បច្ចុប្បន្ននេះ ទីផ្សារអចលនទ្រព្យកាន់តែមានភាពរីកចម្រើនឥតឈប់ឈរ ជាពិសេសគឺសំណង់អាគារស្នាក់នៅរួម ឬភាសាអង់គ្លេសហៅថាខុនដូ។ បើនិយាយពីទីផ្សារនៅក្នុងប្រទេសកម្ពុជាវិញ អាគារស្នាក់នៅរួមគឺជាគំរូបែបរស់នៅថ្មី បែបស៊ីវិល័យ និងទាន់សម័យ ដែលប្រជាជនយើងភាគច្រើនមិនទាន់ស្គាល់ច្បាស់ ឬយល់ច្បាស់នោះទេ។ ដើម្បីបង្កើនចំណេះដឹងស្តីពីខុនដូ គេហទំព័រគំនិតបានធ្វើបទសម្ភាសន៍ ជាមួយនឹងលោក គាម សៀកឡុង អគ្គនាយកក្រុមហ៊ុន Century 21 Dream Property ដែលជាក្រុមហ៊ុនមានជំនាញ និងបទពិសោធលក់ខុនដូ។

១. យើងឃើញថាសំណង់ខុនដូកាន់តែរីកពាសពេញទីក្រុងភ្នំពេញ ប៉ុន្តែនៅមានមនុស្សជាច្រើននៅមិនទាន់យល់ច្បាស់នៅឡើយ តើអ្វីទៅជាខុនដូ?

ខុនដូគឺសំដៅដល់ប្រភេទអាគារមួយដែលមានម្ចាស់កម្មសិទិ្ធច្រើនគ្នា កាន់កាប់ចំណែកឯកជនរបស់ខ្លួន Private Area ឬ  Net Area (យូនិត)នីមួយៗ ហើយនិងការកាន់កាប់រួមគ្នានូវចំណែករួម។ កត្តាដែលខុសគ្នាចំបងរវាង ខុន និងផ្ទះធម្មតានោះ គឺថាខុនដូពុំមានបុគ្គលណាម្នាក់ជាម្ចាស់កម្មសិទ្ធិដីនោះទេ ដីទាំងអស់ដែលសាងសង់គម្រោងខុនដូ គឺជាដីសហកម្មសិទ្ឋិដែលកាន់កាប់ដោយម្ចាស់កម្មសិទ្ធិច្រើនគ្នាដែលមានចំណែកឯកជនរបស់ខ្លួននៅក្នុងអាគារ។

២. អម្បាញ់នេះលោកបានលើកឡើងពីចំណែករួម តើអ្វីទៅជាចំណែករួម?

ចំណែករួមដែលភាសាអង់គ្លេសគេតែងប្រើ Common Area ឬ Public Area គឺសំដៅដល់រាល់ចំណែកនៃអាគារសហកម្មសិទ្ធិ ដែលត្រូវចាត់ទុកជាកម្មវត្ថុ ឬជាប្រយោជន៏នៃសហកម្មសិទ្ធិករទាំងអស់។ ចំណែករួមមានជាអាទ៏ ទីធ្លា ជណ្តើរ ជណ្តើរយន្ត ច្រកចេញចូល ទីកន្លែងនៃសេវាកម្មរួម អាងហែលទឹក កន្លែងហាត់ប្រាណ កន្លែងក្មេងលេងជាដើម។

 ៣. ប្រជាជនខ្មែរមួយចំនួនហាក់ដូចជានៅមិនទាន់ហ៊ានវិនិយោគទៅលើការទិញខុនដូនៅឡើយ តើលោកអាចពន្យល់បានទេហេតុអ្វីបានជាពួកគាត់គួរវិនិយោគ និងរស់នៅខុនដូ?

បាទ! ពិតមែនហើយ។ ប្រជាជនយើងមួយភាគធំនៅមិនទាន់ហ៊ានវិនិយោគទៅលើខុនដូនៅឡើយដោយសារតែពួកគាត់មិនទាន់យល់ និងដឹងច្បាស់ពីខុនដូ។ តែតាមពិតនៅពេលដែលប្រទេសកាន់តែរីកចម្រើន ទីក្រុងកាន់តែរីកធំ តម្រូវការលំនៅដ្ឋានបែបខុនដូនឹងកាន់តែកើនឡើងផងដែរ។ យើងអាចមើលគំរូប្រទេសជិតខាងយើងដូចជាថៃជាដើម ដែលនៅក្នុងទីក្រុងសុទ្ធតែសំណង់ខុនដូពាសពេញ។ ការវិនិយោគលើខុនដូមានអត្ថប្រយោជន៍ដូចជា៖

–ងាយស្រួលរកអ្នកជួល និងជួលបានចំណូលខ្ពស់ បើប្រៀបធៀបជាមួយនឹងអចលនវត្ថុដ៏ទៃទៀតដូចជាវីឡា ផ្ទះលែ្វង ឃ្លាំង ដី ខុនដូគឺមានភាពងាយស្រួលក្នុងរកអ្នកជួល ហើយចំណូលពីការជួលខុនដូគឺខ្ពស់ជាងគេ ដែលអាត្រាបានផលពីវិនិយោគមកវិញជាមធ្យមបានរហូតដល់៧%ក្នុងមួយឆ្នាំ។ គម្រោងខ្លះមានការធានាការជួលក្នុងរយៈពេល៣ឆ្នាំដំបូងក្នុងអត្រា១៨%។

–ទីតាំងមានភាពងាយស្រួល: ជាទូទៅ ខុនដូមានទីតាំងល្អដែលផ្តល់ភាពងាយស្រួលក្នុងការរស់នៅ ស្ថិតនៅក្បែរតំបន់ពាណិជ្ជកម្ម ក្បែរកន្លែងធ្វើការ ទីប្រជុំជន ហាងលក់ទំនិញ សាលារៀន មន្ទីរពេទ្យ ភោជនីយដ្ឋាន ជាដើម។

–ភាពស៊ីវិល័យះ នៅក្នុងអាគារមានដូចជា អាងហែលទឹក ក្លឹបហាត់ប្រាណ កន្លែងក្មេងលេង ភោជនីយ

ដ្ឋាន បារ ហាងកាហ្វេ និងផ្សារទំនើប ដែលនៅក្នុងបរិវេណខុនដូនោះតែម្តង ឫនៅក្បែរនោះ ជាផ្នែកមួយនៃការទាក់ទាញឲ្យចង់រស់នៅក្នុងខុនដូនោះតែម្តង។

–ជាមួយនិងការរស់នៅរបស់មនុស្សដែលមរមាញឹក ខុនដូគឺជាជម្រើសដែលទាក់ទាញពីព្រោះតែការរស់នៅមានភាពងាយស្រួល មានសន្តិសុខ សុវត្ថិភាពល្អ និងចំណាយការថែទំាអស់តិចចំពោះការរស់នៅបែបស៊ីវិល័យ។

–មានឱកាសទំនាក់ទំនង និងពង្រីកបណ្តាញ ជាមួយនឹងវិនិយោគិនបរទេស សហគ្រិនបរទេស និងខ្មែរ អ្នកដែលមានចំណូលខ្ពស់និងមធ្យម ទៅតាមប្រភេទខុនដូ។

៤. លោកបានលើកឡើងជាច្រើនមកហើយស្តីពីអត្ថប្រយោជន៍លើការវិនិយោគ យើងលោកអាចបកស្រាយត្រួសៗថាតើ អ្វីជាហានិភ័យ និងបព្ហាប្រឈមក្នុងការវិនិយោគ និងស្នាក់នៅខុនដូ?

-បាទ! សម្រាប់បញ្ហាប្រឈម និងហានិភ័យវិញគឺថាទី១សម្រាប់ការសាងសង់អាគារខ្ពស់ត្រូវការទុនវិនិយោគច្រើន និងចំណាយពេលយូរក្នុងការសាងសង់។ ដោយសារនៅពេលបច្ចុប្បន្នការលក់គម្រោងគឺអនុពា្ញតិមុនពេលចាប់ផ្តើមបុកគ្រឹះសាងសង់ ឬសាងសង់បានក្នុងកម្រិតណាមួយ អ្នកទិញប្រឈមមុខនឹងហានិភ័យខ្ពស់ក្នុងករណីដែលគម្រោងមិនបានសាងសង់ដូចការសន្យា។ ក្នុងករណីជាប់គាំងក្នុងការសាងសង់ដោយប្រការណាមួយនៅដំណាក់កាលណាមួយ អ្នកទិញពិបាកនឹងមានលទ្ធភាពទៅសាងសង់បន្ត ខុសពីវីឡា ឫផ្ទះល្វែង។ ការចំណាយពេលវេលាសាងសង់យូរ ឫពេលខ្លះមានការពន្យាពេលនៃការសាងសង់នាំឲ្យអ្នកទិញមានការខាតបង់ផលប្រយោន៏ក្នុងការវិនិយោគរបស់ខ្លួន។

-ទី២គឺថ្លៃសេវាគ្រប់គ្រង និងការថែទាំ (Management fee) ដែលតម្រូវឲ្យម្ចាស់សហកម្មសិទ្ធិករទាំងអស់បង់ថ្លៃសេវាគ្រប់គ្រង និងថែទាំប្រចាំខែ អាស្រ័យទៅតាមទំហំកាន់កាប់របស់ខ្លួនសម្រាប់សម្អាត ជួសជុល ការប្រើប្រាស់ចំណែករួម មានទីធ្លា ជណ្តើរ ច្រកចេញចូល និងទីកន្លែងនៃសេវាកម្មរួមផ្សេងៗទៀត និងការបង់ថ្លៃសេវាសម្រាប់ចំណតរថយន្ត ឫម៉ូតូផងដែរ។

-ទី៣គឺបទបពា្ចផ្ទៃក្នុង: ដោយសារតែជាអាគារសហកម្មសិទ្ធិ និងមានអ្នករស់នៅច្រើន បទបពា្ជផ្ទៃក្នុងគឺតម្រូវឲ្យមានជាចាំបាច់ ដែលពេលខ្លះបទបពា្ជផ្ទៃក្នុងនេះធ្វើឲមានការជ្រៀតជ្រែកដល់សិទ្ធិ និងសេរីភាពរបស់កម្មសិទិ្ធករ ហើយអាចជាការដាក់កំហិតឲ្យអ្នកស្នាក់នៅត្រូវទទួលយកទោះបីជាចំណុចខ្លះមិនពេញចិត្តក៏ដោយ។

៥. ដោយសារតែខុនដូគឺជាប្រភេទលំនៅដ្ឋានថ្មីសម្រាប់ប្រជាជនយើង តើពួកគាត់គួរដឹងអ្វីខ្លះមុននឹងសម្រេចចិត្តទិញខុនដូ?

បាទ! ពួកគាត់ត្រូវសិក្សាស្វែងយល់ពីគម្រោង និងម្ចាស់គម្រោងឱ្យបានល្អដើម្បីឱ្យច្បាស់ថាគម្រោងនោះពិតជាគម្រោងដែលគួរតែវិនិយោគ មានដើមទុនគ្រប់គ្រាន់ និងមានច្បាប់សាងសង់ត្រឹមត្រូវ។ ពួកគាត់អាចធ្វើការប្រឹក្សាយោបល់ជាមួយនឹងក្រុមហ៊ុនអចលនទ្រព្យដែលមានបទពិសោធលក់ខុនដូមុននឹងសម្រេចចិត្តទិញ ដើម្បីទទួលព័ត៌មានបានគ្រប់ជ្រុងជ្រោយ ដែលអាចជួយកាត់បន្ថយហានិភ័យក្នុងកម្រិតអតិបរិមា។ ពួកគាត់ត្រូវសួរនាំឱ្យបានច្បាស់ស្តីពីតម្លៃសេវាគ្រប់គ្រងអចលនទ្រព្យ (Management Fee ឬ Maintenance Fee) ដែលភាគច្រើនគេគិតតម្លៃក្នុង១ម៉ែត្រការ៉េ។ ពួកគាត់ត្រូវសួរថាតើគេគិតតម្លៃគ្រប់គ្រងថែទាំទៅលើទំហំនៃចំណែកឯកជន (Net Area) ឬក៏គិតថ្លៃសេវាដោយរួមបញ្ចូលទាំងចំណែករួម (Gross Area)។ អតិថិជនគួរសួរព័ត៌មានឱ្យច្បាស់ថាតើនៅពេលដែលទិញយូនីតណាមួយ តើពួកគាត់នឹងទទួលបានប្លង់កម្មសិទ្ធិប្រភេទណា (ប្លង់រឹង-វិពា្ញបនប័ត្រសម្គាល់ម្ចាស់ចំណែកឯកជនដែលភាសាអង់គ្លេស ហៅថា Strata Title ឬត្រឹមប្លង់ទន់ដែលអាចប្រឈមមុខនឹងបញ្ហាទៅថ្ងៃក្រោយ), តើពួកគាត់នឹងទទួលបានសម្ភារៈអ្វីខ្លះ (សម្ភារៈ បរិក្ខា គ្រឿងសង្ហារឹម) ហើយតើគាត់ត្រូវបង់ថ្លៃអ្វីទៀតដែរឬទេ (ដូចជាថ្លៃចំណតរថយន្ត កន្លែងហែលទឹក ហាត់ប្រាណ ស្ទីម សូណា ។ល។)។ មុននឹងសម្រេចចិត្តទិញ អតិថិជនគួរពិនិត្យឱ្យបានល្អិតល្អិន ពីកិច្ចសន្យាទិញលក់ និងបទបញ្ជាផ្ទៃក្នុងឱ្យបានហ្មត់ចត់ ចៀសវាងការមានរឿងវិវាទទៅថ្ងៃក្រោយ។

អ្នកគ្រប់គ្នាប្រាកដជាស៊ាំនឹងឃ្លាមួយ ដែលគេតែងតែលើកឡើង “អតិថិជនគឺជាស្តេច!” ហើយម្ចាស់អាជីវកម្មនីមួយៗតែងតែដាស់តឿននិងក្រើនរំឮកបុគ្គលិករបស់ខ្លួនឱ្យផ្គាប់ចិត្តអតិថិជនដើម្បី ឱ្យអាជីវកម្មអាចរីកចម្រើនទៅមុខបានយូរអង្វែង។ ក្នុងសម័យកាលបច្ចេកវិទ្យាទំនើបដែលមនុស្សម្នាក់ៗអាចមើលឃើញនិងចែករំលែកព័ត៌មានបានយ៉ាងលឿននិងឆាប់រហ័សនេះ បានញ៉ាំងឱ្យម្ចាស់អាជីវកម្មត្រូវទទួលសំពាធមួយ គឺត្រូវប្រុងប្រយ័ត្ន និងធ្វើការបម្រើអតិថិជនឱ្យបានល្អដើម្បីឱ្យអតិថិជនរបស់ខ្លួនពេញចិត្ត។ បើពុំនោះទេ ព័ត៌មានអាក្រក់នឹងអាចចែករំលែកបានយ៉ាងលឿន ដែលពិបាកនឹងទប់ស្កាត់ ហើយអាចធ្វើឱ្យអាជីវកម្មមួយ ខាតបង់ និងក្ស័យធនបានយ៉ាងលឿន។ មិនថាតែនៅប្រទេសជឿនលឿនទេ សូម្បីតែនៅប្រទេសកម្ពុជាយើង មានករណីជាច្រើនដែលអតិថិជនបានចែករំលែកព័ត៌មាននៅលើបណ្តាញសង្គមទៅលើហាង ឬអាជីវកម្មណាដែលធ្វើឱ្យពួកគេមិនពេញចិត្ត។

ថ្ងៃនេះ គេហទំព័រគំនិតសូមលើកយកករណីមួយដែលកើតឡើងនៅសហរដ្ឋអាមេរិចកាលពីឆ្នាំ២០០៨ ដែលកើតឡើងរវាងក្រុមហ៊ុនអាកាសចរUnited Airlineរបស់សហរដ្ឋអារមេរិចនិងលោកឌេវដែលជាអ្នកលេងហ្គីតា។ ករណីនេះនេះបានធ្វើឱ្យក្រុមហ៊ុនអាកាសចរមួយនេះខាតបង់លុយអស់រាប់រយលានដុល្លាដោយសារតែភាពមិនទទួលខុសត្រូវរបស់ខ្លួន។ រឿងនេះផ្តើមឡើងដោយក្រុមអ្នកចម្រៀងមួយក្រុមដែលធ្វើដំណើរតាមក្រុមហ៊ុនអាកាសចរUnited Airline។ មុននឹងយន្តហោះចេញដំណើរពីព្រលានយន្តហោះ ក្រុមអ្នកចម្រៀងនោះ (ដែលក្នុងនោះមានលោកឌេវ)បានឃើញក្រុមការងារជញ្ចូនឥវ៉ាន់ដាក់យន្តហោះធ្វើការគ្រវាត់គ្រវែងដោយមិនមានការថ្នមអ្វីបន្តិចសោះទៅលើឥវ៉ាន់របស់អ្នកដំណើរ ហើយក្នុងនោះក៏មានឧបករណ៍ភ្លេងរបស់ពួកគេផងដែរ។ ភ្លាមនោះ ពួកគេក៏បានធ្វើការរាយការណ៍ពីភាពមិនពេញចិត្តទៅបុគ្គលិកនៅក្នុងយន្តហោះពីករណីនេះ ប៉ុន្តែម្នាក់ៗតែងរុញទៅអ្នកនេះអ្នកនោះដោយគ្មានអ្នកណាចេញមុខទទួលខុសត្រូវឡើយ ហើយប្រាប់ឱ្យពួកគេដោះស្រាយនៅពេលដែលទៅដល់គោលដៅហោះហើរវិញ។

ពេលមកដល់គោលដៅ ដោយសារតែការហត់នឿយពេកនិងយប់ជ្រៅផងនោះ ពួកក្រុមភ្លេងនិងចម្រៀងនោះក៏មិនបានធ្វើការត្រួតពិនិត្យឧបករណ៍ភ្លេងរបស់ពួកគេទេឬធ្វើការតវ៉ាឡើយដោយធ្វើដំណើរឆ្ពោះទៅសណ្ឋាគារដើម្បីសម្រាក។ ថ្ងៃបន្ទាប់ នៅពេលដែលគេបើកវ៉ាលីហ្គីតាពិនិត្យទើបឃើញថា ហ្គីតារបស់គេគឺត្រូវខូច និងបាក់បែកទៅហើយដោយសារតែការមិនប្រុងប្រយ័ត្នរបស់ក្រុមការងារនៃក្រុមហ៊ុនUnited Airline។ បន្ទាប់ពីបានដឹង គាត់ក៏បានធ្វើការរាយការណ៍ទៅក្រុមហ៊ុនដើម្បីស្វែងរកសំណងដែលក្រុមហ៊ុនអាកាសចរធ្វើឱ្យខូច ដែលហ្គីតានោះមានតម្លៃ3500ដុល្លា។ គាត់ព្យាយាមទាក់ទងពីបុគ្គលិកម្នាក់ទៅបុគ្គលិកម្នាក់ទៀតដើម្បីធ្វើការពន្យល់ទៅលើករណីដែលបានកើតឡើង ហើយក្នុងចំណោមនោះ ក៏មានបុគ្គលិកខ្លះទទួលស្គាល់កំហុសរបស់ក្រុមហ៊ុន ប៉ុន្តែរាល់ការទំនាក់ទំនងម្តងៗគឺត្រូវរង់ចាំរយៈពេលយ៉ាងយូរដើម្បីទទួលបានការឆ្លើយតប ហើយការឆ្លើយតបទៀតនោះគឺសុទ្ធតែអវិជ្ជមាន ដោយក្រុមហ៊ុនអាកាចរUnited Airline បានបដិសេធការទទួលខុសត្រូវ ហើយទម្លាក់កំហុសទៅលើអតិថិជនផ្ទាល់ ឬអ្នកនេះអ្នកនោះ។ ការព្យាយាមទាមទារសំណងគឺត្រូវចំណាយពេលអស់៩ខែ តែមិនមានការឆ្លើយតបជាវិជ្ជមានអ្វីឡើយ សូម្បីតែលោកឌេវដែលសារចុងក្រោយរបស់គាត់ផ្ញើរទៅកាន់ក្រុមហ៊ុនថាត្រូវការសំណងតែ1200ដុល្លាប៉ុណ្ណោះដែលជាតម្លៃជួសជុល ហើយទឹកប្រាក់នោះអាចប្តូរទៅជាសំបុត្រយន្តហោះវិញក៏ដោយក៏នៅតែមិនមានការឆ្លើយតបវិជ្ជមានឬការទទួលខុសត្រូវពីសំណាក់ក្រុមហ៊ុន។ រហូតដល់គាត់បាននិយាយថាបើមិនមានសំណង គាត់នឹងនិពន្ធចម្រៀង និងថតMVស្តីពីបទពិសោធជូរចត់ដែលគាត់ជួបប្រទះជាមួយនឹងក្រុមហ៊ុនអាកាសចរក៏ដោយក៏នៅតែមិនមានការឆ្លើយតបអ្វីពីក្រុមហ៊ុន។

ដោយសារតែហេតុនេះហើយគាត់ក៏បាននិពន្ធបទចម្រៀងបីបទ និងថតជាMV ហើយបានចែករំលែកនៅលើប្រព័ន្ធអ៊ិនធីណិតដោយរំពឹងថានឹងមានអ្នកស្តាប់ និងមើលជាច្រើន។ ក្រោយពីបានបង្ហោះនៅលើYoutube ថ្ងៃទី06 ខែ 07 បទចម្រៀងគាត់ក្លាយទៅជាបទចម្រៀងពេញនិយមដែលមានអ្នកស្តាប់ និងទស្សនា១៥០០០០ដងក្នុងថ្ងៃទិ១ និងកន្លះលានបីថ្ងៃបន្ទាប់ ហើយជាងមួយខែក្រោយមកគឺ៥លានដង រហូតធ្វើឱ្យសាព័ត៌មានធំៗដូជា CNN Walls Street Journal និងសារព័ត៌មានធំៗជាច្រើនទៀតធ្វើការផ្សាយពីករណីនេះ។ ក្រោយពីព័ត៌មាននេះល្បីសុះសាយ តម្លៃប័ណ្ណភាគហ៊ុនរបស់ក្រុមហ៊ុនអាកាសចរUnited Airlineធ្លាក់ចុះ១០% ដែលជាលទ្ធផលធ្វើឱ្យក្រុមហ៊ុនខាតបង់ប្រាក់អស់ប្រមាណ180លានដុល្លា។

នេះជាមេរៀនដ៏ជូរចត់មួយដែលម្ចាស់អាជីវម្ម ឬប្រធានក្រុមហ៊ុនត្រូវប្រុងប្រយ័ត្នចៀសវាងស្ថានភាពស្រដៀងគ្នានេះកើតឡើងម្តងទៀតលើស្ថាប័នរបស់ខ្លួន។ កំហុស ភាពមិនទទួលខុសត្រូវ ឬការធ្វេសប្រហែសមួយអាចធ្វើឱ្យអ្នកខាតបង់ឬក្ស័យធនមួយរំពេច។ នៅក្នុងសម័យកាលទំនើបនេះ មិនថាព័ត៌មានល្អឬអាក្រក់គឺត្រូវបានចែកចាយយ៉ាងលឿន ដែលមិនអាចទប់ស្កាត់បានឡើយ ហើយវាក៏ជាសម័យកាលដែលអតិថិជនមានសិទ្ធអាទិភាពជាងពេលណាៗទាំងអស់ដោយសារតែភាពងាយស្រួលដែលបច្ចេកវិទ្យាបានផ្តល់ឱ្យ។ ចូរប្រុងប្រយ័ត្ននៅរៀងរាល់ពេលដែលធ្វើការដោះស្រាយជាមួយអតិថិជន ព្រោះថា “អតិថិជនគឺជាស្តេច!”។ នៅពេលដែលអតិថិជនពេញចិត្ត ពួកគាត់នឹងនិយាយល្អពីអ្នក ហើយបើគាត់មិនពេញចិត្តទេនោះ លទ្ធផលគឺពិបាកនឹងស្មានទុក៕

វិស័យអចលនទ្រព្យនៅក្នុងប្រទេសកម្ពុជាកំពុងតែមានភាពទាក់ទាញយ៉ាងខ្លាំង ហើយវិស័យនេះក៏បានក្លាយទៅជាសសរស្តម្ភសេដ្ឋកិច្ចជាតិក្នុងចំណោមវិស័យធំៗទាំងបួន។ ស្ទើរតែគ្រប់ទីកន្លែង ដែលយើងបានឮ ការជជែកគ្នាពីវិស័យនេះ ហើយជាពិសេសនោះ គឺការវិនិយោគដើម្បីទទួលបានប្រាក់ចំណេញ។ ការទិញអចលនទ្រព្យគឺមានភាពងាយស្រួល ប៉ុន្តែអ្វីដែលពិបាកនោះគឺការវិនិយោគលើវិស័យអចលនទ្រព្យដើម្បីទទួលបានប្រាក់ចំណេញវិញ ដែលទាមទារឱ្យវិនិយោគិនមានគោលបំណងនិងយុទ្ធសាស្ត្រច្បាស់លាស់ក្នុងការកាត់បន្ថយហានិភ័យដែលកើតអាចមានឱ្យស្ថិតនៅក្នុងកម្រិតអប្បបរិមា។ ថ្ងៃនេះគេហទំព័រ«គំនិត»មានកិត្តិយសដែលបានធ្វើការសម្ភាសន៍ជាមួយនឹងអគ្គនាយកក្រុមហ៊ុន Century 21 Dream Property ដែលជាក្រុមហ៊ុនអចលនទ្រព្យដ៏ល្បី និងមានបណ្តាញធំជាងគេក្នុងពិភពលោក ហើយមានប្រភពដើមពីសហរដ្ឋអាមេរិក គឺ លោក គាម សៀកឡុង។

១- មុននឹងធ្វើការសម្រេចចិត្តវិនិយោគ ឬទិញអចលនទ្រព្យតើវិនិយោគិនគួរគិតពិចារណាទៅលើចំណុច អ្វីខ្លះ?

បាទ! ជាការពិតណាស់វាមានចំណុចជាច្រើន ដែលអ្នកវិនិយោគ ឬអ្នកទិញអចលនទ្រព្យត្រូវធ្វើការពិចារណាមុនពេលសម្រេចចិត្តវិនិយោគ ឬទិញអចលនទ្រព្យ ដោយមិនមែនឃើញគេទិញ រួចទិញតាមគេនោះទេ ។

• ទីមួយ គឺយើងត្រូវដឹងពីគោលបំណងនៃការទិញ តើទិញដើម្បីរស់នៅ ឬក៏ដើម្បីវិនិយោគ។ ហើយសម្រាប់ការវិនិយោគទៀតនោះក៏មានពីរផងដែរគឺសម្រាប់ជួលដើម្បីបានចំណូលអកម្ម និងទិញមកទុកលក់ចំណេញនៅពេលអនាគត។
• ទីពីរ គឺលទ្ធភាពជាក់ស្តែង លំហូរសាច់ប្រាក់ ជម្រើសបង់ប្រាក់ ប្រភពថវិការ ហិរពា្ញវត្ថុរបស់អ្នកទិញ ឬអ្នកវិនិយោគ។
• ទីបី គឺសិក្សាពីសក្តានុពលដែលអាចលក់ចំណេញនាពេលអនាគត។
• ទីបួន យើងត្រូវជ្រើសរើសទិញគម្រោងណាដែលស្របច្បាប់ មានអាជ្ញាប័ណ្ណសាងសង់ អាជ្ញាប័ណ្ណអភិវឌ្ឍន៏គម្រោង អាជ្ញាប័ណ្ណលក់ត្រឹមត្រូវដែលចេញដោយក្រសួងពាក់ព័ន្ធ។ អ្នកទិញគួរធ្វើការសិក្សាអំពីប្រវត្តិ និងកេរ្តិ៍ឈ្មោះម្ចាស់គម្រោងដើម្បីធានាថាគម្រោងដែលកំពុងដំណើរការ និងធ្វើការអភិវឌ្ឍន៍នោះអាចទុកចិត្តបាន។ អ្នកទិញត្រូវច្បាស់ថា អចលនវត្ថុនោះគឺពិតជាមានប្លង់កម្មសិទ្ធិច្បាស់លាស់ និងមិនមានវិវាទ(ប្លង់រឹងដែលយើងហៅថាវិពា្ញបនប័ត្រសម្គាល់ម្ចាស់អចលនវត្ថុ ប័ណ្ណសម្គាល់សិទិ្ធកាន់កាប់ម្ចាស់អចលនវត្ថុ វិពា្ញបនប័ត្រសម្គាល់ម្ចាស់ចំណែកឯកជន ឬប្លង់ទន់ លិខិតផ្ទេរសិទិ្ធនិងប្រើប្រាស់ដីធ្លី)។ សម្រាប់ខ្ញុំផ្ទាល់ គឺខ្ញុំលើកទឹកចិត្តឱ្យវិនិយោគទៅលើអចលនទ្រព្យណាដែលមានប្លង់រឹង។
• ទីប្រាំ គឺគុណភាពសំណង់ សម្ភារៈប្រើប្រាស់ដើម្បីសាងសង់ សន្តិសុខ ការគ្រប់គ្រងថែទាំអចលនទ្រព្យ(Property Management) ដើម្បីរក្សាបាននូវសោភណ្ឌភាព និង ភាពស្រស់ស្អាតនៃទីធ្លាសាធារណៈ។ ហើយសម្រាប់ខុនដូរ និងបុរី យើងត្រូវដឹងពីបទបញ្ជាផ្ទៃក្នុងរបស់ម្ចាស់គម្រោងនីមួយៗផងដែរដើម្បីចៀសវាងបញ្ហា និងវិវាទទៅថ្ងៃខាងមុខ។
• ទីប្រាំមួយ គឺត្រូវសិក្សាពីតម្លៃដើម្បីទទួលបានតម្លៃទីផ្សារ ឬទាបជាងទីផ្សារ (លក់បន្ទាន់ ទិញនៅពេលគេចង់លក់ លក់នៅពេលគេចង់ទិញដើម្បីទទួលបានតម្លៃថ្លៃ)។

២- តើធ្វើដូចម្តេចដើម្បីទទួលបានប្រាក់ចំណេញពីអចលនទ្រព្យ?

ការជ្រើសរើស អចលនទ្រព្យដែលមានភាពទាក់ទាញ ព្រមទាំងមានសំណង់ល្អគឺជាកត្តាសំខាន់ ប៉ុន្តែរាល់ការទិញអចលនទ្រព្យយើងត្រូវគិតដល់ការវិនិយោគ ជាជាងគិតគ្រាន់តែដើម្បីរស់នៅ ក្នុងនោះមាន៖

• ទិញអចលនទ្រព្យទុកជួល ដើម្បីទទួលបានចំណូលអកម្មប្រចាំខែ និងអាចលក់អចលនទ្រព្យនោះក្នុងតំលៃខ្ពស់។ តើវាស្ថិតនៅទីតាំងដែលមានសក្តានុពលក្នុងការជួលដែរឬទេ? ជួលសម្រាប់អាជីវកម្ម?តើប្រភេទអាជីវកម្មអ្វីដែលសមស្របសម្រាប់អចលនវត្ថុនោះ? បើសម្រាប់ស្នាក់នៅ តើសម្រាប់ជួលឱ្យជនបរទេស ឬជនជាតិខែ្មរ? ពេលខ្លះម្ចាស់អចលនទ្រព្យគួរពិចារណាថាតើត្រូវ ធ្វើ ការជួលជុល និងកែលម្អដើម្បីបង្កើនមានភាពទាក់ទាញដើម្បីបង្កើនចំណូល ឬក៏អាចជួលបានដោយមិនចាំបាច់ជួសជុល។ ជាទូទៅ អត្រាបានប្រាក់ត្រឡប់មកវិញពិការពីការវិនិយោគទិញផ្ទះទុកសម្រាប់ជួល ផ្ទះលែ្វង ឬវីឡាអាចបានចន្លោះពី២ ទៅ៣%ក្នុង១ឆ្នាំ ខណៈពេលដែលខុនដូរអាចជួលបានរហូតដល់៧%ក្នុង១ឆ្នាំ។
• អចលនទ្រព្យដែលយើងទិញសម្រាប់រស់នៅក៏អាចក្លាយទៅជាការវិនិយោគមួយផងុខ។វិនិយោគលើវិស័យអចលនទ្រព្យដើម្បីទទួលបានផលចំណេញវិដែរសម្រាប់ទៅថ្ងៃអនាគតប្រសិនបើយើងអាចជ្រើសរើសបានទីតាំងល្អ។ អចលនទ្រព្យតែងតែឡើងថ្លៃនៅពេលដែលមានការអភិវឌ្ឍន៏នៅជុំវិញតំបន់នោះ ដូច្នេះត្រូវជ្រើសរើសតំបន់ដែលនឹងមានការអភិវឌ្ឍន៏។ទីកន្លែងដែលមានកម្រិតហេដ្ឋារចនាសម្ព័ន្ឋនៅមានទាប ប៉ុន្តែអាចកើនឡើងយ៉ាងឆាប់រហ័សនាពេលខាងមុខ និងអាចចំណេញច្រើន។ អ្នកឆ្លាតគិតឆ្ងាយ មើលធ្លុះលទ្ធផល មើលឃើញអ្វីដែលអ្នកធម្មតាមើលមិនឃើញ ហើយការចេះមើលវែងឆ្ងាយនេះគឺពិតជាមានសារៈសំខាន់ណាស់សម្រាប់វិនិយោគទៅលើវិស័យអចលនទ្រព្យនេះ។
• ទិញអចលនទ្រព្យដែលអាចកែលំអរថ្មី ហើយលក់ចេញទៅវិញថ្លៃជាងតម្លៃដើម។ អចលនទ្រព្យខ្លះគឺមានសក្តានុពលបន្ទាប់ពីមានការវិនិយោគ និងជួសជុលកែលម្អបន្តិចបន្តួច។ បើនិយាយឱ្យសាមញ្ញទៅគឺថែមក្រេម ថែមម្សៅដើម្បីបង្កើនភាពទាក់ទាញ។ យើងត្រូវចេះប្រើប្រាស់ឱ្យអស់ពីលទ្ធភាព ដូចឃ្លាមួយដែលគេនិយមលើកឡើងគឺ “បើប្រើវត្ថុប្រើឱ្យអស់ពីប្រយោជន៏ ហើយបើប្រើមនុស្សគឺប្រើឱ្យអស់ពីសមត្ថភាព”។
• ទិញនៅពេលគម្រោងទើបចាប់ផ្តើមសម្ពោធលក់ ជាមួយនឹងការបពា្ចះតម្លៃ  ឬគម្រោងណាដែលទើបចាប់បើកការដ្ឋានសាងសង់ តែសូមប្រុងប្រយ័ត្នក្នុងការជ្រើសរើសគម្រោងដែលអាចទុកចិត្តបាន បើមិនអញ្ចឹងទេនឹងអាចខាតអាសារបង់។

៣- តើមានអ្វីផ្តាំផ្ញើរបន្ថែមទៀតដែរឬទេសម្រាប់អ្នកចង់វិនិយោគលើវិស័យអចលនទ្រព្យ?

បាទ! ខ្ញុំសូមលើកយកបីចំណុចបន្ថែមទៀតសម្រាប់វិនិយោគិនដែលចង់វិនិយោគទៅលើវិស័យនេះ៖

• អ្នកវិនិយោគត្រូវសិក្សាឱ្យបានហ្មត់ចត់ពីគម្រោង ឬអចលនទ្រព្យដែលពួកគាត់ពេញចិត្ត ប៉ុន្តែត្រូវមានការសំរេចចិត្តលឿន មិនរង់ចាំយូរនោះទេ ព្រោះតម្លៃអចលនទ្រព្យកើនឡើងជាប្រចាំមិនចាំយើងឡើយ ហើយប្រសិនបើជាអចលនវត្ថុល្អ ឱកាសដែលគេឆក់យកមុនក៏មានខ្ពស់ដែរ។ កុំរង់ចាំវិនិយោគលើវិស័យអចលនទ្រព្យ តែគួរធ្វើការវិនិយោគលើវិស័យអចលនទ្រព្យហើយរង់ចាំវិញ។
• ប្រឹក្សាជាមួយអ្នកជំនាញ ។ ការធ្វើដូចនេះធ្វើឱ្យចំណេញពេលវេលាដល់អ្នកទិញព្រោះថា កុ្រមហ៊ុនមានពត៌មាន និងមានបណ្តាញច្រើនដែលជួយកាត់បន្ថយហានិភ័យ ព្រមទាំងអាចផ្តល់សេចក្តីសុខផ្លួវអារម្មណ៏ និងអាចទទួលបានប្រាក់ចំណេញខ្ពស់ (តម្លៃទាបជាងទីផ្សារ និងអាចកើនឡើងនៅពេលអនាគត)។ អ្នកទិញដែលស្វែងរកអចលនទ្រព្យតាមក្រុមហ៊ុនគឺមិនត្រូវបានគិតថ្លៃ កម្រៃជើងសារអ្វីនោះទេ ព្រោះថាក្រុមហ៊ុនអចលនទ្រព្យនីមួយៗគឺទទួលបានកម្រៃតែពីអ្នកលក់តែប៉ុណ្ណោះ។ មុននឹងយកមកដាក់លក់នៅក្នុងក្រុមហ៊ុន ក្នុងនាមជាភ្នាក់ងារលក់អចលនទ្រព្យ ពួកយើងតែងតែដាក់តម្លៃលក់ឱ្យដូចគ្នាទៅនឹងតម្លៃដែលទៅទិញខ្លួនឯងផ្ទាល់ មិនថាទៅទិញផ្ទាល់ពីអ្នកលក់ ឬក្រុមហ៊ុនម្ចាស់គម្រោងក្តី។ ក្រុមហ៊ុនមិនមែនធ្វើអ្វីដើម្បីផលប្រយោជន៏រយៈពេលខ្លីនោះទេ គឺយើងផ្តល់ផលចំណេញដល់អតិថិជនរបស់យើង ក្នុងការវិនិយោគលើវិស័យអចលនទ្រព្យ ដោយយើងគិតពីអនាគតវែងឆ្ងាយ។ អតិថិជនគ្រប់រូបរបស់យើងដែលមកប្រើប្រាស់សេវាកម្មយើង អាចនឹងក្លាយជាអតិថជនរបស់យើងមួយជីវិត ហើយគាត់នឹងឱ្យយើងជួយទិញ ជួយជួល និងជួយលក់បន្តទៅនាពេលអនាគត។
• សម្រាប់គម្រោងណាដែលសហការណ៏ផ្តល់ឥណទានដោយធនាគារ និងទទួលសិទ្ធិលក់ដោយក្រុមហ៊ុនអចលនទ្រព្យដែលមានកេរ្ត៏ឈ្មោះគឺអាចជួយកាត់បន្ថយហានិភ័យមួយភាគធំសម្រាប់វិនិយោគិន ដោយសារតែមុននឹងយល់ព្រមផ្តល់ឥណទាន ឬទទួលយកមកលក់ ទាំងធនាគារ និងក្រុមហ៊ុនអចលនទ្រព្យសុទ្ធតែបានធ្វើការសិក្សារពីប្រវត្តិរបស់ម្ចាស់គម្រោង និង ឯកសារផ្លូវច្បាប់ និងអាជ្ញារប័ណ្ណផេ្សងៗ ដើម្បីកាត់បន្ថយហានិភ័យឥណទានរបស់ខ្លួន និងការពារកេរ្ត៏ឈ្មោះរបស់ក្រុមហ៊ុន។ ដូចនេះ អ្នកវិនិយោគទាំងអស់ គួរគិតលើចំណុចនេះ ដោយសិក្សាស្វែងយល់ថាតើគម្រោងដែលពួកគាត់ចង់វិនិយោគមានឥណទានពីធនាគារដែរឬយ៉ាងណា ហើយក្រុមហ៊ុនដែលទទួលលក់គម្រោងគឺជាក្រុមហ៊ុនដែលមានកេរ្តិ៍ឈ្មោះដែរឬទេ។

គួរបញ្ចាក់ថា Century 21 Dream Property ជាក្រុមហ៊ុនអចលនទ្រព្យបានទិញសិទ្ធិអាជីវកម្មពីក្រុមហ៊ុន Century 21 Cambodia។ Century 21 ជាក្រុមហ៊ុនលំដាប់អន្តរជាតិរបស់សហរដ្ឋអាមេរិច ដែលបើកដំណើរការ តាំងពីឆ្នាំ 1971 ក្នុងរដ្ឋ California ជាក្រុមហ៊ុនអចលនទ្រព្យ ដ៏ធំជាងគេ ដែលកំពុងប្រតិបត្តិការនៅ៧៥ប្រទេស មានការិយាល័យចំនួន ៧១០០ ភ្នាក់ងារលក់ចំនួនជាង១០០ ០០០នាក់ ជុំវិញពិភពលោក។

ជាមួយនឹងកេរ្ត៏ឈ្មោះជាសកល និង បណ្តាញលក់ដ៏ធំទូលាយ Century 21 Dream Property មាន មន្រ្តីដែលមានជំនាញវិជ្ជាជីវៈច្បាស់លាស់ ដែលផ្តល់សេវាកម្មដូចជា ការទិញ លក់(ដី វីឡា សណ្ឋាគារ ផ្ទះសំណាក់ លក់គម្រោងផ្ទះល្វែង ខុនដូ) ជួល (អាគារពាណិជ្ជកម្ម បើកអាជីវកម្មថ្មី ឬពង្រីកទីតាំងសាខា សាខាធនាគារពាណិជ្ជ គ្រឹះស្ថានមីក្រូហិរពា្ញវត្ថុ ការិយាល័យអង្គការក្រៅរដ្ឋាភិបាល អាគារស្នាក់នៅ អាផាតមិន) និងការវិនិយោគលើវិស័យអចលនទ្រព្យ ក៏ដូចជាសេវាកម្មគ្រប់គ្រងអចលនទ្រព្យ វាយតម្លៃអចលនទ្រព្យ ជាពិសេស ការប្រឹក្សាយោបល់ លើការវិនិយោគផ្នែកអចលនទ្រព្យ។ យើងមានរបស់ពិសេសពីរដែលក្រុមហ៊ុនផ្សេងទៀតមិនមាន ផ្លាកសញ្ញាសកលរបស់Century 21 និងមានបណ្តុំបណ្តាញលក់ធំជាងគេបំផុតទូទាំងពិភពលោក។

អត្ថបទនេះជា​ការឆ្លុះបញ្ចាំង​ពី​គំនិត​ថ្មីៗ​ ដែលមិន​ត្រឹមតែ​ជា​ប្រភេទ​អាជីវកម្ម​ប៉ុណ្ណោះទេ ប៉ុន្តែ​វាជា​គំនិត​មួយដែល​អាច​ជួយ​ដល់​សង្គម​បាន​យ៉ាង​ច្រើន​ផង​ដែរ។

មរណភាព​ជា​រឿង​ដែល​ពិបាក​ទទួលយក

កើត ចាស់ ឈឺ ស្លាប់ គឺ​ជា​រឿង​ធម្មតា​របស់​មនុស្ស​លោក តែ​មនុស្ស​ជាច្រើន​មិន​អាច​ទទួល​យក​ដំណាក់កាល​ចុងក្រោយ​នៃ​ជីវិត គឺ​មរណភាព បាន​ឡើយ។ នៅ​ពេល​ដែល​ដឹង​យ៉ាងច្បាស់​ថា​ជិត​បាត់បង់​មនុស្ស​ជា​ទី​ស្រឡាញ់​របស់​ខ្លួន អារម្មណ៍​ក្តុកក្តួល និង​ភាព​សោកសង្រេង​ក៏​ចាប់ផ្តើម​កើត​មាន​ឡើង​ចំពោះ​ក្រុម​គ្រួសារ​និង​ញាតិមិត្ត។ ខណៈ​ពេល​ដែល​ម្នាក់ៗ​ដែល​នៅ​ជុំវិញ​កំពុងតែ​មាន​ទុក្ខ​យ៉ាង​ធំ អ្នក​ទាំងនោះ​ត្រូវ​មាន​កាតព្វកិច្ច​មួយ​ដែល​មិន​អាច​ចៀស​បាន គឺ​ការ​រៀបចំ​ពិធីបុណ្យ​តាម​ប្រពៃណី​សម្រាប់​អ្នក​ដែល​បាន​ធ្វើ​មរណកាល​ទៅ​ហើយ។ សមាជិក​គ្រួសារ​ឬ​សាច់ញាតិ ត្រូវ​ញាប់​ដៃ​ញាប់​ជើង​រៀបចំ​គេហដ្ឋាន ទាក់ទង​ទៅ​គ្រប់​ទិសទី ព្រម​ទាំង​ជូន​ដំណឹង និង​សុំ​ការអនុញ្ញាត​ពី​អាជ្ញាធរ ដើម្បី​អាច​រៀបចំ​ពិធីបុណ្យ។ ក្នុង​កាលៈទេសៈ​បែបនេះ ក្រុម​គ្រួសារ​និង​ញាតិមិត្ត​ដែល​ជិត​ស្និទ្ធ​អាច​គិតគូរ​រៀបចំ​ពិធី​បាន​តិចតួច​បំផុត ហើយ​ចង់​នៅ​ក្បែរ​មនុស្ស​ជា​ទី​ស្រឡាញ់​របស់​ខ្លួន​នៅក្នុង​វិនាទី​ចុងក្រោយ។ ជាង​នេះ​ទៅទៀត បើ​មរណភាព​ដោយ​ហេតុ​គ្រោះថ្នាក់ ឬ​ភាព​ចៃដន្យ​អ្វីមួយ​វិញ​ទៀត​នោះ គ្មាន​សោះ​ឡើយ​វិញ្ញាណ និង​ស្មារតី​នៅក្នុង​ក្រុម​គ្រួសារ កុំ​ថា​ឡើយ​បាន​គិតគូរ​ដល់​ការ​រៀបចំ​ពិធី​ឱ្យ​បាន​សមរម្យ។

[quote font_size=”20″ arrow=”yes”]ក្នុង​កាលៈទេសៈ​កំពុង​តែ​មាន​ទុក្ខ ក្រុម​គ្រួសារ​និង​ញាតិមិត្ត​ដែល​ជិត​ស្និទ្ធ​អាច​គិតគូរ​រៀបចំ​ពិធី​បាន​តិចតួច​បំផុត ហើយ​ចង់​នៅ​ក្បែរ​មនុស្ស​ជា​ទី​ស្រឡាញ់​របស់​ខ្លួន​នៅក្នុង​វិនាទី​ចុងក្រោយ![/quote]

មិន​បាន​គិតគូរ​ឡើយ​ដល់​ការ​រៀបចំ​ពិធី​បុណ្យ​សព

ការ​រៀបចំ​ពិធីបុណ្យ​មួយ​តាម​ប្រពៃណី​គឺ​មិន​ងាយស្រួល​នោះ​ទេ ព្រោះ​ត្រូវ​ដឹង​ពី​ក្បួន​ទម្លាប់់ ដឹង​ថា​ត្រូវ​ទៅ​រក​អ្វី ហើយ​រក​ពី​អ្នក​ណា។ អ្វី​ដែល​កាន់​តែ​លំបាក​ទៀត​នោះ គឺ​ម្ចាស់​ដើម​បុណ្យ​មិន​ដែល​ជួបប្រទះ​រឿង​បែបនេះ មិនដឹង​ថា​ត្រូវ​ធ្វើ​អ្វី​មុន អ្វី​ក្រោយ អ្វី​ចាំបាច់ អ្វី​មិន​ចាំបាច់ និង​ថា​តើ​ទាក់ទង​អ្នកណា​ខ្លះ ហើយ​រៀបចំ​យ៉ាង​ដូច​ម្ដេច ដើម្បី​ឱ្យ​ត្រឹមត្រូវ​តាម​ប្រពៃណី ឱ្យ​សម​នឹង​ការ​គោរព​និង​ក្តី​ស្រឡាញ់ ដែល​ខ្លួន​មាន​ចំពោះ​អ្នក​ដែល​បាន​ចែក​ឋាន​ទៅ។

បើ​និយាយ​ពី​ខ្ទង់​ចំណាយ​វិញ សម្រាប់​ពិធី​បុណ្យ​ផ្សេងៗ ប្រហែល​ជា​អាច​ប៉ាន់ប្រមាណ​បាន ប៉ុន្តែ​សម្រាប់​ការរៀបចំ​ពិធីបុណ្យ​សព គឺ​ពិបាក​នឹង​ប៉ាន់ប្រមាណ​ណាស់ ដោយសារតែ​ភាគច្រើន​គឺ​ជា​ការរៀបចំ​ភ្លាមៗ​ដោយ​មិន​បាន​ព្រៀង​ទុក។ ពេល​ខ្លះ​ការ​ចំណាយ​គឺ​ច្រើន​លើសលប់ ដោយសារតែ​គ្រួសារ​សព​មិន​អាច​តថ្លៃ ឬ​គ្មាន​ពេលវេលា​និង​កម្លាំង​ក្នុង​ការ​តថ្លៃ ឬ​ដោយសារ​តែ​ត្រណម​មិន​តថ្លៃ​ក្នុង​ពិធីបុណ្យ ដើម្បី​ឱ្យ​វា​ប្រព្រឹត្តិ​ទៅ​ដោយ​រលូន។ ចំណាយ​ភាគច្រើន​មិនបាន​សមនឹង​តម្រូវការ​របស់​សាច់ញាតិ​បងប្អូន តែ​ដោយ​សិ្ថត​នៅក្នុង​ស្ថានភាព​មានទុក្ខ​បែបនេះ ម្នាក់ៗ​គឺ​ត្រូវតែ​សង្កត់ចិត្ត​ព្រម​ទទួល​យក​អ្វីៗ​ដែល​មាន បើ​ទោះបីជា​មិនបាន​សម​តាមចិត្ត​ដែល​ចង់​បាន​ក៏ដោយ។

«ហាង​មរតក» ចង់​ជួយ​សម្រួល​បន្ទុក​ដល់​គ្រួសារ​សព

ដោយ​សង្កេត​ឃើញ​ពី​ស្ថានភាព​លំបាក​នៃ​គ្រួសារ​សព​បែបនេះ លោក យស ប៊ុនហោ សហការ​ជាមួយ​នឹង​ដៃគូ​បរទេស​ម្នាក់​ទៀត បាន​រួមគ្នា​បង្កើត​ហាង​ផ្ដល់​សេវាកម្ម​រៀបចំ​បុណ្យសព​មួយ​ឡើង ដោយ​បាន​ដាក់​ឈ្មោះ​ហាង​ថា មរតក។ ស្ថាបនិក​ទាំងពីរ​រូប​នេះ​បាន​ពន្យល់​ថា ពួក​គាត់​បាន​មើលឃើញ​ពី​ការ​លំបាក​នៃ​គ្រួសារ​នានា​ក្នុង​សង្គម​ប្រឈម​នឹង​មរណភាព​សមាជិក​គ្រួសារ​របស់​ខ្លួន។ លោក​អ៊ំ​បាន​នឹកគិត​ដល់​ការ​ជួយ​សម្រួល​បន្ទុក​ដល់​ក្រុម​គ្រួសារ​ដែល​មាន​វិបត្តិ ដើម្បី​ឱ្យ​ពួកគាត់​បាន​ចំណាយ​ពេល​វេលា​ចុងក្រោយ​ជាមួយ​អ្នក​ជា​ទី​ស្រឡាញ់​ឱ្យ​ដល់​ទី​បញ្ចប់។ គំនិត​ដ៏​ល្អ​នេះ​ហើយ ដែល​នាំ​ឱ្យ​មាន​ការ​ផ្ដួចផ្ដើម​បង្កើត​ជា​ហាង មរតក នេះ​ឡើង។

លក្ខណៈ​ពិសេស​នៃ «ហាង​មរតក»

ពួកគាត់​មាន​ទស្សនៈ​ថា ពីធី​បុណ្យសព​ធ្វើឡើង​មាន​គោលបំណង​២​យ៉ាង។ ទី១​នោះ​គឺជា​កិត្តិយស​សម្រាប់​អ្នក​ស្លាប់ និង​ទី២​គឺ​ជា​អនុស្សាវរីយ៍​ចុងក្រោយ​បង្អស់​សម្រាប់​អ្នក​ដែល​នៅ​រស់។ ដូចនេះ​ហើយ ពួកគាត់​ចង់​ធ្វើ​យ៉ាងណា​ឱ្យ​ពីធី​បុណ្យ​មាន​ការ​រៀបចំ​ត្រឹមត្រូវ​តាម​ក្បួនខ្នាត តាម​ប្រពៃណី​នៃ​ក្រុម​គ្រួសារ​សព និង​ប្រព្រឹត្ត​ទៅ​រលូន ដោយ​មិន​ឱ្យ​ក្រុម​គ្រួសារ​សព​មាន​ការ​លំបាក​ឡើយ។

ដើម្បី​សម្រេច​បាន​នូវ​កិច្ចការ​ខាង​លើ ពួក​គាត់​បាន​ខិតខំ​ផ្តោត​សំខាន់​លើ​៣​ចំណុច​ដូច​ខាង​ក្រោម៖

1. ការ​ប្រឹក្សា​យោបល់៖ ផ្ដល់​ការ​ប្រឹក្សា​យោបល់​ដល់​ក្រុម​គ្រួសារ​អំពី​ដំណើរការ​នៃ​ពិធីបុណ្យ​យ៉ាង​ច្បាស់លាស់​និង​លម្អិត ដែល​នាំ​មក​នូវ​អារម្មណ៍​ស្ងប់​ក្នុង​ចិត្ត អាច​ជួយ​រំលែកទុក្ខ​សោក​ដ៏​ធំធេង​របស់​គាត់​បាន​មួយ​កម្រិត។
2. ផលិតផល៖ ផ្ដល់​ជូន​តែ​ផលិតផល​ក្នុង​ពិធីបុណ្យ ដែល​ល្អ​ប្រណីត សម្រាប់​ជា​កិត្តិយស​ដល់​អ្នក​ដែល​បាន​ស្លាប់ និង​ជា​ទី​ពេញចិត្ត​នៃ​ញាតិ​មិត្ត​បងប្អូន។
3. សេវាកម្ម៖ ភ្ជាប់​ជាមួយ​នូវ​សេវា​នានា​ដែល​ចាំបាច់ ដើម្បី​ជួយ​សម្រួល​ដល់​ដំណើរការ​និង​ភាព​ប្រសើរ​នៃ​កម្មវិធី​បុណ្យសព តាំង​ពី​ការ​លើកដាក់ ការ​តុបតែង រហូត​ដល់​ការ​យាម​កំដរ។

លើស​ពី​នេះ​ទៅ​ទៀត ស្ថាបនិក​ទាំង​២​រូប ក៏​បាន​គិតគូរ​ដល់​ខ្ទង់ចំណាយ​នៃ​ក្រុម​គ្រួសារ​សព​ផង​ដែរ។ ពួកគាត់​និយាយ​ថា ពួកគាត់​មិន​ផ្ដោត​ចម្បង​លើ​ការ​រក​ប្រាក់​នោះ​ទេ ព្រោះ​ពួកគាត់​យល់​ដល់​ផ្លូវចិត្ត​និង​អារម្មណ៍​នៃ​ក្រុម​គ្រួសារ សូម្បី​តែ​តម្លៃ​ក៏​បាន​គិតគូរ​យ៉ាង​ល្អិតល្អន់។ គិត​ដូចនេះ ពួកគាត់​បាន​បង្កើត​ជា «កញ្ចប់» ដែល​មាន​ទាំង​ផលិតផល និង​សេវា​អម​ជាមួយ មាន​ចែង​ច្បាស់លាស់ ដើម្បី​កាត់បន្ថយ​ចំណាយ​ឱ្យ​បាន​ច្រើន និង​ផ្ដល់​ជូន​ក្នុង​តម្លៃ​សមស្រប​បំផុត ។ នេះ​ក៏​ដើម្បី​អារម្មណ៍​ស្ងប់ចិត្ត​និង​ការ​ជឿជាក់​នៃ​ក្រុម​គ្រួសារ​សព ដែល​ត្រូវការ​ពេលវេលា​ឱ្យ​បាន​ច្រើន​បំផុត​ជាមួយ​មនុស្ស​ជា​ទី​ស្រឡាញ់​របស់​គាត់​ជា​ចុង​ក្រោយ គ្មាន​ពេល​ឡើយ​មក​ខ្វាយខ្វល់​អំពី​ការរៀបចំ​ពិធី​ទាំងនេះ។ សម្រាប់​ការ​ចាប់ផ្ដើម​ប្រតិបត្តិ​ដំបូង មរតក មាន «កញ្ចប់» ៣​ប្រភេទ សម្រាប់​រយៈពេល ៣ថ្ងៃ ៥ថ្ងៃ ឬ ៧ថ្ងៃ ទៅ​តាម​ការ​ចង់បាន​របស់​ក្រុម​គ្រួសារ​សព។ ទោះ​ក្នុង​កញ្ចប់​ណាមួយ​ក៏ដោយ គ្រួសារ​សព​នឹង​ទទួល​បាន​សេវា​និង​ផលិតផល​ដែល​មាន​គុណភាព ដែល​រួមមាន៖ លិខិត​ស្នាម​ពាក់ព័ន្ធ, ការ​សម្អាត​និង​រក្សាសព, ក្ដារមឈូស​ប្រណីត​និង​ជើង​ទម្រ, ការ​តុបតែង​ផ្កា, និង​ការ​ជួយ​សម្រួល​ដល់​ពិធីបុណ្យ ។

[quote font_size=”20″ arrow=”yes”]មិន​ផ្ដោត​ចម្បង​លើ​ការ​រក​ប្រាក់​នោះ​ទេ ព្រោះ​ពួកគាត់​យល់​ដល់​ផ្លូវចិត្ត​និង​អារម្មណ៍​នៃ​ក្រុម​គ្រួសារ[/quote]

ស្ថាបនា «ហាង​មរតក» មិនមែន​ជា​រឿង​ងាយ​ទេ!

ក្នុង​ការ​ធ្វើ​ឱ្យ​ឧត្តម​គំនិត​នេះ​ក្លាយជា​ការពិត​បាន ស្ថាបនិក​ទាំង​២​រូប បាន​ឆ្លង​កាត់​ការ​លំបាក​គ្រប់សព្វ​បែបយ៉ាង​តាំង​ពី​ដើម​ទី​មក​ម្ល៉េះ។ ពួកគាត់​បាន​បង្ហើប​ឱ្យ​ដឹង​អំពី​ការ​លំបាក​ក្នុង​ការ​និយាយ​ពី​គំនិត​របស់​ពួកគាត់​ដោយ​បើកចំហ ព្រោះ​ទោះបី​វា​ជា​រឿង​ដ៏​ប្រពៃ ដែល​ពួកគាត់​គិតគូរ​ដល់​សុខទុក្ខ​អ្នកមាន​វិបត្តិ​ក៏ដោយ ក៏​មនុស្សជា​ទូទៅ​មិនទាន់​អាច​ទទួលយក​បាន​នៅឡើយ​នូវ​ការពិភាក្សា​អំពី​បុណ្យសព ឬ​អំពី​ការ​គ្រោង​បុណ្យសព។ តែ​ពួកគាត់​មិន​រួញរា​ឡើយ ហើយ​បាន​ព្យាយាម​ពន្យល់​ដោយ​អស់ពី​ចិត្ត​អំពី​ការ​លំបាក​នៃ​ក្រុម​គ្រួសារ​សព និង​អំពី​អ្វី​ដែល​ពួកគាត់​អាច​ជួយ​បាន ដែល​នេះ​នាំ​ឱ្យ​មាន​មនុស្ស​កាន់តែ​​ច្រើន​ឡើង បាន​បើក​ចិត្ត​ទូលាយ ហើយ​ថែម​ទាំង​គាំទ្រ និង​ជ្រោមជ្រែង​ពួកគាត់​ឱ្យ​ទទួល​បាន​ជោគជ័យ​ទៀតផង។

គំនិត​ឧត្ដម​សម​នឹង​ទទួល​ជោគជ័យ

បើ​តាម «គំនិត», សេវាកម្ម​ដែល​បង្កើត​ឡើង​ដោយ​ស្ថាបនិក​ទាំង​២​រូប​ខាងលើ អាច​នឹង​ទទួល​បាន​ជោគជ័យ និង​ការ​គាំទ្រ​ច្រើន​ពី​មហាជន​ទូទៅ។ គាំទ្រ​គឺ​ដោយសារតែ​សេវាកម្ម​នេះ​នឹង​ជួយ​សម្រាល​បន្ទុក​ជាច្រើន ដោយ​បាន​ផ្តល់​​អារម្មណ៍​ធូរស្រាល និង​ភាព​ជឿជាក់ ធ្វើ​ឱ្យ​សមាជិក​គ្រួរសារ ព្រមទាំង​សាច់ញាតិ មាន​ពេល​កាន់តែ​ច្រើន​នៅ​ជាមួយ​អ្នក​ជា​ទី​ស្រឡាញ់​របស់​ខ្លួន ព្រោះ​ជា​ពេលវេលា​ដ៏​មាន​តម្លៃ​បំផុត និង​ជា​ពេល​ជួប​មុខ​គ្នា​ចុងក្រោយ។ ភាព​ជឿជាក់​នៃ​គ្រួសារ​សព​នឹង​កើត​ចេញពី​ការយល់​ច្បាស់​ពី​ដំណើរការ​នៃ​ការរៀបចំ​ពិធី ការ​ដឹងពី​កម្រិត​សេវាកម្ម​និង​អ្វី​ផ្សេងៗ​ដែល​នឹង​ទទួល​បាន និង​ការ​ដឹង​ជាក់លាក់​ពី​ខ្ទង់ចំណាយ។ ប៉ុន្តែ​សេវាកម្ម​ដែល​មិនធ្លាប់​មាន​ពីមុន​មួយ​នេះ អាច​នឹង​ត្រូវការ​ពេលវេលា​ពន្យល់​ដោយមាន​ហេតុផល​សមស្រប ដើម្បី​បញ្ជ្រាប​ចូល​ទៅ​ក្នុង​ផ្នត់គំនិត​របស់​ប្រជាជន​ខ្មែរ ឱ្យ​ពួកគាត់​យល់​ច្បាស់ និង​ចាត់ទុក​វា​ដូច​ការរៀបចំ​ពិធី​ផ្សេងៗ​ទៀត។ ភាព​ជឿជាក់​នៃ​មហាជន និង​ការផ្លាស់ប្ដូរ​ផ្នត់គំនិត​របស់​ពួកគាត់​ទៅលើ​ការរៀបចំ​ពិធីបុណ្យ​សព​នេះ​ហើយ នឹង​នាំមក​នូវ​ភាព​ជោគជ័យ​សម្រាប់​មរតក។

ការដាក់តម្លៃឱ្យផលិតផលគឺជាកិច្ចការដែលលំបាកបំផុត។ លំបាកត្រង់ថា ប្រសិនបើដាក់តម្លៃខ្ពស់ពេក បរិមាណនៃការលក់នឹងមានចំនួនតិច ហើយនឹងបាត់បង់ឱកាសក្នុងការឆក់យកចំណែកទីផ្សារដោយសារតែបច្ចុប្បន្ននេះមានដៃគូរប្រកួតប្រជែងជាច្រើន។ ប៉ុន្តែ ប្រសិនបើដាក់តម្លៃទាបពេក គឺអាចប្រឈមមុខនឹងការមិនរួចថ្លៃចំណាយផ្សេងៗដើម្បីឱ្យអាជីវកម្មមានដំណើរការ ហើយក៏ធ្វើឱ្យអតិថិជនអាចយល់ថាផលិតផលនោះមានគុណភាពទៅតាមកម្រិតនោះដែរ។ នៅក្នុងពិភពអាជីវកម្ម មានសហគ្រិនជាច្រើនបានធ្វើការដកពិសោធទៅលើការដាក់តម្លៃរបស់ខ្លួន ដើម្បីបង្កើនការលក់ និងស្ទាបស្ទង់មើលទីផ្សារ ហើយក៏មានសហគ្រិនមិនតិចទេដែលបានបរាជ័យក្នុងកិច្ចការមួយនេះ។

[ad id=”5037″]

ការដាក់តម្លៃផលិតផលគឺជាកិច្ចការដ៏សំខាន់មួយ ដែលអាចធ្វើឱ្យប្រាក់ចំណូលកើន ឬថយចុះទៅតាមយុទ្ធសាស្ត្រ និងយុទ្ធវិធីរបស់សហគ្រិនម្នាក់ៗ។ ប៉ុន្តែ ចូរកុំធ្វើតេស្តសាកល្បងដាក់តម្លៃផលិតផលដោយតាមចិត្តចង់ ឬការប៉ាន់ស្មានដោយគ្មានមូលដ្ឋាន ព្រោះថា ការធ្វើបែបនេះនឹងអាចនាំទៅកាន់ភាពបរាជ័យបាន។ មានការសិក្សាស្តីពីឥរិយាសេដ្ឋកិច្ច(Behavioral Economics)ដ៏គួរឱ្យចាប់អារម្មណ៍មួយចំនួន ដែលបានធ្វើការបង្ហាញផ្លូវក្នុងការដាក់តម្លៃផលិតផលឱ្យបានត្រឹមត្រូវ ដើម្បីបង្កើនចំណូលរបស់អាជីវកម្ម។ សម្រាប់ភាគទីមួយនេះ គំនិតសូមលើកយកការធ្វើតេស្តដាក់តម្លៃមួយដែលគេបានសាកល្បដើម្បីប្រៀបធៀបចំណូលមកបង្ហាញជូន ដែលហៅថា “ការដាក់តម្លៃតាមបែបផ្តល់ជម្រើស” ។

លោក វីលាម ផោនស្តូន (William Poundstone) អ្នកនិពន្ធសៀវភៅ “Priceless: The Myth of Fair Value” បានលើកឡើងថា ការឱ្យនូវជម្រើសតម្លៃផលិតផលគឺអាចធ្វើឱ្យមានការប្រែលប្រួលចំណូលបាន។ នៅក្នុងសៀវភៅនោះ លោកផោនស្តូនបានលើកឡើងពីការធ្វើតេស្តរបស់លោកទៅលើការផ្លាស់ប្តូរឥរិយាបថរបស់អតិថិជននៅពេលដែលមានការផ្លាស់ប្តូរនូវជម្រើសតម្លៃស្រាបៀរ។

ការពិសោធលើកទី១

ក្នុងចំណោមមនុស្ស៥នាក់ ៤នាក់បានជ្រើសរើសនូវស្រាបៀរដែលមានតម្លៃ2,50ដុល្លា ហើយមានតែ១នាក់ប៉ុណ្ណោះដែលជ្រើសរើសស្រាបៀរដែលមានតម្លៃ1,8ដុល្លា។ តើការបន្ថែមជម្រើសមួយទៀតដែលមានតម្លៃថោកជាងនឹងអាចបង្កើនចំណូលដែលឬទេសម្រាប់អ្នកដែលចង់បានជម្រើសស្រាបៀរដែលថោកជាង? អ្នកស្រាវជ្រាវធ្វើការសិក្សាដោយការដាក់បន្ថែមជម្រើសស្រាបៀរមួយទៀតដែលមានតម្លៃ1,60ដុល្លាទៅក្នុងបញ្ចី។

ការពិសោធលើកទី២

លទ្ធផលគឺខុសពីការស្មានទុក! ជម្រើសស្រាបៀរទីបីដែលទើបតែបញ្ចូលហើយមានតម្លៃថោកនោះគឺមិនត្រូវបានគេជ្រើសរើសនោះទេ។ ប៉ុន្តែ យើងឃើញមានការផ្លាស់ប្តូរមួយគួរឱ្យកត់សម្គាល់ទៅលើប្រភេទស្រាបៀរដែលមានតម្លៃ1,8ដុល្លាដែលពីមុនមានអ្នកជាវតែ20%ប៉ុណ្ណោះ ប៉ុន្តែបន្ទាប់ជម្រើសមួយថ្មីបានដាក់ចូល វាធ្វើឱ្យចំនួនអតិថិជនងាកមកជ្រើសរើសស្រាបៀរដែលមានតម្លៃ1,8ដុល្លាកើនឡើងដល់80%។ ប៉ុន្តែ ស្រាបៀរដែលមានតម្លៃថ្លៃ គឺធ្លាក់មកនៅត្រឹម20%តែប៉ុណ្ណោះ។ នេះគឺជាការសម្រេចចិត្តមិនត្រឹមត្រូវមួយដែលបញ្ចូលស្រាបៀរមានតម្លៃថោកជាងចូលទៅក្នុងបញ្ជី ព្រោះថាវាបានធ្វើឱ្យចំណូលធ្លាក់ចុះយ៉ាងសម្បើម។ ប្រសិនបើអតិថិជនមិនចង់បានជម្រើសដែលថោកជាង ប្រហែលជម្រើសដែលថ្លៃជាងអាចនឹងជួយបង្កើនចំណូល?

ការពិសោធលើកទី៣

ពិតជាល្អណាស!

ការបន្ថែមជម្រើសដែលថ្លៃជាង ពិតជាបានបង្កើនចំណូលពិតប្រាកដមែន។ បន្ទាប់ពីបានបន្ថែមជម្រើសដែលថ្លៃជាងចូល (3,4ដុល្លា) ហើយដកចេញនូវជម្រើសដែលមានតម្លៃទាបជាងចេញ(1,60ដុល្លា) ប្រាក់ចំណូលក៏មានការកើនឡើងគួរឱ្យកត់សម្គាល់។ 85%បានជ្រើសរើសនូវជម្រើស 2,50ដុល្លា ហើយ១០% ជ្រើសរើសជម្រើស 3,40ដុល្លា និងមានតែ5%ប៉ុណ្ណោះដែលជ្រើសរើសតម្លៃទាបជាងគេ (1,80ដុល្លា)។

ឧទាហរណ៍ខាងលើពិតជាបានបង្ហាញពីសារៈសំខាន់នៃការផ្តល់ជម្រើសតម្លៃ។ មានអតិថិជនមួយចំនួនចូលចិត្តជ្រើសរើសនូវជម្រើសណាដែលថ្លៃជាងគេ។ ដូចនេះ ការមានផលិតផលមួយដែលមានតម្លៃថ្លៃ នឹងធ្វើឱ្យមានភាពទាក់ទាញសម្រាប់ពួកគេ ហើយធ្វើឱ្យជម្រើសផ្សេងៗគឺជាជម្រើសដែលមានតម្លៃល្អបើគិតលើតម្លៃ។ ក្នុងពិភពអាជីវកម្មជាក់ស្តែង មានអតិថិជនមួយចំនួនធំ មិនជ្រើសរើសយកនូវជម្រើសដែលមានតម្លៃទាបជាងគេនោះទេ ហើយនេះគឺជាចិត្តសាស្ត្ររបស់មនុស្ស។ តើអ្នកមានធ្លាប់មានបទពិសោធបែបនេះដែរឬទេ (មិនហ៊ានជ្រើសរើសយកជម្រើសដែលមានតម្លៃជាងគេ)?

ប្រសិនបើអ្នកនិយាយពីហាងកាហ្វេសម័យទំនើបដែលល្បីនៅក្នុងទីក្រុងភ្នំពេញ តើអ្នកនឹកឃើញពីហាងកាហ្វេមួយណា? ប្រសិនបើអ្នកនិយាយពីបណ្តាញសង្គមវិញ តើអ្នកនឹងនឹកឃើញពីអ្វីមុនគេ? ប្រសិនបើអ្នកចង់ស្វែងរកព័ត៌មាន ឬឯកសារពីប្រព័ន្ធអ៊ីនធឺណិត តើអ្នកនឹងទៅទំព័រមួយណាមុនគេ? ចម្លើយភាគច្រើនសម្រាប់ហាងកាហ្វេ គឺប្រាកដជាហាងកាហ្វេBrown រីឯបណ្តាញសង្គម និងទំព័រស្វែងរកព័ត៌មានគឺប្រាកដជា Facebook និង Googleហើយសម្រាប់មនុស្សភាគច្រើន។

ម៉ាកសញ្ញាខាងលើ គឺសុទ្ធតែជាអ្នកដែលឈានមុខគេនៅក្នុងទីផ្សារ ដែលយុវវ័យ និងមនុស្សជាច្រើនបានស្គាល់ ហើយនិងបានប្រើប្រាស់ឬជាវសេវាពីម៉ាកសញ្ញាខាងលើ។ ហាងកាហ្វេBrown គឺអាចនិយាយបានថាគឺជាហាងកាហ្វេសម័យទំនើបដំបូងគេបង្អស់ដែលបានបញ្ច្រៀបចូលទីផ្សារនៅក្នុងក្រុងភ្នំពេញ ដែលកាលពីបើកដំបូងឡើយ សឹងតែគ្មានអ្នកជឿថា អាជីវកម្មបែបនេះគឺបានទទួលបានភាពជោគជ័យយ៉ាងសម្បើមនៅក្នុងទីផ្សារនៃប្រទេសកម្ពុជាយើង ដោយសារតែតម្លៃគឺមានភាពខុសគ្នាឆ្ងាយខ្លាំងពេកពីហាងកាហ្វេធម្មតា។ ចំណែកឯFacebook និង Google ថ្វីត្បិតតែមិនមែនជាអ្នកឈានចូលទីផ្សារមុនគេ ប៉ុន្តែបានទទួលការគាំទ្រ និងទាញយកប្រជាប្រិយភាពពីបណ្តាអ្នកប្រើប្រាស់ មិនថាតែនៅក្នុងប្រទេសកម្ពុជាយើងទេ គឺទូទាំងពិភពលោកផងដែរ។

[box fontsize=”22″]ដើម្បីក្លាយខ្លួនជាអ្នកឈានមុខគេនៅក្នុងទីផ្សារ អាជីវកម្មមួយត្រូវតែជាអាជីវកម្មដំបូងគេ និងគួរឱ្យចាប់អារម្មណ៍ ឬជាអ្នកដែលល្អជាង![/box]

ការឈានជើងចូលទៅក្នុងទីផ្សារមុនគេគឺមានគុណសម្បត្តិជាច្រើន ប៉ុន្តែការឈានជើងចូលទៅក្នុងទីផ្សារក្រោយគេ ក៏អាចនឹងមានអត្ថប្រយោជនជាច្រើនផងដែរ។ និយាយជារួម ដើម្បីឲ្យក្លាយជាអ្នកឈានមុខគេនៅក្នុងទីផ្សារ អ្នកត្រូវតែជាអ្នកដំបូង ឬជាអ្នកដែលល្អជាង។

ធ្វើជាអ្នកដំបូង

កាហ្វេBrownអ្នកដែលឈានជើងចូលទៅក្នុងទីផ្សារមុនគេគឺត្រូវបានគេហៅថា «អ្នកមានប្រៀប» ។ យើងអាចក្រឡេកទៅមើលហាងកាហ្វេBrown ដែលបង្កើតឡើងនៅឆ្នាំ២០០៩។ ក្នុងអំឡុងពេលនេះ ហាងកាហ្វេសម័យទំនើបគឺគ្មានការប្រកួតប្រជែងដូចពេលបច្ចុប្បន្ននេះទេ។ គំនិត អាជីវកម្មបើកហាងកាហ្វេសម័យទំនើបនាពេលនោះ ក៏ត្រូវបានមនុស្សទូទៅភាគច្រើនគិតថានិងមិនអាចទៅរួចផងដែរ ដោយសារតែស្ថានភាពសេដ្ឋកិច្ច និងវប្បធម៌របស់ប្រទេសយើង។ ប៉ុន្តែ បន្ទាប់ពីបើកដំណើរការ អ្វីៗគឺហូសពីការស្មាន អាជីវកម្មហាងកាហ្វេសម័យទំនើបមានការរីករូតលូតលាស់គួរឱ្យកត់សម្គាល់។ បន្ទាប់ពីភាពជោគជ័យ មានម៉ាកសញ្ញាជាច្រើនបានបញ្ច្រៀបខ្លួនចូលទៅក្នុងទីផ្សារ ធ្វើឱ្យហាងកាហ្វេប្រភេទនេះរីកដូចផ្សិត មានស្ទើរគ្រប់ទីកន្លែងនៅក្នុងទីក្រុងភ្នំពេញ និងធ្លាយទៅដល់បណ្តាខេត្តក្រុងមួយចំនួនផងដែរ។ ប៉ុន្តែទោះជាមានម៉ាកសញ្ញាច្រើនយ៉ាងណាក៏ដោយ ហាងកាហ្វេBrown នៅតែជាម៉ាកសញ្ញាឈានមុខគេក្នុងអាជីវកម្មប្រភេទនេះ។

ការឈានជើងចូលទីផ្សារមុនគេគឺមានប្រៀប និងអត្ថប្រយោជន៍ជាច្រើន។ អ្នកដែលឈានជើងចូលមុនគេ គឺអាចចាប់យកចំណែកទីផ្សារបានធំទូលាយ និងអាចទទួលបានកម្រៃសេវាកម្ម ឬថ្លៃផលិតផលបានថ្លៃដោយសារតែគ្មានដៃគូរប្រកួតប្រជែង។ អ្នកដែលឈានជើងចូលមុនគេគឺអាចមានពេលវេលាច្រើនជាងអ្នកចូលមកទីផ្សារបន្តបន្ទាប់ក្នុងការកែលម្អរឱ្យប្រសើរឡើងនូវដំណើរការ និងប្រព័ន្ធគ្រប់គ្រងដើម្បីឱ្យមានប្រសិទ្ធិភាព និងប្រសិទ្ធិផលខ្ពស់ ហើយថែមទាំងអាចស្គាល់ទីផ្សារបានច្បាស់ជាង។ មិនតែប៉ុណ្ណោះ ពួកគេអាចចាប់យកទីតាំងបានល្អៗចំកន្លែងសម្រាប់បើកអាជីវកម្មប្រភេទនោះ និងអាចជ្រើសរើសបុគ្គលិកឆ្នើមៗមកបម្រើការងារ។ អត្ថប្រយោជន៍ផ្សេងទៀតដែលពួកគេអាចនឹងទទួលបានគឺតម្លៃ និងការផ្តល់ជូនពិសេសពីអ្នកផ្គត់ផ្គង់ ដែលធ្វើឱ្យគេមានប្រៀបយ៉ាងខ្លាំងនៅក្នុងទីផ្សារ។

អ្នកដំបូង និងអ្នកបន្ទាប់

បញ្ហាប្រឈមសម្រាប់អ្នកដែលឈានចូលទៅក្នុងទីផ្សារមុនគេគឺភាពមិនប្រាកដប្រជា។ អ្នកដែលឈានជើងចូលមុនគេភាគច្រើនគឺមិនទាន់ស្គាល់ពីទីផ្សារ និងតម្រូវការពេញលេញរបស់សំណាក់អតិថិជន។ អ្នកទីមួយភាគច្រើនធ្វើការលក់ផលិតផលដែលមិនមានអ្នកប្រើប្រាស់ពីមុនមក ហើយភាគតិចបំផុតដែលពួកគេអាចផលិតផលិតផលដែលត្រូវចិត្តអតិថិជន។ ក្រុមហ៊ុនធំៗអាចនឹងទ្រទ្រង់បាននូវការខាតបង់នៅពេលចាប់ផ្តើមដំបូងដោយសារតែកំហុសលើកទីមួយនៅក្នុងទីផ្សារថ្មីនេះ ប៉ុន្តែសម្រាប់ក្រុមហ៊ុនតូចៗវិញអាចនឹងទទួលរងនូវការដូលរលំ។

អ្នកដែលឈានជើងចូលនៅក្នុងទីផ្សារក្រោយៗ អាចនឹងរៀនពីកំហុសដែលអ្នកមុនៗបានប្រព្រឹត្ត និងធ្វើការកែលម្អរសម្រាប់ទីផ្សារដែលត្រូវបានធ្វើតេស្តរូចហើយ។ ពួកគេអាចនឹងចៀសវាងពីការខាងបង់ ដោយសារការចំណាយខុសគោលដៅ និងហានិភ័យដែលអាចកើតមានដោយសារតែចន្លោះប្រហោងប្រតិបត្តិ និងបច្ចេកវិទ្យាដែលអ្នកមុនៗជួបប្រទះ។ ដោយសារតែការវិនិយោគមានទំហំធំ សម្រាប់អ្នកទីមួយ វាពិបាកនឹងសម្របតាមទីផ្សារដែលមានភាពចាស់ទុំ ក្នុងការផ្លាស់ប្តូរ និងវិនិយោគបន្ថែមទៀតដើម្បីតម្រូវតាមទីផ្សារទាំងផ្នែកប្រតិបត្តិ និងបច្ចេកវិទ្យាដែលធ្វើឲ្យអ្នកដែលមកក្រោយមានប្រៀបជាង និងមានហានិភ័យទាបជាង។

អ្នកដែលឈានជើងចូលមកក្រោយអាចនឹងប្រឹងប្រែងធ្វើការប្រកួតប្រជែងជាមួយអ្នកមកមុនដោយធ្វើការផ្តល់ជូននូវផលិតផលដែលមានគុណភាពខ្ពស់ជាង និងបំពេញតម្រូវការបានល្អជាងដើម្បីស្រូបទាញយកចំណែកទីផ្សារ។ ក្រៅពីនេះ អ្នកឈានចូលទីផ្សារក្រោយៗ អាចនឹងចំណាយលើការវិនិយោគតិចជាង ដែលអាចធ្វើឱ្យគេមានលទ្ធភាពបង្កើនខ្ទង់ចំណាយទៅលើការធ្វើទីផ្សារដែលជាហេតុនាំឱ្យគេមានប្រៀបជាងអ្នកទីមួយ។

ជាក់ស្តែងGoogle បានឈានជើងចូលទៅក្នុងទីផ្សារម៉ាស៊ីនស្វែងរកព័ត៌មានក្នុងឆ្នាំ១៩៩៨។ នៅក្នុងអំឡុងពេលនោះ ត្រូវបានគ្រប់គ្រងចំណែកទីផ្សារដោយក្រុមហ៊ុនធំៗ៣ Yahoo Lycos nនិងAltaVista ដែលក្រុមហ៊ុនទាំងនេះសុទ្ធិតែមានអតិថិជនជាច្រើន និងត្រូវបានគេស្គាល់និងប្រើប្រាស់យ៉ាងទូលំទូលាយ។ ប៉ុន្តែGoogleបានសិក្សាពីចន្លោះប្រហោង និងកំហុសរបស់ក្រុមហ៊ុនទាំង៣ខាងលើ ដោយធ្វើការកែប្រែ និងបង្កើតឡើងនូវផលិតផលដែលប្រសើរជាង ធ្វើការស្វែងរកព័ត៌មានរហ័សជាង និងល្អជាង។

មានក្រុមហ៊ុនជាច្រើនដែលទទួលបរាជ័យដោយមិនអាចថែរក្សាភាពឈានមុខគេនៅក្នុងអាជីវកម្មរបស់ពួកគេ។ ភាពបរាជ័យដែលបានកើតឡើងទៅលើក្រុមហ៊ុនធំៗមានដូចជា MySpace និងFriends Reunited។ ទោះជាក្រុមហ៊ុនទាំងនោះនៅតែមានដង្ហើមរហូតមកទល់នឹងសព្វថ្ងៃនេះ ភាព«មានប្រៀបជាអ្នកដំបូង»ក្នុងបណ្តាញសង្គមមិនអាចយកឈ្នះក្រុមហ៊ុនស្រករក្រោយFacebookបានឡើយ។ មានក្រុមហ៊ុនខ្លះចាប់ផ្តើមដំណើរការ និងឈានជើងចូលទីផ្សារមុនគេ ប៉ុន្តែពួកគេក៏ត្រូវបានដួលរលំ និងក្ស័យធនវិញមុននឹងប្រភេទអាជីវកម្មនោះបានទទួលការគាំទ្រពីសំណាក់អតិថិជន។

ហេតុផលដែលធ្វើឱ្យអ្នកដែលឈានជើងចូលមុនគេមិនអាចសម្រេចបំណងបាន និងមានប្រៀបនៅក្នុងទីផ្សារបានរហូតគឺដោយសារពេលវេលា និងសំណាង។ ការសិក្សាមួយបានបង្ហាញថា នវានុវត្តន៍បច្ចេកវិទ្យា និងល្បឿនវិវឌ្ឍន៍នៃតម្រូវការទីផ្សារគឺជាកត្តាដ៏ចម្បងក្នុងការកំណត់បានថាអ្នកដែលឈានជើងចូលទៅក្នុងទីផ្សារមុនគេអាចនឹងមានប្រៀបឬអត់។ ការសិក្សាបានលើកឡើងថា នៅពេលដែលតម្រូវការទីផ្សារមានល្បឿនរីកលូតលាស់យឺត និងបច្ចេកវិទ្យាមានកម្រិត អ្នកដែលឈានជើងទីផ្សារមុនគេ និងមានប្រៀបជាង។ ប៉ុន្តែផ្ទុយទៅវិញ ប្រសិនបើទីផ្សារមានសភាពប្រែប្រួលខ្លាំង និងការផ្លាស់ប្តូរនៃបច្ចេកវិទ្យាមានភាពរហ័ស អ្នកដែលឈានជើងចូលទីផ្សារមុនគេអាចនឹងជួបបញ្ហាប្រឈម។

សរុបមក វាមិនសំខាន់ទេសម្រាប់អ្នកដែលឈានជើងទីផ្សារមុនគេ ឬក្រោយគេដើម្បីមានប្រៀបលើដៃគូរប្រកួតប្រជែង សំខាន់គឺការផ្តល់ជូននៅផលិតផល ឬសេវាកម្មដែលអាចផ្គាប់ចិត្តអតិថិជនបាន។ អ្នកដែលចាប់ផ្តើមប្រឡូកមុនគេ ភាគច្រើនតែងតែមានប្រៀប និងឈានមុខគេនៅក្នុងទីផ្សារដោយសារតែការស្គាល់ និងចងចាំម៉ាកសញ្ញាពីសំណាក់អតិថិជន មានភាពចាស់ទុំនៅក្នុងទីផ្សារ ការគ្រប់គ្រងទៅលើធនធានដែលមានតិចតួចដែលធ្វើឱ្យអ្នកចូលមកក្រោយពិបាកនឹងយកឈ្នះ និងគ្រឹះយ៉ាងរឹងម៉ាំនៅក្នុងទីផ្សារ។ ប៉ុន្តែអ្នកមកក្រោយក៏អាចក្លាយជាអ្នកមានប្រៀបវិញផងដែរដោយសារតែពួកគេបានដឹងយ៉ាងច្បាស់ពីកំហុសអ្នកដែលឈានជើងចូលមុន ហើយពួកគេតែងតែផ្តល់ជូនអតិថិជននូវផលិផលដែលមានគុណភាពល្អជាងជាមួយនិងតម្លៃទាប។ ជាមួយនឹងជំនាញទីផ្សារដែលមានភាពប៉ិនប្រសប់ជាង អ្នកចូលមកទីផ្សារក្រោយគេអាចនឹងដណ្តើមយកភាពមានប្រៀបរបស់អ្នកចូលមុនបាន។ ដើម្បីក្លាយខ្លួនជាអ្នកឈានមុខគេនៅក្នុងទីផ្សារ អាជីវកម្មមួយត្រូវតែជាអាជីវកម្មដំបូងគេ និងគួរឱ្យចាប់អារម្មណ៍ ឬជាអ្នកដែលល្អជាងគេ។