ហេតុអ្វីត្រូវបង្វឹកបុគ្គលិកអំពីចំណេះដឹងផ្នែកហិរញ្ញវត្ថុ?

ចំណេះដឹងផ្នែកហិរញ្ញវត្ថុ សំដៅលើការយល់ដឹងស៊ីជម្រៅពាក់ព័ន្ធនឹងរបៀបគ្រប់គ្រងចំណាយចាំបាច់ជាប្រចាំថ្ងៃ ការគ្រប់គ្រងហិរញ្ញវត្ថុផ្ទាល់ខ្លួន ការចេះសន្សំ ការបង្កើតហិរញ្ញវត្ថុ ឥណទាន និងការគ្រប់គ្រងបំណុលចាំបាច់ដើម្បីធ្វើការសម្រេចចិត្តប្រកបដោយទំនួលខុសត្រូវផ្នែកហិរញ្ញវត្ថុ ព្រមទាំងយល់ដឹងពីការអនុវត្តផ្សេងៗដែលមានប្រសិទ្ធភាពខ្ពស់ក្នុងការប្រើប្រាស់ហិរញ្ញវត្ថុ។ លើសពីនេះ ក៏អាចដឹកនាំអ្នកឱ្យឆ្ពោះទៅរកជីវិតដែលមានសេរីភាពផ្នែកហិរញ្ញវត្ថុ និងឆ្លាតវៃក្នុងការប្រើប្រាស់ហិរញ្ញវត្ថុ។

ចំពោះនៅក្នុងក្រុមហ៊ុនវិញ ក្នុងនាមជាអ្នកដឹកនាំ ម្ចាស់អាជីវកម្ម ឬប្រធានផែ្នក ប្រសិនបើចង់ចូលរួមចំណែកក្នុងការជួយឱ្យអ្នកនៅក្រោមបង្គាប់របស់ខ្លួនក្លាយជាមនុស្សមានសេរីភាពផ្នែកហិរញ្ញវត្ថុ ដោយមិនមានបញ្ហារឿងហិរញ្ញវត្ថុ ដូច្នេះគួរតែផ្ដោតលើការបណ្ដុះបណ្ដាលពួកគេឱ្យមានចំណេះដឹងផ្នែកហិរញ្ញវត្ថុ។

អ្នកដឹងទេថា បើអ្នកបង្វឹកបុគ្គលិករបស់អ្នកឱ្យមានចំណេះដឹងផ្នែកហិរញ្ញវត្ថុ តើវាមានសារៈសំខាន់បែបណា? ដូច្នេះខាងក្រោមនេះ យើងនឹងបង្ហាញពីសារៈសំខាន់មួយចំនួន ដែលអ្នកនឹងទទួលត្រឡប់មកវិញ បើសិនជាអ្នកបានបណ្ដុះបណ្ដាលបុគ្គលិកនៅក្រោមបង្គាប់របស់អ្នកឱ្យមានចំណេះដឹងផ្នែកហិរញ្ញវត្ថុ។

កាត់បន្ថយស្រ្តេសរបស់បុគ្គលិកលើរឿងបញ្ហាហិរញ្ញវត្ថុ ដោយពួកគេអាចគ្រប់គ្រងហិរញ្ញវត្ថុផ្តាល់ខ្លួនបានយ៉ាងល្អជាកញ្ចប់ថវិកា តាមរយៈការចេះបែងចែកចំណែកនៃការផ្គត់ផ្គង់ និងការចំណាយជាប្រចាំថ្ងៃរបស់ពួកគេបានយ៉ាងល្អ មិនថាពួកគេកំពុងស្ថិតនៅជីវិតលីវ ឬមានគ្រួសារឡើយ។
ជួយបុគ្គលិកឱ្យបង្កើនផលិតភាពការងារខ្ពស់ជាងមុន ដោយពួកគេឈប់មានកង្វល់ច្រើនលើបញ្ហាហិរញ្ញវត្ថុបន្តទៀត ដែលធ្វើឱ្យពួកគេមានអារម្មណ៍ល្អ និងមានផលិតភាពនៅកន្លែងការងារ។
ជួយបុគ្គលិកឱ្យកាន់តែពេញចិត្តនឹងការងារដែលខ្លួនកំពុងធ្វើ និងព្យាយាមធ្វើយ៉ាងអស់ពីចិត្ត តាមរយៈការគ្មានកង្វល់ច្រើនលើរឿងហិរញ្ញវត្ថុ និងយល់ថាក្រុមហ៊ុនបានជួយ ព្រមទាំងឱ្យតម្លៃលើភាពរីកចម្រើនរបស់ពួកគេទាំងនៅកន្លែងការងារ និងជីវិតផ្ទាល់ខ្លួន។
កាត់បន្ថយអាត្រានៃការជំពាក់បំណុលច្រើនរបស់បុគ្គលិក តាមរយៈការមិនងាយនឹងខ្ចី ឬក៏ខ្ចីហិរញ្ញវត្ថុពីកន្លែងណាមួយដោយមានគោលបំណង និងការកំណត់បែងចែកជាក់លាក់ ដោយមិនធ្វើឱ្យខ្លួនឯងធ្លាក់ក្នុងស្ថានភាពជាប់បំណុលច្រើន។
ជួយបុគ្គលិកឱ្យចេះសន្សំលុយបានយ៉ាងល្អ ដោយអាចសល់លុយជារៀងរាល់ខែ ព្រមទាំងអាចប្រើប្រាស់លុយទាំងនោះលើរឿងចាំបាច់នានា ដូចជាបង់រំលស់ផ្ទះ និងតម្រូវការផ្សេងៗអាស្រ័យលើបុគ្គលម្នាក់ៗ។
ជួយលើកតម្កើងកេរ្តិ៍ឈ្មោះក្រុមហ៊ុនបានកាន់តែល្អ តាមរយៈបុគ្គលិកគ្រប់គ្នាមានភាពរីកចម្រើនទាំងរឿងការងារ និងផ្នែកហិរញ្ញវត្ថុ ថែមទាំងជួយធ្វើឱ្យក្រុមហ៊ុនពោរពេញដោយធនធានមនុស្សល្អៗ

ពាណិជ្ជកម្ម

ហេតុអ្វីបានជាការធ្វើយុទ្ធនាការទីផ្សារអ្នកបរាជ័យ?

Rin Hanavy

១. មិនបានកំណត់អត្តសញ្ញាណរបស់អតិថិជនគោលដៅបានត្រឹមត្រូវ

ការកំណត់អត្តសញ្ញាណរបស់អតិថិជន គឺតម្រូវឲ្យអ្នកចំណាយពេលវេលាជាច្រើនដើម្បីធ្វើការស្រាវជ្រាវ អំពីចំណង់ចំណូលចិត្តក៏ដូចជាទំនោរនៃការប្រើប្រាស់របស់ពួកគេ។ ជាងនេះទៅទៀត អ្នកក៏ត្រូវពិចារណាទៅលើកត្តាមួយចំនួនទៀតផងដែរ រួមមាន តើនរណាគឺជាអតិថិជនគោលដៅរបស់អ្នក”? តើនរណាដែលអាចមើលឃើញការផ្សព្វផ្សាយនៃផលិតផលអ្នក? តើផលិតផលរបស់អ្នកនឹងជួយ ឬអាចដោះស្រាយអ្វីបានខ្លះ ដល់អតថិជន?តើទំហំនៃការប្រកួតប្រជែងនៅលើទីផ្សារបច្ចុប្បន្ននេះស្ថិតក្នុងកម្រិតណា?ជាដើម។

នៅពេលដែលអ្នកបានកំណត់ អត្តសញ្ញាណរបស់អតថិជនរួច និងមានគំនិតក្នុងការធ្វើទីផ្សារបែបនេះហើយ អ្នកត្រូវចាប់ផ្ដើមបង្កើតជារឿងរ៉ាវ ការស្ទង់មតិ ឬវីដេអូផ្សេងៗ ដើម្បីវាស់ស្ទង់មើល ពីចំណាប់អារម្មណ៍ ទម្លាប់ និងការសម្រេចចិត្តទិញរបស់អតិថិជន។ ដូចនេះ ការយល់ដឹងច្បាស់អំពីអតិថិជនគោលដៅ និងទំនោររបស់អ្នកប្រើប្រាស់ នឹងធ្វើឲ្យការធ្វើយុទ្ធនាការទីផ្សាររបស់អ្នកទទួលបានជោគជ័យ។

២. ការកំណត់ទីតាំងពុំបានច្បាស់លាស់(Unclear Positioning)

ប្រសិនបើអ្នកមិនបានដឹងច្បាស់ថាអ្នកចង់ផ្ដល់អ្វីទៅកាន់អតិថិជនទេនោះ តើធ្វើយ៉ាងណាទើបអ្នកអាចបង្ហាញពីគុណតម្លៃ និងលក្ខណៈពិសេសនៃអាជីវកម្មរបស់អ្នកបានទៅ? ព្រោះអតិថិជនមិនមែនសុខៗគាត់ចុចចូលមើលទំព័រហ្វេសបុក ឬគេហទំព័ររបស់អ្នកនោះទេ ទាល់តែពួកគេដឹងអំពីអាជីវកម្ម ថាតើអាជីវកម្មរបស់អ្នកនេះអាចជួយ និងអាចដោះស្រាយអ្វីដល់ពួកគេបានខ្លះ ទើបពួកគេព្យាយាមស្វែងរកអ្នក។ ហើយពេលខ្លះទៀតគឺមានភាគតិចណាស់ដែលអតិថិជនដែលមានសក្ដានុពលរបស់អ្នកចង់ចុចមើលលើការផ្សព្វផ្សាយរបស់អ្នក តែភាគច្រើនអាចនឹងចេញពីគេហទំព័ររបស់អ្នកច្រើនជាង ដោយសារតែពួកគេមិនបានដឹងច្បាស់អំពីអ្វីដែលអ្នកនឹងផ្ដល់ឲ្យនោះឯង។ ដូចនេះ អ្នកគប្បីកំណត់ទីតាំងអាជីវកម្មរបស់អ្នកឲ្យបានច្បាស់លាស់ ទាំងគោលបំណង ចក្ខុវិស័យ បេសកកម្ម គុណតម្លៃ ក៏ដូចជាដៃគូប្រកួតប្រជែងរបស់អ្នកជាដើម។

៣. ពុំមានកញ្ចប់ថវិកាគ្រប់គ្រាន់

ពេលខ្លះបើទោះបីជាអ្នកមានគំនិតអស្ចារ្យ បានរៀបចំលំហូរការងារនៃការចាប់ផ្ដើមយុទ្ធនាការទីផ្សារនោះហើយក៏ដោយ ប្រសិនបើអ្នកកញ្ចប់ថវិកាតិចពេក នោះការធ្វើយុទ្ធនាការទីផ្សាររបស់អ្នកប្រាកដជាបរាជ័យដដែល៖

ការធ្វើយុទ្ធនាការទីផ្សាររបស់អ្នកនឹងមានវត្តមានបានតែមួយរយៈពេលខ្លី ឬអាចនឹងបញ្ឈប់ពាក់កណ្ដាលទី ដោយសារតែខ្វះខាតថវិកាក្នុងការធ្វើបន្តទៀត។ជាហេតុធ្វើយុទ្ធនាការរបស់អ្នកនេះមិនត្រឹមតែខាតពេលវេលា ថែមទាំងមិនអាចរករកចំណូលត្រឡប់មកវិញបាននោះទេ។

ដូចនេះ ប្រសិនបើអ្នកចង់ធ្វើឲ្យយុទ្ធនាការទទួលបានប្រសិទ្ធភាពខ្ពស់ អ្នកគប្បីថ្លឹងថ្លែងឲ្យវាមានភាពស្មើរគ្នា រវាងគោលដៅយុទ្ធនាការដែលអ្នកចង់ធ្វើ និងថវិកាដែលអ្នកកំពុងតែមានកាន់នៅនឹងដៃនេះ ចៀសវាងធ្វើលើសហួសមាឌ វាអាចបណ្ដាលឲ្យអ្នកបរាជ័យ។

៤. បង្កើតសារខុស ទៅកាន់ Audience របស់អ្នក (You Create the wrong messages of your audience)

យុទ្ធនាការទីផ្សាររបស់អ្នកបរាជ័យអាចបណ្ដាលមកពី សារដែលអ្នកបង្កើត នោះធ្វើឲ្យមនុស្សមិនចាប់អារម្មណ៍ អានមិនយល់ថាអ្នកចង់លក់អ្វី ចង់ផ្សាយពីអ្វី ឬជាប្រភេទសារធម្មតាៗ ដែលអាជីវកម្មណាក៏ប្រើជាដើម (unclear Call to action)។ ដូចនេះអ្នកគួរតែបង្កើតសារបែបណាឲ្យមានភាពទាក់ទាញ ងាយអាន ងាយយល់ និងមានខុសប្លែកពីគេ ដើម្បីធ្វើឲ្យមនុស្សពេលបានឃើញឬអានសារនេះហើយចង់ទិញ ឬចង់ដឹងបន្ថែមពីផលិតផលរបស់អ្នក។ ហើយដើម្បីអាចធ្វើបែបនេះបាន រាល់ពេលដែលអ្នកធ្វើយុទ្ធនាការទីផ្សារនេះ អ្នកត្រូវប្រាកដក្នុងចិត្តថា អ្នកបានដឹងច្បាស់អំពីអត្តសញ្ញាណនិងបុគ្គលិកលក្ខណៈរបស់អតិថិជនគោលដៅរបស់អ្នក។

៥. មិនមានភាពលេចធ្លោ

ដើម្បីអាចធ្វើឲ្យយុទ្ធនាការទីផ្សាររបស់អ្នកអាចទៅមុនបានរលូនបាននោះគឺ បង្កើតនូវយុទ្ធនាការមួយដែលប្លែក គួរឲ្យចាប់អារម្មណ៍ និងបង្កប់នូវសារនៃអាជីវកម្មរបស់អ្នកនៅក្នុងនោះដែរ។ ចៀសវាងការបង្កើតយុទ្ធនាការដដែលៗ វិធីសាស្ត្រដដែលៗ ឬជាយុទ្ធនាការដែលក្រុមហ៊ុនជាច្រើនបានប្រើរួចហើយជាដើម។ ភាពដដែលៗនឹងធ្វើឲ្យមនុស្សឆាប់ណាយចិត្ត និងអូសរំលងចោលនូវការផ្សព្វផ្សាយរបស់អ្នក។

៦. ពឹងផ្អែកតែទៅលើច្រកផ្សព្វផ្សាយតែមួយ

យើងមិនអាចដាក់ពងមាន់នៅក្នុងកន្រ្តកតែមួយបាននោះទេ ចំណែកឯការធ្វើទីផ្សារនោះទៀតសោតក៏ដូច្នឹងដែរ យើងគប្បីបង្កើតច្រកផ្សព្វផ្សាយឲ្យបានច្រើន មិនថានៅលើបណ្ដាញសង្គម Tik Tok, Youtube, Facebook ឬ Instagram ដើម្បីអាចឲ្យមនុស្សបានឃើញ និងស្គាល់នូវផលិតផលរបស់អ្នកឲ្យកាន់តែច្រើន។ ម្យ៉ាងវិញទៀត ដោយសារតែនៅក្នុងច្រកផ្សព្វផ្សាយនីមួយៗសុទ្ធតែមានចំណុចខ្លាំង និងចំណុចខ្សោយរៀងៗខ្លួន ទើបជាមូលហេតុដែលតម្រូវឲ្យអ្នកត្រូវមានច្រកផ្សព្វផ្សាយច្រើន។ចៀសវាងករណីដែលច្រកផ្សព្វផ្សាយណាមួយមិនដំណើរការ គឺអ្នកអាចនៅសល់ច្រកផ្សព្វផ្សាយផ្សេងទៀតដែលអាចជួយយឹតយោងគ្នាបាន។

ពាណិជ្ជកម្ម

ភាពខុសគ្នារវាង សេវាកម្មអតិថិជនល្អ និងសេវាកម្មអតិថិជនឆ្នើម

Sann Thaven

សេវាកម្មអតិថិជន មានសារៈសំខាន់ណាស់សម្រាប់គ្រប់ក្រុមហ៊ុនទាំងអស់ ជាពិសេសក្រុមហ៊ុនដែលផ្ដោតលើការលក់ផលិតផល ឬផ្ដល់សេវាកម្មផ្នែកណាមួយដល់អតិថិជន។ បន្ថែមពីនេះ ការផ្ដល់សេវាកម្មអតិថិជន តែងតែមានមិនល្អ ល្អ និងឆ្នើម ឬល្អឥតខ្ចោះ ដោយអាស្រ័យលើបុគ្គលិកទាំងផ្នែកលក់ ឬផ្នែកសេវាកម្មអតិថិជនមានភាពប៉ិនប្រសប់ និងទទួលបានការបណ្ដុះបណ្ដាលបានល្អ។ ម្យ៉ាងទៀតក្នុងនាមជាម្ចាស់អាជីវកម្មក៏ត្រូវដឹងដែរថា ប្រសិនបើក្រុមហ៊ុនរបស់អ្នកផ្ដល់នូវសេវាកម្មអតិថិជនដ៏ល្អបំផុតតាមដែលអាចធ្វើបាន នោះក្រុមហ៊ុនរបស់អ្នកក៏កំពុងចាប់យកអតិថិជនបានកាន់តែច្រើនបន្តិចម្ដង និងក៏មានឱកាសបង្កើតប្រាក់ចំណូលជាបន្តបន្ទាប់ផងដែរ។

តើអ្វីជាការផ្ដល់សេវាកម្មអតិថិជន?

ការផ្ដល់សេវាកម្មអតិថិជន សំដៅលើការចេះជួយដោះស្រាយបញ្ហារបស់អតិថិជន ការបង្រៀនអតិថិជនពីរបៀបប្រើប្រាស់ផលិតផលសេវាកម្ម ការឆ្លើយតបរាល់ចម្ងល់របស់អតិថិជន និងអាចបំពេញតម្រូវការអតិថិជន។ បន្ថែមពីនេះ អ្នកច្បាស់ជាកាន់តែមានចម្ងល់ចង់ដឹងបន្ថែមទៀត ថាតើការផ្ដល់សេវាកម្មអតិថិជនល្អ និងការផ្ដល់សេវាកម្មអតិថិជនឆ្នើម វាមានលក្ខណៈខុសគ្នាយ៉ាងដូចម្ដេច?

ភាពខុសគ្នារវាង សេវាកម្មអតិថិជនល្អ និង សេវាកម្មអតិថិជនឆ្នើម

នៅក្នុងចំណុចនេះ យើងនឹងបង្ហាញឱ្យអ្នកបានកាន់ច្បាស់ និងយល់បន្ថែមអំពីភាពខុសគ្នានៃការផ្ដល់សេវាកម្មល្អ និងឆ្នើម ដើម្បីអ្នកអាចអភិវឌ្ឍន៍សមត្ថភាពខ្លួនឯងបានកាន់តែល្អ បើអ្នកជាបុគ្គលិកផ្នែកលក់ឬផ្នែកសេវាកម្មអតិថិជន និងដើម្បីឱ្យអ្នកបានបណ្ដុះបណ្ដាលបន្ថែមដល់ក្រុមបុគ្គលិករបស់អ្នក បើអ្នកជាអ្នកដឹកនាំ ឬជាប្រធានផ្នែកលក់។

សេវាកម្មអតិថិជនល្អ

តែងតែផ្តោតលើការផ្តល់ជូនឱ្យសមស្របជាមួយនឹងតម្រូវការ និងការរំពឹងទុករបស់អតិថិជន ព្រមទាំងអាចផ្ដល់ជូនលើសពីអ្វីដែលអតិថិជនរំពឹងទុកពីក្រុមហ៊ុន
អាចជួយធ្វើឱ្យអតិថិជនមានការពេញចិត្ត និងអាចរក្សាអតិថិជនបានយ៉ាងល្អទាំងចាស់ ទាំងថ្មី
យល់ដឹងអំពីរបៀបដែលស្វាគមន៍ និងប្រព្រឹត្តចំពោះអតិថិជនតាមរបៀបដ៏ល្អ និងត្រឹមត្រូវ ដែលជាផ្នែកមួយធ្វើឱ្យអតិថិជនសប្បាយចិត្ត
អាចជួយណែនាំពីផលិតផលសេវាកម្មឱ្យសមស្របជាមួយនឹងតម្រូវការរបស់អតិថិជន និងអាចដោះស្រាយបញ្ហានានារបស់អតិថិជន
តាមដានទាំងមតិវិជ្ជមាន និងអវិជ្ជមានដែលទទួលបានពីអតិថិជន ដើម្បីធ្វើការកែលម្អឱ្យមានភាពប្រសើរជាងមុន

សេវាកម្មអតិថិជនឆ្នើម

បម្លែងខ្លួនឯងឱ្យក្លាយជាអ្នកជំនាញលើអ្វីដែលខ្លួនឯងកំពុងលក់ ដោយមានការយល់ដឹងច្បាស់អំពីផលិតផលសេវាកម្មដែលកំពុងលក់ និងអាចពន្យល់ណែនាំបានយ៉ាងល្អជូនដល់អតិថិជន
តែងតែបង្ហាញដល់អតិថិជនបានយ៉ាងល្អបំផុតលើភាពដាច់ដោយឡែក និងភាពខុសគ្នារវាងម៉ាកយីហោរបស់ក្រុមហ៊ុនដៃគូប្រកួតប្រជែង ឬផលិតផលស្រដៀងគ្នា ជាមួយនឹងក្រុមហ៊ុនរបស់ខ្លួន
ជាបុគ្គលមានភាពស្ទាត់ជំនាញលើការទំនាក់ទំនងជាមួយអតិថិជន និងជំនាញដោះស្រាយបញ្ហាបានយ៉ាងល្អបំផុត
មានភាពប៉ិនប្រសប់ និងឆ្លាតវៃលើការយល់ដឹងអំពីតម្រូវការ និងការរំពឹងទុករបស់អតិថិជន
តែងតែផ្ដល់ជូននូវអ្វីដែលលើពីការរំពឹងទុកដល់អតិថិជនជានិច្ច តាមរយៈការបំពេញចិត្តអតិថិជនបានយ៉ាងល្អ ផ្ដល់នូវបទពិសោធន៍ល្អៗដល់អតិថិជន និងតែងតែធ្វើឱ្យអតិថិជនរំភើបឬភ្ញាក់ផ្អើលនូវអ្វីដែលពួកគេទទួលបានដោយលើសពីការរំពឹងទុករបស់ពួកគេ

ពាណិជ្ជកម្ម

កម្មវិធី CRM ឥតគិតថ្លៃល្អបំផុត ដែលណែនាំពីលោក Neil Patel

Sann Thaven

Neil Patel គឺជាអ្នកជំនាញផ្នែកទីផ្សារឌីជីថល ដោយភាគច្រើនគាត់ចែករំលែកផ្ដោតលើម៉ាស៊ីនស្វែងរក “SEO” និងទីផ្សារមាតិកា។ បន្ថែមពីនេះ គាត់ក៏ជាអ្នកមានឥទ្ធិពលផ្នែកឌីជីថលលំដាប់ទី10 ផងដែរ នេះបើយោងតាមការផ្សព្វផ្សាយរបស់ទស្សនាវដ្តី Forbes។ ភាគច្រើន Neil ចែករំលែកចំណេះដឹងពាក់ព័ន្ធនឹងទីផ្សារច្រើននៅក្នុងបណ្ដាញសង្គមផ្ទាល់ខ្លួន ប៉ុន្តែនៅក្នុងអត្ថបទនេះ យើងនឹងដកស្រង់បង្ហាញពីការចែករំលែកក៏ដូចជាការណែនាំអំពីកម្មវិធី CRM (កម្មវិធីគ្រប់គ្រងទំនាក់ទំនងអតិថិជន) ដែលឥតគិតថ្លៃល្អបំផុតពី Neil។

1. HubSpot

គេហទំព័រ HubSpot មានកម្មវិធីច្រើន ប៉ុន្តែអ្វីដែល Neil ចង់ណែនាំខ្លាំងនោះ គឺកម្មវិធី CRM ដែលផ្ដោតលើទីផ្សារដោយប្រើប្រាស់ឥតគិតថ្លៃ ដោយសក្តិសមបំផុតក្នុងការប្រើប្រាស់សម្រាប់អ្នកទីផ្សារ ពីព្រោះ HubSpot បានភ្ជាប់ទៅនឹងកិច្ចខិតខំប្រឹងប្រែងផ្នែកទីផ្សាររបស់អ្នកទាំងអស់ ដូចជាអ៊ីមែល ទម្រង់បែបបទ ទំព័រចុះចត ការផ្សាយពាណិជ្ជកម្ម ឆាត និងផ្តល់ព័ត៌មានច្បាស់លាស់អំពីបណ្តាញ និងយុទ្ធសាស្ត្រផ្សេងៗដែលជំរុញឱ្យមានដំណើរការល្អ។ លើសពីនេះ HubSpot ក៏រួមបញ្ចូលជាមួយ G Suite, Gmail និងកំណែជាច្រើននៃOutlook ព្រមទាំងមានឧបករណ៍ទីផ្សារជាច្រើនទៀត រួមមាន៖

ការតាមដានសកម្មភាពគេហទំព័រ
រូបយន្តសន្ទនា (Conversational bots)
Deal Pipelines
អ្នកគ្រប់គ្រងកិច្ចការ និងសកម្មភាព
កាលវិភាគណាត់ជួប
ការបែងចែកបញ្ជី
ការតាមដានអ៊ីមែល
VoIP ដោយផ្ទាល់ពី CRM

ចុចតំណរភ្ជាប់នេះ ដើម្បីចុះឈ្មោះប្រើប្រាស់ឥតគិតថ្លៃ៖ https://app.hubspot.com/signup

គួរបញ្ជាក់ផងដែរ HubSpot CRM ជាកម្មវិធី CRM ឥតគិតថ្លៃច្រើនបំផុតដូចជាការលក់ ការធ្វើទីផ្សារ និងសេវាកម្មអតិថិជន ព្រមទាំងអនុញ្ញាតឱ្យមានអ្នកប្រើប្រាស់គ្មានដែនកំណត់ទៀតផងដែរ។

2. Agile CRM

គេហទំព័រ Agile CRM ផ្ដល់នូវការប្រើប្រាស់កម្មវិធី CRM ដោយឥតគិតថ្លៃជាលក្ខណៈជាក្រុមបាន(ក្រុមអាចមានចំនួន 10នាក់) ដែលល្អបំផុតសម្រាប់ដំណោះស្រាយ CRM សេវាកម្មអតិថិជន។ ជាពិសេសវាក៏ផ្ដល់នូវការរាយការណ៍សម្រាប់ការអនុវត្តបានយ៉ាងល្អ ដោយជួយផ្នែកសេវាកម្មអតិថិជនអាចរក្សាបាននូវការតាមដាន និងគ្រប់គ្រងព័ត៌មាននានាដែលបានបញ្ចូលក្នុងប្រព័ន្ធ CRM។

ចុចតំណរភ្ជាប់នេះ ដើម្បីចុះឈ្មោះប្រើប្រាស់ឥតគិតថ្លៃ៖ https://my.agilecrm.com/register

គួរបញ្ជាក់ផងដែរថា Agile CRM មិនបានផ្ដោតខ្លាំងលើលក្ខណៈពិសេសផ្នែកលក់ និងទីផ្សារដ៏ល្អអស្ចារ្យដូចខាងក្រោមនោះទេ។

កិច្ចព្រមព្រៀងគ្មានដែនកំណត់
ពិន្ទុនៃការនាំមុខ
កាលវិភាគណាត់ជួប
ការតាមដានអ៊ីមែល
យុទ្ធនាការតាមអ៊ីមែល
ការតាមដានសកម្មភាពគេហទំព័រ
អ្នកបង្កើតទំព័រចុះចត (Landing page)

3. Apptivo

គេហទំព័រ Apptivo ល្អបំផុតសម្រាប់ការគ្រប់គ្រងអាជីវកម្មកម្រិតមូលដ្ឋាន ព្រមទាំងអាចបង្កើតកម្មវិធី CRM ដែលមានតម្លៃសមរម្យ និងផ្តល់នូវផែនការចាប់ផ្ដើមដោយឥតគិតថ្លៃជារៀងរហូត ថែមទាំងអាចជួយដល់កិច្ចការរដ្ឋបាល ដូចជាព័ត៌មានអតិថិជនរបស់អ្នកទាំងអស់ ហើយអនុញ្ញាតឱ្យអ្នកបង្កើត និងគ្រប់គ្រងវិក្កយបត្រ ការប៉ាន់ស្មាន ការបញ្ជាទិញ និងសំណើទាំងអស់ទៀតផង។

ចុចតំណរភ្ជាប់នេះ ដើម្បីចុះឈ្មោះប្រើប្រាស់ឥតគិតថ្លៃ៖ https://partner-forms.softwareadvice.com/

4. Really Simple Systems

គេហទំព័រ Really Simple Systems ផ្ដល់នូវការប្រើប្រាស់កម្មវិធី CRM ដោយឥតគិតថ្លៃជាមួយនឹងទំនាក់ទំនងគ្មានដែនកំណត់ ហើយវាសក្តិសមបំផុតសម្រាប់ការលក់ ដោយអ្នកអាចតាមដានលំហូរនៃការលក់បានយ៉ាងល្អ ថែមទាំងអាចដឹងអំពីឱកាសនៃការលក់បានទៀតផង។

ចុចតំណរភ្ជាប់នេះ ដើម្បីចុះឈ្មោះប្រើប្រាស់ឥតគិតថ្លៃ៖ https://www.reallysimplesystems.com/

បន្ថែមពីនេះ វាក៏មានប្រព័ន្ធដ៏សាមញ្ញក្នុងការអនុញ្ញាតឱ្យអ្នកតាមដានរង្វាស់ដែលអ្នកត្រូវការ និងផ្តល់នូវមុខងារ CRM ដ៏សម្បូរបែបដែលមានប្រយោជន៍ខ្លាំងសម្រាប់ក្រុមលក់របស់អ្នក ក្នុងនោះរួមមានចំណុចសំខាន់ៗមួយចំនួន ដូចជា៖

ការគ្រប់គ្រងបំពង់ (Pipeline management)
បណ្តាញលក់
តារាងពេលវេលារបស់អតិថិជន
ប្រវត្តិនៃឱកាស
ការចុះបញ្ជីនិងការព្យាករការលក់
ការចូលប្រើ API
រួមបញ្ចូលជាមួយ Google Contacts និង Outlook

ពាណិជ្ជកម្ម

ហេតុអ្វីគ្រប់បុគ្គលិកផ្នែកលក់ ក៏ជាតំណាងផ្នែកសេវាអតិថិជនដែរ?

Sann Thaven

ជាទូទៅក្រុមហ៊ុនភាគច្រើន តែងតែមានការបែងចែករវាងក្រុមបុគ្គលិកផ្នែកលក់ ដើម្បីធ្វើការបិទការលក់ និងបង្កើនប្រាក់ចំណូលដល់ក្រុមហ៊ុនតាមការរំពឹងទុក ហើយមួយក្រុមទៀតគឺជាក្រុមបុគ្គលិកផ្នែកសេវាកម្មអតិថិជន ដើម្បីជួយសម្រួលដល់អតិថិជនដែលមានស្រាប់ នៅពេលពួកគេមានបញ្ហា ឬមានសំណួរនានា។ បន្ថែមពីនេះ ក៏មានក្រុមហ៊ុនមួយចំនួនប្រើប្រាស់ឧបករណ៍ CRM ក្នុងការជួយដល់ក្រុមបុគ្គលិកទាំងផ្នែកលក់ និងផ្នែកសេវាកម្មអតិថិជន ដើម្បីចូលប្រើប្រាស់ព័ត៌មានអតិថិជនបានយ៉ាងងាយស្រួល ដោយក្នុងនោះមានទាំងឈ្មោះអតិថិជន កាលបរិច្ឆេទកិច្ចសន្យា បរិមាណបញ្ជាទិញ និងទំនាក់ទំនងជាមួយអតិថិជនចុងក្រោយជាដើម។

ចំណាំ៖ CRM មកពីពាក្យពេញ Customer Relationship Management មានន័យថា ការគ្រប់គ្រងទំនាក់ទំនងអតិថិជន។ អ្នកអាចចូលមើលគំរូ និងអាចយកប្រើប្រាស់នៃឧបករណ៍ CRM តាមតំណរភ្ជាប់នេះ https://salesflare.com/ ។

ភាពពាក់ព័ន្ធរវាងផ្នែកលក់ និងផ្នែកសេវាកម្មអតិថិជន

ក្រុមអ្នកលក់ ជាទូទៅចំណាយពេលវេលាត្រឹមតែ 37% ប៉ុណ្ណោះក្នុងការលក់របស់ពួកគេ ដោយពេលវេលានៅសេសសល់ គឺពួកគេចំណាយលើការថែរក្សានូវទំនាក់ទំនងជាមួយអតិថិជនទាំងអស់ តាមរយៈការហៅទូរស័ព្ទ ផ្ញើសារតាមឆាតឬអ៊ីម៊ែល និងកំណត់ពេលជួបជាមួយអតិថិជនជាដើម ក្នុងគោលបំណងស្ដាប់ការព្រួយបារម្ភរបស់អតិថិជន ដោះស្រាយតម្រូវការដល់អតិថិជន និងតាមដានជាប្រចាំលើចំណាប់អារម្មណ៍នូវអ្វីដែលពួកគេទទួលបានពីក្រុមហ៊ុនដែលផ្ដល់ជូន។ ហើយទាំងនេះសុទ្ធតែបានមកពីការសិក្សាស្រាវជ្រាវកាលពីឆ្នាំ 2017 របស់ InsideSales.com។

ចំណុចខាងលើនេះ អ្នកច្បាស់ជាគិតថា អ្វីដែលក្រុមអ្នកលក់ធ្វើសកម្មភាព វាហាក់បីដូចជាផ្នែកសេវាកម្មអតិថិជនកំពុងតែធ្វើដែរ។ ហើយវាជាការពិត ទាំងផ្នែកលក់ និងផ្នែកសេវាកម្មអតិថិជន ទាំងពីរនេះ មានសារៈសំខាន់ដូចគ្នា ពីព្រោះវាជាផ្នែកមួយដែលអាចចងចិត្តអតិថិជន និងអាចបិទការលក់ជាមួយអតិថិជន។ ដូច្នេះក្នុងនាមជាអ្នកដឹកនាំនៅក្នុងក្រុមហ៊ុន អ្នកក៏ត្រូវបណ្ដុះបណ្ដាលផ្នែកអ្នកលក់ទាំងអស់ឱ្យចេះនូវជំនាញសេវាកម្មអតិថិជន ដើម្បីធ្វើជាតំណាងផ្នែកសេវាកម្មអតិថិជន ក្នុងការអាចផ្ដល់សេវាកម្មដ៏ល្អជូនអតិថិជន ព្រមទាំងអាចធ្វើឱ្យការបិទការលក់មានប្រសិទ្ធខ្ពស់ជាងមុន ទោះបីជាក្រុមហ៊ុនរបស់អ្នកកំពុងមានផ្នែកសេវាកម្មអតិថិជនមួយក្រុមហ៊ុនក៏ដោយ។

ផ្នែកសំខាន់ក្នុងការបង្រៀនដល់ក្រុមអ្នកលក់ទាំងអស់

ក្នុងនាមជាអ្នកដឹកនាំ អ្នកត្រូវតែផ្ដល់ការបណ្ដុះបណ្ដាលលើផ្នែកសំខាន់ចំនួនពីរឱ្យក្រុមអ្នកលក់របស់អ្នកទាំងអស់បានយល់ដឹងបន្ថែម ដើម្បីធ្វើឱ្យពួកគេក្លាយជាអ្នកលក់ដ៏ល្អផង និងក្លាយជាតំណាងផ្នែកសេវាកម្មអតិថិជនដ៏ល្អផង ដោយលុបបំបាត់នូវការគិតរបស់អ្នកលក់ទាំងអស់ថា ខ្លួនឯងមិនត្រឹមជាអ្នកលក់នោះទេ ប៉ុន្តែក៏ជាអ្នកផ្ដល់សេវាកម្មអតិថិជនដ៏ល្អផងដែរ។

1. ការលក់ គឺជាការផ្ដល់សេវាកម្មអតិថិជនយ៉ាងសកម្មបំផុត

អ្នកត្រូវបណ្ដុះបណ្ដាលដល់ក្រុមអ្នកលក់ទាំងអស់ឱ្យបានដឹងថា ការលក់ គឺជាផ្នែកមួយដែលសំខាន់ ព្រមទាំងក៏ជាផ្នែកមួយដែលត្រូវផ្ដល់សេវាកម្មអតិថិជនដ៏ល្អយ៉ាងសកម្មភាពជាងគេ ពីព្រោះការលក់បានជោគជ័យ លុះត្រាតែអាចធ្វើឱ្យអតិថិជនជឿជាក់ អាចដោះស្រាយនូវតម្រូវការរបស់ពួកគេ និងមានទំនាក់ទំនងល្អជាមួយពួកគេផងដែរ។ បន្ថែមពីនេះ អ្នកផ្តល់សេវាអតិថិជនល្អបំផុត គឺជាអ្នកដោះស្រាយបញ្ហាដែលអត់ធ្មត់ខ្លាំងបំផុត ដែលធ្វើឱ្យអតិថិជនពេញចិត្ត ហើយរឿងទាំងនេះ ភាគច្រើនក្រុមអ្នកលក់ជួបច្រើនជាមួយអតិថិជន និងក៏ត្រូវដោះស្រាយជូនអតិថិជនផងដែរ។

ចូរចងចាំថា អ្នកត្រូវតែបង្ហាញឱ្យក្រុមអ្នកលក់ដឹងថា ការលក់ គឺជាប់ពាក់ព័ន្ធខ្លាំងជាមួយការផ្ដល់សេវាកម្មអតិថិជន ដូច្នេះត្រូវតែយកចិត្តទុកដាក់ទាំងជំនាញលក់ និងជំនាញផ្ដល់សេវាកម្មអតិថិជនឱ្យបានខ្លាំងដំណើរគ្នា ទើបអាជីពក៏រីកចម្រើន និងប្រាក់ចំណូលផ្ទាល់ខ្លួនក៏កាន់តែកើន ព្រមទាំងក្រុមហ៊ុនក៏ជោគជ័យផងដែរ។

2. បង្វឹកអ្នកលក់របស់អ្នកឱ្យគិតដូចអ្នកបម្រើសេវាអតិថិជន

នៅក្នុងចំណុចនេះ ក្នុងនាមជាអ្នកដឹកនាំត្រូវតែឱ្យក្រុមអ្នកលក់ទាំងអស់ចេះរៀនសង្កេតរាល់ការគិត និងទស្សនៈផ្សេងៗរបស់អ្នកផ្ដល់សេវាកម្មអតិថិជន ដូចជាអ្នកផ្ដល់សេវាកម្មអតិថិជនតែងតែព្យាយាមយល់អំពីអតិថិជនទាំងបញ្ហា តម្រូវការ និងទុក្ខកង្វល់នានា ដោយធ្វើជាអ្នកស្ដាប់ដ៏ល្អ បន្ទាប់មកព្យាយាមដោះស្រាយជូនអតិថិជន។ល។ បន្ថែមពីនេះ អ្នកក៏ត្រូវបង្រៀនដល់ក្រុមអ្នកលក់ពីរបៀបនៃការផ្ដល់សេវាកម្មដ៏ល្អ និងរបៀបយល់ចិត្តអតិថិជនជាដើម ដោយមិនមែនគ្រាន់តែគិតថា ក្នុងនាមជាអ្នកលក់ គ្រាន់តែបញ្ចុះបញ្ចូលអតិថិជនឱ្យបង់លុយទិញទៅបានហើយ។

ពាណិជ្ជកម្ម

4ជំហាន បង្កើតមាតិកាបង្កើនកេរ្តិ៍ឈ្មោះក្នុងសម័យឌីជីថល

laoleangchae

PERSONAL BRANDING ជាការលក់ខ្លួនឯងមែន?
ក្នុងសម័យឌីជីថលនាពេលបុច្ចប្បន្ននេះ ការបង្កើតកេរ្តិ៍ឈ្មោះឲ្យខ្លួនឯង គឺជារឿងធម្មតា ដែលនរណាៗក៏អាចធ្វើទៅបានដោយអាស្រ័យលើការតាំងចិត្ត និងគោលបំណង់ច្បាស់លាស់ ហើយនេះជាឧទាហរណ៍ងាយៗក្នុងការស្វែងយល់បន្ថែម

១. បង្ហាញនូវអ្វីដែលជារបស់ខ្លួន (Be Yourself)
LAO leangchae គឺជាគេហទំព័រផ្លូវកាដែលចែករំលែក បំផុសគំនិត និងបង្កើនជំនាញក្នុងវិស័យអាជីវកម្ម ជាពិសេសសម្រាប់អ្នកដែលចង់ស្វែងយល់អំពីការធ្វើ មាតិកាក្នុងបណ្តាញសង្គម (Social Media Content Marketing) និងម្ចាស់អាជីវកម្មដែលចង់ដឹងអំពីតិចនិចថ្មីៗបន្ថែម មុននឹងឈានដល់ការប្រើសេវាកម្ម ភ្ញាក់ងារទីផ្សារ (Marketing Agency) សម្រាប់អាជីវកម្មរបស់ខ្លួន។

២. គុណតម្លៃដែលមិនដូចអ្នកដទៃ (Unique Value)
បើយើងមានជំនាញច្រើន ចង់លក់អ្វី បង្ហាញអ្វីក៏មិនសំខាន់ តែក្នុងសម័យឌីជីថលចំណេះដឹងទូលំទូលាយបែបនេះ តម្រូវការរបស់អ្នកទិញ/ស្តាប់ គឺត្រូវតែជាក់លាក់ ច្បាស់លាស់ និងអាចទុកចិត្តបាន។គេហទំព័រផ្លូវកាមួយនេះ នឹងផ្តល់ជូននូវមាតិកាដែលផ្តល់ឲ្យនូវ Quality ច្រើនជាង Quantity ដោយផ្អែកទៅលើគោលជំហរ ៣ចំណុចគឺ “ចែករំលែក បំផុសគំនិត និងបង្កើនជំនាញក្នុងវិស័យអាជីវកម្ម”។

៣. អតិថិជនគោលដៅ (Define your Audience)
ត្រូវប្រាកដថាអ្នកបានស្វែងយល់ (Customer Research) អំពីប្រភេទនៃអតិថិជនរបស់អាជីវកម្មអ្នក មុននឹងង្កើតសេវាកម្ម/ផលិតផល ដើម្បីបង្ការការចំណាយពេលធ្វើតែមិនទទួលបានលទ្ធផល ឬចំណាយពេលយូរពេក បាត់បង់ការតាំងចិត្ត ដែលអាចឈានទៅដល់ការ CLOSE។

៤. អត្តសញ្ញាណនៃអាជីវកម្ម (Brand Identity)
មិនថាអ្នកលក់អ្វី បង្ហាញអ្វីនោះទេ ធ្វើយ៉ាងណាកុំឲ្យបាត់នូវអត្តសញ្ញាណនៃអាជីវកម្មរបស់ខ្លួន។ ដែលក្នុងនោះរួមបញ្ចូល ការប្រើប្រាស់ពាក្យ- របៀបក្នុងការ Design ទៅលើ Artwork- ការប្រើប្រាស់ពណ៌- ការប្រើប្រាស់ Front …ជាដើម។

កុំភ្លេច Like ឬ Follow Facebook Page របស់គំនិត
សម្រាប់មាតិកាថ្មីៗ!

ពាណិជ្ជកម្ម

ភាពខុសគ្នារវាង ចៅហ្វាយនាយ “Boss” និង អ្នកដឹកនាំ “Leader”

Sann Thaven

ការដឹកនាំក្រុមមួយ តែងតែមានគោលបំណង និងមានបេសកកម្ម ដើម្បីធ្វើសកម្មភាពទាំងឡាយណាក្នុងការសម្រេចបាននូវអ្វីដែលបានកំណត់នោះ។ ទោះបីជាយ៉ាងនេះក្ដី ក៏ការដឹកនាំដើម្បីឆ្ពោះទៅកាន់ការសម្រេចបាននូវគោលដៅរួមបានលឿន និងល្អ វាក៏ពឹងអាស្រ័យលើការដឹកនាំល្អផងដែរ។

បន្ថែមពីនេះ អ្នកក៏ត្រូវដឹងផងដែរថា នៅក្នុងការដឹកនាំក្រុមមួយ តែងតែមានអ្នកដែលមានដំណែងខ្ពស់ ឬមានតួនាទីដឹកនាំក្រុម តាំងខ្លួនឯងជាចៅហ្វាយនាយ និងអ្នកខ្លះក៏តាំងខ្លួនឯងជាអ្នកដឹកនាំ។ ដូច្នេះនៅក្នុងចំណុចនេះ សួរថា តើការដឹកនាំដោយតាំងខ្លួនឯងជាចៅហ្វាយនាយ និងជាអ្នកដឹកនាំ ដើម្បីដឹកនាំក្រុមក្នុងការសម្រេចបាននូវគោលដៅ និងបេសកកម្មរួម មួយណាល្អជាង?

ដើម្បីស៊ីជម្រៅនៃភាពខុសគ្នារវាងចៅហ្វាយនាយ និងអ្នកដឹកនាំ ខាងក្រោមនេះនឹងពន្យល់បកស្រាយ ហើយបន្ទាប់មកអ្នកអាចពិនិត្យមើលខ្លួនឯងបន្ថែមប្រសិនបើអ្នកកំពុងមានតួនាទីជាអ្នកដឹកនាំក្រុម ថាតើរាល់ថ្ងៃនេះអ្នកកំពុងតាំងខ្លួនឯងជាចៅហ្វាយនាយ ឬជាអ្នកដឹកនាំ ក្នុងការដឹកនាំក្រុម?

អំពី ចៅហ្វាយនាយ “Boss”

ចរិតលក្ខណៈនៃការដឹកនាំរបស់អ្នកដែលតាំងខ្លួនឯងជាចៅហ្វាយនាយ

សម្រុកធ្វើការតែឆ្ពោះទៅរកគោលដៅដែលបានកំណត់ដោយថ្នាក់លើរបស់ពួកគេឱ្យបានល្អ
ចូលចិត្តនិយាយបញ្ជាច្រើនទៅកាន់អ្នកនៅក្រោមបង្គាប់ ជាជាងការដឹកនាំបង្ហាញផ្លូវ
តែងតែគិតផ្ដោតខ្លាំងលើការចង់បានប្រាក់ចំណេញ និងគិតប្រយោជន៍បុគ្គលច្រើនជាងប្រយោជន៍ រួមរបស់ក្រុមទាំងមូល
ចូលចិត្តធ្វើអ្វីដោយគិតឃើញតែលទ្ធផលរយៈពេលខ្លី ជាជាងគិតអំពីលទ្ធផលរយៈពេលវែង
ចូលចិត្តតាំងខ្លួនឯងជា “មេ”
គិតផ្ដោតលើលទ្ធផលដំបូងគេ ដោយមិនសូវខ្វល់អំពីមតិយោបល់របស់អ្នកផ្សេងទៀត
ចង់ដឹងតែពីរបៀបធ្វើការងារឱ្យបានសម្រេចតាមការគ្រោងទុកប៉ុណ្ណោះ
តែងតែព្យាយាមធ្វើជាអ្នកគ្រប់គ្រងអ្នកនៅក្រោមបង្គាប់ ជាជាងការជួយជំរុញលើកទឹកចិត្តពួកគេឱ្យបង្កើតគំនិតច្នៃប្រឌិត និងព្យាយាមធ្វើការឱ្យបានល្អស្របតាមទេពកោសល្យ
មិនសូវបង្កើតទំនាក់ទំនងល្អក្នុងការធ្វើការជាមួយអ្នកក្រោមបង្គាប់ឡើយ ដោយព្យាយាមសម្រេចចិត្តតែតាមការយល់ឃើញផ្ទាល់

អំពី អ្នកដឹកនាំ “Leader”

ចរិតលក្ខណៈនៃការដឹកនាំរបស់អ្នកដែលតាំងខ្លួនឯងជាអ្នកដឹកនាំ

អ្នកដឹកនាំតែងតែទទួលយកនូវផ្នត់គំនិតរីកចម្រើន ដោយជាមនុស្សបើកចិត្ត និងរៀនពីគំនិតថ្មីៗពីអ្នកនៅក្រោមបង្គាប់ ព្រមទាំងសាកល្បងធ្វើតាមនូវគំនិតរបស់ពួកគេ
តែងតែជំរុញលើកទឹកចិត្តអ្នកនៅក្រោមបង្គាប់ឱ្យមានគំនិតច្នៃប្រឌិតជានិច្ច
តែងតែធ្វើជាអ្នកស្ដាប់ដ៏ល្អ និងមានការកំណត់ការរំពឹងទុកបានច្បាស់លាស់
ជំរុញទឹកចិត្តបុគ្គលិកនៅក្រោមបង្គាប់ឱ្យរក្សានូវមហ្ឆិចតាផ្ទាល់ខ្លួន និងបន្តធ្វើអ្វីដែលកាន់តែល្អ
តែងតែរៀបចំជាប្រព័ន្ធការងារ រួមជាមួយនឹងដំណើរការនៃការបំពេញការងារបានយ៉ាងល្អ ព្រមទាំងផ្តល់ភាពងាយស្រួលដល់បុគ្គលិកក្នុងការសម្រេចចិត្តដោយខ្លួនឯងក្នុងការធ្វើសកម្មភាពនានា
ចូលចិត្តត្រួសត្រាយផ្លូវដល់អ្នកនៅក្រោមបង្គាប់ក្នុងការបំពេញការងារឱ្យទទួលបានជោគជ័យ
តែងតែគិតពីផលប្រយោជន៍រួម និងគិតដល់ភាពរីកចម្រើនរបស់អ្នកនៅក្រោមការដឹកនាំខ្លួនរបស់ខ្លួនឯង
ជាបុគ្គលដែលចូលចិត្តផ្ដោតលើដំណោះស្រាយ និងលទ្ធផលរយៈពេលវែង

ពាណិជ្ជកម្ម

គេហទំព័រល្អបំផុត ក្នុងការតាមដានព័ត៌មានបច្ចេកវិទ្យា

Sann Thaven

នៅក្នុងពិភពលោកយើងនេះ គេហទំព័រចែករំលែកចំណេះដឹងមានច្រើន ប៉ុន្តែនៅក្នុងខ្លឹមសារអត្ថបទខាងក្រោមនេះ នឹងបង្ហាញនូវគេហទំព័រមួយចំនួនដែលល្អបំផុត ដើម្បីតាមដានព័ត៌មានបច្ចេកវិទ្យាឱ្យទាន់សម័យកាល។

1. TechCrunch

គេហទំព័រ TechCrunch ត្រូវបានបង្កើតឡើងនៅថ្ងៃទី 11 ខែមិថុនា ឆ្នាំ 2005 ដោយវាគឺជាគេហទំព័រព័ត៌មានដែលផ្ដោតលើចំណេះដឹងទាក់ទងនឹងទិដ្ឋភាពបច្ចេកវិទ្យា ព្រមទាំងផ្តល់ជូននូវព័ត៌មានបច្ចេកវិទ្យាថ្មីៗ គំនិតថ្មីៗ និងការវិភាគអំពីក្រុមហ៊ុនបច្ចេកវិទ្យានៅជុំវិញពិភពលោក។

គួរបញ្ជាក់ផងដែរថា គេហទំព័រ TechCrunch គឺជាមគ្គុទ្ទេសក៍លេខមួយសម្រាប់ការផ្ដល់នូវចំណេះដឹងផ្នែកបច្ចេកវិទ្យា។

ចុចទីនេះ ដើម្បីចូលទៅកាន់គេហទំព័រ TechCrunch៖ https://techcrunch.com/

2. Gizmodo

គេហទំព័រ Gizmodo នឹងផ្ដល់នូវចំណេះដឹងពីការ Review អំពីទូរស័ព្ទ ទូរទស្សន៍ កុំព្យូទ័រយួរដៃ កម្មវិធី ភាពយន្តចុងក្រោយបង្អស់ និងព័ត៌មានចុងក្រោយបំផុតអំពីគោលការណ៍ឯកជនភាព បច្ចេកវិទ្យា បរិស្ថាន និងកម្លាំងពលកម្ម។ គួរបញ្ជាក់ផងដែរ គេហទំព័រនេះមានគោលបំណងធំបំផុតគឺគ្របដណ្តប់លើពិភពនៃបច្ចេកវិទ្យា វិទ្យាសាស្ត្រ និងការកម្សាន្តប្រកបដោយតម្លាភាព ភាពត្រឹមត្រូវ ការលេងសើចសប្បាយ។

ចុចទីនេះ ដើម្បីចូលទៅកាន់គេហទំព័រ Gizmodo៖ https://gizmodo.com/

3. The Verge

គេហទំព័រ The Verge ត្រូវបានបង្កើតឡើងក្នុងឆ្នាំ 2011 ដោយស្ថិតនៅក្នុងភាពជាដៃគូជាមួយ Vox Media ព្រមទាំងផ្ដល់នូវចំណេះដឹងដោយផ្ដោតខ្លាំងលើបច្ចេកវិទ្យា វិទ្យាសាស្រ្ត សិល្បៈ និងវប្បធម៌។ បន្ថែមពីនេះ វាក៏ផ្ដល់នូវការបង្ហាញអំពីរបៀបដែលបច្ចេកវិទ្យានឹងផ្លាស់ប្ដូរបរិបទនៃការរស់នៅរបស់មនុស្សនាពេលអនាគតផងដែរ។

ចុចទីនេះ ដើម្បីចូលទៅកាន់គេហទំព័រ The Verge៖ https://www.theverge.com/

4. VentureBeat

គេហទំព័រ VentureBeat គឺជាប្រភពឈានមុខគេសម្រាប់ការផ្ដល់ព័ត៌មាន និងព្រឹត្តិការណ៍បច្ចេកវិទ្យា ភាពបំប្លែងដែលអាចផ្តល់នូវបរិបទស៊ីជម្រៅ ដើម្បីជួយដល់ម្ចាស់អាជីវកម្មធ្វើការសម្រេចចិត្តដ៏ឆ្លាតវៃ និងបន្តរក្សាព័ត៌មានទាន់ហេតុការណ៍។

ចុចទីនេះ ដើម្បីចូលទៅកាន់គេហទំព័រ VentureBeat៖ https://venturebeat.com/

5. WIRED

គេហទំព័រ WIRED នឹងផ្ដល់នូវព័ត៌មានបច្ចេកវិទ្យា និងរបៀបដែលបច្ចេកវិទ្យាមានឥទ្ធិពលលើជីវិតប្រចាំថ្ងៃរបស់យើង ព្រមទាំងផ្តល់នូវអ្វីគ្រប់យ៉ាងដែលអ្នកត្រូវដឹងនៅក្នុងពិភពបច្ចេកវិទ្យា។ បន្ថែមពីនេះ ក្រៅពីចំណេះដឹងបច្ចេកវិទ្យា គេហទំព័រ Wired ក៏ផ្ដល់នូវចំណេះដឹងលើប្រធានបទជាច្រើន ដូចជាចំណេះដឹងអាជីវកម្ម វិទ្យាសាស្រ្ត ឧបករណ៍ ប្រព័ន្ធសុវត្ថិភាព ការដឹកជញ្ជូន និងផ្សេងទៀត។

ចុចទីនេះ ដើម្បីចូលទៅកាន់គេហទំព័រ WIRED៖ https://www.wired.com/

6. Mashable

Mashable គឺជាក្រុមហ៊ុនប្រព័ន្ធផ្សព្វផ្សាយ និងការកម្សាន្តទូទាំងពិភពលោក ដោយផ្ដោតលើការចែករំលែកចំណេះដឹងអំពីការកម្សាន្ត វប្បធម៌ បច្ចេកវិទ្យា វិទ្យាសាស្រ្ត វេទិកាប្រព័ន្ធផ្សព្វផ្សាយឌីជីថល និងប្រព័ន្ធផ្សព្វផ្សាយ។

ចុចទីនេះ ដើម្បីចូលទៅកាន់គេហទំព័រ Mashable៖ https://mashable.com/

7. The Information

គេហទំព័រ The Information ផ្ដោតខ្លាំងលើការចែករំលែកស៊ីជម្រៅលើឧស្សាហកម្មច្ចេកវិទ្យា ដោយព័ត៌មានភាគច្រើនមានលក្ខណៈទម្រង់ខ្លឹមសារវែង សរសេរដោយអ្នកសារព័ត៌មានប្រកបដោយគុណភាព ដើម្បីផ្តល់នូវទិដ្ឋភាព 360 ដឺក្រេនៃព័ត៌មានបច្ចេកវិទ្យា។

ចុចទីនេះ ដើម្បីចូលទៅកាន់គេហទំព័រ The Information៖ https://www.theinformation.com/

8. The Next Web

គេហទំព័រ The Next Web គឺជាក្រុមហ៊ុនប្រព័ន្ធផ្សព្វផ្សាយដែលផ្តោតលើបច្ចេកវិទ្យា និងផ្ដល់នូវគំនិតផ្តួចផ្តើមជាច្រើនដែលផ្តោតលើព័ត៌មានបច្ចេកវិទ្យាអន្តរជាតិ អាជីវកម្ម និងវប្បធម៌។

ចុចទីនេះ ដើម្បីចូលទៅកាន់គេហទំព័រ The Next Web៖ https://thenextweb.com/

ពាណិជ្ជកម្ម

ស្ត្រីវ័យ 75 ឆ្នាំ ដែលមានជាងគេនៅសហរដ្ឋអាមេរិក

Sann Thaven

នៅសហរដ្ឋអាមេរិក ជាប្រទេសរីកចម្រើនខ្លាំង ហើយក៏មានមហាសេដ្ឋី និងសហគ្រិនជាច្រើនរូប ប៉ុន្តែទោះបីជាយ៉ាងនេះក្ដី នៅក្នុងខ្លឹមសារអត្ថបទមួយនេះ យើងនឹងបង្ហាញពីស្រ្ដីមួយរូបដែលមានវ័យ 75 ឆ្នាំ ជនជាតិអាមេរិក ដែលជាប់ឈ្មោះក្នុងទស្សនាវដ្ដី Forbes ជាស្រ្តីដែលមានទ្រព្យសម្បត្តិសុទ្ធច្រើនជាងគេក្នុងចំណោមស្ដ្រីជនជាតិអាមេរិកចំនួន 100នាក់ ដែលជាអ្នកបង្កើតអាជីវកម្មដោយខ្លួនឯង។

បើយោងតាមការធ្វើបច្ចុប្បន្នភាពថ្មីនៅថ្ងៃទី19 ខែមិថុនា ឆ្នាំ 2022នេះ នៅក្នុងការផ្សព្វផ្សាយរបស់ទស្សនាវដ្ដី Forbes គឺលោកស្រី Diane Hendricks មានទ្រព្យសម្បត្តិសុទ្ធសរុបចំនួន 11ពាន់លានដុល្លារ ដោយមានប្រភពចំណូលធំៗមកពីក្រុមហ៊ុនចែកចាយដំបូល។ បន្ថែមពីនេះ លោកស្រីក៏សហស្ថាបនិកអ្នកចែកចាយសម្ភារៈសំណង់ ABC Supply Co. Inc. (ABC) ដែលជាអ្នកចែកចាយលក់ដុំដ៏ធំបំផុតមួយ នៃសម្ភារៈដំបូលនៅក្នុងសហរដ្ឋអាមេរិក និងជាអ្នកចែកចាយឈានមុខគេនៃផ្នែកចំហៀង បង្អួច លូ ក្តារជញ្ជាំង ស៊ុមដែក ក្បឿងពិដាន និងក្រឡាចត្រង្គ ហើយមានសហការីជាង 15,000 នាក់ និងទីតាំង 811។ ក្រុមហ៊ុននេះ នាងបានបង្កើតវានៅក្នុងឆ្នាំ 1982 ជាមួយប្តីរបស់នាងឈ្មោះ Ken ដែលជាអ្នកជំនាញផ្នែកដំបូល នៅ Beloit រដ្ឋ Wisconsin ។ ចំពោះក្រុមហ៊ុន ABC Supply ក៏ធ្លាប់បានទទួលពានរង្វាន់ Gallup Exceptional Workplace Awards ចំនួន 15 និងពានរង្វាន់ជ្រើសរើសបុគ្គលិក Glassdoor ចំនួនពីរសម្រាប់កន្លែងធ្វើការល្អបំផុតសម្រាប់ការប្តេជ្ញាចិត្តរបស់ខ្លួនក្នុងការបង្កើតវប្បធម៌ចូលរួមជាមួយបុគ្គលិក។

នៅក្នុងឆ្នាំ 2010 លោកស្រី Diane Hendricks ក៏បានទិញយក Bradco ដែលជាក្រុមហ៊ុនរបស់ដៃគូប្រកួតប្រជែង និងក្លាយជាអ្នកចែកចាយសម្ភារៈសំណង់ L&W Supply ក្នុងឆ្នាំ 2016 ហើយក្រុមហ៊ុនរបស់លោកស្រីក៏ចាប់ផ្ដើមមានសាខាជិត 800 និងប្រាក់ចំណូលជិត 15 ពាន់លានដុល្លារក្នុងឆ្នាំ 2021។

លើសពីនេះ លោកស្រីក៏ជាប្រធានក្រុមហ៊ុន Hendricks Holding Co., Inc. (HHC) ដែលធ្វើជាអធិបតីលើផលប័ត្រអាជីវកម្មចម្រុះ រួមមានការផលិត ការចែកចាយ ការអភិវឌ្ឍន៍អចលនទ្រព្យ សំណង់ ការកែច្នៃ និងវិទ្យាសាស្ត្រជីវិត ព្រមទាំងជាប្រធានក្រុមហ៊ុន NorthStar Medical Technologies LLC ដែលជាអ្នកច្នៃប្រឌិតសកលក្នុងការផលិត និងចែកចាយអ៊ីសូតូបវិទ្យុសកម្មដែលប្រើសម្រាប់រូបភាពវេជ្ជសាស្ត្រ។

ការបង្កើតអាជីវកម្ម និងការដឹកនាំប្រតិបត្តិការដោយខ្លួនឯងនេះ គឺជាគំរូដ៏ល្អមួយសម្រាប់ស្រ្តីទូទាំងពិភពលោកដែលអាចសិក្សារៀនសូត្របន្ថែមពីលោកស្រី និងមានភាពក្លាហានមួយក្នុងការចាប់ផ្ដើមអាជីវកម្មផ្ទាល់ខ្លួន ដោយហ៊ានដើរតាមក្ដីស្រមៃផ្ទាល់ខ្លួន។ ហើយក៏ជាគំរូក្នុងការឱ្យស្រី្តៗផ្លាស់ប្ដូរផ្នត់គំនិតថា ស្រ្តីមិនអាចក្លាយជាអ្នកដឹកនាំ មិនអាចដើរតាមក្ដីស្រមៃ មិនអាចក្លាយជាមហាសេដ្ឋី។ល។

ពាណិជ្ជកម្ម

មហាសេដ្ឋីលំដាប់លេខ 1 ទូទាំងពិភពលោកប្រចាំឆ្នាំ 2022

Sann Thaven

បើយោងតាមទស្សនាវដ្ដី Forbes បានឱ្យដឹងថាការធ្វើបច្ចុប្បន្នភាពថ្ងៃទី16 ខែមិថុនា ឆ្នាំ2022 នេះ ទ្រព្យសម្បត្តិសុទ្ធសរុបរបស់លោក Elon Musk មានចំនួន 215.6 ពាន់លានដុល្លារ ដែលជាចំនួនកើនឡើងលើសទ្រព្យសម្បត្តិសុទ្ធសរុបរបស់លោក Bernard Arnault ចំនួន 80 ពាន់លានដុល្លារ និងលើសទ្រព្យសម្បត្តិសុទ្ធសរុបរបស់ Jeff Bezos ចំនួន 82.2 ពាន់លានដុល្លារ។ ចំពោះការធ្វើបច្ចុប្បន្នភាពថ្មីក្នុងឆ្នាំ 2022 នេះ ជាទិន្នន័យមួយបង្ហាញថា លោក Elon Musk មានចំនួនទ្រព្យសម្បត្តិសុទ្ធច្រើនជាងមហាសេដ្ឋីនានាទូទាំងពិភពលោក ដូចជា Bill Gates, Warren Buffett, Larry Ellison, Mukesh Ambani, Gautam Adani, Larry Page, Sergey Brin និងជាច្រើនរូបទៀត។

គួរបញ្ជាក់ផងដែរថា ទ្រព្យសម្បត្តិដែល Elon Musk ទទួលបានច្រើនជាងគេ គឺបានមកពីប្រភពចំណូលចំនួនពីរ រួមមាន Tesla និង SpaceX។ លើសពីនេះ Elon Musk ក៏កំពុងធ្វើការដើម្បីធ្វើបដិវត្តការដឹកជញ្ជូនទាំងនៅលើផែនដីតាមរយៈក្រុមហ៊ុនផលិតរថយន្តអគ្គិសនី Tesla និងនៅក្នុងលំហ តាមរយៈក្រុមហ៊ុនផលិតរ៉ុក្កែត SpaceX។ ម្យ៉ាងទៀត គាត់បានកាន់កាប់ភាគហ៊ុន Tesla ចំនួនប្រហែល 25% និង SpaceX ដែលជាក្រុមហ៊ុនរ៉ុក្កែតរបស់ Musk ក៏មានតម្លៃ 100 ពាន់លានដុល្លារ បន្ទាប់ពីការផ្តល់មូលនិធិក្នុងខែធ្នូ ឆ្នាំ 2021។ ហើយទាំងនេះ ជាផ្នែកសំខាន់ត្រួសៗអំពីប្រភពចំណូលរបស់ Musk។

បន្ថែមពីនេះ ភាពជោគជ័យរបស់ Elon Musk មិនមែនកើតឡើងដោយងាយស្រួលនោះឡើង ប៉ុន្តែវាកើតចេញពីក្ដីស្រលាញ់ក្នុងការបង្កើតអ្វីថ្មីៗ និងដើរតាមក្ដីស្រមៃរបស់ខ្លួនឯង រួមផ្សំជាមួយនឹងភាពឆ្លាតវៃ និងសមត្ថភាព ឆន្ទៈរបស់លោកផ្ទាល់ក្នុងការតស៊ូជំនះរហូតទទួលបាននូវអ្វីដែលលោកចង់ឃើញ។ លើសពីនេះ លោកក៏បន្តស្វែងរកអ្វីថ្មីៗក្នុងការបង្កើតវាឡើង ដើម្បីដើរតាមក្ដីស្រមៃ និងជួយពិភពលោកឱ្យកាន់តែជឿនលឿនផងដែរ។ ម្យ៉ាងវិញទៀត ការខិតខំរបស់លោកមិនមែនមនុស្សគ្រប់គ្នាអាចធ្វើតាមបានឡើយ ដោយលោកក៏ធ្លាប់ព្យាយាមធ្វើការរហូត 120ម៉ោង ក្នុងមួយសប្ដាហ៍ក៏មាន ដែលនេះជារឿងគួរឱ្យនឹកស្មានមិនដល់ថាគាត់អាចធ្វើបាន។

ពាណិជ្ជកម្ម

សៀវភៅហិរញ្ញវត្ថុផ្ទាល់ខ្លួន ដែលសិស្សនិស្សិតគួរតែអាន!

Sann Thaven

មនុស្សជាច្រើន ជាពិសេសនៅក្នុងវ័យជំទង់តែងតែចង់ទទួលបានសេរីភាពផ្នែកហិរញ្ញវត្ថុផ្ទាល់ខ្លួន ពីព្រោះវ័យនេះ ជាវ័យដែលប្រាក់ចំណូលទាប ប៉ុន្តែចំណង់នៃការចង់ចំណាយមានច្រើន ដូច្នេះហើយដើម្បីអាចធ្វើឱ្យខ្លួនឯងមានសេរីភាពហិញ្ញវត្ថុ អ្នកអាចជ្រើសរើសអានសៀវភៅចំនួន 4 ខាងក្រោម។

1. សៀវភៅ Your Money Life: Your 20s និពន្ធដោយ Peter Dunn

សៀវភៅនេះ នឹងបង្រៀនមនុស្សពីការសងប្រាក់កម្ចីសម្រាប់សិស្សនិស្សិត ដោយជៀសវាងការជាប់បំណុលច្រើនលើរឿងមិនចាំបាច់ ព្រមទាំងផ្ដល់នូវយុទ្ធសាស្រ្តក្នុងការប្រើប្រាស់សាច់ប្រាក់ឱ្យបានល្អ ដោយបង្ហាញពីវិធីកាត់បន្ថយចំណាយលើការរស់នៅប្រចាំថ្ងៃ និងបង្ហាញពីរបៀបកំណត់ភាគរយនៃប្រាក់ចំណូលរបស់អ្នក ដែលអាចត្រូវចំណាយលើគ្រឿងទេស លើការស្នាក់នៅ និងផ្សេងៗជាដើម។ លើសពីនេះ ក៏បង្ហាញឱ្យអ្នកចេះពីរបៀបត្រៀមលុយទុកសម្រាប់ការប្រើប្រាស់លើភាពចាំបាច់ ឬការចំណាយលើតម្រូវការរបស់អ្នកនាពេលខាងមុខ។ល។

ទិញសៀវភៅ៖ https://www.amazon.com/gp/product/0983458855/ref=as_li_tl

2. សៀវភៅ Financial Freedom និពន្ធដោយ Grant Sabatier

សៀវភៅនេះ នឹងបង្រៀនអ្នកឱ្យក្លាយជាមនុស្សមានសេរីភាពផ្នែកហិរញ្ញវត្ថុ ដោយអ្នកអាចគ្រប់គ្រងហិរញ្ញវត្ថុផ្ទាល់ខ្លួនបានយ៉ាងល្អ ព្រមទាំងអាចដឹងថាខ្លួនឯងត្រូវបែងចែកចំណាយផ្ទាល់ខ្លួនបែបណា និងត្រូវលុបបំបាត់រាល់ចំណាយលើអ្វីមិនចាំបាច់បែបណា។ល។

ទិញសៀវភៅ៖ https://www.amazon.com/gp/product/0525540881/ref

3. សៀវភៅ The Total Money Makeover និពន្ធដោយ Dave Ramsey

សៀវភៅនេះ នឹងផ្តល់នូវគន្លឹះ និងដំបូន្មានជាច្រើនដើម្បីគេចផុតពីការជំពាក់បំណុលគេ ជៀសវាងភាពលំបាកនៃកំណើនសាច់ប្រាក់ និងការចេះបង្កើតថវិកាដ៏រឹងមាំដែលអាចឆ្ពោះទៅរកភាពជោគជ័យផ្នែកហិរញ្ញវត្ថុក្នុងរយៈពេលវែង។

ទិញសៀវភៅ៖ https://www.amazon.com/gp/product/1595555277/ref

4. សៀវភៅ Your Money or Your Life និពន្ធដោយ Vicki Robin and Joe Dominguez

សៀវភៅនេះ នឹងបង្ហាញពីរបៀបចំនួន9 ដើម្បីធ្វើឱ្យអ្នកមានសេរីភាពផ្នែកហិរញ្ញវត្ថុក្នុងរយៈពេលវែង ព្រមទាំងបង្ហាញពីរបៀបចៀសវាងពីការជំពាក់បំណុល និងបង្កើតទម្លាប់ហិរញ្ញវត្ថុល្អៗនៅក្នុងជីវិត ដោយអាចចៀសវាងពីការចំណាយដោយភាពរឹតត្បិតច្រើន។

ទិញសៀវភៅ៖ https://www.amazon.com/gp/product/0143115766/ref

ពាណិជ្ជកម្ម

កន្លែងល្អបំផុត ដើម្បីអាចរៀនជំនាញថ្មីៗ

Sann Thaven

បច្ចេកវិទ្យាកាន់តែជឿនលឿន ហើយមនុស្សក៏កាន់តែត្រូវការដើម្បីសិក្សានូវជំនាញថ្មីៗផងដែរ ដោយមិនអាចរក្សានូវអ្វីដដែលៗបានឡើយ ពីព្រោះអ្នកអាចនឹងដើរមិនទាន់សម័យកាលនាពេលបច្ចុប្បន្ន។ ម្យ៉ាងវិញទៀត បច្ចុប្បន្ននេះ ក៏កាន់តែមានភាពងាយស្រួលសម្រាប់មនុស្សក្នុងការសិក្សានូវជំនាញថ្មីៗដោយមិនចាំបាច់ទៅសាលាផ្ទាល់ ដោយអាចសិក្សានៅផ្ទះតាមប្រព័ន្ធអនឡាញបាន។ ដូច្នេះខាងក្រោមនេះ យើងក៏នឹងបង្ហាញនូវគេហទំព័រល្អៗមួយចំនួនដែលអ្នកអាចជ្រើសរើសដើម្បីសិក្សានូវជំនាញថ្មីៗបានតាមរយៈអនឡាញ។

1. Udemy

Udemy មានវគ្គបណ្តុះបណ្តាលជាវីដេអូចំនួន 183,000 ដោយផ្ដោតលើជំនាញដែលមានចាប់ពីការរចនា ផ្នែកតន្ត្រី ការថតរូប IT កម្មវិធី និងអាជីវកម្ម។ លើសពីនេះ មិនថាអ្នកចង់ពង្រឹងជំនាញ ផ្នែក Photoshop ឬអភិវឌ្ឍន៍សមត្ថភាពរបស់អ្នកក្នុងការសរសេរកម្មវិធី និង machine learning នោះទេ គេហទំព័រនេះពិតជាមានវគ្គសិក្សាដែលអ្នកត្រូវការជាច្រើន ដើម្បីឆ្ពោះទៅការសម្រេចបាននូវគោលដៅអាជីពរបស់អ្នក។

គេហទំព័រ Udemy: https://www.udemy.com/

2. Coursera

គេហទំព័រ Coursera ផ្តល់ជូននូវវគ្គសិក្សាតាមអ៊ីនធឺណិតជាច្រើនប្រភេទ ដោយក្នុងនោះក៏មានថ្នាក់សិក្សាដែលមានការគាំទ្រដោយសាកលវិទ្យាល័យនានា ដែលអាចផ្ដល់នូវសញ្ញាបត្រជូនអ្នកក្រោយពីបញ្ចប់ការសិក្សា និងផ្ដល់វគ្គសិក្សាផ្សេងទៀតដើម្បីបង្កើនជំនាញរបស់អ្នក។ វគ្គសិក្សានីមួយៗភាគច្រើនផ្ដោតលើ វិទ្យាសាស្ត្រកុំព្យូទ័រ ឬទិន្នន័យ អាជីវកម្ម IT និងការអភិវឌ្ឍន៍ខ្លួនឯង។

គេហទំព័រ Coursera: https://www.coursera.org/

3. Skillshare

ការផ្តល់ជូនវគ្គសិក្សារបស់ Skillshare បានបញ្ចូលនូវកម្មវិធីរាប់ពាន់ ដោយអាចជួយអ្នកក្នុងការអភិវឌ្ឍផ្នែកអាជីវកម្ម បច្ចេកវិទ្យា និងជំនាញច្នៃប្រឌិតជាច្រើន ក្នុងនោះក៏មានវគ្គសិក្សាវិទ្យាសាស្ត្រទិន្នន័យ និងការអភិវឌ្ឍន៍ទូរស័ព្ទទៅទីផ្សារ ភាពជាសហគ្រិន និងការរចនាក្រាហ្វិក។ បន្ថែមពីនេះ វគ្គសិក្សារបស់ Skillshare ត្រូវបានរចនាឡើង ដើម្បីបំពេញតម្រូវការអភិវឌ្ឍន៍ជំនាញដោយផ្ដោតលើសិស្សនិស្សិត។

គេហទំព័រ Skillshare: https://www.skillshare.com/

4. LinkedIn Learning

LinkedIn Learning គឺជាគេហទំព័រដែលផ្ដល់ជូននូវវគ្គបណ្ដុះបណ្ដាលច្រើនជាង 10,000 ដើម្បីឱ្យសិស្សនិស្សិតទទួលបាននូវជំនាញថ្មីៗស្របតាមតម្រូវការរបស់ពួកគេ។

គេហទំព័រ LinkedIn Learning: https://www.linkedin.com/learning/

5. Alison

Alison ផ្ដល់នូវថ្នាក់សិក្សាអនឡាញឥតគិតថ្លៃជាច្រើន ដោយវគ្គសិក្សានីមួយៗផ្ដោតលើបច្ចេកវិទ្យា ភាសា វិទ្យាសាស្ត្រ ចំណេះដឹងផ្នែកហិរញ្ញវត្ថុ ជំនាញផ្ទាល់ខ្លួន ជំនាញទន់ ភាពជាសហគ្រិន និងជាច្រើនផ្សេងទៀត។ បន្ថែមពីនេះ គេហទំព័រនេះក៏ផ្តោតលើអ្នកសិក្សាគ្រប់ប្រភេទ ចាប់ពីអ្នកជំនាញ អ្នកគ្រប់គ្រង រហូតដល់គ្រូបង្រៀន និងអ្នកធ្វើការឯករាជ្យ។ អ្នកក៏អាចស្វែងរកវគ្គសិក្សាតាមអាជីពដែលអ្នកមាន ឬចង់ស្វែងរកវគ្គសិក្សាផ្សេងទៀតដែលអ្នកគិតថាមានប្រយោជន៍បំផុតសម្រាប់អ្នកបានផងដែរ។

គេហទំព័រ Alison: https://alison.com/

6. Codecademy

Codecademy ផ្តល់ទាំងវគ្គសិក្សាឥតគិតថ្លៃ និងការបង់ប្រាក់ ដែលជួយអ្នកប្រើប្រាស់ក្នុងការអភិវឌ្ឍជំនាញពាក់ព័ន្ធនឹងបច្ចេកវិទ្យា ហើយក៏មានវគ្គសិក្សាដែលបង្រៀនអ្នកពីរបៀបសរសេរកូដផងដែរ។

គេហទំព័រ Codecademy: https://www.codecademy.com/

7. Masterclass

ប្រសិនបើអ្នកពិតជាចង់រៀនពីអ្នកជំនាញដើម្បីពង្រឹងជំនាញថ្មីៗរបស់អ្នក នោះ Masterclass គឺជាជម្រើសដ៏ល្អបំផុតសម្រាប់អ្នក ដោយក្នុងនោះវគ្គសិក្សានឹងបង្រៀនដោយ Gordon Ramsay, Neil Gaiman, និងChris Voss។

គេហទំព័រ MasterClass: https://www.masterclass.com/

8. FutureLearn

FutureLearn ភាគច្រើនសម្បូរទៅដោយវគ្គសិក្សាដោយឥតគិតថ្លៃស្ទើរទាំងស្រុង។ អ្នកអាចស្វែងរកប្រភេទវគ្គសិក្សាជាច្រើនដែលបង្រៀនដោយសាកលវិទ្យាល័យ និងក្រុមហ៊ុនល្អៗជាច្រើន ដែលផ្ដោតលើជំនាញ ដូចជាអាជីវកម្មអេឡិចត្រូនិច ការគ្រប់គ្រង សិល្បៈច្នៃប្រឌិត ប្រព័ន្ធផ្សព្វផ្សាយ ច្បាប់ IT វិទ្យាសាស្ត្រកុំព្យូទ័រ ការថែទាំសុខភាព វិស្វកម្ម នយោបាយ ចិត្តវិទ្យា និងជាច្រើនទៀត។

គេហទំព័រ FutureLearn:

https://www.futurelearn.com/courses?filter_availability=upcoming

ពាណិជ្ជកម្ម

តើត្រូវរៀនជំនាញអ្វីបន្ថែម សម្រាប់ឆ្នាំ 2022 នេះ?

Sann Thaven

ពិភពលោកកាន់តែជឿនលឿនជាលំដាប់ ហើយបច្ចេកវិទ្យាក៏កាន់តែរីកចម្រើនជាខ្លាំង ដូច្នេះក៏ទាមទារឱ្យបុគ្គលម្នាក់ៗមានការអភិវឌ្ឍន៍សមត្ថភាពឱ្យខ្លាំង និងតាមឱ្យទាន់សម័យកាល។ ម្យ៉ាងទៀត អ្នកក៏ត្រូវ បង្កើនចំណេះដឹងថ្មីៗឱ្យបានច្រើនអំពីការវិឌ្ឍយ៉ាងឆាប់រហ័សនៃបច្ចេកវិទ្យា ជាពិសេសអ្នកត្រូវចាប់ផ្ដើមស្គាល់នូវបច្ចេកវិទ្យាដែលបានប្រើប្រាស់នៅក្នុងស្ថានប័នរបស់អ្នក បច្ចេកវិទ្យាដែលមនុស្សជុំវិញអ្នកតែងតែប្រើប្រាស់ និងតែងតែនិយាយអំពីវា ហើយសង្គមខាងក្រៅក៏កំពុងមានការប្រើប្រាស់ច្រើន។

អ្នកអាចតាមដានគេហទំព័រមួយចំនួន ដើម្បីអាចតាមទាន់ព័ត៌មានចុងក្រោយនៃបច្ចេកវិទ្យាថ្មីៗ ដូចជា TechCrunch, Gizmodo, TheVerge, VentureBeat, Digital Trends, The Information និងGadget Review។ បន្ថែមពីនេះ ក្រៅពីតាមដានឱ្យទាន់នៃការរីកចម្រើននៃបច្ចេកវិទ្យា អ្នកក៏ត្រូវគិតអំពីការរៀននូវជំនាញបន្ថែមសម្រាប់ខ្លួនឯង ហើយខាងក្រោមនេះ នឹងបង្ហាញអំពីជំនាញមួយចំនួនដែលអ្នកត្រូវរៀនបន្ថែម ដើម្បីអាចដឹង និងអាចបម្លែងខ្លួនឯងឱ្យក្លាយជាអ្នកជំនាញផ្នែកនីមួយៗផងដែរ។

1. ការរចនា UX/UI

បទពិសោធន៍អ្នកប្រើប្រាស់ (UX) និងការរចនាចំណុចទាក់ទាញដល់អ្នកប្រើប្រាស់ (UI) គឺជាផ្នែកនៃការអភិវឌ្ឍន៍គេហទំព័រ ឬកម្មវិធីទូរស័ព្ទចល័ត ដោយផ្តោតលើការធានាថាអ្នកប្រើប្រាស់អាចទទួលបាននូវគុណតម្លៃច្រើនបំផុតពីការចូលមើលគេហទំព័រ ឬកម្មវិធីដែលពួកគេកំពុងប្រើប្រាស់។ បន្ថែមពីនេះ ក្រុមហ៊ុនជាច្រើនក៏កំពុងស្វែងរកជួលបុគ្គលិកពេញម៉ោងលើផ្នែកមួយនេះផងដែរ ឬជាភ្នាក់ងាររចនាUX/UI ដើម្បីរចនា និងជួយធ្វើឱ្យបទពិសោធន៍ និងផលិតផលរបស់ក្រុមហ៊ុនពួកគេ កាន់តែមានភាពងាយស្រួលប្រើប្រាស់ដោយសមស្របជាមួយនឹងតម្រូវការនៃផលិតផល និងសេវាកម្មរបស់ពួកគេ។ បន្ថែមពីនេះ បើអ្នកមិនចង់ចាប់ផ្នែកនេះជាអាជីពផ្ទាល់ខ្លួនទេ អ្នកក៏ត្រូវសិក្សាឈ្វេងយល់ផងដែរ ដើម្បីអាចយល់ និងជាចំណេះដឹងថ្មីសម្រាប់អ្នក។