ថ្លៃចំណាយនៃការចាប់ផ្តើមហាងមួយ

By

ហេង មុយលី

-

0

តើអ្នកធ្លាប់ចង់បើកហាងផ្ទាល់ខ្លួនទេ? អ្នកដឹងទេថាដើម្បីបើកហាងមួយបាន អ្នកត្រូវចំណាយលើអ្វីខ្លះ?

ការជូលទីតាំង៖ ប្រសិនបើអ្នកមិនមានទីតាំងផ្ទាល់ខ្លួនទេនោះថ្លៃចំណាយដំបូងដែលអ្នកត្រូវប្រើគឺការជួលទីតាំង។ ទីតាំងនៅលើផ្លូវធំគឺមានតម្លៃថ្លៃតែអ្នកនឹងអាចមានភ្ងៀវច្រើន។ ចំណែកឯហាងដែលមានទីតាំងនៅជាយក្រុងមានតម្លៃធូរថ្លៃក៏ពិតមែនប៉ុន្តែវាអាចធ្វើឲ្យអ្នកខាតបង់។ ពេលខ្លះអ្នកក៏អាចរកបានទីតាំងល្អនិងមានអតិថិជនគោលដៅច្រើនជាមួយនឹងថ្លៃជួលសមរម្យដូចជាហាងនៅជាប់សាលារៀនជាយក្រុងជាដើម។ អ្នកគួរតែរកអ្នកជំនាញអចលនទ្រព្យដើម្បីឲ្យគេជួយលើបញ្ហានេះ។
ការចំណាយផ្សេងៗ៖ សម្រាប់ការបើកហាងមួយ ការចំណាយទៅលើរបស់របរប្រើប្រាស់ផ្សេងៗគឺច្រើនណាស់។ ប្រសិនបើអ្នកមិនធ្លាប់ស្ថិតនៅក្នុងអាជីវកម្មនេះពីមុន អ្នកប្រហែលជាដឹងមិនអស់ឡើយថាត្រូវប្រើឧបករណ៍អ្វីខ្លះ។ វាអាស្រ័យថាអាជីវកម្មរបស់អ្នកគឺជាអ្វីប៉ុន្តែជាទូទៅមានដូចជាទឹកភ្លើង ក្រដាស សម្ភារៈក្នុងហាង តុកៅអី ម៉ាស៊ីនត្រជាក់ ទូទឹកកក ឧបករណ៍ប្រើប្រាស់ក្នុងផ្ទះបាយ សម្ភារៈបន្ទប់ទឹកជាដើម។
ការជួសជុលនិងរៀបចំកែលម្អហាង៖ អ្នកត្រូវចំណាយលុយជាច្រើនទៅលើសម្ភារៈដូចជា គ្រឿងសង្ហារឹមនិងជួសជុលកែលម្អហាងរបស់អ្នកទៅតាមម៉ូដដែលអ្នកចង់បានហើយអ្នកនឹងត្រូវការកម្លាំងពលកម្មដើម្បីសម្រួលកិច្ចការទាំងនោះ។
បញ្ជីសារពើភ័ណ្ឌ៖ ហាងលក់ទំនិញ ហាងកាហ្វេ ហាងលក់សម្លៀកបំពាក់ ហាងលក់ផ្កាជាដើមសុទ្ធតែត្រូវការទំនិញស្តុកទុកនិងបញ្ជីទំនិញដែលលក់ដាច់ឬលក់មិនសូវដាច់។ បើអ្នកចាប់ផ្តើមហាងជាលើកដំបូង អ្នកអាចចំណាយអស់ច្រើនទៅលើការទិញទំនិញចូលទៅក្នុងស្តុក។
ធានារ៉ាប់រង៖ អ្នកគួរតែមានការធានារ៉ាប់រងទៅលើបុគ្គលិកនិងមានកញ្ចប់ត្រៀមទុកសម្រាប់ហានិភ័យអាជីវកម្មក្នុងករណីមានបញ្ហាកើតឡើងជាយថាហេតុ។
បច្ចេកវិទ្យា៖ ទំនើបកម្មនៃការប្រើប្រាស់បច្ចេកវិទ្យាគឺជួយសម្រួលដល់កិច្ចការជាច្រើននៅក្នុងអាជីវកម្មសព្វថ្ងៃនេះដូចជាការប្រើប្រាស់កុំព្យូទ័រ ម៉ាស៊ីនព្រីន កូពី កាមេរ៉ាសុវត្ថិភាព កណ្តឹងប្រកាសអាសន្នជាដើម។
ផ្លាកយីហោនិងម៉ាកសញ្ញា៖ អ្នកត្រូវដាក់ផ្លាកយីហោនៅខាងក្រៅហាងជាប់ចិញ្ចើមផ្លូវដើម្បីផ្សព្វផ្សាយ។ លើសពីនេះអ្នកអាចចំណាយទៅលើការតុបតែងរូបរាងហាងដែលអាចឆ្លុះបញ្ចាំងពីម៉ាកសញ្ញាឬការបោះពុម្ពអាវដែលមានម៉ាកសញ្ញាដើម្បីផ្សព្វផ្សាយម៉ាកអាជីវកម្មរបស់អ្នក។
ទីផ្សារ៖ អ្នកត្រូវចំណាយលុយដើម្បីឲ្យគេស្គាល់ដោយបង្កើតគេហទំព័រ ទំព័រលើបណ្តាញសង្គម បោះក្រដាសផ្សព្វផ្សាយ ធ្វើកាតអាជីវកម្មជាដើម។
បុគ្គលិក៖ អ្នកត្រូវចំណាយលុយខ្លះទៅលើការជួលបុគ្គលិកនិងដំណើរការជ្រើសរើសបុគ្គលិក។ អ្នកក៏អាចជួលបុគ្គលិកក្រៅម៉ោងតែក្នុងកំឡុងពេលដែលមមាញឹកខ្លាំងជាដើម។

ពាណិជ្ជកម្ម

ផ្នត់គំនិតទាំង៦ដែលជួយឲ្យអាជីវកម្មរបស់អ្នកប្រសើរឡើង

By

bunneath Heng

-

0

ជាការពិតមិនមែនមនុស្សគ្រប់រូបសុទ្ធតែទទួលបានជោគជ័យក្នុងការបើកអាជីវកម្មនោះទេ តើអ្នកដែលឆ្ងល់ដែរទេថាយើងមានពេល ២៤ម៉ោងលើ២៤ម៉ោងដូចអ្នកដទៃដែរ ប៉ុន្តែការខិតខំប្រឹងប្រែងរបស់យើងមិនទទួលបានផលដូចអ្នកដទៃ? ដូចនេះ អត្ថបទក្នុងថ្ងៃនេះខ្ញុំចង់បង្ហាញឲ្យអ្នកដឹងពីផ្នត់គំនិតរបស់មនុស្សជោគជ័យដែលលោកអ្នកអាចយកទៅសាកល្បងប្រើប្រាស់ក្នុងការគិតរបស់អ្នកបានដើម្បីទទួលបានភាពជោគជ័យដូចពួកគាត់៖

ទី១ ចាប់ផ្តើមដោយមានគោលដៅច្បាស់លាស់

មូលហេតុដែលខ្ញុំលើកចំណុចនេះឡើងដោយសារតែខ្ញុំសង្កេតឃើញថាមនុស្សយើង៩៩ភាគរយមិនមានភាពច្បាស់លាស់ក្នុងការចាប់ផ្តើមធ្វើអ្វីមួយ។ ដូចនះ អ្នកត្រូវសួរខ្លួនឯងឲ្យច្បាស់ថាអ្នកចង់បានភាពជោគជ័យលើអ្វីហើយត្រួវលះបង់អ្វីខ្លះនិងធ្វើកិច្ចការអ្វីខ្លះដើម្បីសម្រេចបានគោលដៅរបស់អ្នក? ឧទារហណ៍ អ្នកចង់រកចំណួលឲ្យបាន$200,000 ក្នុងរយៈពេល៣ឆ្នាំនៃអាជីវកម្មរបស់អ្នក។ ដូចនេះអ្នកត្រូវចាប់ផ្តើមរកវីធីដើម្បីឈានដល់គោលដៅនោះហើយអ្នកត្រូវតែរំឮកខ្លួនឯងរាល់ពេលជាមួយគោលបំណងរបស់អ្នក។

ទី២ ការគ្រប់គ្រងពេលវេលានិងប្រសិទ្ធភាពការងារ

ជាការពិតការគ្រប់គ្រងពេលវេលានិងប្រសិទ្ធភាពការងារគឺជាអ្វីដែលអ្នកគួរតែចាប់ផ្តើមរៀនស្វែងយល់ឲ្យកាន់តែច្បាស់។ ដូចជាសម្ដី លោក Abraham Lincoln បានលើកឡើងថា “ អ្នកឲ្យពេលវេលាខ្ញុំប្រាំមួយម៉ោងក្នុងការកាប់ដើមឈើហើយខ្ញុំនឹងចំណាយពេលមួយម៉ោងក្នុងការសំលៀងពូថៅឲ្យមុត ”។ ហេតុដូចនេះហើយអ្នកអាចស្វែងរកដំបូន្មានចំពោះការគ្រប់គ្រងពេលវេលានិងប្រសិទ្ធភាពការងារតាមរយៈការមើលYoutube សួរមិត្តអ្នកដែលគេជោគជ័យ ជាដើមដើម្បីប្រើប្រាស់ដំបូន្មានទាំងនោះក្នុងការកសាងអាជីវកម្មរបស់អ្នកឲ្យប្រសើរឡើង។

ទី៣ ឆ្លៀតពេលទំនេររបស់អ្នក

អ្នកមិនត្រូវរស់រាល់ថ្ងៃគ្រាន់តែដើម្បីបញ្ចប់ការងារនោះទេ អ្នកត្រូវធ្វើអ្វីដែលប្រសើរជាងនេះ។ ថ្ងៃនិងពេលឈប់សម្រាកគឺជាពេលវេលាទំនេររបស់អ្នក។ អ្នកអាចយកពេលវេលាទាំងនោះមកអានសៀវភៅ ស្តាប់ព័ត៌មាន អានអត្ថបទដែលទាក់ទងនឹងអាជីវកម្មរបស់អ្នក ។ មិនថាអ្នកធ្វើអ្វីទេ អ្នកត្រូវដឹងថាវាជាកិច្ចការដែលមានប្រយោជន៍។

ទី៤ ចេះរៀបចំពេលវេលា

នេះគឺជាចំណុចមួយដែលខ្ញុំឆ្លងកាត់ខ្លួនឯងដោយពីរខែមុនខ្ញុំកើតជំងឺស្ត្រេសនៅពេលដែលជិតចុងឆមាសនៃការសិក្សារបស់ខ្ញុំ។ មូលហេតុដោយសារតែកិច្ចការសាលារបស់គ្រូនីមួយៗមកដំណាលគ្នាពេកហើយខណៈពេលនោះដែល ចំនួននៃអតិថិជនរបស់ខ្ញុំកើនឡើងដែលទាមទារឲ្យខ្ញុំត្រូវផ្គត់ផ្គង់ទំនិញជូនគាត់និងត្រូវជួបគាត់ដើម្បីពិភាក្សារឿងដំណើរការការងារ។ ប៉ុន្តែកិច្ចការទាំងអស់នោះខ្ញុំធ្វើមិនបានជោគជ័យឡើយដោយសារតែខ្ញុំភ្លេចរៀបចំពេលវេលាឲ្យបានត្រឹមត្រូវថាមួយណាចាំបាច់គួរធ្វើមុនហើយកិច្ចការណាដែលខ្ញុំអាចធ្វើតាមក្រោយបាន។

ទី៥ ការហាត់ប្រាណ

អ្នកចង់សម្រេចគោលដៅរបស់អ្នក អ្នកត្រូវមានសុខភាពល្អក្នុងការជម្នះគ្រប់ឧបសគ្គ។ ដូចនេះការហាត់ប្រាណគឺជាប្រការចាំបាច់ដែលអ្នកគួរធ្វើយ៉ាងហោចណាស់ឲ្យបាន៣០នាទីក្នុងមួយថ្ងៃដូចជាការដើរឬរត់តិចៗដោយអ្នកអាចស្តាប់ព័ត៌មានកំឡុងពេលដែលអ្នកកំពុងដើរផងដែរ។

ទី៦ កសាងអាជីវកម្មរបស់អ្នក

អ្នកត្រូវមានផ្នត់គំនិតចង់ឲ្យអាជីវកម្មរបស់អ្នករីកលូតលាស់។ អ្នកមិនគ្រាន់តែធ្វើឲ្យតែបាននោះទេ អ្នកត្រូវយកចិត្តទុកដាក់និងគិតថាអាជីវកម្មគឺសំខាន់ណាស់សម្រាប់អ្នកព្រោះអ្នកកំពុងតែបង្កើតអាជីវកម្មដែលពិតប្រាកដ។ ដូចនេះ អ្នកតែងតែជួបឧបសគ្គជាច្រើនដូចជាមានមនុស្សមួយចំនួនតែងតែចង់ឃើញអ្នកអន់ថយជាងឃើញអ្នកប្រសើរឡើង វិបត្តិហិរញ្ញវត្ថុ ខាតបង់ចំណូល ឬបុគ្គលិកអសមត្ថភាពជាដើម។ ហេតុដូច្នេះហើយអ្នកត្រូវតែមានសកម្មភាពជាក់លាក់ដើម្បីកសាងអាជីវកម្មរបស់អ្នកឲ្យបានជោគជ័យ។

ពាណិជ្ជកម្ម

៤ប្រភេទនៃប្រព័ន្ធសេដ្ឋកិច្ច

By

Pisey So

-

0

(Wikipedia, 2017) ប្រព័ន្ធសេដ្ឋកិច្ចគឺជាប្រព័ន្ធនៃផលិតកម្ម ការលៃលកធនធាន និងការបែងចែកទំនិញឬសេវាកម្មនៅក្នុងសង្គមឬទីតាំងភូមិសាស្ត្រជាក់លាក់ណាមួយ។ វាក៏យោងទៅតាមប្រព័ន្ធនៃសង្គមផងដែរដើម្បីកត់សម្គាល់ទៅលើចំណុចអាទិភាពណាខ្លះដែលសង្គមនៅអាចសម្រេចបានក្នុងគោលបំណងបង្កើតយុទ្ធសាស្ត្រសេដ្ឋកិច្ចដ៏មានប្រសិទ្ធភាពនិងទទួលបានភាពជោគជ័យ។ ប្រព័ន្ធនៃសេដ្ឋកិច្ចត្រូវកំណត់ថាអ្វីដែលគេត្រូវផលិត ផលិតដោយរបៀបណា និងផលិតទៅឲ្យអ្នកណា។ យ៉ាងណាមិញប្រព័ន្ធនៃសេដ្ឋកិច្ចត្រូវបានគេបែងចែកជា៤បែប៖

#ទី១ សេដ្ឋកិច្ចបែបប្រពៃណី

វាគឺជាសេដ្ឋកិច្ចដើមដែលប្រពៃណី ទំនៀមទម្លាប់ និងជំនឿរបស់គ្រួសារ សហគមន៍ ក្រុម កុលសម្ព័ន្ធ ឬសាសនារបស់ខ្លួននឹងកំណត់ពីទំនិញឬសេវាកម្មដែលសេដ្ឋកិច្ចនោះត្រូវផលិតនិងចែកចាយហើយភាគច្រើនការដោះដូរទំនិញគឺមិនប្រើប្រាស់លុយកាក់។ ប្រទេសដែលប្រើប្រាស់សេដ្ឋកិច្ចរបៀបនេះភាគច្រើនគឺស្ថិតនៅតំបន់ដាច់ស្រយាលនិងពឹងផ្អែកទៅលើវិស័យកសិកម្មជាចម្បង។ គេអាចហៅម្យ៉ាងទៀតថា “ភាពគ្រប់គ្រាន់សម្រាប់ចិញ្ចឹមជីវិត”។ សេដ្ឋកិច្ចរបៀបនេះគឺមិនសូវមានឬគ្មានការអភិវឌ្ឍន៍ ទទួលយកបច្ចេកវិទ្យា និងផ្នែកសុខាភិបាលពីបរទេសតិចតួចឬគ្មានសោះដោយប្រពៃណីនឹងសម្រេចពីការចិញ្ចឹមជីវិត ការស្លៀកពាក់ ក៏ដូចជាការតាំងទីលំនៅរបស់ពួកគេដែលប្រព្រឹត្តទៅតាមមនុស្សជំនាន់មុន។ ប៉ុន្តែវាមានលក្ខណៈប្រសើរត្រង់ថាសេដ្ឋកិច្ចបែបនេះនឹងជួយឲ្យប្រជាជននៅតែរក្សាប្រពៃណី ទំនៀមទម្លាប់ និងការបំពេញចិត្តមនុស្សជុំវិញបានស្របពេលដែលសេដ្ឋកិច្ចផ្សេងទៀតពិបាកនឹងធ្វើបាន។

#ទី២ សេដ្ឋកិច្ចបញ្ជាឬសេដ្ឋកិច្ចផែនការ

សេដ្ឋកិច្ចរបៀបនេះគឺរដ្ឋមានសិទ្ធិកាន់កាប់ទៅលើសកម្មភាពទាំងស្រុងនៃសេដ្ឋកិច្ចដោយការសម្រេចចិត្តចែកចាយនិងផលិតគឺធ្វើទៅតាមផែនការរបស់រដ្ឋាភិបាល។ វាមិនសូវមានភាពបត់បែនដូចសេដ្ឋកិច្ចទីផ្សារទេហើយប្រតិកម្មផ្លាស់ប្តូរការទិញទំនិញរបស់អ្នកប្រើប្រាស់និងភាពឡើងចុះនៃការផ្គត់ផ្គង់និងតម្រូវការក៏មានភាពយឺតយ៉ាវផងដែរ។ ឧទាហរណ៍ដូចជាប្រទេសដែលកាន់របបកុម្មុយនីស។ ហេតុផលចម្បងដែលរដ្ឋាភិបាលជ្រើសរើសសេដ្ឋកិច្ចប្រភេទនេះគឺដើម្បីអាចកាន់កាប់ធនធានដែលមានតម្លៃរបស់ខ្លួន(ឧ. ប្រេង រ៉ែ មាស)។ រីឯផ្នែកផ្សេងទៀតដូចជាកសិកម្មគឺប្រជាជនជាអ្នកដឹកនាំនិងចាត់ចែង។

#ទី៣ សេដ្ឋកិច្ចទីផ្សារសេរី

រាល់សកម្មភាពនៃការដោះដូរទំនិញដោយសេរីនិងអាស្រ័យទៅលើការត្រូវរ៉ូវគ្នារវាងអ្នកប្រើប្រាស់និងអ្នកផ្គត់ផ្គង់។ ក្រុមហ៊ុនក៏ដូចជាស្ថាប័នឯកជនមានសិទ្ធិកាន់កាប់ក្រុមហ៊ុន ដាក់តម្លៃទំនិញ គ្រប់គ្រងសង្វាក់ផលិតកម្ម ក៏ដូចជាបុគ្គលិកដោយខ្លួនឯង។ ចំណែករដ្ឋាភិបាលមិនមានសិទ្ធិគ្រប់គ្រងធនធានចាំបាច់ ទំនិញដែលមានតម្លៃ ឬវិស័យសំខាន់ៗនៃសេដ្ឋកិច្ចនោះទេ។ ប្រជាជនជាអ្នកកំណត់ថាសេដ្ឋកិច្ចត្រូវប្រព្រឹត្តទៅដោយរបៀបណា ការផ្គត់ផ្គង់ត្រូវធ្វើដូចម្តេច និងតម្រូវការអ្វីខ្លះដែលចាំបាច់។ ជាក់ស្តែងមិនមានសេដ្ឋកិច្ចទីផ្សារសេរីសុទ្ធសាធនៅក្នុងពិភពលោកឡើយ។ រដ្ឋាភិបាលនៅតែមានចំណែកចំពោះសេដ្ឋកិច្ចខ្លះៗដដែល។

#ទី៤ សេដ្ឋកិច្ចចម្រុះ

ជាសេដ្ឋកិច្ចមួយដែលរួមបញ្ចូលកិច្ចសហប្រតិបត្តិការរវាងសេដ្ឋកិច្ចទីផ្សារនិងសេដ្ឋកិច្ចផែនការជាមួយគ្នា។ ធនធានត្រូវបានគេបែងចែកទៅឲ្យទាំងឯកជននិងរដ្ឋជាអ្នកត្រួតត្រាតាមវិស័យនីមួយៗដែលប្រើប្រាស់គោលការណ៍ល្អបំផុតចំពោះប្រព័ន្ធទាំងពីរ។ ទីផ្សារសេរីគឺមានតិចឬច្រើនជាងរដ្ឋាភិបាលលើកលែងតែវិស័យសំខាន់ៗមួយចំនួនដូចជាវិស័យអប់រំ ថាមពល(ឧ. អគ្គិសនីកម្ពុជា) ទូរគមនាគម៍ជាដើម។ វិស័យទាំងនោះមិនអាចឲ្យឯកជនកាន់កាប់ទាំងស្រុងបានទេព្រោះវាអាចធ្វើឲ្យប៉ះពាល់ដល់សន្តិសុខជាតិ។ ជាក់ស្តែងយើងឃើញថាវិស័យផ្សេងៗគឺមានទាំងរដ្ឋនិងឯកជន(ឧ. វិស័យអប់រំ)។ ទោះបីជាតាមទ្រឹស្តីគឺគេចង់ធ្វើយ៉ាងណាឲ្យវិស័យទាំងពីរអាចទាញយកផលប្រយោជន៍ពីគ្នាទៅវិញទៅមកឲ្យបានល្អយ៉ាងណាក៏ដោយប៉ុន្តែចំពោះការអនុវត្តជាក់ស្តែងគឺមិនងាយនោះឡើយ។ យើងឃើញថាទំហំនៃការគ្រប់គ្រងរបស់រដ្ឋាភិបាលគឺធំដែលជួនកាលអាចមានឥទ្ធិពលលើសពីភាពចាំបាច់ទៅទៀត។

ឯកសារយោង៖

Economic system. (2017). Retrieved August 07, 2017, from en.wikipedia.org

Hill, Charles W.L. International Business (9th ed.) (Chapter 2). USA: University of Washington.

Dana G. (n.d). Economic System Types. Retrieved August 07,2017, from smallbusiness.chron.com

The Four Types of Economic Systems. (2017). Retrieved August 08, 2017, from quickonomics.com

Brian C. (2008). The Four Types of Economic Systems. Retrieved August 07,2017, from www.slideshare.net

Will G. (2014). The 4 Types Of Economic Systems Explained. Retrieved August 07,2017, from blog.udemy.com

ពាណិជ្ជកម្ម

7 ឧទាហរណ៍ធ្វើឲ្យទំព័រ Facebook អាជីវកម្មសកម្ម!

By

Suos Sovanna

-

0

Facebook បាននាំមកនូវ ភាពងាយស្រួលសម្រាប់អាជីវកម្មក្នុងការរក្សា និងបង្កើតទំនាក់ទំនង ជាមួយអតិថិជនគោលដៅ ក្នុងកម្រិតស្និទ្ធស្នាលមួយ ដែលមិនធ្លាប់មានពីមុន។ ជាពិសេសអាជីវកម្មនិមួយៗ អាចទំនាក់ទំនង ជាមួយអិតិថជនដោយផ្ទាល់! ពោលហ្វេសប៊ុក បានក្លាយទៅជា ច្រកទីផ្សារឬច្រកសម្រាប់លក់ផលិតផលទៅហើយ! ហេតុដូចនេះ ម្ចាស់អាជីវកម្មគ្រប់រូប ត្រូវស្វែងរកវិធីសាស្ត្របង្កើនអន្តរកម្ម ជាមួយអតិថិជននៅលើផេក។

ហ្គេមជាវិធីសាស្រ្តមួយ ដែលងាយស្រួលនិងធូរថ្លៃ ដែលអាជីវកម្មគួរតែអនុវត្ត ។ ហ្គេមអាចទាញចំណាប់អារម្មណ៍ និងអន្តរកម្មយ៉ាងច្រើន ពីយុវជន ហើយរហ័ស។ ដោយសារ ក្នុងការលេងហ្គេមម្តងៗ អ្នកលេងត្រូវគោរពតាមលក្ខខ័ណ្ឌ ដែលបានចែង។ ជាទូទៅគឺពួកគេត្រូវ (១) ចុច Like លើផេក (២) ចុច Like លើរូបភាព (៣) លេងហ្គេម (៤) Share ផុសជាសារធារណៈ (៥) Mention មិត្តភ័ក្តចំនួន៥នាក់។

ខាងក្រោមគឺជា 7 ឧទាហរណ៍នៃហ្គេម ដែលបានអនុវត្ត ដោយក្រុមហ៊ុនផ្សេងៗ ដែលអ្នកអាចយកជាគម្រូបាន។

1. លេងផ្គុំរូប

2. ចែករំលែកក្តីស្រាលាញ់ដើម្បីឈ្នះបានប័ណ្ណបញ្ចុះតម្លៃ

3. សំណួរចម្លើយ

4. ការចោទសួរជាសំនួរទាក់ទងទៅនឹងផលិតផលរបស់អ្នក

5. ការចូលរួមលេងល្បែងស្វែងរកផ្លូវ

6. ការចោទជាសំនួរបែបគណិតវិទ្យាដែលមានលក្ខណៈប្រកួតប្រជែង

7. ចែករំលែកភាពរីករាយនិងឈ្នះបានកែវយ៉ាងស្រស់ស្អាតមួយគូ

ពាណិជ្ជកម្ម

ហេតុអ្វីបានជាគុយទាវទូករីកលូតលាស់លឿននិងបរាជ័យលឿន?

By

Sreylen Vong

-

0

គំនិតជឿជាក់ថាអ្នកប្រាកដជានៅចាំហាងគុយទាវទូក8 Boat Noodle ឬគុយទាវទូកដែលមានឈ្មោះប្រហាក់ប្រហែលនេះ។ គុយទាវទូកបានចាប់ផ្តើមបើកលក់នៅកម្ពុជាដំបូងចុងឆ្នាំ២០១៤។ ក្រោយពេលបើក ហាងគុយទាវទូកទទួលបានការចាប់អារម្មណ៍យ៉ាងរហ័សពីសំណាក់មហាជន ហើយថែមទាំងបានលក់សិទ្ធិធុរកិច្ច(Franchise)ជាច្រើនថែមទៀត។ ប៉ុន្តែមិនយូរប៉ុន្មានក៏ឃើញថាហាងទាំងនោះបានទទួលបរាជ័យនិងបិទទ្វារជាបន្តបន្ទាប់។

តើមូលហេតុអ្វីដែលធ្វើឲ្យហាងគុយទាវទូកមួយនេះរីកលូតលាស់លឿនតែក៏បរាជ័យលឿនបែបនេះ?

ចិត្តសាស្រ្តរបស់មនុស្ស

មនុស្សពេលដែលឃើញអ្វីដែលប្លែកថ្មីតែងតែចង់សាកចង់ដឹង ហើយមនុស្សតែងតែចង់បង្ហាញទៅមិត្តភ័ក្តិនៅពេលពួកគាត់មានអារម្មណ៍ថាខ្លួនពិសេស(ញ៉ាំគចានច្រើន)។ គុយទាវទូកធ្វើឲ្យអ្នកញុំាមានអារម្មណ៍ថាប្លែក និងពិសេសដោយសារតែញុំារហូតដល់គរចានដែលជម្រុញឱ្យគាត់បង្ហោះនៅលើបណ្តាញFacebookដើម្បីអួត និងបង្ហាញមិត្តភ័ក្តិ ។ ដូច្នេះនៅពេលដែលទើបតែបើកដំបូងមានមនុស្សជាច្រើនបានទៅតម្រង់ជួរញុំា។ តែក្រោយពេលបានសាកល្បងញុំារួចមកក៏មិនសូវមានមនុស្សចាប់អារម្មណ៍នឹងទៅញុំាទៀត ជាមូលហេតុដែលធ្វើឲ្យហាងគុយទាវទូកនេះមិនអាចដំណើរការតទៅមុខទៀតបាន។ ក្រោយពេលដែលបានសាកល្បងអ្វីដែលប្លែកថ្មីរួចមកមនុស្សក៏មានអារម្មណ៍ថាធម្មតានិងលែងចាប់អារម្មណ៍ទៀត។

និនា្នការសង្គម

មនុស្សនៅក្នុងសង្គមភាគច្រើនទន់ទោរទៅរកគ្នា។ នៅពេលដែលឃើញគេញុំា ផឹកអ្វី ទៅកន្លែងណាមួយ ឬធ្វើអ្វីមួយដែលខ្លួនមិនធ្លាប់បានធ្វើនោះ អ្នកតែងតែចង់សាកល្បងនិងធ្វើតាមគេភ្លាម។ ដូចគ្នានេះដែរ អ្នកខ្លះពេលដែលឃើញគេទៅញុំាគុយទាវទូកហើយថតផុសនៅក្នុងហ្វេសប៊ុកធ្វើឲ្យគេមានចិត្តមួយថា ត្រូវតែទៅញុំានិងថតផុសឲ្យដូចគេដែរ។ បើគេមិនបានញុំានិងថតផុសនោះទេ គេនឹងគិតថាខ្លួនឯងដើរមិនទាន់សង្គម មិនទាន់អ្នកដទៃដែលនៅក្នុងបរិបទសង្គមតែមួយ។ ប៉ុន្តែមួយរយៈក្រោយមកការនិយមនេះនឹងផ្លាស់ប្តូរ ឬអន់ថយទៅវិញព្រោះម្នាក់ៗបានសាកល្បងរួចហើយ។ និន្នាការនៃសង្គមតែងតែដើរទៅមុខជានិច្ច ដូចនេះបើគ្មានការផ្លាស់ប្តូរ ឬកែប្រែខ្លះៗនោះទេនឹងធ្វើឲ្យអ្នកបរាជ័យជាក់ជាមិនខាន។

តម្លៃ

បើយើងសង្កេតមើលពីតម្លៃរបស់គុយទាវទូកវិញ ក្នុងមួយចានប្រហែល២៥០០៛ប៉ុណ្ណោះយើងប្រាកដជាគិតថាមិនថ្លៃនោះទេ ប៉ុន្តែបើញុំាមួយឆ្អែតមនុស្សម្នាក់ប្រហែលជាត្រូវញុំាពី៤ចានឡើងទៅ។ ជាមួយគ្នានេះដែរ បើយើងញុំាគុយទាវក្នុងហាងដទៃទៀតគឺមានតម្លៃប្រហែល៨០០០៛ប៉ុណ្ណោះក្នុងមួយចាន។ សរុបមក បើចង់ញុំាគុយទាវទូកឲ្យឆ្អែតប្រហែលជាត្រូវចំណាយថ្លៃបន្តិច។

ការពង្រីកខ្លួនលឿនពេក

ហាងគុយទាវទូកគឺបានពង្រីកខ្លួនយ៉ាងលឿនរហូតដល់រាប់សិបហាងក្នុងរយៈពេលដ៏ខ្លី។ ការពង្រីកខ្លួនលឿនពេកនេះ ក៏ជាមូលហេតុមួយដែលធ្វើឱ្យហាងគុយទាវទូកឆាប់សាបរលាបពីភាពពេញនិយមផងដែឬ។ ហេតុអ្វី? ព្រោះថា វិជាចិត្តសាស្ត្រមួយរបស់មនុស្ស នៅពេលដែលវាងាយស្រួលនឹងទទួលបានពេក (ទៅណាក៏ឃើញ) វាលែងក្លាយទៅជារបស់ពិសេសដូចមុនទៀតហើយ។ ម្យ៉ាងវិញទៀត នៅពេលដែលការផ្គត់ផ្គង់កើនលឿនពេក ធ្វើឱ្យអតិថិជនត្រូវបែកសាចទៅហាងផ្សេងៗគ្នាដែលធ្វើឱ្យមើលពីក្រៅហាងទៅលែងមានមនុស្សច្រើនតម្រង់ជួរដូចមុន ដែលកត្តានេះក៏រួមចំណែកជះឥទ្ធិពលដល់ចិត្តសាស្ត្រអតិថិជន ធ្វើឱ្យគាត់យល់ថាវាលែងពេញនិយមដូចមុនទៀតហើយ។ ចិត្តសាស្ត្ររបស់អតិថិជនភាគច្រើនគឺប្រហាក់ប្រហែលគ្នា នៅពេលដែលហាងណាមានមនុស្សច្រើន គឺគាត់ចូលចិត្តចូលហាងនោះ ទោះបីត្រូវប្រជ្រៀតគ្នា ឬរង់ចាំក៏ដោយ។

គុណភាពសេវា និងផលិតផល

បើយើងក្រឡេកទៅមើលគុណភាពសេវាកម្មរបស់គុយទាវទូកវិញគឺមិនខុសពីកន្លែងដទៃទៀតនោះទេ។ យើងត្រូវចំណាយពេលរង់ចាំនិងកម្ម៉ុង់ប្រហាក់ប្រហែលនឹងហាងដទៃទៀតដែរ និងមិនមានលក្ខណៈពិសេសអ្វីដែលគួរឲ្យចាប់ចិត្តដែរ។

បើក្រឡេកពីគុណភាពផលិតផលវិញ យុទ្ធសាស្ត្រទីផ្សារល្អអាចធ្វើឱ្យមនុស្ស មកភ្លោកទឹកភ្លោកដីបានដើម្បីសាក ប៉ុន្តែបន្ទាប់ពីបានសាកល្បងហើយមានអារម្មណ៍ថាមិនមានអ្វីឆ្ងាញ់ ឬពិសេសនោះ អាត្រានៃការវិលត្រឡប់មកវិញគឺមានកម្រិតទាបប៉ុណ្ណោះ។ ដូចនេះ មានតែគុណភាពផលិតទេដែលអាចរក្សានិរន្តរភាពនៃភាពពេញនិយមបានពីសំណាក់អតិថិជន។

សរុបសេចក្តីមក ចំណុចខាងលើនេះគឺពិតជាសំខាន់ណាស់ក្នុងការធ្វើអាជីវកម្ម បើសិនជាអ្នកមិនបានយកចិត្តទុកដាក់ទៅលើប៉ុន្មានចំណុចនេះទេ អ្នកអាចនឹងជួបប្រទះបញ្ហា និងការបរាជ័យជាមិនខានឡើយ។ អត្ថបទនេះគ្រាន់តែជាការសង្កេតនិងយល់ឃើញ ដើម្បីសិក្សាយល់ដឹងនិងធ្វើជាបទពិសោធន៍សម្រាប់ការធ្វើអាជីវកម្មតែប៉ុណ្ណោះ។

ពាណិជ្ជកម្ម

តើ Ponds កំពុងតែដើរខុសគោលដៅមែនដែរឬទេ?

By

Suos Sovanna

-

0

កាលពីប្រហែលមួយឆ្នាំមុន ក្រុមហ៊ុន Ponds Cambodia បានបង្កើតកម្មវិធីមួយ ដែលមានឈ្មោះថា High School Love ។ កម្មវិធីនេះគឺជាកម្មវិធីវិដេអូរឿងភាគបែបយុវវ័យ ដែលផ្តោតលើសិស្សវិទ្យាល័យ ដែលប្រឈមមុខនឹងរឿងស្នេហា និងបញ្ហាមុខមុន។ មកដល់ពេលថ្មីៗនេះ ក្រុមហ៊ុននេះបានប្រកាសពីវត្តមានបន្តរបស់កម្មវិធី វិដេអូរឿងភាគ High School Love រដូវកាលទីពីរ ដែលនឹងចាក់ជូនទស្សនាក្នុងពេលឆាប់ៗនេះ។

តើហេតុអ្វីបានជាក្រុមហ៊ុន Ponds Cambodia បង្កើតកម្មវិធីនេះឡើង? តើនរណាគឺជាអតិថិជនគោលដៅរបស់ក្រុមហ៊ុន Ponds Cambodia? មនុស្សស្រីជំទង់ ( អាយុ ១៨ដល់២៧ឆ្នាំ) ឬក្មេងជំទង់ ( អាយុ ១៣ដល់១៧ឆ្នាំ)?

ប្រសិនបើយើងសង្កេតមើល វីដេអូពាណិជ្ជកម្មកាលពីមុនៗ របស់ក្រុមហ៊ុននេះ យើងនឹងឃើញថា ការផ្តោតគឺស្ថិតទៅលើមនុស្សស្រីជំទង់ អាយុប្រមាណ១៨ឆ្នាំដល់២៧ឆ្នាំ ហើយមិនមែនជាក្មេងជំទង់នោះទេ។

ឧទាហរណ៍ នៅក្នុងវីដេអូពាណិជ្ជកម្មមួយរបស់ Ponds គឺសម្តែងដោយ កញ្ញាមាស សូនីតា ដែលបង្ហាញពីរបៀបរក្សាសម្រស់ ដើម្បីរក្សាបានភាពស្រស់ស្អាតរបស់នារីនាវ័យជំទង់ ។

ប៉ុន្តែមួយរយៈក្រោយនេះ តើហេតុអ្វីក្រុមហ៊ុននេះ បែរជាសម្រេចចិត្តថតជាខ្សែររឿងភាគ ដែលនិយាយពីក្មេងជំទង់ទៅវិញ? តើ Ponds កំពុងតែដើរខុសគោលដៅមែនដែរឬទេ?

ដើម្បីឆ្លើយទៅនឹងសំនួរ ដែលខ្ញុំបានចោទខាងលើនេះ ជាដំបូងយើងត្រូវមើលថាតើក្រុមហ៊ុន Ponds កំពុងប្រម៉ូតផលិតផលដដែល ឬផលិតផលថ្មី? ព្រោះទោះបីជាមានម៉ាកសញ្ញាដូចគ្នា ប៉ុន្តែផលិតផលទាំងនោះ អាចមានអតិថិជនគោលដៅខុសគ្នា។

ក្រឡេកមករឿងភាគ High School Love យើងម្តងទៀត យើងអាចសង្កេតឃើញថាកម្មវិធីនេះគឺត្រូវបានបង្កើតឡើងដើម្បីប្រម៉ូតផលិតផលថ្មីនៃ Pond’s ដែលជា Pond’s Acne Clear ។ Pond’s Acne Clear គឺជាផលិតផលរូបមន្តថ្មី ប្រើប្រាស់សម្រាប់កំចាត់មុន។ ខ្ញុំគិតថា Pond’s មានភាពវៃឆ្លាតក្នុងការចាប់យកអតិថិជនគោលដៅ សម្រាប់ផលិតផលថ្មីរបស់ខ្លួន ព្រោះក្មេងស្រីវ័យពី១៣ឡើងដល់១៧ឆ្នាំ គឺត្រូវប្រឈមនឹងបញ្ហាមុខមុនខ្លាំងជាងវ័យផ្សេងៗទៀត ហើយពួកគេតែងតែចង់បានថ្មាំព្យាបាលណា ដែលមានតម្លៃធូរថ្លៃ និងមិនមានភាពស្មុគស្មាញ (over-the-counter medications )!

ដូច្នេះលើកនេះ Ponds កំពុងប្រើយុទ្ធសាស្ត្រត្រឹមត្រូវណាស់ ជាមួយនឹងផែនការថតជាខ្សែររឿងភាគយុវវ័យ ដើម្បីបញ្រ្ជៀបការយល់ដឹងអំពីផលិតផលថ្មីរបស់ខ្លួនដោយប្រយោល ហើយជាពិសេសនោះគឺ បង្កើតបានជាអារម្មណ៍ស្និទ្ធស្នាលរវាងក្មេងស្រីជំទង់និងផលិតផល ដោយសារការសម្តែងក្នុងខ្សែររឿងបានបង្ហាញដូចទៅនឹងអារម្មណ៍ពិតរបស់ពួកគេ ដូចជាក្តីទុក្ខសោក កង្វល់ អារម្មណ៍តូចចិត្តដែលកើតចេញពីបញ្ហាមុខមុនជាដើម។

ពាណិជ្ជកម្ម

មូលហេតុដែលអ្នកនៅតែត្រូវការនាមប័ណ្ណ

By

Sreylen Vong

-

0

នាមប័ណ្ណអាចមើលទៅជារឿងដែលហួសសម័យ។ ប៉ុន្តែការយកនាមប័ណ្ណទៅតាមខ្លួននៅតែសំខាន់ពីព្រោះវាផ្តល់ភាពងាយស្រួលក្នុងការទំនាក់ទំនងជាមួយនឹងអ្នកដទៃ និងមានភាពផ្ទាល់ខ្លួនជាង បើយើងប្រៀបធៀបទៅនឹងការប្រើប្រាស់ការទំនាក់ទំនងតាមប្រព័ន្ធឌីជីថល។ ដូច្នេះហើយ គេមិនអាចបញ្ឈប់ការប្រើប្រាស់នាមប័ណ្ណនាពេលខ្លីខាងមុខនោះទេហើយអ្នកជំនួញតែងតែត្រូវការវាជាចំាបាច់។

នាមប័ណ្ណធ្វើឲ្យគេងាយនឹងចងចាំអ្នក

នៅពេលដែលអ្នកជួបនរណាម្នាក់នៅក្នុងកម្មវិធីឬការប្រជុំគួរតែផ្លាស់ប្តូរនាមប័ណ្ណរបស់អ្នក ព្រោះវាអាចជួយឲ្យគេងាយនឹងចងចាំមុខមាត់របស់អ្នកទៅនឹងឈ្មោះរបស់អ្នក។ ម៉្យាងទៀតនៅពេលដែលអ្នកឲ្យនាមប័ណ្ណទៅគេនោះមានន័យថាអ្នកផ្តល់នូវមូលហេតុមួយសម្រាប់ឲ្យគេទាក់ទងមកអ្នក។ វីធីនេះពួកគេអាចខលទូរស័ព្ទ អ៊ីម៉ែលមកអ្នកវិញ ឬយ៉ាងហោចណាស់ក៏អាចធ្វើជាមិត្តនៅក្នុងLinkedInដែរ។

នាមប័ណ្ណធ្វើឲ្យអ្នកមើលទៅមានជំនាញជាងមុន

មាននាមប័ណ្ណធ្វើឲ្យអ្នកមើលទៅមានជំនាញជាងការសរសេរព័ត៌មានរបស់អ្នកនៅក្នុងក្រដាសធម្មតាពីព្រោះវាបង្ហាញថាអ្នកបានចំណាយពេលវេលាក្នុងការបោះពុម្ពប័ណ្ណដែលមានព័ត៌មានរបស់អ្នកនៅក្នុងនោះ។ ជាងនេះទៅទៀត សាកគិតថាបើនៅក្នុងកម្មវិធីណាមួយដែលមនុស្សទាំងអស់គេមាននាមប័ណ្ណនិងធ្វើការផ្លាស់ប្តូរនាមប័ណ្ណរបស់គេហើយអ្នកបែរជាគ្មានទៅវិញ។ វាអាចធ្វើឲ្យអ្នកដាច់ឆ្ងាយពីអ្នកដទៃនិងមិនស្គាល់គេ។

នាមប័ណ្ណជាវិធីដ៏ល្អក្នុងការបង្ហាញនូវភាពជាខ្លួនឯង

អ្នកអាចជាសហគ្រិនឬជាបុគ្គលិកគេ ប៉ុន្តែវាមិនមែនជាបញ្ហានោះទេ។ អ្នកនៅតែអាចមានភាពជាខ្លួនឯងនិងបង្ហាញពីខ្លួនឯងនៅក្នុងនាមប័ណ្ណរបស់អ្នក។ មួយវិញទៀត បើសិនជាអ្នកចង់ឲ្យនាមប័ណ្ណរបស់ខ្លួនមានភាពខុសប្លែកពីគេនិងមិនគួរឲ្យធុញទ្រាន់ អ្នកអាចប្រើប្រាស់នាមប័ណ្ណដែលមានម៉ូដផ្សេងៗដោយអ្នកអាចសាកសួរពីកន្លែងដែលទទួលធ្វើនាមប័ណ្ណនានា។

នាមប័ណ្ណធ្វើឲ្យមានភាពងាយស្រួលជាងនិងលឿនជាងនៅក្នុងការផ្លាស់ប្តូរព័ត៌មាន

ឧបករណ៍ឌីជីថលនិងទូរស័ព្ទទំនើបអាចនឹងមាននៅគ្រប់ទីកន្លែង ប៉ុន្តែពួកវានៅតែមិនអាចធ្វើការផ្លាស់ប្តូរព័ត៌មានលឿនជាងមុននោះទេ។ គ្រប់ឧបករណ៍ទាំងអស់មិនមែនសុទ្ធតែអាចដំណើរការជាមួយគ្នាបានស្រួលឡើយ។ នេះជាមូលហេតុដែលធ្វើឲ្យការផ្លាស់ប្តូរព័ត៌មានតាមរយៈឌីជីថលមានការពិបាក។ ម៉្យាងវិញទៀត មនុស្សមួយចំនួននៅតែមិនចូលចិត្តប្រើប្រាស់ទូរស័ព្ទទំនើបឬបើគេប្រើប្រាស់ គេអាចនឹងមិនដឹងពីរបៀបផ្លាស់ប្តូរព័ត៌មានបែបឌីជីថលតាមរយៈទូរស័ព្ទដៃទំនើបដែរ ដូចនេះការយកនាមប័ណ្ណតាមខ្លួនអាចជាជំនួយដ៏ល្អក្នុងស្ថានភាពបែបនេះ។

ប្រភព៖www.entrepreneur.com

ពាណិជ្ជកម្ម

យុទ្ធសាស្ត្រទីផ្សារបណ្តាញសង្គមរបស់សម្បត្តិហ្វាយនែនមានអ្វីដែលប្លែកពីគេ?

By

ហាក់ គីមថុង

-

0

បច្ចុប្បន្ននេះ បណ្តាញសង្គម ជាពិសេសFacebook គឺជាច្រកផ្សព្វផ្សាយដ៏មានប្រសិទ្ធិភាពដែលក្រុមហ៊ុន និងអាជីវកម្មជាច្រើនបានចាប់ឱកាសនេះដើម្បីប្រកួតប្រជែងដើម្បីស្វែងរកអតិថិជន និងពង្រីកកិត្តិនាមក្រុមហ៊ុន។ ប៉ុន្តែ ទោះជាក្រុមហ៊ុន និងអាជីវកម្មនីមួយៗបានប្រើប្រាស់Facebook ដូចគ្នា ប៉ុន្តែយុទ្ធសាស្ត្រ និងវិធីប្រើប្រាស់មានកម្រិត និងសមត្ថភាពខុសៗគ្នាផងដែរ។

នៅក្នុងវិស័យមីក្រូហិរញ្ញវត្ថុវិញក៏មិនខុសពីវិស័យផ្សេងៗ យើងឃើញថា ស្ទើរតែគ្រប់ស្ថាប័នកំពុងតែមានវត្តមាននៅលើបណ្តាញសង្គម និងប្រើប្រាស់ច្រកផ្សព្វផ្សាយមួយនេះជាទីតាំងមួយដើម្បីពង្រីកទីផ្សារ និងផ្សព្វផ្សាយផលិតផល។

ក្នុងចំណោមស្ថាប័នមីក្រូហរិញ្ញវត្ថុ ខ្ញុំសង្កេតឃើញថា សម្បត្តិហ្វាយនែនគឺជាស្ថាប័នដែលមើលទៅមានភាពលេចធ្លោជាងគេនៅលើបណ្តាញFacebook។ ហេតុអ្វី? ជំនួសឱ្យការបង្ហោះតែពាក្យស្លោកជម្រុញទឹកចិត្ត និងភាពជាអ្នកដឹកនាំ ឬបង្ហោះតែសេវាកម្ម និងផលិតផលរបស់ខ្លួនដែលជាវិធីគេតែងប្រើ សម្បត្តិហ្វាយនែនបានធ្វើរឿងមួយចំនួនទៀតដែលខុសពីគេ៖

ការរចនាមានស្តង់ដា៖ បើក្រឡេកមើលទៅការរចនាPost, Cover ឬរូបភាពផ្សេងៗ សម្បត្តិហ្វាយនែនមានស្តង់ដាររចនាជាក់លាក់ ដែលជាអត្តសញ្ញាណរបស់ខ្លួនបានល្អ។ មិនតែប៉ុណ្ណោះ គុណភាពនៃការរចនាមានភាពទាន់សម័យ និងមើលទៅស្អាត ហើយសាកសមជាស្ថាប័នរឹងមាំមួយ និងមានភាពច្នៃប្រឌិត។

មានភាពសកម្ម៖ ទំព័រFacebook របស់ស្ថាប័ននេះមានភាពសកម្ម និងដើរទាន់សម័យកាល និងរដូវកាលដែលមើលទៅពួកគាត់មានកាលវិភាគ និងយុទ្ធសាស្ត្រច្បាស់លាស់។

ដឹងពីទំហំរូបភាពសម្រាប់Facebook: មានស្ថានប័នមិនតិចទេដែលពេលខ្លះមិនបានចាប់អារម្មណ៍ និងទំហំរូបភាពCover ឬក៏Postដោយពួកគាត់រចនាឡើងដែលអាចមើលបានតែក្នុងកុំព្យូទ័រ ហើយនៅពេលដែលប្រើប្រាស់ទូរស័ព្ទដៃវិញ រូបភាពទាំងនោះក្លាយទៅជារូបភាពដែលមិនពេញរូបរាង ឬបាត់ព័ត៌មានមួយចំនួនដោយសារតែទំហំបង្ហាញខុសគ្នា រវាងកុំព្យូទ័រ និងទូរស័ព្ទដៃ។ តើអ្នកដឹងទេ? បច្ចុប្បន្ននេះអ្នកប្រើប្រាស់លើសពី៩០%ដែលគាត់បើកមើលFacebookតាមរយៈទូរស័ព្ទដៃ។ ដូចនេះ មុននឹងរចនា អ្នកត្រូវតែមានទិន្នន័យនេះនៅក្នុងចិត្តដើម្បីរចនា Cover និង Poster ឱ្យស៊ីទៅនឹងឥរិយាបថប្រើប្រាស់របស់អតិថិជន។ ក្រៅពីCover យើងឃើញថា សម្បត្តិហ្វាយនែនបានរចនារូបភាពPostមួយចំនួនជាលក្ខណៈបញ្ឈរ ហេតុអ្វី? ព្រោះថានៅពេលដែលអ្នកប្រើប្រាស់ទូរស័ព្ទដៃ អ្នកនឹងឃើញរូបភាពនេះធំពេញអេក្រង់ដែលជាយុទ្ធសាស្ត្រមួយបង្កើនការចាប់អារម្មណ៍របស់អ្នកប្រើប្រាស់ផងដែរ។

បង្កើតFrame រូបProfileតាមរដូវកាល៖ ថ្មីៗនេះយើងឃើញថាការបង្កើតFrameសម្រាប់រូបភាពProfileគឺមានការពេញនិយមជាខ្លាំង។ សម្រាប់សម្បតិ្តហ្វាយនែនវិញ គឺស្ថាប័ននេះបានដើរមុនគេបន្តិចដោយបង្កើតFrameតាមរដូវកាល តាំងពីពីធីភ្ជុំបិណ្ឌមកម្ល៉េះ ដែលមានមនុស្សជាច្រើនបានប្រើប្រាស់Frameនេះដើម្បីអបអរសាទរពីធីបុណ្យសាសនាមួយនេះ។ ថ្មីៗនេះ ស្ថាប័នក៏បានបង្កើតFrame សម្រាប់រំឮកថ្ងៃចូលទីវង្គតរបស់សម្តេចតា ហើយក៏បានត្រៀមFrameរូចជាស្រេចសម្រាប់ពីធីបុណ្យអ៊ុំទូកនាពេលខាងមុខ ដែលសឱ្យឃើញថា ស្ថាប័នមួយនេះចាប់បានទំនោរសង្គមក្នុងការប្រើប្រាស់Frame និងបង្កើតFrame ឱ្យចំនឹងរដូវកាលដើម្បីជម្រុញការប្រើប្រាស់Frameទាំងនោះឱ្យបានច្រើន ដែលជាលទ្ធផល យុទ្ធសាស្ត្រមួយនេះនឹងធ្វើឱ្យមនុស្សកាន់តែច្រើនស្គាល់ ឬបានឃើញពីម៉ាកសញ្ញារបស់ខ្លួន។ ទោះបីជាប៉ុន្មានថ្ងៃនេះមានការបង្កើតFrame ពីស្ថាប័នជាច្រើនក៏ដោយ អ្វីដែលសម្បតិ្តហ្វាយនែននៅល្អជាងគេនោះគឺគុណភាព និងកម្រិតស្តង់ដានៃការចនា ដែលមើលទៅមានភាពទាក់ទាញជាងគេ។

ការបង្កើត និងផ្សព្វផ្សាយមាតិការចម្រុះ៖ មាតិការមានភាពចម្រុះ ដែលមិនមែនផ្តោតតែលើសេវាកម្ម ឬផលិតផល ឬពាក្យស្លោកជម្រុញទឹកចិត្ត ដែលស្ថាប័នមួយចំនួនបានប្រើប្រាស់។ សម្បត្តិហ្វាយនែន បានបង្កើតបែបចម្រុះ ពេលខ្លះបង្ហោះមាតិការដែលមានប្រយោជន៍ទូទៅ ពេលខ្លះបង្កើតជាCampaign ល្អៗសម្រាប់ទាក់ទាញអន្តរកម្ម និងការចែករំលែករបស់អ្នកប្រើប្រាស់ ហើយអ្វីដែលសំខាន់នោះ ស្ថាប័ននេះមិនភ្លេច និងបង្កប់អត្តសញ្ញាណ និងផលិតផលរបស់ខ្លួននោះទេ ដែលធ្វើឱ្យអ្នកប្រើប្រាស់ងាយស្រួលយល់ និងដឹងថា សម្បត្តិហ្វាយនែនគឺជាស្ថាប័នហិរញ្ញវត្ថុ។

សង្ឃឹមថា អត្ថបទមួយនេះអាចជាបច្ច័យមួយសម្រាប់ម្ចាស់អាជីវកម្ម អ្នកទីផ្សារអាចយកទៅស្វ័យសិក្សាពីយុទ្ធសាស្ត្រទីផ្សារនៅលើបណ្តាញសង្គមរបស់ខ្លួន ហើយធ្វើយ៉ាងណាជាអ្នកដែលដើរមុនគេ ធ្វើអ្វីដែលប្លែកជាងគេ ដើរតាមស័យកាលនិងអ្នកប្រើប្រាស់ តែក៏មិនត្រូវភ្លេចពីគុណតម្លៃអាជីវកម្ម និងសេវាកម្មរបស់ខ្លួនដែរ។ ការធ្វើទីផ្សារលើបណ្តាញសង្គមគឺជាសិល្បៈ យុទ្ធសាស្ត្រ និងវិទ្យាសាស្ត្រ ដែលទាមទារឱ្យយើងមានភាពបត់បែន មានភាពច្នៃប្រឌិត ដែលមិនមែនគ្រាន់តែធ្វើតាមគេនោះទេ។ ព្រោះថា គុណតម្លៃអាជីវកម្ម ផលិតផល សេវាកម្ម និងអតិថិជនគោលដៅខុសៗគ្នា ដែលទាមទារឱ្យយើងសិក្សាស៊ីជម្រៅសម្រាប់ទាក់ទាញបេះដូងអតិថិជន និងធ្វើជាអ្នកនាំមុខគេក្នុងវិស័យរបស់ខ្លួន។

ពាណិជ្ជកម្ម

អ្នកទីផ្សារឌីជីថល(Digital Marketer)ត្រូវចេះជំនាញចម្រុះ!

By

Suos Sovanna

-

0

តើអ្នកដឹងទេថា ទំនួលខុសត្រូវរបស់អ្នកទីផ្សារឌីជីថល ឬDigital Marketer គឺជាអ្វី? បេសកកម្មចម្បង របស់អ្នកទីផ្សារឌីជីថល គឺកសាងកេរ្តិ៍ឈ្មោះឲ្យក្រុមហ៊ុនក្រុមហ៊ុន ឬម៉ាកសញ្ញា។ ហើយពួកគេ ត្រូវផ្តល់លទ្ធផល នៃការស្រាវជ្រាវ និងទិន្នន័យពាក់ព័ន្ធ របស់អតិថិជនទៅកាន់ក្រុមរបស់ខ្លួន ក្រុមបុគ្គលិកលក់ និងថ្នាក់គ្រប់គ្រង នៅក្នុងស្ថាប័ន ដែលគេបំរើការផងដែរ។ មិនតែប៉ុណ្ណោះ ពួកគេមានតួនាទី ដូចទៅនឹងក្រុមបុគ្គលិកលក់ដែរ គឺជំរុញអតិថិជនអោយទិញ។

ក្នុងពេលបច្ចុប្បន្ន ការងារនេះមានភាពលំបាក កាន់តែខ្លាំងទៅៗ ពីមួយឆ្នាំទៅមួយឆ្នាំ ដោយសារតែ ច្រកផ្សព្វផ្សាយ នៅតាមប្រព័ន្ធឌីជីថល មិនមែនមានតែមួយ ហើយក្រុមហ៊ុន ដែលគ្រប់គ្រងប្រព័ន្ធទាំងនោះ តែងតែបន្តអភិវឌ្ឍន៍ប្រព័ន្ធដំណើរបស់ពួកគេ ឥតឈប់ឈរ ដើម្បីឲ្យវាដើរទាន់សម័យកាល ដោយប្រើប្រាស់បច្ចេកវិទ្យាចុចក្រោយ និងដើម្បីរក្សាបាននូវភាពជឿនលឿន និងចំណាប់អារម្មណ៍សម្រាប់អ្នកប្រើប្រាស់។ ដូច្នេះអ្នកទីផ្សារឌីជីថល ត្រូវតែងបង្វឹកសមត្ថភាព របស់ខ្លួនជានិច្ច បើមិនដូច្នេះទេ គេមិនអាចឈរជើង នៅក្នុងវិស័យ ដែលតែងតែលូតលាស់ និងមានបម្លាស់ប្តូរនេះទេ! ក្រៅពីនេះអ្នកទីផ្សារ ត្រូវមានជំនាញចម្រុះ ដូចខាងក្រោម៖

១.អ្នកទីផ្សារឌីជីថលត្រូវចេះជំនាញសរសេរ និងសរសេរដោយប្រើភាពច្នៃប្រឌិត

សមត្ថភាពក្នុងការសរសេរ គឺជាចំណុចយ៉ាងសំខាន់ណាស់ នៅក្នុងការងារជាអ្នកទីផ្សារ ព្រោះការងាររបស់អ្នក សឹងតែងគ្រប់ជ្រុង សុទ្ធតែពាក់ពន្ធទៅនឹងការសរសេរនេះឯង។ ឧទាហរណ៍ អ្នកត្រូវបង្កើតមាតិកាម៉ាឃីតធីង (content marketing) ដើម្បីផ្តល់ពត៌មាន ដែលមានប្រយោជន៍ សម្រាប់អតិថិជនគោលដៅ ដើម្បីកសាងទំនុកចិត្ត របស់ពួកគេមកលើក្រុមហ៊ុនអ្នក។ ចំណែកនៅលើប្រព័ន្ធផ្សព្វផ្សាយសង្គម (social media messaging) អ្នកត្រូវបង្កើតសារ ដែលខ្លីនិងងាយយល់ ដើម្បីទាញការចាប់អារម្មណ៍ របស់អតិថិជនគោលដៅ។ នៅក្នុងកិច្ចការ ទាំងពីរខាងលើនេះ ជោគជ័យគឺអាស្រ័យនៅលើ កម្រិតនៃការសរសេររបស់អ្នក។ ប្រសិនបើអ្នក អាចសរសេរបានល្អ និងមានគុណភាព អ្នកអានប្រាកដជា ចាប់ផ្តើមកត់សម្គាល់ ពីវត្តមានរបស់អ្នក នៅក្នុងទីផ្សារ ឬវិស័យដែលអ្នកបំរើសេវាកម្ម ឬផ្គត់ផ្គង់ផលិតផល។

២.ចេះប្រើប្រាស់ Facebook & Instagram

ការងាររបស់អ្នកទីផ្សារឌីជីថល គឺមិននៅឆ្ងាយពីបណ្តាញសង្គម ទាំងពីរនេះឡើយ ព្រោះវាជាបណ្តាញសង្គម ដែលពេញនិយមបំផុត នៅក្នុងប្រទេសខ្មែរយើង! នៅឆ្នាំ២០១៧នេះ ចំនួនអ្ន្កប្រើប្រាស់ នៅក្នុងប្រទេសកម្ពុជា មានចំនួនប្រមាណ៖

Facebook មានប្រមាណ ៦លាននាក់ (ប្រភពក្រុមហ៊ុន Facebook)

Instagram មានប្រមាណ ៣លាននាក់ (ប្រភពក្រុមហ៊ុន Facebook)

៣.ត្រូវចេះឌីហ្សាញ ថតរូប ថតវីដេអូ និងកាត់តរូបភាព

ធម្មតាការងារជាមួយបណ្តាញសង្គម អ្នកតែងតែត្រូវដាក់ រូបថតស្អាតៗចូលទៅ បង្ហោះនៅក្នុងផេក។ អ្នកអាចយក រូបភាពទូទៅ បានយ៉ាងងាយពីក្នុងហ្គូហ្គល។ ប៉ុន្តែអ្នកក៏ត្រូវតែ បង្កើតរូបភាព ដែលជារបស់ខ្លួនឯងដែរ ដូចជារូបភាពនៃផលិតផល និងសេវាកម្មរបស់អ្នក។ ហើយនៅពេលមានរូបភាពស្អាត ហើយអ្នកត្រូវតែចេះឌីហ្សាញ បន្តិចបន្តួចបន្ថែមទៀត ទៅលើរូបភាពទាំងនោះ ដើម្បីឲ្យវាមានលក្ខណៈ ស្របជាមួយម៉ាកសញ្ញា របស់អ្នក ដែលគេតែស្គាល់ថាជាការធ្វើ Branding នោះឯង។ រួមផ្សំជាមួយរូបភាព អ្នកក៏ត្រូវតែបង្កើតវីដេអូខ្លីៗ ដែលបង្ហាញពីគុណតម្លៃ និងបង្កើនអារម្មណ៍ជាមួយអតិថិជនគោលដៅផងដែរ។

៤.អ្នកត្រូវចេះវិភាគទិន្នន័យ!

ចំណុចចុងក្រោយ ដែលខ្ញុំចង់លើកយកមកនិយាយ គឺជាការងារដែលឈឺក្បាលជាងគេ ដែលមនុស្សទូទៅប្រាថ្នាគេចចេញ។ អ្នកឌីជីថលម៉ាឃីតធីងជារឿយៗត្រូវធ្វើការសិក្សាទៅលើសិ្ថិតិ ដើម្បីមើលពីដំណើរការនៃគម្រោងផ្សព្វផ្សាយ។ វាជាកិច្ចការមួយដែលមិនអាចគេចចេញបានទេ ព្រោះវាជាផ្នែកមួយយ៉ាងសំខាន់់ នៅក្នុងការស្វែងយល់ពីលទ្ធផល (ប្រសិទ្ធភាពនិងកង្វះខាត) នៃផែនការដែលមានដាក់ចុះអនុវត្ត!

ពាណិជ្ជកម្ម

វិធីបង្កើតជំនឿចិត្តចំពោះព័ត៌មានផលិតផល(Product information)

By

Pisey So

-

0

Product information ជាព័ត៌មានដែលដាក់លើផលិតផលរបស់យើងដើម្បីណែនាំអតិថិជនអំពីផលិតផលរបស់យើង។ ប្រសិនបើអ្នកបង្កើតវាបានល្អ វាក៏អាចជួយទាក់ទាញចិត្តអតិថិជនបានផងដែរ។ គំនិតនឹងណែនាំអំពីវិធីសាស្រ្តបង្កើតជំនឿចិត្តបន្ថែមលើ Product information ដែលយើងបានបង្កើតវា៖

១. ផ្ទៀងផ្ទាត់ Production informationដែលអ្នកបង្កើតជាមួយនឹងProduction informationរបស់ផលិតផលដទៃដែលដូចគ្នាទៅនឹងផលិតផលរបស់យើង។ ប្រសិនបើ Production informationរបស់យើងមានលក្ខណៈល្អប្រសើរជាងមានន័យថាយើងមានឱកាសអាចផ្តួលគូប្រកួតប្រជែងបានហើយ។

២. ចូលរួមក្នុងកម្មវិធីដែលគេដាក់តាំងលក់ផលិតផលដើម្បីមើលពីការសរសេរព័ត៌មាននៃផលិតផលរបស់គេ។

៣. ស្ទង់មតិរបស់អតិថិជនគោលដៅថាតើពួកគេអាន Production information ហើយពួកគេមានចំណាប់អារម្មណ៍ទៅនឹងផលិតផលយើងដែរឬទេ? ឬក៏ពួកគេចង់បានអ្វីបន្ថែមទៀត?

បើសិនជាអ្នកនៅតែមិនមានទំនុកចិត្ត អ្នកអាចជួបពីភាក្សាជាមួយអ្នកឯកទេសខាងវិស័យឧស្សាហកម្មឬពឹងអ្នកដេលពូកែតែងនិពន្ធឲ្យជួយបន្ថែម។

ពាណិជ្ជកម្ម

គន្លឹះទាំង៥ដែលអាចជួយអាជីវកម្មឲ្យរួចផុតពីវិបត្តិ

By

ហេង មុយលី

-

0

អាជីវកម្មកាលណាតែវាជួបវិបត្តិគឺពិតជាពិបាកដោះស្រាយណាស់។ តើអ្នកប្រឈមមុខជាមូយនឹងវិបត្តិបានយ៉ាងដូចម្តេច? កុំបារម្ភអី ទាំងអស់នេះជាយុទ្ធសាស្រ្ត៥យ៉ាងដែលអាចជួយអ្នកនិងអាជីវកម្មរបស់អ្នកឆ្លងផុតការលំបាកបាន។

១. អ្នកមិនអាចដោះស្រាយវិបត្តិបានទេដរាបណាអ្នកមិនទទួលស្គាល់ថាអាជីវកម្មអ្នកពិតជាមានបញ្ហាកើតឡើង។ ផ្តោតទៅលើបញ្ហានាពេលបច្ចុប្បន្នដោយមិនយកការជោគជ័យនាពេលអតីតកាលមកប្រៀបធៀបឬដោះស្រាយឡើយ។ ចូរចងចាំថាការបដិសេធចំពោះវិបត្តិមិនមែនជាដំណោះស្រាយនោះទេ។ មួយវិញទៀតគំនិតដែលគិតថាគ្មានដំណោះស្រាយគឺមិនបានធ្វើឲ្យបញ្ហារលាយអស់នៅឡើយ លុះត្រាតែអ្នកមានសកម្មភាពដើម្បីដោះស្រាយវា។

២. បញ្ឈប់បុគ្គលិកណាដែលមិនបានផ្តល់ផលប្រយោជន៍ដល់ក្រុមហ៊ុនបើមិនដូច្នោះទេពួកគេនឹងក្លាយទៅជាបំណុលរបស់ក្រុមហ៊ុនជាពិសេសទៅលើប្រាក់ខែបុគ្គលិក។ ដូចនេះបើអ្នកកំពុងស្ថិតក្នុងវិបត្តិ អ្នកគួរតែកាត់បន្ថយចំនួនបុគ្គលិកដើម្បីកាត់បន្ថយការចំណាយ។ ម្យ៉ាងវិញទៀត ការកាត់បន្ថយបុគ្គលិកមិនមែនសម្ដៅទៅលើបញ្ហាប្រាក់កាសតែមួយមុខនោះទេ ប៉ុន្តែវាក៏សម្ដៅដល់ប្រសិទ្ធភាពនៃការបំពេញការងារផងដែរ។

៣. នៅពេលក្រុមហ៊ុនអ្នកជួបវិបត្តិ អ្នកគួរបោះបង់គម្រោងណាដែលមិនផ្តល់ប្រាក់ចំណេញ មិនទទួលបានប្រាក់ចំណេញច្រើននិងគម្រោងដែលត្រូវការទុនច្រើន។ សូម្បីតែក្រុមហ៊ុនធំៗក៏ប្រើវិធីនេះដើម្បីឈានទៅដល់គោលដៅដែរ។ ចូរចងចាំថាការបន្តការរង់ចាំតែងតែត្រូវការចំណាយ។

៤. បន្ទាប់ពីកាត់បន្ថយចំនួនបុគ្គលិកនិងគម្រោងមិនបានការចោល វាជាពេលវេលាដែលអ្នកត្រូវប្រើអ្វីដែលនៅសល់ឲ្យមានប្រយោជន៍ដោយវិនិយោគធនធានទាំងអស់ទៅលើគម្រោងណាដែលអាចផ្តល់ជាប្រាក់ចំណេញត្រឡប់មកវិញ។ ចូរយកចិត្តទុកដាក់ទៅលើធនធានដែលនៅសល់ហើយប្រើមនុស្សដែលមានសមត្ថភាពនិងជំនាញឲ្យជួយដោះស្រាយ។

៥. វិបត្តិឬបញ្ហាផ្សេងៗជាឱកាសដ៏ល្អក្នុងការពង្រឹងជំនាញនិងបង្កើតដំណោះស្រាយថ្មីៗ។ អ្នកអាចរៀនពីបញ្ហាព្រោះថាបើអ្នកក្លាយជាសហគ្រិនដ៏ល្អ អាជីវកម្មអ្នកអាចមានឱកាសខ្ពស់ក្នុងការទទួលបានភាពជោគជ័យ។ ដំបូងអ្នកត្រូវរៀនពីរបៀបគ្រប់គ្រងខ្លួនឯង មានភាពសកម្មក្នុងការងារ ចេះបត់បែន និងសម្របខ្លួន។

ការប្រឈមមុខនឹងវិបត្តិមិនមែនជាភាពងាយស្រួលនោះទេ ប៉ុន្តែបើអ្នកដឹងពីដំណោះស្រាយ វិបត្តិទាំងនោះអាចក្លាយជាឱកាសក្នុងការពង្រឹងអាជីវកម្មអ្នកឲ្យឈានទៅមួយកម្រិតទៀត។

ពាណិជ្ជកម្ម

គន្លឹះទាំង១០យ៉ាងធ្វើឲ្យអាជីវកម្មកាន់តែរីកចម្រើនសម្រាប់ឆ្នាំ២០១៨

By

ហេង មុយលី

-

0

ឆ្នាំ២០១៧គឺបានរសាត់អស់ពេល៣/៤ទៅហើយ ហើយឆ្នាំ២០១៨ក៏កំពុងតែខិតជិតមកដល់។ សម្រាប់អាជីវកម្មដើម្បីឱ្យមានភាពរីកលូតលាស់ល្អ អ្នកត្រូវតែគិតទុកពីយុទ្ធសាស្ត្រឱ្យបានមុនឆ្នាំថ្មី ដើម្បីឱ្យអ្វីៗដំណើរការបានរលូននៅឆ្នាំថ្មីខាងមុខ។ ឆ្នាំ២០១៨គឺនឹងមានកម្រិតការប្រកួតប្រជែងកាន់តែខ្លាំងក្លា តើវាមានន័យយ៉ាងណាសម្រាប់អ្នក? អ្នកមានបំណងបង្កើនចំណូលនិងធ្វើឲ្យអាជីវកម្មកាន់តែជោគជ័យ។ ដូចនេះ ចូរធ្វើគោលដៅទាំងនោះឲ្យក្លាយជាការពិត។ ទាំងនេះជាជំហានសាមញ្ញៗទាំង១០ដែលអ្នកគួរធ្វើតាមមដើម្បីឲ្យអាជីវកម្មរបស់អ្នកកាន់តែរីកដុះដាលទៅមុខ៖

មានផែនការជាក់លាក់ទៅលើគោលដៅដែលអ្នកចង់បាននិងវិធីក្នុងការសម្រេចវា។ បើអ្នកមិនមានគ្រោងការជាក់លាក់ អ្នកនឹងអាចដើរផ្លូវខុស។ ហេតុនេះហើយ អ្នកត្រូវបង្កើតគម្រោងដែលសាមញ្ញៗនឹងអាចសម្រេចវាបាន។ វាជាការប្រសើរណាស់បើអ្នកមានដែគូសហការ។
ផ្តោតទៅលើលំហូរសាច់ប្រាក់ដោយមានការរៀបចំប្រព័ន្ធគ្រប់គ្រងប្រាក់ព្រោះវាអាចឲ្យអ្នកប្រាកដថាអតិថិជនទូទាត់ប្រាក់ទៀងទាត់។
អាជីវកម្មតូចៗខ្លះមិនមានទិន្នន័យគ្រប់គ្រងប្រចាំខែឡើយដោយពួកគេមិនបានដឹងពីចំនួនប្រាក់ចំណេនិងចំណាយដែលត្រូវបង់ពន្ធឡើយ។ ដូច្នេះអ្នកគួរប្រើទិន្នន័យគ្រប់គ្រងប្រាក់ប្រចាំខែដោយឲ្យគណនេយ្យករឬអ្នកប្រឹក្សាអាជីវកម្មធ្វើតួនាទីនេះ។
អាជីវកម្មខ្លះចង់បង្កើនអតិថិជន ប៉ុន្តែពួកគេមិនមានយុទ្ធសាស្រ្តទាក់ទាញអតិថិជនថ្មីឡើយ។ ដូចនេះអ្នកត្រូវស្គាល់ពីអ្វីដែលអតិថិជនត្រូវការនិងចង់បានឲ្យបានច្បាស់ដើម្បីបង្កើតយុទ្ធសាស្ត្រទាក់ទាញពួកគាត់ឬការប្រើវិធីចាស់ៗដែលធ្លាប់ទាក់ទាញអតិថិជនចាស់ពីមុន។
អ្នកគប្បីមានយុទ្ធសាស្រ្តក្នុងការបែងចែកឲ្យដាច់នូវផលិតផលនិងសេវាកម្ម។
ស្វែងយល់ឲ្យបានស៊ីជម្រៅពីចំណូលដែលបានមកពីការលក់ផលិតផលនិងសេវាកម្មទាំងអស់ ថាតើផលិតផលឬសេវាកម្មមួយណាដែលផ្តល់ប្រាក់ចំណេញច្រើនជាងគេហើយអ្នកអាចផ្តោតទៅលើការលក់នោះឲ្យបានច្រើន។
អ្នកគួរដឹងពីអតិថិជនណាដែលផ្តល់ផលចំណេញច្រើនជាងគេហើយយកចិត្តទុកដាក់ទៅលើពួកគេឲ្យបានខ្លាំងជាទីបំផុតព្រោះថាវាជាចំណុចដែលធ្វើឲ្យអាជីវកម្មអ្នកកើនប្រាក់ចំណូល។ ប៉ុន្តែវាមិនមែនមានន័យថាអ្នកមិនយកចិត្តទុកដាក់ចំពោះអតិថិជនផ្សេងនោះទេ។
អ្នកគួរពិចារណាឲ្យច្បាស់ជាមុនសិនសឹមសម្រេចចិត្តតម្លើងតម្លៃផលិតផលដោយផ្តល់ជូននូវតម្លៃមួយដ៏សមរម្យ។
មិនថាអ្នកធ្វើអាជីវកម្មតែម្នាក់ឯងឬមានបុគ្គលិក អ្នកគួររៀបចំអាជីវកម្មជាប្រព័ន្ធ។
បណ្តុះបណ្តាលមនុស្សនៅក្នុងក្រុមឲ្យយល់ដឹងព្រោះការងារក្រុមរលូននាំអាជីវកម្មទៅរកភាពជោគជ័យ។

ពាណិជ្ជកម្ម

៤យ៉ាងដែលអ្នកគួរដឹងពីវីដេអូម៉ាឃីតធីងសម័យថ្មី

By

bunneath Heng

-

0

តើអ្នកកំពុងតែប្រើប្រាស់វីដេអូក្នុងការធ្វើយុទ្ធសាស្រ្តទីផ្សាររបស់អ្នកមែនទេ? តើអ្នកកំពុងស្វែងរកគន្លឹះក្នុងការទាក់ទាញចំណាប់អារម្មណ៍របស់អតិថិជនរបស់អ្នកមែនទេ? ការផ្សព្វផ្សាយបច្ចុប្បន្នមានការវិវត្តយ៉ាងឆាប់រហ័សពីទម្រង់អក្សរទៅជាវីដេអូ។ ដូចនេះអ្នកគួរធ្វើយ៉ាងណាដើម្បីធ្វើឲ្យវីដេអូមានគុណភាពហើយត្រូវបានស្គាល់ដោយអតិជនរបស់អ្នក ។ អ្នកអាចបង្កើតវីដេអូបែបនិទានរឿងនិងអ្វីផ្សេងទៀតដែលអ្នកគិតថាអតិថិជនរបស់អ្នកងាយយល់។ វីដេអូម៉ាឃីតធីងសម័យថ្មីត្រូវបានគេប្រើប្រាស់ស្ទើរតែទូទាំងពិភពលោក។ ខាងក្រោមនេះគឺកិច្ចការដែលអ្នកគួរធ្វើដើម្បីបង្កើតការផ្សព្វផ្សាយវីដេអូម៉ាឃីតធីងសម័យថ្មី៖

គន្លឹះក្នុងការច្នៃប្រតិដ្ឋ (Creativity)

សព្វថ្ងៃការផ្សព្វផ្សាយមានការកើនឡើងជាងមុន ដូចនេះអ្នកទីផ្សារត្រូវយល់ពីសាររបស់គាត់ដែលបម្រុងនឹងផ្ញើទៅកាន់អតិធិជន។ ភាពច្នៃប្រតិដ្ឋសម្រាប់ការផ្សព្វផ្សាយគឺពិតជាចាំបាច់ណាស់ធ្វើយ៉ាងណាឲ្យមានភាពខុសប្លែកពីអ្នកដទៃ។ ការផ្សព្វផ្សាយបែបបុរាណធ្វើឲ្យអតិថិជនមានការធុញទ្រាន់នៅពេលដែលឃើញការផ្សព្វផ្សាយដដែលៗ។ ដូចនេះ អ្នកគួរតែរកវិធីសាស្ត្រណាដើម្បីផ្លាស់ប្តូរសាររបស់អ្នកដោយមានទាំងការច្នៃប្រតិដ្ឋនិងទាក់ទាញអតិថិជន។ ការប្រើប្រាស់វីដេអូម៉ាឃីតធីងសម័យថ្មីដែលមានភាពច្នៃប្រតិដ្ឋអាចធ្វើឲ្យមានគេស្គាល់កាន់តែច្រើន។

វីដេអូដែលងាយស្រួលយល់

ពីសម័យមុនមានការលំបាកនៅពេលដែលយើងមើលវីដេអូតាមទូរសព្ទ័ព្រោះវាគ្មានរូបភាពច្បាស់ដូចនឹងទូរទស្សន៍។ ប៉ុន្តែបច្ចុប្បន្នមានភាពខុសគ្នាព្រោះមនុស្សភាគច្រើនមានទូរស័ព្ទទំនើបដូចនេះគាត់អាចមើលវីដេអូតាមSmart phone របស់ពួកគាត់។ ដូចនេះអ្នកគួរតែបង្កើតវីដេអូណាដែលមានរូបភាពច្បាស់ហើយអ្នកក៏ត្រូវគិតពីរយៈពេលនៃវីដេអូផងដែរ។ វីដេអូគួរតែមានរយៈពេលត្រឹមតែ២ទៅ៣នាទីព្រោះថាចំណាប់អារម្មណ៍របស់អតិថិជនមានដែនកំណត់។ យើងត្រូវស្វែងរកគន្លឹះណារក្សាសាររបស់អ្នកឲ្យខ្លី មានអត្ថន័យ និងចំគោលដៅនៃការផ្សព្វផ្សាយរបស់អាជីវកម្មអ្នក។ ដូចនេះ អ្នកត្រូវធ្វើវីដេអូដែលមានបច្ចេកទេសខ្ពស់ក្នុងការនាំសារទៅកាន់អតិថិជនរបស់អ្នកផ្តោតឲ្យចំចំណុចសំខាន់ ងាយយល់ ងាយមើល និងទទួលយកបាន អ្នកនឹងទទួលបានជោគជ័យក្នុងធ្វើសារភ្ជាប់ជាមួយអតិថិជនរបស់អ្នក។ ឧទាហរណ៍វីដេអូដែលមានរូបភាពជាតុក្កតាវាពិតជាមានភាពទាក់ទាញអតិថិជនណាស់ ព្រោះវាធ្វើឲ្យអតិថិជនងាយស្រួលយល់អត្ថន័យ មានពណ៌ស្រស់ស្អាត មានដំណើររឿងគួរឲ្យចង់មើល និងគុណភាពច្បាស់ល្អ។

ទទួលបានភាគរយខ្ពស់ពីការបញ្ជាទិញរបស់អតិថិជន

សម្រាប់អ្នកដែលបានឃើញវីដេអូរបស់អ្នកនោះហើយប្រសិនបើវីដេអូរបស់អ្នកអាចទាក់ទាញចិត្តអ្នកមើលបាននោះគាត់នឹងរកមើលព័ត៌មានបន្ថែមទាក់ទងនឹងផលិតផលឬសេវាកម្មរបស់អាជីវកម្មអ្នក។ បន្ទាប់មកគាត់នឹងសាកល្បងសេវាកម្មឬផលិតផលរបស់អ្នក។ ក្នុងវីដេអូនោះអ្នកអាចបង្ហាញពីមូលហេតុដែលអតិថិជនគួរជ្រើសរើសយកអាជីវកម្មរបស់អ្នកនិងមិនរើសយកអ្នកឯទៀត។

ការទទួលបាន share ច្រើន

ការប្រើប្រាស់បណ្តាញសង្គមក្នុងការស្វែងរកអតិថិជនរបស់អ្នកគឺជាប្រការដែលអ្នកចាំបាច់ដឹង។ ស្រមៃថាបើអ្នកមានវីដេអូដ៏ល្អមួយដែលពោរពេញទៅដោយអត្ថន័យប៉ុន្តែបែរជាគ្មានអ្នកshareវីដេអូរបស់អ្នកសោះវាប្រៀបដូចនឹងវីដេអូរបស់អ្នកគ្មានតម្លៃអ្វីសោះ។ អ្នកគួរតែBoost វីដែអូអ្នកដើម្បីឲ្យវាអាចreach ទៅកាន់មនុស្សជាច្រើននិងទទួលបាន shareច្រើន។

ពាណិជ្ជកម្ម

គម្រោង៨យ៉ាងដែលជួយឲ្យអាជីវកម្មខ្នាតតូចអាចរកចំណូលបានក្នុងថ្ងៃឈប់សម្រាក

By

ហេង មុយលី

-

0

យើងដឹងហើយថារដូវកាលនៃការឈប់សម្រាកជាពេលវេលាដ៏មមាញឹកសម្រាប់អាជីវកម្មធុនតូចជាច្រើនដែលអាចបង្កជាសម្ពាធសម្រាប់ម្ចាស់អាជីវកម្ម។ ប៉ុន្តែយើងអាចប្រែក្លាយវាឲ្យទៅជាឱកាសរកចំនូលតាមវិធីទាំង៨យ៉ាងនេះ។

១. បង្កើតគម្រោងទុកជាមុនដើម្បីបង្ការកត្តាដែលកើតឡើងហួសពីការរំពឹងទុកដូចជាកត្តាអាកាសធាតុជាដើម។ មួយវិញទៀត អ្នកគួរធ្វើបញ្ជីទុកមុនពីចំនួនផលិតផលដែលអតិថិជនត្រូវការ រយៈពេលផុតកំណត់នៃការដឹកជញ្ជូន សេវាកម្មដឹកជញ្ជូន និងការមកជាវដល់កន្លែងដែលអាចជួយសន្សំប្រាក់និងពេលវេលារបស់អ្នក។

២. បង្កើតការថតចម្លងខិតបណ្ណ័ កាតសម្គាល់អាជីវកម្ម និងការផ្សាយពាណិជ្ជកម្មទុកជាមុនសម្រាប់ផ្សព្វផ្សាយមុនពេលថ្ងៃឈប់សម្រាកមកដល់។ អ្នកគួររៀបចំគម្រោងផ្សព្វផ្សាយតាមបណ្តាញសង្គមឬព័ត៌មានដាក់នៅលើគេហទំព័រទុកឲ្យហើយផងដែរ។

៣. មានគម្រោងចូលរួមក្នុងកម្មវិធីផ្សេងៗដែលអនុញ្ញាតឲ្យអ្នកអាចជួបអតិថិជនគោលដៅរបស់អ្នកដើម្បីឲ្យអ្នកមានឱកាសអាចផ្សព្វផ្សាយទៅកាន់ពួកគេមុនថ្ងសសម្រាកចូលមកដល់។

៤. តែងតែUpdateប្រតិទិនក្នុងការិយាល័យសម្រាប់បុគ្គលិកអ្នកចំពោះកាលវិភាគសំខាន់ៗមួយចំនួនដូចជារដូវកាលដែលមមាញឹកខ្លាំង ពិធីជប់លៀង វិស្សមកាល ថ្ងៃត្រូវបញ្ចូនទំនិញ និងថ្ងៃផុតកំណត់នៃការដឹកជញ្ជូនទំនិញ។

៥. បង្កើតទីផ្សារផ្ទាល់ខ្លួនដែលខុសពីដៃគូប្រកួតប្រជែងសម្រាប់គេហទំព័រឬប្រព័ន្ធអ៊ីនធឺណិតដទៃទៀតរបស់អ្នកដូចជាទំព័រនៃបណ្តាញសង្គមហ្វេសប៊ុកជាដើម។

៦. បង្កើតផ្ទាំងពីមុខហាងដែលទាក់ទាញភ្នែក មានពណ៌ចម្រុះ មានលក្ខណៈសាមញ្ញដែលជាវិធីក្នុងការទាក់ទាញអតិថិជនបានយ៉ាងប្រសើរព្រោះថាមាន៦៨%នៃអតិថិជនដែលជាវផលិតផលបណ្តាលមកពីរូបភាពដែលទាក់ទាញភ្នែករបស់ពួកគេ។

៧. ផ្តល់រង្វាន់សម្រាប់អតិថិជនដោយមិនត្រឹមតែជាពាក្យអរគុណ ប៉ុន្តែអាចជាប័ណ្ណបញ្ចុះតម្លៃជាដើមដើម្បីទាក់ទាញពួកគាត់ឲ្យមកម្តងទៀត។

៨. ធ្វើការទំនាក់ទំនងជាមួយអតិថិជនដើម្បីដឹងពីតម្រូវការដែលពួកគាត់ត្រូវការជាមុននោះអ្នកនឹងអាចធ្វើរៀបចំគោលដៅបានច្បាស់លាស់មួយ។

ពាណិជ្ជកម្ម

វិធីអស្ចារ្យ១០យ៉ាងក្នុងការបង្ហាញសេចក្តីថ្លែងអំណរគុណចំពោះនិយោជិក

By

ហេង មុយលី

-

0

មិនមែនបុគ្គលិកគ្រប់គ្នាសុទ្ធតែធ្វើការដើម្បីតែប្រាក់ខែទេតែជួនកាលមកពីគេស្រឡាញ់ការងារនោះទើបធ្វើឲ្យគេខិតខំធ្វើការយ៉ាងលំបាក។ ហេតុនេះការសរសើរពីការខិតខំប្រឹងប្រែងធ្វើការរបស់ពួកគេក៏ជាអ្វីដែលពួកគេចង់ឮពីនិយោជកដែរ។ ជាការពិតណាស់ វាមិនមែនជារឿងពិបាកឡើយដោយគ្រាន់តែនិយាយពាក្យអរគុណ ប៉ុន្តែនៅមានវិធីជាច្រើនទៀតក្នុងការបង្ហាញពីក្តីគោរពនិងគាំទ្រទៅកាន់និយោជិករបស់អ្នកជាជាងការនិយាយតែពាក្យថាអរគុណ៖

១. អនុញ្ញាតឲ្យបុគ្គលិកអ្នកទទួលរង្វាន់ឬកាដូនៅពេលបញ្ចប់ការងារដោយជោគជ័យ។ អ្នកអាចឲ្យពួកគេរើសរង្វាន់ដោយខ្លួនឯងព្រោះអ្នកខ្លះត្រូវការប្រាក់បន្ថែមដើម្បីប្រើប្រាស់ចាំបាច់ជាជាងកាដូក៏ថាបាន។

២. ឲ្យតម្លៃបុគ្គលិករបស់អ្នកដោយស្ដាប់ពីអ្វីដែលពួកគេព្យាយាមចែករំលែក។ ពួកគេបន្តចែករំលែកពីរឿងរបស់គេក៏ដូចជាគន្លឹះឬវិធីផ្សេងដែលពួកគេធ្លាប់ឆ្លងកាត់ជាមួយអ្នកនិងមិត្តរួមការងារដទៃទៀត។ នៅពេលអ្នកធ្វើបែបនេះគឺធ្វើឲ្យពួកគេមានអារម្មណ៍ថាអ្វីដែលគេផ្តល់ឲ្យមានតម្លៃនិងធ្វើឲ្យគេមានទំនុកចិត្តលើខ្លួនឯង។

៣. អនុញ្ញាតឲ្យនិយោជិកអ្នកសម្រេចចិត្តទៅលើបញ្ហានានា។ មិនត្រឹមតែពាក្យពេចន៍អរគុណនិងប្រាក់រង្វាន់លើកទឹកចិត្តទេដែលសំខាន់ ការបង្ហាញថាអ្នកមានជំនឿចិត្តទៅលើគំនិតនិងជំនាញរបស់ពូកគេគឺពិតជាមានតម្លៃជាងនិងអាចបណ្តាលឲ្យគេមានទំនុកចិត្តចំពោះខ្លួនឯងថែមទាំងមិនងាយបង្កើតកំហុសទៅទៀតព្រោះគេដឹងច្បាស់ថាគេមិនអាចបំផ្លាញទំនុកចិត្តរបស់អ្នក។

៤. ផ្តល់ការភ្ញាក់ផ្អើលបន្តិចបន្តួចឲ្យពួកគេរួមមានការប៉ាវបាយ កាត់បន្ថយម៉ោងធ្វើការជាដើម។

៥. ផ្តល់ការសរសើរច្បាស់លាស់ទៅឲ្យបុគ្គលិកអ្នកដោយនិយាយដូចជា អ្នកពេញចិត្តទៅនឹងការពិភាក្សានេះឬពួកគេជាដៃគូសហការដ៏ល្អជាដើម។ ទង្វើបែបនេះអាចបន្ថែមអត្ថន័យទៅលើការសរសើរនិងជម្រុញនិយោជិកអ្នកឲ្យរឹតតែមានការអភិវឌ្ឍន៍។

៦. ផ្តល់ម៉ោងសម្រាកបន្ថែមឲ្យពួកគេសម្រាប់ធ្វើអ្វីផ្សេងក្រៅពីការងារដូចជាពេលវេលាសម្រាប់គ្រួសារនិងខ្លួនឯង កម្មវិធីសប្បុរសធម៌ និងវិស្សមកាលរយៈពេលខ្លីជាដើម។

៧. ធ្វើឲ្យពួកគេមានអារម្មណ៍ថាពួកគេមានការពាក់ព័ន្ធទៅនឹងប្រតិបត្តិការរបស់ក្រុមហ៊ុនយ៉ាងពិតប្រាកដក្រុមហ៊ុន ដោយប្រាប់ពីរឿងរ៉ាវដែលកើតមានឡើងនៅក្នុងការងារ ទោះជាពេលខ្លះពួកគេមិនអាចជួយអ្វីបានក៏ដោយ។ ការធ្វើបែបនេះបង្ហាញថាពួកគេជាក្រុមតែមួយជានិច្ច។

៨. ការដាក់បង្អែមរួមមានស្ករគ្រាប់ ស្ករសូកូឡានៅក្នុងបន្ទប់សម្រាកក៏អាចជាសញ្ញាបង្ហាញពីពាក្យថាអរគុណទៅពួកគេដែរ។

៩. ជម្រុញមតិយោបល់របស់ពួកគេដោយការស្ទង់មតិជារឿយៗព្រោះវាធ្វើឲ្យពួកគេយល់ថាយោបល់ពួកគេមានអ្នកអើពើ និងដឹងឮ។

១០. បង្កើតបរិយាកាសសប្បាយរីករាយនៅក្នុងកន្លែងធ្វើការដូចជាពិធីជប់លៀងឬល្បែងកម្សាន្តនានា។

ពាណិជ្ជកម្ម

គន្លឹះខ្លីៗ៣យ៉ាងដើម្បីកាត់បន្ថយអារម្មណ៍តានតឹងសម្រាប់អ្នកធុរកិច្ច

By

Pisey So

-

0

ដោយសារតែធុរកិច្ចត្រូវធ្វើការ ២៤ម៉ោងក្នុងមួយថ្ងៃ ៧ថ្ងៃក្នុងមួយសប្តាហ៍ និង៣៦៥ថ្ងៃក្នុងមួយឆ្នាំ វាមិនចម្លែកទេដែលពួកគេមានអារម្មណ៍ស្រ្តេស ស្មុគស្មាញ ឬតានតឹងនោះ។ ចំពោះវិធីសាស្រ្តសម្រាប់លុបបំបាត់អារម្មណ៍ធុញទ្រាន់ដែលអ្នកធុរកិច្ចភាគច្រើនជួបប្រទះមានដូចជា

#ទី១៖ ប្រសិនបើអ្នកមានអារម្មណ៍ថាធុញទ្រាន់ដោយសារតែធ្វើការងារដដែលៗ នៅកន្លែងដដែលៗ ដែលមានទិដ្ឋភាពដដែលៗជារៀងរាល់ថ្ងៃ អ្នកត្រូវផ្លាស់ប្តូរទស្សនីយភាពនៃកន្លែងធ្វើការដោយផ្លាស់ប្តូរទីតាំងធ្វើការដែលនៅក្នុងការិយាល័យរបស់អ្នកផ្ទាល់ឬអ្នកអាចផ្លាស់ប្តូរហាងកាហ្វេដែលអ្នកឧស្សាហ៍ទៅ ព្រោះធ្វើបែបនេះមិនត្រឹមតែជួយឲ្យមានអារម្មណ៍ប្រសើរឡើងទេថែមទាំងទទួលបានគំនិតថ្មីៗទៀតផង។ម្យ៉ាងទៀតអ្នកត្រូវឆ្លៀតពេលទៅកន្លែងកម្សាន្តណាមួយដែលមានទេសភាពធម្មជាតិឬទីណាក៏បានដែលមានខ្យល់ឱកាសល្អអាចធ្វើឲ្យខួរក្បាលរបស់អ្នកស្រឡះនិងសម្រាកគិតពីការងារបានមួយរយៈ។

#ទី២៖ រកវិធីបង្ហាញអារម្មណ៍ឬបញ្ហាដែលបណ្តាលឲ្យអ្នកតានតឹងចេញមកខាងក្រៅដោយអ្នកអាចសរសេរបញ្ហាឬរឿងរ៉ាវផ្សេងៗដែលកើតមានឡើង។ មួយវិញទៀតអ្នកអាចពិគ្រោះឬពិភាក្សាជាមួយមនុស្សដែលអ្នកអាចទុកចិត្តបានឬតែងតែផ្តល់ដំបូន្មានល្អៗមកកាន់អ្នកដែលគេនោះអាចជាឪពុកម្តាយ បងប្អូន ដៃគូ មិត្តជិតស្និទ្ធ ឬជាអ្នកផ្តល់ប្រឹក្សាជាដើម។ យ៉ាងណាមិញអ្នកគួរចៀសវាងការផុសបញ្ហាឬអារម្មណ៍តានតឹងរបស់អ្នកនៅលើបណ្តាញសង្គម។

#ទី៣៖ អ្នកគួរបញ្ឈប់ការគិតគូពីអនាគតឬកំហុសពីអតីតកាលហួសហេតុពេកឬសួរសំណួរខ្លួនឯងដដែលៗថា “ចុះបើសិនជា?” ជាច្រើនដង។ អ្នកមិនគួរគិតពីបញ្ហាអ្វីមួយឲ្យស៊ីជម្រៅឬជ្រុលពេកនោះទេព្រោះថាជួនកាលបញ្ហានោះស្រាលសោះក៏អាចនាំឲ្យអ្នកគិតដល់ថ្នាក់វាធ្ងន់ធ្ងររកផ្លូវដោះស្រាយមិនចេញដែរ។ ជាពិសេសកុំប្រើអារម្មណ៍មកដោះស្រាយជាមួយនឹងបញ្ហាឲ្យសោះ។ អ្នកត្រូវជឿជាក់លើខ្លួនឯងនិងប្រើប្រាស់ខួរក្បាលឲ្យមករស់នៅក្នុងបច្ចុប្បន្នសិនសឹមគិតសាឡើងវិញពីដំណោះស្រាយ។

ពាណិជ្ជកម្ម

៤និន្នាការនៃប្រព័ន្ធផ្សព្វផ្សាយសង្គមដែលអ្នកត្រូវដឹងសម្រាប់ឆ្នាំ២០១៨

By

Sreylen Vong

-

0

ចុងបញ្ចប់នៃឆ្នាំកំពុងតែខិតជិតមកដល់យ៉ាងឆាប់រហ័ស។ នៅសល់តែប៉ុន្មានខែទៀតប៉ុណ្ណោះគឺឆ្នាំ២០១៨ហើយ។ ប្រព័ន្ធផ្សព្វផ្សាយសង្គមផ្តល់ឱកាសក្នុងការទាក់ទាញនូវចំណាប់អារម្មណ៍ដ៏មិនគួរឲ្យជឿចំពោះម៉ាកសញ្ញានៃផលិតផលរបស់អ្នក។ តើអ្នកនឹងទទួលយកអត្ថប្រយោជន៍នេះ ឬក៏ឲ្យដៃគូអាជីវកម្មរបស់អ្នកជាអ្នកទទួលយកនូវអត្ថប្រយោជន៍នេះ?

ស្ថានភាពមានការផ្លាស់ប្តូរជានិច្ចហើយវាដល់ពេលហើយដើម្បីចាប់ផ្តើមយុទ្ធសាស្រ្តទីផ្សារនៃប្រព័ន្ធផ្សព្វផ្សាយសង្គមរបស់អ្នកសម្រាប់ឆ្នាំខាងមុខនេះ។ ដើម្បីឈានទៅកាន់ភាពជោគជ័យ អ្នកត្រូវតែដឹងអំពីនិន្នាការចុងក្រោយបំផុត។ ការយល់ដឹងអំពីការប្រើប្រាស់ប្រព័ន្ធផ្សព្វផ្សាយសង្គមនឹងធ្វើឱ្យអ្នកស្ថិតក្នុងស្ថានភាពល្អប្រសើរជាងមុនក្នុងការបង្កើនដើមទុននៅពេលឈានដល់ឆ្នាំ ២០១៨។ ទាំងនេះគឺជានិន្នាការនៃប្រព័ន្ធផ្សព្វផ្សាយសង្គម៤ដែលអ្នកគួរតែចាប់ផ្តើមធ្វើការផ្តោតទៅលើឲ្យបានឆាប់រហ័ស៖

#១ ការមកដល់របស់ Chatbots ដែលអ្នកត្រូវតែមានជំនាញក្នុងការប្រើប្រាស់

Chatbotsគឺជាកម្មវិធីរបស់កុំព្យូទ័រដែលគេបង្កើតឡើងសម្រាប់ធ្វើការសន្ទនាជាមួយនឹងអ្នកប្រើបា្រស់ជាពិសេសតាមរយៈប្រព័ន្ធអ៊ីនធើណេត។ បើសិនជាអ្នកមិនស្គាល់ Chatbotsនោះទេ អ្នកត្រូវតែរៀនពីរបៀបដែលបច្ចេកវិទ្យានេះអាចផ្តល់អត្ថប្រយោជន៍ដ៏អស្ចារ្យដល់ទីផ្សារនៃប្រព័ន្ធផ្សព្វផ្សាយសង្គមរបស់អ្នក។ សេវាបម្រើអតិថិជនបានផ្លាស់ប្តូរពីការខលទូរស័ព្ទនិងអ៊ីម៉ែលទៅជាប្រើប្រាស់ប្រព័ន្ធផ្សព្វផ្សាយសង្គមជំនួសវិញ។ Chatbotsអាចជួយឲ្យអ្នកអាចឆ្លើយតបទៅកាន់អតិថិជនបានឆាប់រហ័សហើយអ្នកនឹងទទួលបានការពេញចិត្ត។ នេះជាមូលហេតុដែល Facebook Messenger bots ទទួលបានការពេញនិយមជាពិសេស។ ការដំឡើងវាគឺមានភាពសាមញ្ញណាស់ហើយអ្នកអាចធ្វើវាដោយមិនគិតថ្លៃ។

ប្រព័ន្ធផ្សព្វផ្សាយសង្គមគឺជាកន្លែងសម្រាប់ទំនាក់ទំនងដ៏មានប្រជាប្រិយភាពសម្រាប់អតិថិជន។ វាចាំបាច់ណាស់ចំពោះគ្រប់អាជីវកម្មទាំងអស់ក្នុងការប្រើប្រាស់សេវាកម្មនេះ។ ចំណុចទាក់ទាញបំផុតនៃការប្រើប្រាស់ Chatbots គឺសមត្ថភាពក្នុងការផ្តល់ការភ្ជាប់បន្ទាន់ភ្លាមៗទៅកាន់អតិថិជន។ “Chatbots គឺតែងតែនៅជាមួយអតិថិជនគ្រប់ពេលវេលា” សម្តីរបស់លោក James Memije ស្ថាបនិកនៃ AccuServ Heating & Air Conditioning។

#២ ប្រព័ន្ធផ្សព្វផ្សាយសង្គមត្រូវតែផ្តោតទៅលើទូរស័ព្ទចល័តភាគច្រើន

Snapchat និង Instagram គឺសុទ្ធតែជាប្រព័ន្ធផ្សព្វផ្សាយសង្គមដែលមានទម្រង់ផ្តោតទៅលើទូរស័ព្ទចល័តនិងនៅខណ:ដែល Instagram អាចភ្ជាប់ដំណើរការតាមរយៈកុំព្យូទ័រគឺមានអ្នកប្រើប្រាស់តិចជាងអ្នកដែលភ្ជាប់តាមរយ:ទូរស័ព្ទ។ Facebook ទទួលបានប្រាក់ចំណូល៨៤ភាគរយពីការផ្សព្វផ្សាយតាមរយៈទូរស័ព្ទដែលនេះបង្ហាញឲ្យឃើញថាភាគច្រើននៃអ្នកប្រើប្រាស់ប្រព័ន្ធផ្សព្វផ្សាយសង្គមគឺនៅលើទូរស័ព្ទរបស់ខ្លួន។

“មាតិកា(Content)ដែលអ្នកផុសនៅលើប្រព័ន្ធផ្សព្វផ្សាយសង្គមត្រូវរំលេចcalls-to-actionហើយអ្នកត្រូវចាំទុកក្នុងចិត្តថាមនុស្សដែលអ្នកផុសទៅដល់គឺជាអ្នកប្រើប្រាស់ទូរស័ព្ទចល័ត។ ពួកគេមានទូរស័ព្ទនៅក្នុងដៃស្រាប់ ដូច្នេះអ្នកគួរទាញយកឱកាសនិងបង្កើតមាតិកាដែលជម្រុញឲ្យគេធ្វើសកម្មភាព” Catherine Jacobs, COO នៃ McQuarries Hunter LLP។

Facebook ពីដំបូងឡើយគឺបង្កើតឡើងសម្រាប់ការប្រើប្រាស់នៅលើកុំព្យូទ័រ បន្ទាប់មកវាបានវិវត្តក្លាយជាការពេញនិយមប្រើប្រាស់នៅលើទូរស័ព្ទ។ និន្នាការនៃទូរស័ព្ទចល័តដែលគ្របដណ្តប់ប្រព័ន្ធផ្សព្វផ្សាយសង្គមនឹងកាន់តែកើនឡើង ដូច្នេះចូរត្រៀមខ្លួនអ្នកឥឡូវនេះ។

#៣ កុំលុបបំបាត់ platforms ដោយសារតែវាមានលក្ខណៈពិសេសស្រដៀងគ្នា

វាមិនមែនជារឿងអាថ៌កំបាំងនោះទេដែល Facebook និង Instagram ចម្លងតាម Snapchat។ ឥឡូវនេះពួកវាមាននូវលក្ខណៈពិសេសស្រដៀងគ្នា ប៉ុន្តែគេមិនចាំបាច់ធ្វើឱ្យពួកវាដូចគ្នានោះទេ។ បើយើងមើលពីខាងក្រៅ ពួកវាហាក់ដូចជាមានភាពស្រដៀងគ្នាខ្លាំងរហូតដល់យើងអាចលុបចោលមួយណាក៏បាន ប៉ុន្តែ platform នីមួយៗក៏មានសមត្ថភាពនិងអ្នកប្រើប្រាស់ផ្សេងៗគ្នា។

“Snapchat គឺនៅតែជាជម្រើសដ៏ពេញនិយមជាងក្នុងចំណោមអ្នកប្រើប្រាស់វ័យក្មេង នៅខណ:ដែល Instagram គឺជាជម្រើសថ្មីនៃបណ្តាញសង្គម។ Facebook គឺជាជម្រើសដែលប្រជាជនស្ទើរតែគ្រប់វ័យមានភាពងាយស្រួលនៅក្នុងការប្រើប្រាស់។ ដូចនេះ ខណ:ដែលប្រព័ន្ធផ្សព្វផ្សាយសង្គមទាំងបីនេះមានលក្ខណៈពិសេសដូចគ្នា វានៅតែមានការចូលចិត្តទៅតាមអ្នកប្រភេទប្រើប្រាស់ផ្សេងៗគ្នា” បកស្រាយដោយ Yosef Adelman, CEO នៃ Falcon Marketing។

នៅខណ:ដែលfeaturesអាចកាន់តែនឹងមានលក្ខណ:ស្រដៀងគ្នាច្រើនទៅនឹងplatformsនៃប្រព័ន្ធផ្សព្វផ្សាយសង្គមផ្សេងៗគ្នា។ អ្នកមិនអាចលុបចោលនូវច្រកនៃប្រព័ន្ធផ្សព្វផ្សាយសង្គមណាមួយដោយផ្អែកលើលក្ខណៈពិសេសតែម្យ៉ាងនោះទេ។ ការធ្វើបែបនេះអាចនាំឲ្យអ្នកបាត់បង់សមត្ថភាពរបស់អ្នកដើម្បីឈានទៅដល់អ្នកប្រើប្រាស់។

#៤ វីដេអូត្រូវតែក្លាយជាផ្នែកមួយនៃយុទ្ធសាស្រ្តមាតិការបស់អ្នក

អ្នករាល់គ្នាពិតជាដឹងស្រាប់ហើយថាវីដេអូគឺកំពុងពេញនិយមនាពេលបច្ចុប្បន្ននេះ ហើយការដាក់ Facebook ads នៅក្នុងវីដេអូគឺកំពុងតែមានការទាក់ទាញនិងមានការចូលរួមកាន់តែច្រើន។ នៅពេលដែលអ្នកធ្វើវាបានល្អហើយ អ្នកមិនចាំបាច់ចំណាយប្រាក់ច្រើននោះទេ។

“Snapchat ផ្អែកទៅលើមាតិកាវីដេអូយ៉ាងខ្លាំងដូចជា Stories របស់ Instagramដែរ វាជាការបង្ហាញថាមាតិកាជាវីដេអូកំពុងតែគ្របដណ្តប់ប្រព័ន្ធផ្សព្វផ្សាយសង្គមបច្ចុប្បន្ន។ អាជីវកម្មដែលរៀនយ៉ាងឆាប់រហ័សអំពីរបៀបផ្សព្វផ្សាយតាមរយៈមាតិកាវីដេអូនឹងទទួលបានជោគជ័យក្នុងប្រព័ន្ធផ្សព្វផ្សាយសង្គមច្រើនជាងអ្នកដែលមិនអើពើពីវាសោះ” សម្តីរបស់លោក Brain Gwinn, CEO នៃ Greenview Investment Partners។

ប្រភព៖ www.entrepreneur.com

ពាណិជ្ជកម្ម

កត្តាបឋមបីយ៉ាងសម្រាប់អ្នកលក់ជោគជ័យ

By

ហាក់ គីមថុង

-

0

អាជីពជាអ្នកលក់គឺជាការងារមួយដែលពោពេញទៅដោយសក្តានុពល និងអាចរកប្រាក់ចំណូលបានខ្ពស់ប្រសិនបើយើងខិតខំប្រឹងប្រែង តស៊ូ និងចេះតិចនិចក្នុងការចរចារ ឬលក់។ នៅប្រទេសជឿនលឿន អាជីពអ្នកលក់គឺជាអាជីពមួយដែលគេលើកតម្កើង ហើយមានអ្នកល្បីៗលំដាប់ពីភពលោកមិនតិចអ្នកទេដែលល្បីដោយសារតែអាជីពលក់នេះដូចជាលោក Joe Girard លោក Zig Ziglar លោក Dale Carnegie ជាដើម។ តើកត្តាអ្វីខ្លះដែលដែលអាចជួយឱ្យអ្នកលក់ជោគជ័យបាន?

លោកអ៊ុង សុឆិកា ដែលជាប្រធានផ្នែកលក់ និងជានាយកផ្នែកបណ្តុះបណ្តាលរបស់ក្រុមហ៊នធានារ៉ាប់រងអាយុជីវិតសុវណ្ណាភូមិឡាយហ្វ៍បានលើកឡើងយ៉ាងសាមញ្ញថា អ្នកលក់ជោគជ័យតំបូងត្រូវមានមានកត្តាបឋមបី គឺ៖

[ad id=”5311″]

១) ពេញចិត្តនឹងក្រុមហ៊ុន ផលិតផល និងជឿជាក់ថាវិស័យ និងក្រុមហ៊ុនដែលគាត់កំពុងធ្វើនឹងរីកចម្រើនទៅមុខ មិនមែនដោយសារលុយ ឬចំណូលតែមួយមុខនោះទេ។

២) មានគោលដៅហិរញ្ញវត្ថុ និងមិនមែនហិរញ្ញវត្ថុច្បាស់លាស់ដែលចង់ជោគជ័យនៅក្នុងវិស័យលក់នេះពិតប្រាកដ។ ឧទាហរណ៍៖ គោលដៅរបស់អ្នកលក់អចលនទ្រព្យ គឺផ្តល់ដី និងគេហដ្ឋានដ៏ល្អនៅក្នុងក្តីសុបិនរបស់អតិថិជនដើម្បីឲ្យគាត់មានសុភមង្គលបំផុតជាមួយក្រុមគ្រួសារជាមួយនឹងតម្លៃសមរម្យដែលគាត់អាចទទួលយកបាន។

៣) មានវិន័យ និងស្រលាញ់ការរៀនសូត្រ ហើយចូលចិត្តចែករំលែកមិនលាក់អ្វីដែលខ្លួនធ្វើបាន និងអ្វីដែលជាការលំបាករបស់ខ្លួននៅនឹងខ្លួនឯងឡើយ។ ការលក់មិនមែនស្រួលនោះទេ វាជាការលំបាក ដូច្នេះបើទុកក្នុងខ្លួន គឺអាចនឹងស្ទះស្លាប់ ដូច្នេះយើងចាំបាច់ត្រូវធ្វើការងារជាក្រុម ចែករំលែក ភាពជោគជ័យ និងការលំបាកផ្សេងៗរវាងគ្នា និងគ្នា និងអ្នកដឹកនាំផ្នែកលក់ជានិច្ច។

ពាណិជ្ជកម្ម

ជំហានទាំង៥ដើម្បីបង្កើនការមានទំនួលខុសត្រូវរបស់បុគ្គលិកអ្នក

By

bunneath Heng

-

0

ការបកស្រាយពាក្យថា “ទំនួលខុសត្រូវ”គឺងាយ ប៉ុន្តែការលំបាកនោះគឺការប្រាប់បុគ្គលិករបស់អ្នកថាតើពួកគាត់គួរមានទំនួលខុសត្រូវបែបណាហើយវាក៏កាន់តែលំបាកចំពោះការធ្វើឲ្យពួកគាត់មានទំនួលខុសត្រូវ ។ ជាពិសេសគឺនៅពេលដែលអ្នកដឹកនាំក្រុមភ្លេចថាគាត់គឺជាគម្រូក្នុងការបង្ហាញពីភាពមានទំនួលខុសត្រូវ។ គាត់ក៏មិនបានត្រិះរិះពិចារណាអំពីអាកប្បកិរិយារបស់គាត់។ ហេតុនេះគាត់នឹងមិនអាចទទួលបានមកវិញនូវការមានទំនួលខុសត្រូវរបស់បុគ្គលិកគាត់ដូចគ្នា។ អ្នកត្រូវចំាថាទំនួលខុសត្រូវជាផ្នែកមួយនៃបរិយាកាសក្រុមហ៊ុនដែលទាមទារឲ្យមានការយកចិត្តទុកដាក់។ ខាងក្រោមនេះ គឺសហគ្រិនបានបកស្រាយពីទំនួលខុសត្រូវដែលបុគ្គលិកគួរតែមាននិងជំហានដែលបុគ្គលិកគួរប្រព្រឹត្ត៖

ទី១ ហ៊ានស្ម័គ្រចិត្តបង្ហាញពីអ្វីដែលត្រូវធ្វើ៖ យើងទាំងអស់គ្នាតែងតែឃើញក្រុមហ៊ុនមួយចំនួនមានបញ្ហាដដែលៗកើតឡើងហើយគ្មានបុគ្គលិកឬអ្នកគ្រប់គ្រងណាលើកពីដំណោះស្រាយនៃបញ្ហានោះឡើងឡើយ។ ទង្វើបែបនេះអាចធ្វើឲ្យអាជីវកម្មរបស់អ្នកមានបញ្ហានៅថ្ងៃមុខ។ បើសិនជាអ្នកចង់ឲ្យគាត់ចេះមានទំនួលខុសត្រូវនៅពេលមានបញ្ហាកើតឡើង អ្នកអាចលើកជាអង្គប្រជុំពិភាក្សានិងសាកសួរបុគ្គលិកទាក់ទងនឹងមធ្យោបាយដើម្បីដោះស្រាយបញ្ហាទាំងនោះ។

ទី២ ទទួលស្គាល់កំហុសដែលខ្លួនបានធ្វើ៖ បុគ្គលិកមួយចំនួននៅពេលដែលគាត់ធ្វើខុសគាត់តែងតែចង្អុលដាក់អ្នកដទៃជាជាងទទួលស្គាល់កំហុសរបស់ខ្លួនឬក៏គាត់បែរជាដោះសារថានេះមិនមែនជាភារកិច្ចរបស់គាត់ជាដើម។ ហេតុនេះក្នុងនាមយើងជាអ្នកដឹកនាំយើងត្រូវធ្វើជាគម្រូល្អដោយបង្ហាញគាត់ថាការដោះស្រាយបញ្ហាជូនអតិថិជនឬបញ្ហាដែលកើតមាននៅក្នុងស្ថាប័នជាការស្វះស្វែងរកដំណោះស្រាយរួមមិនមែនជាបញ្ហារបស់បុគ្គលណាម្នាក់។

ទី៣ សម្រេចចិត្តឲ្យមានភាពវិជ្ជមាន៖ បុគ្គលិកភាគច្រើនតែងតែមិនហ៊ានបង្ហាញពីការសម្រេចចិត្តឬបញ្ចេញមតិព្រោះគាត់គិតថាខ្លួនគាត់មិនបានទទួលការបណ្តុះបណ្តាលគ្រប់គ្រាន់ ចំណេះដឹងនៅទាប ឬមិនសូវមានបទពិសោធន៍ជាដើម។ វាគឺជាផ្នែកមួយនៃទំនួលខុសត្រូវរបស់ក្រុមហ៊ុនដូចគ្នា។ អ្នកត្រូវធ្វើឲ្យយ៉ាងណាដើម្បីឲ្យបុគ្គលិករបស់អ្នកមានភាពក្លាហាន ជាជាងធ្វើឲ្យគាត់កាន់តែមានអារម្មណ៍ថាគាត់អន់ជាងអ្នកដទៃ។

ទី៤ គិតឲ្យបានស៊ីជម្រៅពីផលវិបាកទាំងឡាយមុននឹងធ្វើការសម្រេចចិត្ត៖ តើអ្នកដោះស្រាយបញ្ហាឲ្យអស់ពីចិត្តរបស់អ្នកដើម្បីក្រុមហ៊ុនឬអ្នកគ្រាន់តែធ្វើការដើម្បីប្រយោជន៍ផ្ទាល់ខ្លួន? តើអ្នករកដំណោះស្រាយយូរអង្វែងសម្រាប់អតិថិជននិងស្ថាប័នឬគ្រាន់តែរកដំណោះស្រាយឲ្យរួចមួយគ្រាៗហើយថ្ងៃក្រោយអាចនឹងមានរឿងដដែលកើតឡើងវិញ? ដូចនេះគិតឲ្យច្បាស់មុននឹងសម្រេចចិត្តធ្វើអ្វីមួយ។

ទី៥ មានការរំពឹងខ្ពស់ពីខ្លួនអ្នកនិងក្រុមរបស់អ្នក៖ នៅពេលដែលអ្នកមានការប្តេជ្ញាខ្ពស់ ទោះបីជាអ្នកមិនអាចជួយបុគ្គលិករបស់អ្នកក៏ដោយប៉ុន្តែវាបានជួយជម្រុញកម្លាំងចិត្តដល់ពួកគាត់ឲ្យខិតខំប្រឹងប្រែងអស់ពីសមត្ថភាពដើម្បីសម្រេចគោលដៅរបស់ក្រុមហ៊ុន។ ម្យ៉ាងវិញទៀត នៅពេលដែលអ្នកព្យាយាមរក្សាឆន្ទៈដ៏រឹងមាំរបស់ខ្លួននិងប្រាប់ទៅកាន់បុគ្គលិកថាអ្នកបានផ្ញើក្តីសង្ឃឹមទុកនៅនឹងពួកគេនោះគេប្រាកដជាខំប្រឹងមិនឲ្យអ្នកអស់សង្ឃឹមទេ។

ពាណិជ្ជកម្ម

អាថ៌កំបាំងទាំង៥ដែលធ្វើឲ្យអ្នកដឹកនាំមានជំនាញជួបដោយផ្ទាល់ជាមួយបុគ្គលិក

By

bunneath Heng

-

0

បច្ចុប្បន្នអ្នកតែងតែឮពាក្យការជួបផ្ទាល់រវាងបុគ្គលិកនិងអ្នកដឹកនាំអាចមួយសប្តាហ៍ម្តងឬក៏ជួបពិភាក្សានៅពេលបុគ្គលិកមានបញ្ហាជាដើមក្នុងរូបភាពជាការប្រជុំបូកសរុបលទ្ធផលឬការរិះរកគំនិតថ្មីទាក់ទិននឹងបញ្ហាណាមួយ។ ការជួបផ្ទាល់រវាងបុគ្គលិកនិងអ្នកដឹកនាំបែបនេះគឺពិតជាមានអត្ថប្រយោជន៍ច្រើនណាស់ចំពោះអាជីវកម្មរបស់អ្នក។

ទី១ អ្នកដឹកនាំគួរមានចម្ងល់ចំពោះកិច្ចការផ្សេងៗនិងមិនចោទប្រកាន់ផ្តេសផ្តាស

អ្នកដឹកនាំល្អមិនចេះតែចោទប្រកាន់ផ្តេសផ្តាសពីមូលហេតុដែលធ្វើឲ្យការបំពេញការងារនៃបុគ្គលិករបស់ខ្លួនអន់ថយនោះទេ តែគាត់បែរជាមានចម្ងល់ទៅលើរឿងរ៉ាវផ្សេងៗដែលទាក់ទងនឹងបញ្ហាដែលបុគ្គលិករបស់គាត់ប្រឈម។ កត្តាមួយចំនួនអាចធ្វើឲ្យបុគ្គលិកសម្រេចចិត្តធ្វើអ្វីមួយមិនបានត្រឹមត្រូវ បញ្ហាដែលធ្វើឲ្យពួកគាត់ខកខានបំពេញការងារ ឬក៏គាត់មិនមានអារម្មណ៍ក្នុងការធ្វើការជាដើម។ នៅពេលដែលអ្នកដឹកនាំមានចម្ងល់ដូចនេះគាត់តែងតែប្រើឱកាសនៃការជួបផ្ទាល់ដើម្បីសាកសួរពីបញ្ហាទាំងនោះដែលនេះអាចធ្វើឲ្យទំនាក់ទំនងរបស់អ្នកគ្រប់គ្រងនិងបុគ្គលិកកាន់តែប្រសើរឡើង។

ទី២ អ្នកដឹកនាំត្រូវស្តាប់ដោយយកចិត្តទុកដាក់

នៅពេលអ្នកដឹកនាំជួបផ្ទាល់ជាមួយបុគ្គលិក គាត់យល់កាន់តែច្បាស់ពីបុគ្គលិករបស់គាត់ព្រោះគាត់បានស្តាប់ពីបញ្ហារបស់បុគ្គលិកឬចំណុចផ្សេងៗដែលបុគ្គលិកទាមទារពីក្រុមហ៊ុន។ នៅពេលដែលជួបផ្ទាល់បែបនេះ អ្នកដឹកនាំមានឱកាសស្តាប់ច្រើនពីបុគ្គលិកជាជាងការនិយាយទៅកាន់ពួកគេតែម្យ៉ាង។ មួយវិញទៀត ប្រសិនបើបុគ្គលិកស្តាប់ដោយយកចិត្តទុកដាក់ពីសម្តីឬពាក្យណែនាំរបស់យើងដូចគ្នានោះយើងអាចវាយតម្លៃបានច្បាស់ពីអត្តចរិករបស់ពួកគេ។ កាលៈទេសៈនៃការជួបផ្ទាល់ជាពេលវេលាអាចឲ្យម្នាក់ៗអាចបង្ហាញពីទឹកចិត្តរៀងៗខ្លួនចំពោះស្ថាប័ននិងការបំពេញការងារកន្លងមក។

ទី៣ អ្នកដឹកនាំគួរតែប្រើប្រាស់ភាពស្ងៀមស្ងាត់

ពេលដែលអ្នកសួរសំណួរទៅកាន់បុគ្គលិកហើយពួកគាត់ឆ្លើយមិនបានអ្នកគួរប្រើភាពស្ងប់ស្ងាត់មួយសន្ទុះសិនដើម្បីទុកពេលឲ្យពួកគាត់បានគិតមុននឹងឆ្លើយជាជាងសួរសំណួរបន្តទៅទៀតឬក៏យើងអាចនិយាយថា “មិនអីទេ អ្នកអាចគិតតាមសម្រួលបាន”។ ទង្វើដូចនេះយើងកំពុងតែបង្ហាញពីយកចិត្តទុកដាក់និងឲ្យតម្លៃចំពោះការគិត អារម្មណ៍ និងគំនិតរបស់គាត់។ ការទុកពេលសម្រាប់បុគ្គលិកឲ្យគាត់គិតពិចារណាដូចជាការផ្តល់ពេលវេលាឲ្យគាត់ក្នុងការរៀនស្វែងយល់ពីខ្លួនឯង។

ទី៤ ការជួបផ្ទាល់ជាមួយបុគ្គលិកប្រៀបដូចការហ្វឹកហាត់ដើម្បីភាពរីកចម្រើន

ឧទាហរណ៍ដូចជាអ្នករត់កីឡា បើសិនជាគាត់ចង់ឲ្យសមត្ថភាពរបស់គាត់កាន់តែរឹងមាំ គាត់ត្រូវហ្វឹកហាត់ឲ្យកាន់តែប្រសើរ។ បើធៀបនឹងអ្នកដឹកនាំវិញ គាត់ក៏ត្រូវប្តេជ្ញាធ្វើយ៉ាងណាឲ្យការជួបដោយផ្ទាល់ជាមួយបុគ្គលិកកាន់តែច្រើនគឺមានគោលបំណងធ្វើឲ្យការបំពេញការងាររបស់បុគ្គលិកកាន់តែប្រសើរឡើងដូចគ្នា។ ការប្តេជ្ញាចិត្តត្រូវមាន៣ដំណាក់កាល៖ ទី១ អ្នកដឹកនាំត្រូវត្រៀមសំណួរឲ្យបានត្រឹមត្រូវមុននឹងសួរទៅកាន់បុគ្គលិកធ្វើយ៉ាងណាឲ្យចាក់ចំចំណុចខ្វះខាតនៃលទ្ធផលការងារឬបញ្ហាដែលពាក់ព័ន្ធ។ ទី២ គាត់ត្រូវត្រិះរិះពីវិធីសន្ទនា។ ទី៣ គាត់ត្រូវរកមធ្យោបាយផ្សេងៗដែលនាំឲ្យការជួបផ្ទាល់ជាមួយបុគ្គលិកកាន់តែផ្តល់ផលប្រយោជន៍ច្រើន។

ទី៥ អ្នកដឹកនាំត្រូវពង្រឹងអាកប្បកិរិយាល្អជាងអាក្រក់

ក្នុងនាមជាអ្នកដឹកនាំល្អអ្នកត្រូវតែមានអាកប្បកិរិយាល្អវិជ្ជមានដូចជាលើកទឹកចិត្តបុគ្គលិក រិះគន់ដើម្បីស្ថាបនាការបំពេញការងាររបស់បុគ្គលិក វាយតម្លៃដោយយោងតាមទិដ្ឋភាពជាក់ស្ដែង និងផ្តល់ដំបូន្មានល្អៗទៅកាន់ពួកគេជាដើម។ ក្នុងពេលដែលបុគ្គលិកជួបទល់មុខគ្នាជាមួយអ្នកគ្រប់គ្រងរបស់ខ្លួនគឺងាយនឹងធ្វើឲ្យពួកគេមានអារម្មណ៍ភ័យខ្លាចណាស់ ហេតុនេះអ្នកដឹកនាំគួរតែចៀសវាងការបញ្ចេញឥរិយាបថមិនល្អដូចជាស្តីបន្ទោស ខឹងសម្បារ មិនពេញចិត្ត មានទឹកមុខមិនល្អ ជេរប្រទេចផ្តាសា ឬប្រើប្រាស់អំពើហិង្សាតាមរូបភាពផ្សេងៗ។ ផ្ទុយមកវិញ អ្នកដឹកនាំគួរបង្កើតវប្បធម៌នៃសិទ្ធិបញ្ចេញមតិស្មើៗគ្នានិងបើកទូលាយចំពោះការរិះគន់គ្រប់បែបយ៉ាង។ ជាពិសេសអ្នកដឹកនាំគួរធ្វើឲ្យបុគ្គលិកមានអារម្មណ៍ស្និទ្ធស្នាលនិងមិនខ្លាចរអារដូចជាការជជែកលេងមុនពេលប្រជុំជាដើម។

ពាណិជ្ជកម្ម