ការទិញលក់អចលនទ្រព្យទាមទារការគិតពិចារណា​ច្រើន​មុននឹងទិញ ដោយសារតែតម្លៃ​ខ្ពស់ និងមិនងាយ​ដោះដូរចុះឡើង ការប្រកួតប្រជែងទីផ្សារពីសំណាក់អ្នកសាងសង់លំនៅដ្ឋាន ដែលទាមទារឱ្យអ្នកលក់ត្រូវមាន​សិល្បៈ និងសិល្បវិធី​ជាច្រើន​ដើម្បីទាក់ចិត្តអតិថិជន​ឱ្យសម្រេចចិត្តទិញបាន។ ថ្ងៃនេះ​ខ្ញុំសូម​ណែនាំ​វិធី៨យ៉ាងដើម្បីបង្កើនប្រសិទ្ធភាព​បិទការលក់​ផ្ទះរបស់អ្នកឱ្យភាគរយជោគជ័យខ្ពស់។

១.និយាយពីចំណុច​លក់សំខាន់បំផុត​មុនគេ

អតិថិជនភាគច្រើនមាន​ការចាប់អារម្មណ៍​នូវសម្តីដែលអ្នកនិយាយមុនដំបូងបំផុត ហើយការណែនាំ​ចំណុចដែលពិសេស​មុនគេនឹងធ្វើឱ្យអតិថិជន​មានការចាប់អារម្មណ៍ខ្លាំង​ និងបន្តដាក់អារម្មណ៍ស្តាប់អ្នកបន្តទៀត។ តាមការពិសោធន៍ជាក់ស្តែង ការធ្វើដូចនេះនឹងបង្កើនប្រសិទ្ធភាព​ការលក់ និងអាត្រាជោគជ័យខ្ពស់។

២.បង្កើតទំនុកចិត្តដល់អតិថិជន

ទំនុកចិត្តគឺជារឿនដែលសំខាន់បំផុត​ក្នុងពិភពអាជីវកម្ម ជាពិសេស​អ្នកលក់ត្រូវ​បង្កើត​ការជឿទុកចិត្តនេះឱ្យបានដើម្បីជាគ្រឹះកសាងទំនាក់ទំនងល្អជាមួយអតិថិជន។ ការជឿជាក់អាចបែងចែកជាពីរ មួយគឺការជឿជាក់លើផលិតផល និងការជឿជាក់លើមនុស្ស​(ជឿជាក់លើអ្នកលក់ផ្ទាល់) ដែលអ្នកលក់ត្រូវបង្កើតគុណសម្បត្តិទាំង២នេះ​ឱ្យបានមុននឹងលក់អ្វីៗបានរលូន។ ដូចនេះអ្នកត្រូវតែច្បាស់ពីផលិតផលរបស់ខ្លួន ដើម្បីបង្កើតភាពជឿជាក់ផលិតផល និងរៀននិយាយដោយភាពស្វាហាប់ និងជឿជាក់ដើម្បី​ធ្វើឱ្យខ្លួន​ក្លាយជា​មនុស្ស​ជាទីទុកចិត្ត។

៣. ស្តាប់ដោយយកចិត្តទុកដាក់

កុំនិយាយតែម្នាក់ឯង ហើយ​មិនទុកឱកាស​ឱ្យ​អតិថិជនបង្ហាញចំណាប់អារម្មណ៍ ដែលវាជាកំហុសធំបំផុត។ អ្នកត្រូវតែស្តាប់អតិថិជន​ឱ្យបានច្រើន ស្វែងយល់ពីការចង់បានរបស់ពួកគាត់ និងការគិតរបស់គាត់ដោយប្រើប្រាស់វិធីសួរសំណួរឆ្លាតវៃ​របស់អ្នកដើម្បីដឹងពីតម្រូវការអតិថិជន ហើយធ្វើការឆ្លើយតបឱ្យបានសក្តិសមបំផុត។

៤. ប្រើប្រាស់របៀបនិយាយ​ឱ្យត្រូវនឹងប្រភេទអតិថិជន

ទោះបីអតិថិជននោះមកទិញផ្ទះ ឬផលិតផល​ដូចគ្នាក៏ដោយ តែការចង់បាន និងកង្វល់របស់ពួកគាត់គឺតែងតែមានភាពខុសៗគ្នា។ ប្រសិនបើអតិថិជន​ទិញ​ចង់ទិញផ្ទះមែន តែអ្នកដែលចង់ទិញដើម្បីរស់នៅ នឹងផ្តោតខ្លាំង​លើ​បរិយាកាស​រស់នៅ និងសុវត្ថិភាព ហើយអ្នកដែលចង់ទិញដើម្បីវិនិយោគ នឹងផ្តោតខ្លាំងលើការកើនតម្លៃ និងសក្តានុពលនៃតំបន់ រីឯអ្នកដែលទិញ​ដើម្បីកូនៗ នឹងផ្តោតខ្លាំងលើតំបន់ជិតសាលារៀនឬស្ថាប័នអប់រំនានា។ ដូចនេះ អ្នកមិនត្រូវទន្ទេញ​គម្ពីរលក់ទាំងមូល ហើយព្យាយាមសូត្រគ្រប់ពាក្យឱ្យអតិថិជនស្តាប់នោះទេ អ្នកត្រូវតែសង្កត់នូវចំណុចដែលអតិថិជន​ចង់ដឹងខ្លាំងបំផុត។

៥. ជឿជាក់លើផលិតផលខ្លួនឯង

គ្រប់សំណង់ផ្ទះទាំងអស់តែងតែមានចំណុចខ្លាំង និងចំណុចខ្សោយ ហើយអ្នកមិនត្រូវ​បាក់ទឹកចិត្តក្នុងការលក់​ដោយសារតែគុណវិបត្តិរបស់ផលិតផលអ្នកនោះទេ។ ប្រសិនបើអ្នកមិនជឿជាក់លើអ្វីដែលអ្នកលក់នោះទេ អ្នកនឹងមិនអាច​ទាក់ចិត្តអតិថិជន​ឱ្យជឿជាក់ទិញផ្ទះពីអ្នកបានឡើយ។ ចាត់ទុកផ្ទះដែលអ្នកលក់ដូចជាកូនរបស់អ្នក ដែលតែងតែល្អបំផុតសម្រាប់អ្នក ហើយជាមួយនឹងអារម្មណ៍នេះ អ្នកនឹងអាចលក់បានដោយជឿជាក់។

៦. ចេះរៀបរាប់ពីទិដ្ឋភាព​រស់នៅ

អ្នកលក់ជាច្រើន​ចូលចិត្តនិយាយតែនៅជិតតំបន់នេះ តំបន់នោះ ដូចសូត្រមេរៀនឱ្យគេស្តាប់ តែមិនបានដាក់អារម្មណ៍អំពីភាពអស្ចារ្យ​ និងចេះព័ណ៌នា​ពីទស្សនីយភាពនៃការរស់យ៉ាងស្ទាត់ជំនាញ ដែលអាចធ្វើឱ្យអតិថិជនស្រមើស្រមៃឃើញពីជីវិតដ៏ប្រសើរដែលគាត់នឹងមាននៅក្នុងបុរីនោះ។ លុះត្រាណាតែអ្នកអាច​បញ្ចូល​អារម្មណ៍ឱ្យអតិថិជនអាចស្រម៉ៃឃើញពីទិដ្ឋភាពនោះ ការលក់របស់អ្នកអាច​មិនបានផលគាប់ប្រសើរឡើយ។

៧. ចេះប្រើប្រាស់តួរលេខ

ការប្រើប្រាស់តួរលេខគឺជាតិចនិច​មួយជួយបង្កើនភាព​ប៉ិនប្រសប់ និងជំនាញរបស់អ្នកដល់អតិថិជន។ ប្រសិនបើអ្នកអាចប្រើប្រាស់តួរលេខ​ប្រៀបធៀបឱ្យអតិថិជនស្តាប់ ដូចជា​តម្លៃនៅជុំវិញ (ប្រសិនបើអ្នកមានតម្លៃ​ល្អជាង) ឬក៏ប្រើបាស់​តួរលេខ​ជាក់ស្តែងពីការឡើងតម្លៃអចលនវត្ថុនៅតំបន់ផ្សេងមកនិយាយដើម្បីសូកចូល​ក្នុងគម្រោងរបស់អ្នក នោះអ្នកប្រាកដជាអាចទាក់ចិត្តអតិថិជនបានជាមិនខាន។

៨. ដាក់ចំណុច​សំខាន់មួយទៀតនៅចុងបញ្ចប់

ទោះបីជាខ្ញុំបានប្រាប់ថាត្រូវ​និយាយពីចំណុចសំខាន់ពីក្បាលដំបូងមែន តែអ្នកក៏ត្រូវ​ទុក​ព័ត៌មានពិសេស​មួយទៀត​នៅ​ចុងបញ្ចប់ផងដែរ ព្រោះវាជា​ពេលដែលអ្នកត្រូវទាក់ចិត្តអតិថិជនចុងក្រោយ និងជះឥទ្ធិពលក្នុងការសម្រេចចិត្តទិញ។ នៅពេលរៀបរាប់ អ្នកអាចដាក់អ្វីដែលមិនសូវសំខាន់នៅកណ្តាល ហើយ​និយាយ​ពីចំណុច​សំខាន់នៅដើម និងចុងដើម្បីធ្វើឱ្យអតិថិជនមានចិត្តរំភើបពេលឮព័ត៌មាននេះហើយសម្រេចិត្តទិញភ្លាមៗ។

នាពេលបច្ចុបបន្ននេះវិស័យអចលនទ្រព្យកំពុងតែមានវិសាលភាពយ៉ាងខ្លាំងនៅក្នុងប្រទេសកម្ពុជា។ យើងសង្កេតឃើញថាក្នុងអំទ្បុងពេលប៉ុន្មានឆ្នាំចុងក្រោយនេះ មានសំណង់អគារធំៗ ព្រមទាំងគេហដ្ឋានជាច្រើនកំពុងតែរីកដុះដាលនិងលេចចេញជារូបរាងជាលំដាប់។ អាស្រ័យហេតុនេះទើបមានមនុស្សជាច្រើនមានការចាប់អារម្មណ៍ហើយបែរមកវិនិយោគលើវិស័យនេះវិញ។ ការប្រទ្បូកនៅក្នុងវិស័យអចលនទ្រព្យអោយបានជោគជ័យមិនសូវជាងាយស្រួលប៉ុន្មានទេ។ ក្នុងអំទ្បុងពេលដែលអ្នកដើរនៅលើផ្លូវនេះអ្នកប្រាកដជាបានជួបនូវបញ្ហានិងការខាតបង់ជាច្រើនដែលវិនិយោគិនមិនតិចទេបានឆ្លងកាត់រួចមកហើយមុនពេលដែលពួកគេឈានទៅដល់ភាពជោគជ័យ។

ដូច្នេះបើសិនជាអ្នកកំពុងតែមានក្តីស្រមៃឬក៏មានបំណងចង់ក្លាយទៅជាវិនិយោគិនដ៏ជោគជ័យម្នាក់​ អត្ថបទនេះនឹងបង្ហាញប្រាប់អ្នកអំពីលក្ខណ:សម្បត្តិមួយចំនួនដែលវិនិយោគិនជោគជ័យជាច្រើនមានហើយអ្នកក៏គួរតែមានផងដែរ។

១. ស្គាល់ច្បាស់ពីដែនកំណត់របស់ខ្លួនឯង

ខ្លួនអ្នកផ្ទាល់គឺជាទ្រព្យសម្បត្តិដ៏ពិសេសបំផុតដែលអ្នកមាន។ ជាការពិតអ្នកគឺជាចំណុចចាប់ផ្តើមដ៏ធំបំផុតនៃការវិនិយោគរបស់អ្នក។ វាគឺជារឿងមួយដែលសំខាន់ក្នុងការស្វែងយល់ពីជំនាញនិងទេពកោសល្យរបស់អ្នក។ប្រហែលជាអ្នកអាចមានសម្ថភាពនូវក្នុងការគ្រប់គ្រងនូវអចលនទ្រព្យសម្រាប់ជួលតែក៏មិនប្រាកដថាអ្នកអាចក្លាយទៅអ្នកវិនិយោគដ៏ជោគជ័យនៅក្នុងវិស័យអចលនទ្រព្យដែរ។ វិនិយោគិនជោគជ័យតែងតែគិតថាតើពួកគេគួរតែចំណាយពេលទៅលើអ្វីដែលល្អបំផុត។ការដែលអ្នកព្យាយាមចង់ធ្វើរឿងគ្រប់យ៉ាងអាចនឹងក្លាយទៅជាការចំណាយពេលឥតប្រយោជន៍ទៅវិញ។ អ្នកគួរតែយកពេលខ្លះមកគិតនិងឆ្លុះបញ្ចាំងពីខ្លួនឯងដើម្បីអោយអ្នកដឹងថាតើអ្នកពូកែខាងអ្វីជាងគេហើយអ្នកគួរតែយកពេលវេលារបស់អ្នកទៅធ្វើរឿងអ្វីដែលសាកសមបំផុតសម្រាប់ខ្លួនឯង។ អ្នកគួរតែលះបង់នូវរឿងមួយចំនួនដែលពុំសូវសំខាន់សម្រាប់អ្នកហើយរៀនទុកចិត្តលើអ្នកដទៃនិងមនុស្សជុំវិញខ្លួនរបស់អ្នកអោយធ្វើអ្វីទាំងនោះសម្រាប់អ្នកវិញពីព្រោះថាមនុស្សម្នាក់ៗមានចំណុចពិសេស ទេពកោសល្យនិងជំនាញរៀងៗខ្លួន។ វិនិយោគិនដ៏ជោគជ័យតែងតែដឹងច្បាស់ពីដែនកំណត់របស់ខ្លួនឯង។

២ .ផ្តោតទៅលើទិន្នន័យច្បាស់លាស់

វិនិយោគិនជោគជ័យមិនធ្វើការសម្រេចចិត្តទៅតាមអារម្មណ៍របស់ខ្លួនឯងនោះទេ ។ នៅពេលដែលរឿងអ្វីមួយគ្មានការធានាពីភាពជោគជ័យច្បាស់លាស់ទេនោះ​ការពិនិត្យមើលទៅលើទិន្ន័យគឺជាចំណុចដែលសំខាន់បំផុត។អ្វីទាំងអស់ដែលមាននៅក្នុងអាជីវកម្មតាំងពីការធ្វើទីផ្សាររហូតដល់ការវិភាគចរចារសុទ្ធតែមាននូវទិន្ន័យ។បើសិនជាអ្នកមើលឃើញថាទិន្ន័យរបស់អចលនទ្រព្យនោះមិនល្អទេ អ្នកមិនគួរវិនិយោគទេ ពីព្រោះថាអ្នកអាចនឹងខាតបង់នាពេលអនាគត។ វិនិយោគិនជោគជ័យចាត់ទុកទិន្ន័យជាតម្លៃស្នូលនៃការវិនិយោគ។

៣ . គិតទៅលើគុណភាពជាជាងបរិមាណ

វិនិយោគិនជោគជ័យនឹងជ្រើសរើសកិច្ចព្រមព្រៀងមួយដែលផ្តល់ផលប្រយោជន៍ច្រើនជាជាងកិច្ចព្រមព្រៀងដែលមើលទៅហាក់ដូចជាមានចំនួនច្រើនតែផ្តល់ផលប្រយោជន៍តិច។ នៅពេលដែលអ្នកចាប់ទទួលកិច្ចព្រមព្រៀងណាមួយអ្នកគួរតែពិនិត្យទៅលើចំណុចមូលដ្ឋានមួយចំនួនជាមុនសិនថាតើអ្នកនឹងត្រូវខាតបង់អ្វីខ្លះបើសិនជាអ្នកវិនិយោគលើគម្រោងមួយនេះ ? ជាទូទៅបញ្ហាជាមួយនឹងគម្រោងខ្នាតមធ្យមគឺថាអ្នកត្រូវតែធ្វើប្រតិបត្តិការរបស់អ្នកអោយបានល្អបំផុតទើបអ្នកអាចទទួលបាននូវផលចំនេញ​ដែលវាមិនសូវជាងាយស្រួលប៉ុន្មានទេ ។ ផ្ទុយទៅវិញបើសិនជាអ្នកអត់ធ្មត់ហើយរងចាំទទួលគម្រោងផ្សេងដែលល្អជាងនេះអ្នកអាចនឹងទទួលបានភាពជោគជ័យជាង​។

៤​​ . រៀនឆ្លើយថា”​ទេ”

អ្នកមិនអាចចេះតែយល់ព្រមចំពោះរឿងគ្រប់យ៉ាងនោះទេ ។ វិនិយោគិនជោគជ័យដឹងច្បាស់ថា តើនៅក្នុងស្ថានភាពបែបណាគួរតែបដិសេធហើយស្ថានភាពបែបណាគួរតែយល់ព្រម។ ប្រហែលជាពេលខ្លះភ្នាក់ងារអចលនទ្រព្យអាចនឹងបញ្ចុះបញ្ចូលអ្នកអោយវិនិយោគលើអចលនទ្រព្យណាមួយ​​ ដូច្នេះបើសិនជាអ្នកមិនចាប់អារម្មណ៍ទេអ្នកគួរតែបដិសេធជាជាងការយល់ព្រមចំពោះគ្រប់រឿងដែលអាចផ្តល់ផលប៉ះពាល់ដល់អ្នកនាពេលអនាគត។​ មិនមែនមនុស្សនិងអចលនទ្រព្យទាំងអស់សុទ្ធសឹងតែល្អសម្រាប់អ្នកទេ​ ​​​​ហើយការបដិសេធក៏មិនមែនសុទ្ធតែអាក្រក់ទាំងអស់នោះទេ។

៥ .ចំណង់ចំណូលចិត្ត និងការតស៊ូ

វិនិយោគិនភាគច្រើនទទួលបានជោគជ័យគឺដោយសារតែការស្រលាញ់និងការពេញចិត្តចំពោះអ្វីដែលគេកំពុងតែធ្វើ។ ពួកគេតែងតែបង្កើននូវចំណេះដឹងនិងគំនិតបន្ថែមទៀតតាមរយះការអាននិងការចូលរួមសិក្ខាសិសាផ្សេងៗដែលទាក់ទងនឹងវិស័យអចលនទ្រព្យ។ លើលពីនេះទៅទៀតពួកគេព្យាយាមបង្កើតនូវទំនាក់ទំនងល្អជាមួយមនុស្សជុំវិញខ្លួននិងអ្នកដែលអាចជួយពួកគេបាន។ យ៉ាងណាមិញវិនិយោគិនជោគជ័យជាច្រើនសុទ្ធតែមាននូវចំណុចពិសេសរួមមួយគឺជាការតស៊ូមិនបោះបង់។ មិនថាជួបនឹងបញ្ហាឬការលំបាកយ៉ាងណាក៏ដោយក៏ពួកគេនៅតែបន្តស្វែងរកដំណោះស្រាយរហូតបានទទួលបានជោគជ័យដែរ​។

៦. ការមានវិន័យលើខ្លួនឯង

អ្នកត្រូវមានវិន័យលើខ្លួនឯង មិនគួរបណ្តោយអោយភាពលោភលន់នាំមុខអ្នកទ្បើយ ។ មានវិនិយោគិនមិនតិចទេដែលជួបប្រទះនឹងការខាតបង់រហូតដល់អស់ទ្រព្យពីខ្លួនក៏មាន​ នៅពេលដែលទីផ្សារអចលនទ្រព្យមានការធ្លាក់ចុះម្តងៗ ដោយសារតែការខ្វះនូវម្ចាស់ការលើខ្លួនឯង។ ការតាមដានព័ត៌មានថ្មីៗអំពីអចលនទ្រព្យគឺពិតជាសំខាន់ខ្លាំងណាស់សម្រាប់វិនិយោគិនប៉ុន្តែមានវិនិយោគិនមួយចំនួនពុំបានចាប់អារម្មណ៍នោះទេ។​ នៅពេលដែលតម្លៃអចលនទ្រព្យកំពុងតែទ្បើងខ្ពស់ពួកគេសង្វាតប្រមូលលុយទាំងអស់ទៅទិញដោយភាពលោភលន់ហើយភ្លាមៗនោះស្រាប់តែទីផ្សារបែរជាធ្លាក់ចុះវិញពួកគេក៏ត្រូវខាតបង់យ៉ាងធ្ងន់ធ្ងរ​ដែលនេះគឺជាលទ្ធផលនៃការមិនមានវិន័យលើខ្លួនឯង។

ដូច្នេះហើយបើសិនជាអ្នកចង់ក្លាយវិនិយោគិនដ៏ជោគជ័យអ្នកគួរតែព្យាយាមអភិវឌ្ឍន៍ខ្លួនឯងក៏ដូចជាបំពេញបន្ថែមនូវចំនុចខ្វះដែលអ្នកមានហើយចំណាយពេលបន្ថែមទៀតលើការតាមដានព័ត៌មាននិងចំណេះដឹងទាក់ទងនឹងអចលនទ្រព្យអោយបានច្រើនតាមដែលអាចធ្វើបាន។ លើសពីនេះទៅទៀតបើសិនជាអ្នកដាក់ចិត្តចង់ប្រទ្បូកក្នុងវិស័យនេះហើយអ្នកគួរតែរៀបចំផែនការជីវិតអ្នកអោយបានត្រឹមត្រូវនិងកុំបោះបង់ចោលទ្បើយទោះបីជាវាលំបាកតែថ្ងៃណាមួយអ្នកប្រាកដជានឹងទទួលបាននូវភាពជោគជ័យជាក់ជាមិនខាន។