲ្យមានអារម្មណ៍ល្អទៅកាន់អ្នកដទៃនឹងជួយបង្កើនការបំពេញវិជ្ជាជីវៈរបស់អ្នកដោយទទួលស្គាល់ថាវាជាការងារដ៏ល្អប្រសើរមួយដើម្បីជួយលើកទឹកចិត្តនិងសរសើរទៅកាន់សហការីរបស់អ្នកដោយផ្ទាល់នៅក្នុងអ៊ីម៉ែល នៅក្នុងកិច្ចប្រជុំ និង​តាមរយៈវេទិកាទំនាក់ទំនងផ្ទៃក្នុងជាដើម។ អ្នកត្រូវប្រាកដក្នុងចិត្តថាការនិយាយរបស់អ្នកត្រូវមានលក្ខណៈពេញលេញ និង ត្រឹមត្រូវ ដែលវាមិនមែននិយាយត្រឹមតែ ជាការអរគុណនោះទេ ។ដូចនេះការផ្ដល់កិត្តិយស និង និយាយសរសើរជាសាធារណៈដែលប្រកបទៅដោយអត្ថន័យដល់អ្នកដទៃក៏ជួយពង្រឹងកេរ្តិ៍ឈ្មោះរបស់អ្នក និង តម្លៃរបស់អ្នកដែរ។

៤. ចូលរួមទាំងសកម្មភាពខាងក្រៅនិងខាងក្នុង ដើម្បីជួយពង្រីកនូវចំណេះជំនាញរបស់អ្នក

       វាអាចជាជំនាញរបស់អ្នកដែលត្រូវតែទទួលការអភិវឌ្ឍ មិនមែនជាការងាររបស់អ្នកនោះទេ។ អ្នកត្រូវកំណត់ចំណាំចំពោះតំបន់ណាដែលអាចធ្វើឲ្យអ្នកទទួលបានការអភិវឌ្ឍ និង អាចស្វែងរកឱកាសក្នុងការសម្រេចនូវកិច្ចការសំខាន់ណាមួយបាន។សកម្មភាពនៅខាងក្រៅ វាពិតជាងាយស្រួលក្នុងការស្វែងរក ប៉ុន្តែដំបូងអ្នកត្រូវពិនិត្យទៅលើការរៀនសូត្រ និង ការអភិវឌ្ឍនៅក្នុងអង្គភាពអាជីវកម្ម ឬ នៅក្នុងក្រុមហ៊ុន ដូចជាការចូលរួមធ្វើបទបង្ហាញ ឬ ការធ្វើសិក្ខាសិលាជាដើម។ ម្យ៉ាងវិញទៀតការទទួលយកវគ្គសិក្សាខាងក្នុងក៏នឹងជួយបង្កើនការប្រឈមរបស់អ្នកចំពោះមនុស្សថ្មីនៅក្នុងក្រុមហ៊ុន ដែលអាចធ្វើឲ្យបទពិសោធន៍ការងាររបស់អ្នកកាន់តែរីកចម្រើនឡើង និង មានពូកែខាងផ្នេកទំនាក់ទំនង។

៥. ណែនាំខ្លួនអ្នកទៅកាន់មិត្តរួមការងារថ្មី និង ចូលរួមគ្រប់សកម្មភាពដែលទាក់ទងនឹងសង្គម

       ណែនាំខ្លួនឯងទៅឲ្យមនុស្សជុំវិញខ្លួនបានស្គាល់ វាជាឱកាសដែលអ្នកអាចបង្កើតទំនាក់ទំនងជិតស្និទ្ធជាមួយនឹងបុគ្គលិកការងារនៅក្នុងក្រុមហ៊ុន ជាពិសេសនៅពេលដែលអ្នកស្គាល់មនុស្សបានច្រើនអ្នកក៏ងាយស្រួលក្នុងការបំពេញការងារផងដែរ។ ជាងនេះទៅទៀតអ្នកក៏គួរតែចូលរួមគ្រប់សកម្មភាពសង្គមផងដែរ ដូចជាការ ជួយកុមារកំព្រា ការចូលរួមក្នុងការថែរក្សាបរិស្ថាន ឬ ជួយចែករំលែកចំណេះដឹងទៅកាន់អ្នកដទៃជាដើម ដើម្បីបង្ហាញពីការខ្វល់ខ្វាយពីស្ថានភាពនៅក្នុងសង្គម។

 ៦. រៀបចំកន្លែងធ្វើការរបស់អ្នកឡើងវិញ

 រៀបចំកន្លែងធ្វើការនៅត្រង់នេះមានន័យថា អ្នកត្រូវចេះបង្កើតនូវបរិយាកាសការងារឲ្យមានភាពស្រស់ស្រាយ និង សប្បាយរីករាយជាមួយគ្នានៅកន្លែងការងាររបស់អ្នក ឬ រៀបចំការតុបតែងការិយាល័យរបស់អ្នកឲ្យបានស្អាត និង មានផាសុខភាពល្អ។ តើមានអ្វីដែលនៅចំពោះមុខអ្នក និង​ នៅជុំវិញអ្នក ដែលធ្វើឲ្យអ្នកសប្បាយចិត្ត ឬ​ រំឮកអ្នកពីមនុស្សជាទីស្រលាញ់​ ឬ ទីកន្លែងដែលអ្នកស្រលាញ់ដែរឬទេ? បើសិនជាមិនមានទេនោះ អ្នកអាចចាប់ផ្ដើមធ្វើនូវជំហានតូចៗ និង សាមញ្ញៗ ដូចជាដាក់ស៊ុមរូបថតគ្រួសារអ្នក ឬ មនុស្សជាទីស្រលាញ់របស់អ្នក ដាក់ថូផ្កា តាំងនូវពានរង្វាន់ដែលអ្នកធ្លាប់ទទួលបាន ឬ មួយក៏រៀបចំកម្រាលឥដ្ឋដែលអ្នកចូលចិត្តជាដើម។ ប្រសិនជាមានរបស់របរទាំងនេះនៅទីតាំងដែលអ្នកធ្វើការ វានឹងជួយជម្រុញឲ្យអ្នកមានមោទនភាព និង តែងតែទទួលបានជោគជ័យគ្រប់ភារកិច្ចទាំងអស់ ព្រោះរបស់ទាំងនោះនឹងលើកទឹកចិត្តអ្នកឲ្យក្រោកឈរឡើង ហ៊ានប្រឈមមុខនឹងវា ទោះបីជាមានឧបសគ្គមកតោងទាមក៏ដោយ។ដូចនេះដើម្បីជាការលើកទឹកចិត្តក្នុងពេលធ្វើការអ្នកគួរតែរៀបចំតុបតែងកន្លែងធ្វើការរបស់អ្នកឲ្យមានសោភណភាពល្អ និង តុបតែងនូវវត្ថុណាដែលជួយលើកកម្លាំងចិត្តដល់អ្នក។

៧.  ចំណាយពេលឲ្យបានច្រើនដើម្បីបញ្ចូលថាមពលឲ្យបានពេញលេញ

       ចំណាយពេលឲ្យខ្លួនឯងបានសម្រាក ពោលគឺ សម្រាកទាំងកម្លាំងខួរក្បាល និង កម្លាំងកាយ  ហើយក៏ត្រូវចំណាយពេលខ្លះដើម្បីបញ្ចូលនូវថាមពលខ្លះៗដែរដើម្បីកាត់បន្ថយភាពតុកស៊ីកមួយចំនួន។ដូចនេះអ្នកត្រូវយកចិត្តទុកដាក់ក្នុងការរក្សាឲ្យបាន នូវតុល្យភាពរវាងការងារ និង ជីវិតរបស់អ្នក មានន័យថា អ្នកមានពេលសម្រាប់ធ្វើការ ហើយអ្នកក៏មានពេលក្នុងការដើរលេង សម្រាកលំហែកាយផងដែរ។  យ៉ាងណាមិញបើអ្នកមានភាពស្មុគស្មាញគិតមិនចេញ ដោះស្រាយមិនកើត អ្នកអាចទុកកិច្ចការនោះមួយភ្លេតសិន ហើយទុកពេលឲ្យខ្លួនឯងសម្រាកបន្តិច ឬ ដើរជុំវិញនៅកន្លែងធ្វើការរបស់អ្នកដើម្បីធ្វើចលនាខ្លះដើម្បីកុំឲ្យអង្គុយនៅមួយកន្លែងពេក ព្រោះការដើរនេះអាចជួយសម្រួលនូវថាមពលរបស់អ្នកឲ្យបានប្រសើរឡើងវិញ។

៨.  ធ្វើនូវចំណង់ចំណូលចិត្ត ឬ សកម្មភាពថ្មីជាក់លាក់មួយ

អ្នកគួរតែធ្វើអ្វីមួយនៅក្នុងជីវិតផ្ទាល់ខ្លួនរបស់អ្នកឲ្យមានភាពរីករាយ និង ទទួលបាននូវទិន្នផលមួយខ្ពស់ ព្រោះការធ្វើអ្វីដែលអ្នកប្រាថ្នាចង់ធ្វើនឹងជួយកាត់បន្ថយនូវសម្ពាធ និង ភាពតានតឹងរបស់អ្នក ហើយវាជួយឲ្យអ្នកបានជួបនឹងជីវិតមួយដ៏ស្រស់ស្អាត រំភើប និង ពោរពេញទៅដោយសុភមង្គល។ ម្យ៉ាងទៀតអ្នកក៏គួរតែធ្វើសកម្មភាពណាថ្មីៗដែលអ្នកមិនធ្លាប់ធ្វើ ព្រោះការដែរធ្វើអ្វីប្លែកចម្លែកអារម្មណ៍នឹងធ្វើឲ្យអ្នកបានយល់ បានស្គាល់គ្រប់កិច្ចការទាំងអស់ ហើយវាក៏ជួយបង្កើននូវសមត្ថភាពរបស់អ្នកផងដែរ។

អាកប្បកិរិយាដែលអ្នកបានបង្ហាញជាលើកដំបូងនៅពេលជួបនរណាម្នាក់គឺពិតជាសំខាន់ណាស់សម្រាប់អ្នក ព្រោះមនុស្សភាគច្រើនចូលចិត្តវិនិច្ឆ័យចំណេះដឹង អត្តចរិក និង បុគ្គលិកលក្ខណៈរបស់អ្នកដទៃតាមរយៈកត្តាខាងក្រៅ(ការតុបតែងខ្លួន)។ បើកត្តាខាងក្រៅរបស់អ្នកមើលទៅស្អាតបាតសាកសមជាអ្នកអាជីព នោះ ពួកគេប្រាកដជាចាត់ទុកអ្នកជាមនុស្សម្នាក់ដែលមានចំណេះដឹងខ្ពស់ជាមិនខាន។ដូចនេះថ្ងៃនេះយើងនឹងលើកយកវិធី៧យ៉ាងដើម្បីធ្វើឲ្យខ្លួនឯងទទួលបាននូវការចាប់អារម្មណ៍ជាលើកដំបូងនៅកន្លែងធ្វើការ៖

១. ការស្លៀកពាក់

ការស្លៀកពាក់ វាគឺជារឿងសំខាន់មួយដែលអាចទាក់ភ្នែកមនុស្សគ្រប់គ្នាបាន ហើយវាក៍អាចធ្វើឲ្យពួកគេគោរពស្រលាញ់ និង ឲ្យតម្លៃអ្នកបានដែរ អាស្រ័យទៅលើរបៀបនៃការតុបតែងខ្លួនអ្នក។ យើងបានដឹងហើយថា រឿងដំបូងដែលមនុស្សតែងផ្ដោតអារម្មណ៍ និង វិនិច្ឆ័យទៅលើមនុស្សថាជាមនុស្សបែបណា មានអត្តចរិតបែបណានោះគឺវាស្ថិតនៅលើរូបរាងខាងក្រៅ ម្យ៉ាងទៀតការស្លៀកពាក់ឲ្យបានត្រឹមត្រូវ នឹង ធ្វើឲ្យអ្នកមានទំនុកចិត្ត និង មានភាពជឿជាក់លើខ្លួនឯងក្នុងការសម្រេចកិច្ចការអ្វីមួយ។​ ដូច្នេះហើយបើសិនជាអ្នក ត្រូវទៅសម្ភាសន៍ជាមួយនឹងអ្នកគ្រប់គ្រងក្រុមហ៊ុន អ្នកត្រូវរៀបចំខ្លួនឲ្យបានស្អាត សាកសមជាអ្នកអាជីពទើបអ្នកអាចមានភាគរយខ្ពស់ដើម្បីទទួលបានការងារនោះ។

២. ដាក់ខ្លួនអ្នកនៅទីនោះ

ប្រសិនបើអ្នកអាចកម្ចាត់ភាពខ្មាសអៀនរបស់អ្នកនៅកន្លែងធ្វើការថ្មីរបស់អ្នកបាន អ្នកប្រាកដជាអាចបំបាក់នូវរនាំងដែកដែលអ្នកតែងតែជួបនោះបានយ៉ាងងាយគឺ អ្នកគ្រាន់តែទុកខ្លួនឯងនៅទីនោះ ដូច្នេះក្រុមរបស់អ្នកនឹងព្យាយាមស្វែងយល់ពីអ្នក។

៣. ស្វែងរកវិធីដើម្បីជម្រុញការសន្ទនារបស់អ្នក

មានវិធីសាស្ត្រជាច្រើនដែលអ្នកអាចបង្កើតបានក្នុងការជម្រុញនូវការសន្ទនាក្រៅផ្លូវការរបស់អ្នកបាន ដូចជា ពេលញ៉ាំអាហារ ញ៉ាំកាហ្វេ និង ពេលសម្រាកជាដើម។ពេលណាដែលអ្នកកាន់តែមានការសន្ទនាគ្នា នោះទំនាក់ទំនងរបស់អ្នកកាន់តែមានភាពរឹងមាំ ពង្រីកបានកាន់តែធំ និង មានស្ថេរភាពបានយូរអង្វែង។

៤. ចិត្តល្អ និង មានភាពច្បាស់លាស់

វិធីល្អបំផុតក្នុងចំណោមវិធីផ្សេងៗទៀតដើម្បីធ្វើឲ្យមានអារម្មណ៍វិជ្ជមានចំពោះមិត្តរួមការងារថ្មី គឺគ្រាន់តែបង្ហាញនូវទឹកចិត្តល្អ ចេះជួយយកអាសារគ្នា ចេះឲ្យតម្លៃគ្នា និង គោរពគ្នាគឺគ្រប់គ្រាន់ទៅហើយ។ ជាពិសេសនៅពេលណាដែលអ្នកមានភាពហ្មត់ចត់ មានភាពច្បាស់លាស់ចំពោះការងារ និង តួនាទីដែលជាកាតព្វកិច្ចរបស់ខ្លួនឯង នោះមនុស្សគ្រប់គ្នានឹងគោរពស្រលាញ់អ្នក  និង អាចទទួលបាននូវចំណាប់អារម្មណ៍របស់អ្នកផងដែរ។ដូចនេះដើម្បីទទួលបាននូវការចាប់អារម្មណ៍ពីអ្នកដទៃ មិនថានៅកន្លែងការងារ ឬ កន្លែងណាក៏ដោយ អ្នកត្រូវបង្ហាញនូវសន្ដានចិត្តល្អ ភាពច្បាស់លាស់ និង ភាពប្រាកដប្រជាដែលអ្នកមានទៅកាន់ពួកគេ។

៥. ទទួលយកនូវក្រុមរបស់អ្នក

រាល់សមាជិកថ្មីដែលទើបតែនឹងចូលធ្វើការថ្មីៗ ពួកគេគួរតែចំណាយពេលមួយចំនួនខ្លីដើម្បីស្គាល់ពីសមាជិកដទៃនៅក្នុងក្រុមរបស់ពួកគេ ទើបជួយឲ្យបុគ្គលិកថ្មីសម្របខ្លួនបានលឿនជាងមុន។ម្យ៉ាងវិញទៀតអ្នកមិនត្រូវ

ធ្វើអ្វីមួយដើម្បីតែប្រយោជន៍ខ្លួនឯង តែអ្នកត្រូវធ្វើអ្វីមួយដើម្បីប្រយោជន៍នៅក្នុងក្រុមទាំងមូលរបស់អ្នក ទើបល្អប្រសើរ។

៦. សួរ និង ស្ដាប់

       ការសួរជាសំណួរ និង ការស្ដាប់ដោយយកចិត្តទុកដាក់ វាគឺជាវិធីមួយដែលអ្នកអាចទទួលបានការចាប់អារម្ម​ណ៍លើកដំបូងពីអ្នកដទៃ ព្រោះវាបង្ហាញថា អ្នកពិតជាចង់ដឹង ចង់ឮ ចង់សាក និង ចង់រៀន ជាមួយនឹងការងារនោះពិតមែន ជាពិសេសវានឹង បង្ហាញថាអ្នកពិតជាមានឆន្ទៈក្នុងការចូលរួមចំណែកបេសកកម្មនោះប្រាកដមែន។យ៉ាងណាមិញការចង់រៀនអំពីការងារ និង ការសម្របខ្លួនទៅនឹងការផ្លាស់ប្ដូរនៅកន្លែងធ្វើការ គឺជាលក្ខណៈសំខាន់ពីររបស់និយោជិកដែលមានឧត្តមគតិ។

៧. បង្កើតកេរ្ត៍ឈ្មោះជុំវិញគំនិតផ្ដួចផ្ដើម

គំនិតផ្ដួចផ្ដើម គឺជារឿងសំខាន់បំផុតសម្រាប់និយោជិកថ្មីដើម្បីឈានទៅដល់ការសម្រេចនូវសមិទ្ធផលដ៏ល្អមួយ។បើអ្នកមានគំនិតផ្ដួចផ្ដើមល្អ នោះអ្នកនឹងឆាប់ទទួលបាននូវចំណាប់អារម្មណ៍របស់មនុស្សរាល់គ្នាជាពិសេសអ្នកនឹងទទួលបាននូវការយកចិត្តទុកដាក់ពីមិត្តរួមការងាររបស់អ្នក ជាហេតុធ្វើឲ្យពួកគេបែរមករកអ្នក ចាត់ទុកអ្នកជាមនុស្សសំខាន់ម្នាក់នៅក្នុងក្រុមហ៊ុន។

អារម្មណ៍ល្អឬមិនល្អ គឺអាស្រ័យទៅលើអ្នកខ្លួនឯងជាអ្នកបង្កើត​ ថាតើអ្នកបានធ្វើអ្វី និង បាននិយាយអ្វីខ្លះដើម្បីឲ្យអារម្មណ៍របស់អ្នកបានសប្បាយរីករាយនិងមានថាមពលជារៀងរាល់ថ្ងៃ។ អ្នកប្រាកដជាពិបាក ហើយក៏មិនដឹងថាត្រូវនិយាយអ្វីមកកាន់ខ្លួនឯងជារៀងរាល់ព្រឹកដើម្បីបង្កើតឲ្យមានអារម្មណ៍ដែរ។ ដូចនេះសំណួរខាងក្រោមនេះនឹងជួយអ្នកឲ្យមានអារម្មណ៍ស្រស់ថ្លា និង មានផលិតភាពបានកាន់តែច្រើន៖

១. តើខ្ញុំអរគុណអ្វីខ្លះនៅក្នុងថ្ងៃនេះ?

អ្នកត្រូវអរគុណខ្លួនអ្នក សមត្ថភាពរបស់អ្នក ខួរក្បាលរបស់អ្នក ការខិតខំប្រឹងប្រែងរបស់អ្នក ភាពរឹងមាំរបស់អ្នក និង សុខភាពរបស់អ្នក ព្រោះដោយសារតែពួក​វាទើបអ្នកអាចទទួលបាននូវសម្ធិផល នូវស្នាដៃដែលអ្នកប្រាថ្នាចង់បាន។ ដូចនេះ ចូរអ្នកអរគុណរាល់អ្វីៗដែលបានជួយអ្នកឲ្យរួចផុតពីបញ្ហា រួចផុតពីភាពហ្មងសៅ និងរួចផុតពីអារម្មណ៍មិនដាច់ស្រឡះដែលអ្នកមាន ហើយបង្ហាញនូវការអរគុណនេះមកកាន់ខ្លួនឯងជារៀងរាល់ព្រឹកដើម្បីឲ្យអារម្មណ៍របស់អ្នកមានភាពធូរស្បើយ និង មានថាមពលក្នុងការបោះជំហានទៅមុខទៀត។

២. តើនរណាដែលខ្ញុំត្រូវអរគុណនៅក្នុងថ្ងៃនេះ?

ពេលដែលអ្នកមានអារម្មណ៍ដឹងគុណ ឬ បង្ហាញការថ្លែងអំណរគុណទៅកាន់នរណាម្នាក់ដែលអ្នកគិតថាសាកសមនឹងទទួល នោះការថ្លែងអំណរគុណរបស់អ្នកនឹងធ្វើឲ្យអ្នកមានអារម្មណ៍ស្រស់ស្រាយ សប្បាយរីករាយ និង មានទឹកមុខស្រស់បស់ពោរពេញទៅដោយថាមពល ក្ដីសង្ឃឹម និង ក្ដីស្រលាញ់ទៅកាន់មនុស្សជុំវិញខ្លួន។ដូចនេះអ្នកគួរតែជ្រើសរើសអ្វីមួយមិនថារបស់នោះជារបស់តូចឬធំ មានតម្លៃឬមិនមានតម្លៃនោះទេជូនទៅដល់ពួកគេ ដើម្បីបង្ហាញពីការអរគុណ និង ការដឹងគុណរបស់អ្នកចំពោះពួកគេ។អ្នកនឹងឃើញទង្វើ និង ការគិតរបស់អ្នកនៅពេលដែលអ្នកធ្វើដូច្នេះ ពីព្រោះការសម្ដែងនូវការអរគុណចំពោះអ្នកដទៃគឺប្រៀបបានទៅនឹងការអរគុណនូវអ្វីដែលខ្លួនបានធ្វើយ៉ាងហ្នឹងដែរ។ អ្នកអាចសាកស្វែងរកនរណាម្នាក់ដើម្បីបង្ហាញនូវការដឹងគុណចំពោះពួកគេ ដូចជាឪពុកម្ដាយ បងប្អូន លោកគ្រូអ្នកគ្រូ មនុស្សជាទីស្រលាញ់ មេរបស់អ្នក ឬ មិត្តភក្តិរបស់អ្នកជាដើម ថាតើបន្ទាប់ពីអ្នកធ្វើបែបនោះហើយអ្នកនឹងមានអារម្មណ៍បែបណា?សប្បាយរីករាយ ឬ កើតទុក្ខ? ស្រស់ស្រាយ ឬ តប់ប្រមល់នៅក្នុងខ្លួន?អ្នកនឹងដឹងបន្ទាប់ពីការសាកល្បងមួយនេះ។

៣. តើអ្វីដែលខ្ញុំគួរតែគិតនៅក្នុងថ្ងៃនេះ?

ភាគច្រើនអារម្មណ៍មិនល្អច្រើនតែកើតមានឡើងនៅពេលដែលអ្នកធ្វើអ្វីមួយមិនច្បាស់លាស់ ធ្វើការងារពីរបីក្នុងពេលតែមួយ ធ្វើការឆ្បោលៗ ធ្វើឲ្យរួចតែពីដៃ ជាដើម។ ដោយផ្អែកលើបញ្ហាទាំងអស់នេះហើយ ទើបអ្នកត្រូវរៀបចំផែនការ ឬ កាលវិភាគមួយ ថាត្រូវធ្វើអ្វីខ្លះនៅក្នុងថ្ងៃនីមួយៗដើម្បីបង្កើតភាពច្បាស់លាស់សម្រាប់ខ្លួនឯង និង ដើម្បីកាត់បន្ថយភាពស្មុគស្មាញ ភាពស៊ាំញ៉ាំ ឬ អារម្មណ៍មិនល្អជាដើម។ ម្យ៉ាងទៀតនៅពេលដែលអ្នកសួរខ្លួនឯងថា តើថ្ងៃនេះខ្ញុំគួរតែធ្វើអ្វីខ្លះដើម្បីឲ្យការងារខ្ញុំទទួលបានប្រសិទ្ធភាព? នោះសំណួរទាំងនោះនឹងបង្ហាញផ្លូវឲ្យអ្នកបានដឹងភ្លាមៗ ថាអ្នកត្រូវធ្វើអ្វី។យ៉ាងណាមិញទោះបីជាផែនការរបស់អ្នកមិនមែនជាផែនការមួយដ៏អស្ចារ្យក៏ដោយ ប៉ុន្តែវាជួយចង្អុលបង្ហាញឲ្យអ្នកបានដឹងថា អ្នកត្រូវធ្វើអ្វីមុន ធ្វើអ្វីបន្ទាប់ ទៅតាមរបៀបរវារៈដែលអ្នកបានកំណត់ ជាជាងដែលអ្នកធ្វើវាទាំងភាពច្របូកច្របល់ និងមិនច្បាស់លាស់។លើសពីនេះ បន្ទាប់ពីអ្នកសម្រេចចិត្តថាត្រូវធ្វើការងារណាមួយនៅក្នុងថ្ងៃនេះ អ្នកគួរតែយកចិត្តទុកដាក់ទៅលើការងារនោះមួយមុខបានហើយ មិនត្រូវធ្វើការងារនេះហើយគិតពីបញ្ហាផ្សេងនោះទេ ព្រោះវាអាចជះឥទ្ធិពលទៅលើការងាររបស់អ្នកគឺ ការងាររបស់អ្នកអាចមិនបញ្ចប់ ឬ ធ្វើវាមិនបានល្អជាដើម។

ជាចុងក្រោយអ្នកគួរតែចាប់ផ្ដើមធ្វើអ្វីមួយជារៀងរាល់ថ្ងៃដោយអារម្មណ៍ល្អ ស្រស់ស្រាយ ដោយមានគោលដៅជាក់លាក់ ជាពិសេសបង្ហាញនូវការអរគុណទៅកាន់មនុស្សជាទីស្រលាញ់របស់អ្នក ដើម្បីជួយជម្រុញការងាររបស់អ្នកឲ្យកាន់តែមានផលិតភាពខ្ពស់ ហើយកុំភ្លេចសួរសំណួរទាំងនេះមកកាន់ខ្លួនឯងជារៀងរាល់ព្រឹក។

Brand? Brand? Brand? ជាពាក្យដែលមនុស្សម្នាក់ៗកំពុងតែនិយមប្រើប្រាស់ ហើយជាពាក្យដែលតែងតែនិយាយ តែងតែសរសើរនិង តែងតែអួតដាក់គ្នាថាវាជាផលិតផលល្អ មានតម្លៃ ព្រមទាំងមានគុណភាពខ្ពស់ទៀតផងដែលនរណាៗក៏ចង់ប្រើ។មនុស្សម្នាក់ៗសុខចិត្តចំណាយលុយជាច្រើនដើម្បីរបស់របរ ប្រេនៗមកលម្អខ្លួន មកប្រើប្រាស់ទៅតាមតម្រូវការដែលចង់បាន ព្រោះមនុស្សគ្រប់គ្នានឹងសរសើរថាពួកគេឡូយ ហ៊ឺហា ស្អាត សង្ហារ ឬ នឹងឲ្យតម្លៃទៅពួកគេតាមរបស់របរដែលតែងតែប្រើប្រាស់។នៅក្នុងនោះដែរយើងឃើញថា ពាក្យថាBrand គឺសំដៅទៅលើផលិតផលមួយដែលមានម៉ាកយីហោល្បីល្បាញ និង មានគុណភាពខ្ពស់​ ហើយភាគច្រើនគេច្រើនតែនិយាយពាក្យថាBrand ទៅលើសម្លៀកបំពាក់ កាបូប ទូរស័ព្ទ នាឡិកា ឬ ស្បែកជើង។ល។  ប៉ុន្តែនៅក្នុងថ្ងៃនេះលោកគ្រូ លីហាវ (Ly Haw) ​នឹងប្រាប់អំពីបុគ្គលិកBrand វិញម្ដង ថាតើបុគ្គលិកBrand​ ត្រូវមានលក្ខណៈBrand យ៉ាងដូចម្ដេចខ្លះ?ដូច្នេះហើយមិនមែនមានតែវត្ថុ ឬ ផលិតផល ទេដែលមានម៉ាកមានយីហោ មានតម្លៃ និង គុណភាពនោះ ប៉ុន្តែមនុស្សយើងគ្រប់គ្នាក៏អាចក្លាយទៅជាមនុស្សBrand បុគ្គលិកBrand និង អ្នកដឹកនាំBrand បានដែរ ប្រសិនជាយើងចង់ឲ្យខ្លួនឯងមានតម្លៃ មានគេគោរពស្រលាញ់ច្រើន ។

ខាងក្រោមនេះលោកគ្រូ លីហាវ (Ly Haw) នឹងរាយរាប់រៀបរាប់ពីចំណុចទាំង៤ រួមមាន “ កើត ចាស់ ឈឺ ស្លាប់” ជូនអ្នកទាំងអស់ បានដឹង បានស្ដាប់ និង បានអនុវត្តដើម្បីក្លាយជាបុគ្គលិកBrand ម្នាក់៖

១. កើត

កើត នេះមិនមែនសំដៅទៅលើការកើតចេញពីផ្ទៃរបស់ម្ដាយយើងនោះទេ ប៉ុន្តែ “កើត” នេះគឺសំដៅទៅលើការធ្វើអ្វីមួយឲ្យកើត ធ្វើអ្វីមួយឲ្យចេញជាលទ្ធផល ចេញជាផ្លែជាផ្កា ទៅតាមអ្វីដែលអ្នកចង់បាន និង អ្នកគ្រប់គ្រងរបស់អ្នករំពឹងថាអ្នកនឹងអាចបំពេញវាបាន។យ៉ាងណាមិញប្រសិនជាអ្នកគ្រប់គ្រងរបស់អ្នកបានដាក់ការងារឲ្យអ្នកធ្វើដូចជាសរសេរជាអត្ថបទ ឬ ឌីហ្សាញរូបភាពកាត់តរូបភាព ដូចនេះអ្នកត្រូវតែធ្វើវាឲ្យកើត មានន័យថា អ្នកត្រូវសរសេរអត្ថបទឲ្យបានល្អ មានន័យគ្រប់គ្រាន់ មានភាពទាក់ទាញ ហើយអាចផ្ដល់ជាមតិយោបល់ដើម្បីជួយអ្នកដទៃ និង សាធារណៈជនឲ្យបានដឹងនិង បានយល់។ហើយប្រសិនជាអ្នកគ្រប់គ្រងរបស់អ្នកដាក់កិច្ចការឲ្យអ្នក ចំពោះការឌីហ្សាញរូបភាព ម៉ូតសម្លៀកបំពាក់ ឬ ក៏ឌីហ្សាញរូបភាព អ្នកត្រូវតែធ្វើវាឲ្យអស់ពីសមត្ថភាព រៀបចំរូបភាពឲ្យមានភាពទាក់ទាញ ត្រជាក់ភ្នែក និង មនុស្សគ្រប់គ្នាឆាប់ចាប់អារម្មណ៍ជាដើម។ទាំងនេះបង្ហាញថាអ្នកអាចធ្វើវាកើត កើតចេញជាទម្លាប់ ជាលទ្ធផល និង ជាស្នាដៃ។

២. ចាស់

ចាស់ នេះក៏ដូចគ្នា មិនមែនសំដៅទៅលើវត្ថុចាស់ឬមួយក៏មនុស្សចាស់នោះទេ តែ “ចាស់” ចង់សំដៅទៅលើ ការចាស់ចិត្ត ចាស់គំនិតទៅលើការងារ មិនមែនជាមនុស្សដែលអាឡិកអាឡក់ ទន់ជ្រាយ ឬ មកធ្វើការមិ​នទាន់ពេលនោះទេ។ ការធ្វើការបណ្ដើរ ញ៉ាំបណ្ដើរ ធ្វើបណ្ដើរលេងបណ្ដើរ គឺមិនមែនជាមនុស្សចាស់ចិត្តចាស់គំនិតនោះទេ ដូចនេះមិនត្រូវធ្វើការបែបហ្នឹងនោះទេ។ ជារៀងរាល់ថ្ងៃដែលអ្នកទៅធ្វើការ គឺអ្នកត្រូវតែមានគោលដៅឲ្យបានច្បាស់លាស់ថា ខ្ញុំទៅដើម្បីធ្វើការ ដើម្បីរកលុយជូនគ្រួសារ និង ដើម្បីទទួលបាននូវបទពិសោធន៍ គឺមិនមែនទៅដើម្បីលេង Facebook  ហើយវាក៏មិនមែនជាពេលដែលអ្នកត្រូវលេងFacebook ដែរ។ ដូចនេះអ្នកត្រូវតែចាស់ចិត្តចាស់គំនិត ធ្វើអ្វីដែលត្រឹមត្រូវ​ គោរពម៉ោងពេលធ្វើការ និង គោរពវិន័យឲ្យបានត្រឹមត្រូវ។

៣. ឈឺ

មិនមែនមនុស្សដែលឈឺ មនុស្សដែលមានជម្ងឺអ្វីនោះទេ ប៉ុន្តែគឺជាការឈឺឆ្អាលអ្នកដទៃ ឈឺឆ្អាលក្នុងផ្លូវល្អ ផ្លូវវិជ្ជមាន ឈឺឆ្អាលដើម្បីជួយអ្នកដទៃទៅតាមសមត្ថភាពដែលអ្នកអាចធ្វើបាន។អ្នកគួរតែមានចិត្តមានគំនិត មានចិត្តចង់ជួយ ចង់ឈឺឆ្អាលដល់បុគ្គលិកដទៃ ឈឺឆ្អាលដល់អ្នកគ្រប់គ្រងថ្នាក់លើ និង ចេះឈឺឆ្អាលចំពោះស្ថាប័នដែលខ្លួនកំពុងតែធ្វើនេះឯង។ជាក់ស្ដែងនៅពេលដែលមិត្តរួមការងារ អ្នកគ្រប់គ្រង ឬ ស្ថាប័នរបស់អ្នកកំពុងតែជួបបញ្ហា អ្នកគួរតែចូលរួមយ៉ាងសស្រាក់សស្រាំ ដើម្បីជួយសម្រាលការងារ ឬ ចូលរួមបញ្ចេញមតិក្នុងការដោះស្រាយជាមួយគ្នា។ឧទាហរណ៍ដូចជាក្នុងករណីមួយ​ ដែលអ្នកឃើញមិត្តរួមការងាររបស់ត្រូវទទួលរងនូវបន្ទុកការងារជាច្រើនដែលត្រូវបង្ហើយឲ្យក្រុមហ៊ុននៅក្នុងថ្ងៃនេះ តើអ្នកគួរតែជួយសម្រាលការងារឲ្យពួកគេឬក៏ទៅចោលពួកគេ? បើសិនអ្នកចង់ក្លាយជាបុគ្គលិកប្រេន អ្នកគួរតែចេះឈឺឆ្អាលជាមួយនឹងពួកគេ ជួយធ្វើការងារឲ្យគ្នាដើម្បីបញ្ចប់ឆាប់បានចេញពីធ្វើការទាំងអស់គ្នា ទោះបីការងារនោះមិនមែនជាការងាររបស់អ្នកក៏ដោយ។ដូចេ្នះ ពាក្យថាបុគ្គលិកប្រេន មិនមែនមនុស្សគ្រប់គ្នាអាចទទួលយកបានដោយងាយៗ ដោយគ្មានការខិតខំព្យាយាមនោះទេ។

៤.​ ស្លាប់

ចំណុចស្លាប់ចុងក្រោយគេនេះ មិនមែនអ្នកត្រូវលាចាកលោក ឬ ទៅណាដែលមិនអាចមកវិញនោះទេ តែ “ ស្លាប់” នេះសំដៅទៅលើអត្តចរិក និង ទម្លាប់របស់អ្នក។ ពាក្យថាស្លាប់គឺបានមកពីពាក្យសម្លាប់ ដូចនេះអ្នកត្រូវតែសម្លាប់នូវចរិក នូវអារម្មណ៍ដែលមិនល្អ ដែលចូលចិត្តច្រណែនឈ្នានីសគ្នា គុំគួនគ្នា ចងគំនុំដាក់គ្នា និង ឆាវឆាវដាក់គ្នា ឲ្យស្លាប់បាត់ទៅ ទាំងនៅកន្លែងធ្វើការក្ដី ទាំងនៅនៅក្នុងជីវភាពរស់នៅប្រចាំថ្ងៃក្ដី ព្រោះពេលដែលអ្នកតែងតែប្រកាន់ខ្ជាប់នូវគំនុំគុំគួន ការច្រណែនឈ្នានីសគ្នា គឺអ្នកនឹងមិនទទួលបាននូវការសរសើរ ឬ​ ការគោរពពីអ្នកដទៃនោះទេ ជាពិសេសគឺប្រសិទ្ធភាពការងាររបស់អ្នកនឹងថមថយ រីឯប្រាក់ខែក៏វាទៅតាមហ្នឹងដែរ។ ម្យ៉ាងវិញទៀតមិនមែនត្រឹមតែសម្លាប់ចោលនូវចរិកមិនល្អរបស់អ្នកនោះទេ តែអ្នកត្រូវតែសម្លាប់នូវទម្លាប់អាក្រក់ៗរបស់អ្នកផងដែរ គឺទម្លាប់គេចវេសពីការងារ ទម្លាប់លេងសើចច្រើនខុសទំនង ទម្លាប់ខ្ជិលច្រអូស ទម្លាប់មកធ្វើការមិនទៀងម៉ោង និង ទម្លាប់និយាយដើមគ្នានៅកន្លែងធ្វើការងារជាដើម។ដូចនេះ អ្នកគួរតែលុបបំបាត់វា និង សម្លាប់វា នូវទម្លាប់ និង ចរិកមិនល្អណាដែលអ្នកមាន ឲ្យវាបរលោកទីឋានដែលឆ្ងាយៗឲ្យអស់ទៅ ទើបអ្នកអាចផ្លាស់ខ្លួនឯង ទៅជាបុគ្គលិកប្រេនម្នាក់ ដែលមនុស្សគេត្រូវការ គេឲ្យតម្លៃ និង ស្រលាញ់រាប់អានអ្នក។ហើយម្យ៉ាងវិញទៀត អ្នកគួរតែសួរខ្លួនឯងថាអាយុស្រករៗយើង តើគេមានអី? ហើយយើងមានអីខ្លះហើយ? គេធ្វើការ២ឆ្នាំគេសល់អី? រីឯយើងធ្វើការឲ្យគេ៥ឆ្នាំទៅហើយ តើយើងសល់អ្វីជាដុំកំភួនខ្លះ? តើអ្នកចង់ឲ្យប្រាក់ខែរបស់អ្នកកើនតាមអាយុ? ឬ ក៏ ឲ្យប្រាក់ខែរបស់អ្នកបានច្រើនជាងអាយុ? ឬក៏ចង់បានប្រាក់ខែដែលតិចជាងអាយុអ្នក? ចូរអ្នកគិតពិចារណាឲ្យបានល្អិតល្អន់ដោយខ្លួនឯង។

មានរឿងនិទានអប់រំខ្លីមួយ ដែលយើងចង់បង្ហាញប្រាប់អ្នកឲ្យបានយល់ ឲ្យបានដឹង៖ មានសេះនិងលាដែលត្រូវជ្រើសរើសក្នុងការធ្វើដំណើរទៅចម្លងធម៌ជាមួយនឹងលោកគ្រូថាងចេង។ដំបូងលោកគ្រូថាងចេងគាត់ចង់ជិះសត្វលាទៅ ប៉ុន្តែសត្វលាបដិសេធមិនព្រមទៅនោះទេព្រោះគេដឹងថាការធ្វើដំណើរទៅចម្លងធម៌ គឺត្រូវដើរផ្លូវវែងឆ្ងាយណាស់ហត់ណាស់ទម្រាំតែយកធម៌ហ្នឹងបាន។ ដូច្នេះ លោកគ្រូថាងចេងគ្មានជម្រើសក៏ជ្រើសរើសសេះជំនួសលាវិញ ហើយសេះក៏ព្រមធ្វើដំណើរជាមួយ ឲ្យលោកគ្រូថាងចេងជិះ។ ពេលដែលសេះនិងគ្រូថាងចេងត្រឡប់មកពីចម្លងធម៌វិញ លាក៏បានសួរទៅសេះថា “ បងសេះឯងធ្វើដំណើរតាមផ្លូវហត់អត់”  សេះក៏បានឆ្លើយថា “ ហត់ ហើយក៏មានឧបសគ្គច្រើនណាស់ដែរ”។ លាក៏បាននិយាយទៀតថា “ គឺខ្ញុំដឹងមុនហើយ បានខ្ញុំមិនទៅព្រោះវាហត់ខ្លាំងណាស់” ប៉ុន្តែសេះបានសួរបកទៅវិញថា “ ចុះរាល់ថ្ងៃហ្នឹងបងឯងអត់ហត់មែន​ ព្រោះខ្ញុំឃើញបងឯងអូសរទេះ ដឹកស្រូវ ដឹកបន្លែ ដឹកនេះដឹកនោះរាល់ថ្ងៃ គឺខ្ញុំគិតថាបងឯងសឹងតែហត់ជាងខ្ញុំទៀតផង ហើយចម្ងាយដែលបងឯងដើររាល់ថ្ងៃ និង ចម្ងាយផ្លូវដែលខ្ញុំដើររាល់ថ្ងៃគឺ មានចម្ងាយមិនលើសខ្វះគ្នាប៉ុន្មាននោះទេ ទោះបីជាយើងធ្វើដំណើរដូចគ្នាមែន ប៉ុន្តែលទ្ធផលដែលយើងទាំងពីរនាក់ទទួលបានគឺវាខុសគ្នា ឥលូវនេះខ្ញុំនិងលោកគ្រូថាងចេងបានឡើងឋានសួគ៌ ប៉ុន្តែបងនៅឋានកណ្ដាល ហើយនៅតែធ្វើការងារដោយប្រើកម្លាំងដដែល”។ ដូច្នេះរឿងនិទានខ្លីមួយនេះចង់ប្រាប់អ្នកទាំងអស់គ្នាថា ទោះបីជាយើងមានពេលវេលាដូចគ្នាមែន ប៉ុន្តែមិនប្រាកដថាលទ្ធផលដែលយើងទទួលបានហ្នឹងដូចគ្នានោះទេ។ តួយ៉ាងបើអ្នកទាំងអស់គ្នាចេញមកធ្វើការហើយ អ្នកទាំងអស់គ្នាត្រូវតែមានគោលដៅ និង ក្ដីសម្រៃ ថាយើងចង់សម្រេចអ្វីនាពេលអនាគត ហើយចង់សម្រេចវាបែបណា? ដោយរបៀបណា?។ដូនេះអ្នកទាំងអស់គ្នាឈប់ខ្ជះខ្ជាយពេលវេលារបស់អ្នកបន្តទៀតទៅ សូមធ្វើអ្វីដែលមានតម្លៃពិតប្រាកដ សម្រាប់ខ្លួនឯង សម្រាប់គ្រួសារ មនុស្សជុំវិញខ្លួន សម្រាប់សង្គមជាតិ និង សម្រាប់ក្រុមហ៊ុនរបស់អ្នក។