ការធ្វើអាជីវកម្ម តែងតែអាចប្រព្រឹត្តិនូវកំហុសនានា ដែលម្ចាស់អាជីវកម្មមិនអាចចៀសបាន ប៉ុន្តែអ្វីដែលគួរឱ្យកត់សម្គាល់នោះគឺថា កំហុសខ្លះក៏អាចចៀសវាងបាន និងកែប្រែឱ្យល្អឡើងវិញផងដែរ ប្រសិនបើមុននឹងចាប់ផ្ដើមអាជីវកម្ម បានសិក្សាអំពីកំហុសនានាដែលម្ចាស់អាជីវកម្មមុនៗបានប្រព្រឹត្តិ ហើយរិះរកវិធីដើម្បីកែច្នៃ និងចៀងវាងកុំឱ្យកើតឡើងចំពោះអ្នក។ បន្ថែមពីនេះ អ្នកមានការរៀបចំផែនការល្អ និងត្រៀមខ្លួនរួចជាស្រេចក្នុងការដោះស្រាយបញ្ហានានា ព្រមទាំងព្យាយាមកុំឱ្យមានការប្រព្រឹត្តិនូវកំហុសច្រើននៅក្នុងអាជីវកម្ម។

ទោះបីជាយ៉ាងនេះក្ដី នៅក្នុងខ្លឹមសារអត្ថបទនេះ នឹងបង្ហាញនូវកំហុសធំៗមួយចំនួនដែលម្ចាស់អាជីវកម្មខ្នាតតូចតែងតែប្រព្រឹត្តិឡើង ដើម្បីជាសាររំលឹកដាស់តឿនក្នុងការចៀសវាង និងកែតម្រូវឱ្យធ្វើបានល្អជាងនេះ ក្នុងគោលបំណងកសាងអាជីវកម្មឱ្យមានដំណើរការរីកចម្រើនទៅមុខជាបន្តបន្ទាប់ និងទទួលរងនូវហានិភ័យនានាក្នុងកម្រិតទាបបំផុតវិញ។

1. ព្យាយាមធ្វើអ្វីគ្រប់យ៉ាងដោយខ្លួនឯងទាំងអស់

ការដែលមានឈ្មោះថា ម្ចាស់អាជីវកម្ម មិនថាស្ថិតនៅក្នុងកម្រិតណានោះទេ តែងតែមានទំនួលខុសត្រូវ និងភារកិច្ចដែលត្រូវធ្វើច្រើនដោយស្ទើរតែគ្មានពេលឈប់សម្រាក។ ទោះបីជាយ៉ាងណា ក៏វាមានវិធីក្នុងការបំពេញកិច្ចការងារទាំងនោះបានយ៉ាងល្អ និងទាន់ពេលវេលាស្របតាមការចង់បានផងដែរ តាមរយៈការចេះរៀបចំផែនការ និងផ្ទេរឱ្យអ្នកដទៃធ្វើជំនួស មិនមែនសម្រុកធ្វើខ្លួនឯងទាំងអស់នោះឡើយ។ ជាក់ស្ដែង ម្ចាស់អាជីវកម្មខ្នាតតូច តែងតែព្យាយាមសន្សំសំចៃលុយដោយមិនជួលបុគ្គលិកច្រើនដើម្បីបំពេញការងារជំនួសឡើយ ដោយព្យាយាមធានារ៉ាប់រងធ្វើកិច្ចការស្ទើរ 360ដឺក្រេនៅក្នុងក្រុមហ៊ុន ដូចជាការទំនាក់ទំនងជាមួយអតិថិជនទាំងអនឡាញ និងជួបផ្ទាល់ ការគ្រប់គ្រងផ្នែកពន្ធ ប្រព័ន្ធផ្សព្វផ្សាយ ការជូតសម្អាតនិងរៀបចំក្រុមហ៊ុនឱ្យមានផាសុកភាព និងផ្សេងៗជាច្រើនទៀតដែលសុទ្ធតែជាការងារអ្នកផ្សេងអាចធ្វើជំនួសបាន ហើយអាចទុកពេលវេលាខ្លួនឯងឱ្យបានច្រើនក្នុងការរិះរកយុទ្ធសាស្រ្តធ្វើយ៉ាងណាឱ្យក្រុមហ៊ុនរីកចម្រើន និងធ្វើកិច្ចការសំខាន់ៗផ្សេងទៀតទើបជាការប្រសើរ។

2. ធ្វើឱ្យមានភាពច្របូកច្របល់រវាងហិរញ្ញវត្ថុផ្ទាល់ខ្លួន និងអាជីវកម្ម

ម្ចាស់អាជីវកម្មខ្នាតតូច ភាគច្រើនចូលចិត្តធ្វើឱ្យហិរញ្ញវត្ថុផ្ទាល់ខ្លួន និងចរន្តសាច់ប្រាក់ក្នុងក្រុមហ៊ុនមានការច្របូកច្របល់គ្នា ដែលជាហេតុធ្វើឱ្យពិបាកដឹងថាចំណូល ចំណេញឬខាត និងបំណុលនៅក្នុងក្រុមហ៊ុនបែបណា។ល។ សកម្មភាពនេះ នឹងធ្វើឱ្យក្រុមហ៊ុននឹងទទួលរងនូវហានិភ័យផ្នែកហិរញ្ញវត្ថុធ្ងន់ធ្ងរនាពេលអនាគត ព្រមទាំងអាចឈានដល់ការដួលរលំក្រុមហ៊ុនក៏មាន ពីព្រោះផ្នែកនេះគឺសំខាន់ណាស់សម្រាប់ការបន្តដំណើររបស់ក្រុមហ៊ុន ដូចពាក្យមួយដែលម្ចាស់អាជីវកម្មនិយាយប្រាប់គ្នាថា “ក្រុមហ៊ុនអាចបន្តដំណើរទៅមុខបាន លុះត្រាតែមានចំណូល ហើយចំណេញ ប៉ុន្តែបើក្រុមហ៊ុនអស់លុយ ឬមានបញ្ហាជាប់គាំងសាច់ប្រាក់ នោះមិនយូរទេក្រុមហ៊ុននឹងត្រូវក្ស័យធន”។

3. ព្យាយាមប្រកួតប្រជែងគ្នាលើការកំណត់តម្លៃ

អាជីវកម្មខ្នាតតូច តែងតែព្យាយាមធ្វើការបញ្ចុះតម្លៃដេញតាមគ្នា ដើម្បីដើម្បីទាក់ទាញអតិថិជន ជំរុញការលក់ ឬយកឈ្នះគូប្រជែងទាំងនោះនៅក្នុងទីផ្សារ។ ការធ្វើបែបនេះ នឹងធ្វើឱ្យក្រុមហ៊ុនកាន់តែធ្លាក់ចំណូល ទោះបីជាលក់ដាច់បានច្រើនក៏ដោយ ជួនកាលមិនរួចនឹងថ្លៃដើមក៏មាន។ ហេតុដូចនេះ កុំព្យាយាមធ្វើបែបនេះពេក ក្រុមហ៊ុនមិនរីកចម្រើនទៅមុខទេ ប៉ុន្តែត្រូវព្យាយាមកំណត់តម្លៃស្ដង់ដារ និងបង្កើតគុណតម្លៃសម្រាប់ផលិតផលឬសេវាកម្មរបស់អ្នក។ ធ្វើបែបនេះ អតិថិជនកាន់តែផ្ដល់តម្លៃ និងចង់បានផលិតផលឬសេវាកម្មរបស់អ្នកកាន់តែច្រើន ទោះបីជាក្រុមហ៊ុននោះមានតម្លៃថ្លៃជាងគេបន្ដិចក៏ដោយ ប្រៀបដូចជាក្រុមហ៊ុន Apple និងក្រុមហ៊ុនលក់ទូរស័ព្ទផ្សេងៗទៀត ដោយក្រុមហ៊ុន Apple តែងតែមានផលិតផលថ្លៃ ប៉ុន្តែនៅតែមានអ្នកគាំទ្រ និងជាជម្រើសទីមួយក្នុងការទិញមកប្រើប្រាស់ ព្រមទាំងជាម៉ាកទូរស័ព្ទដែលមនុស្សស្ទើរគ្រប់គ្នាប្រាថ្នាចង់បាន។

មនុស្សគ្រប់គ្នា តែងតែនិយាយថាពួកគេស្រលាញ់ខ្លួនឯង ព្រមទាំងនិយាយណែនាំអ្នកនៅក្បែរខ្លួនថា ត្រូវចេះស្រលាញ់ខ្លួនឯងឱ្យបានច្រើន ប៉ុន្តែពួកគេមិនដឹងទេថា ពួកគេស្រលាញ់ខ្លួនឯងកម្រិតណាឱ្យពិតប្រាកដ ដោយពួកគេគ្រាន់តែបាននិយាយថា ស្រលាញ់ខ្លួនឯង តែអាចសកម្មភាពជាក់ស្ដែងមិនទាន់ស្រលាញ់ខ្លួនឯងក៏ថាបាន។ ហេតុដូចនេះ នៅក្នុងខ្លឹមសារខាងក្រោមនេះ នឹងបង្ហាញនូវសញ្ញាមួយចំនួនដែលអ្នកអាចឆ្លុះបញ្ចាំងអំពីខ្លួនឯងបានថា អ្នកមិនទាន់ស្រលាញ់ខ្លួនឯងបានច្រើននោះទេ។

1. អ្នកមានអារម្មណ៍ថា អ្នកគឺជានរណាឱ្យប្រាកដ

ការដែលស្គាល់ខ្លួនឯងជានរណាយ៉ាងពិតប្រាកដ ជាផ្នែកមួយដែលមនុស្សគ្រប់គ្នាត្រូវដឹងអំពីខ្លួនឯង ប៉ុន្តែប្រសិនបើយើងនៅតែមានអារម្មណ៍ថាមិនដឹងខ្លួនឯងជានរណាឱ្យពិតប្រាកដផង ច្បាស់ណាស់អ្នកនឹងតែងតែគ្មានភាពជឿជាក់ គ្មានការសប្បាយចិត្តពេញលេញនៅក្នុងកាលៈទេសៈណាមួយ មិនតែងតែព្យាយាមធ្វើអ្វីដើម្បីបំពេញចិត្តខ្លួនឯង និងធ្វើសកម្មភាពនានាដែលសរបញ្ជាក់ថាអ្នកមិនទាន់បានស្រលាញ់ខ្លួនឯងបានច្រើនឡើយ។

ហេតុអ្វីគ្រាន់តែមានអារម្មណ៍ថា ខ្លួនឯងជានរណាឱ្យពិតប្រាកដ ក៏បញ្ជាក់ថាអ្នកមិនស្រលាញ់ខ្លួនឯងបានច្រើន? ពីព្រោះកាលណាអ្នកមិនដឹងថាខ្លួនឯងជានរណាឱ្យពិតប្រាកដផង ច្បាស់ណាស់អ្នកនឹងមិនសូវជឿជាក់លើខ្លួនឯងក្នុងការធ្វើសកម្មភាពនានាដើម្បីសម្រេចគោលដៅនៅក្នុងជីវិត មិនហ៊ានបង្ហាញពីអ្វីជាភាពពិតរបស់ខ្លួនឯងទៅកាន់ពិភពលោក និងតែងតែធ្វើអ្វីតាមតែអារម្មណ៍ ដោយគ្មានគោលដៅជាក់លាក់។

2. រស់នៅក្នុងភាពអវិជ្ជមាន ច្រើនជាងភាពវិជ្ជមាន

ជីវិតរបស់មនុស្សម្នាក់ៗតែងតែមានទាំងសេចក្ដីសុខ និងសេចក្ដីទុក្ខ ហើយវាក៏អាស្រ័យលើផ្នត់គំនិតរបស់មនុស្សម្នាក់ៗផងដែរថា តើពួកគេចង់ធ្វើសកម្មភាពផ្ដោតលើក្ដីសុខច្រើនជាង ឬក្ដីទុក្ខច្រើនជាង? ហេតុដូចនេះ ប្រសិនបើអ្នកចង់ដឹងថាអ្នកស្រលាញ់ខ្លួនឯងបានច្រើនឬអត់ អ្នកអាចសង្កេតពីស្ថានភាពជីវិតរស់នៅរបស់អ្នក ថាតើជីវិតរបស់អ្នកកំពុងស្ថិតនៅភាពអាប់អួរច្រើនជាង ឬភាពស្រស់បំព្រងច្រើនជាង? ប្រសិនបើអាប់អួរច្រើនជាង នោះអ្នកកំពុងតែធ្វើបាបខ្លួនឯងដោយធ្វើឱ្យខ្លួនឯងស្ថិតនៅភាពអវិជ្ជមាន ភាពសោកសៅ និងភាពមិនអាចរីកចម្រើនទៅមុខ ប៉ុន្តែបើភាពស្រស់បំព្រងច្រើនជាង នោះមានន័យថាអ្នកកំពុងស្រលាញ់ខ្លួនឯងបានច្រើន ពីព្រោះអ្នកព្យាយាមធ្វើសកម្មភាពទាំងឡាយណាដែលធ្វើឱ្យជីវិតរបស់អ្នកស្ថិតនៅក្នុងភាពវិជ្ជមាន និងតែងតែធ្វើអ្វីដើម្បីបំពេញចិត្តខ្លួនឯង ព្រមទាំងធ្វើអ្វីដោយផ្ដោតលើការសម្រេចនូវគោលដៅជីវិតផ្ទាល់ខ្លួន ជាពិសេសចេះបង្កើតក្ដីសុខឱ្យខ្លួនឯងបានច្រើន ដោយព្យាយាមរស់នៅជាមួយតែភាពវិជ្ជមាន។

3. មិនខ្វល់ពីសុខភាពខ្លួនឯងជាចម្បង

សុខភាពជារឿងសំខាន់ណាស់ ប្រសិនបើនរណាមានចំណេះដឹងជ្រៅជ្រះកម្រិតណាក៏ដោយ ប៉ុន្តែបើបណ្ដោយឱ្យសុខភាពធ្លាក់ដល់ដំណាក់កាលមិនល្អ ក៏ជារឿងមិនល្អដែរ ហើយវាក៏ជាផ្នែកមួយដែលសរបញ្ជាក់ថាអ្នកមិនស្រលាញ់ខ្លួនឯងបានច្រើននៅឡើយ។ អ្នកត្រូវដឹងថា មនុស្សដែលស្រលាញ់ខ្លួនឯងច្រើន ជាទូទៅពួកគេខ្វាយខ្វល់អំពីសុខភាពរបស់ពួកគេណាស់ ហេតុនេះពួកគេតែងតែព្យាយាមធ្វើយ៉ាងណាឱ្យសុខភាពពួកគេបានល្អតាមដែរអាចទៅរួច ទោះបីជាដឹងថា​ គ្មាននរណាម្នាក់អាចគេចផុតពីការឈឺបានឡើយ គ្រាន់តែពួកគេព្យាយាមធ្វើឱ្យការឈឺនោះកើតឡើងក្នុងកម្រិតស្រាលបំផុត។ ដូច្នេះបើស្រលាញ់ខ្លួនឯង ត្រូវគិតគូរអំពីសុខភាពខ្លួនឯង មិនមែននិយាយថាស្រលាញ់ខ្លួនឯង ប៉ុន្តែតែងតែគេងយប់ជ្រៅ ញុំាអាហារមិនទៀងទាត់ និងចូលចិត្តធ្វើអ្វីដែលប៉ះពាល់ដល់សុខភាពជាបន្តបន្ទាប់។

4. ចូលចិត្តបង្អាប់ខ្លួនឯងជាមួយអ្នកដទៃ

ការបង្អាប់ ឬការប្រៀបធៀបខ្លួនឯងជាមួយនឹងអ្នកដទៃ វាជារឿងល្អ ប្រសិនបើអ្នកប្រៀបធៀបខ្លួនឯងហើយព្យាយាមពង្រឹងសមត្ថភាពឱ្យកាន់តែល្អ មិនមែនប្រៀបធៀបដើម្បីធ្វើឱ្យខ្លួនឯងបាក់ទឹកចិត្ត អស់សង្ឃឹម មានភាពច្រណែន និងធ្វើបាបខ្លួនឯងជាដើម។ ហេតុនេះ បើស្រលាញ់ខ្លួនឯង ត្រូវយល់អំពីខ្លួនឯង និងព្យាយាមធ្វើអ្វីដែលជាគោលដៅដែលអ្នកចង់បាន មិនមែនប្រៀបធៀបជាមួយនឹងអ្នកដទៃ ហើយធ្វើឱ្យខ្លួនឯងបោះបង់ ឬពិបាកចិត្តរាល់ថ្ងៃនោះឡើយ។ ចូររីករាយជាមួយនឹងបច្ចុប្បន្នដែលអ្នកមាន ហើយព្យាយាមធ្វើអ្វីគ្រប់យ៉ាងនូវអ្វីដែលអ្នកចង់សម្រេចបាននៅក្នុងជីវិត។

5. រស់នៅដោយគ្មានគោលដៅច្បាស់លាស់

ការដែលមានគោលដៅច្បាស់លាស់នៅក្នុងជីវិត សរបញ្ជាក់បានថា អ្នកនឹងកំពុងចង់ធ្វើអ្វីមួយដ៏ល្អបំផុតសម្រាប់ជីវិតរបស់អ្នក មិនមែនគ្រាន់តែរស់មួយថ្ងៃឱ្យបានមួយថ្ងៃនោះទេ ប៉ុន្តែរស់ដោយមានក្ដីស្រមៃ និងព្យាយាមធ្វើឱ្យក្ដីស្រមៃក្លាយជាការពិត។ អ្នកត្រូវដឹងថា អ្នកដែលរស់នៅជាមួយក្ដីស្រមៃ ឬមានគោលដៅច្បាស់លាស់ ជាមនុស្សដែលរីករាយបំផុតជាប្រចាំថ្ងៃ ព្រមទាំងមានថាមពលជាប្រចាំដើម្បីបំពេញនូវចំណង់ផ្ទាល់ខ្លួន មិនមែនចេះតែរស់ៗ និងធ្វើអ្វីតាមតែអារម្មណ៍ ឬតាមអ្នកដទៃ។

ក្រុមការងារជាផ្នែកសំខាន់នៅក្នុងក្រុមហ៊ុន ពីព្រោះបើគ្មានក្រុមការងារ នោះក្រុមហ៊ុនក៏មិនអាចដំណើរការឆ្ពោះទៅរកការសម្រេចគោលដៅក្រុមហ៊ុនបានលឿននោះដែរ ដូចពាក្យមួយឃ្លាគេបាននិយាយថា ក្រុមហ៊ុនគ្រាន់តែជាឈ្មោះ ប៉ុន្តែក្រុមហ៊ុនអាចទទួលបានជោគជ័យបានកម្រិតណា គឺវាអាស្រ័យលើសមត្ថភាព និងការរួបរួមគ្នារបស់ក្រុមការងារ។ ទោះបីជាយ៉ាងណា ការធ្វើការងារជាមួយគ្នា តែងតែមានជម្លោះ ឬមានបញ្ហាផ្ទៃក្នុងនានា ប៉ុន្តែវាក៏មានដំណោះស្រាយផងដែរ ដោយអាស្រ័យលើការគ្រប់គ្រងចាត់ចែងរបស់ម្ចាស់អាជីវកម្ម ឬថ្នាក់ដឹកនាំនៅក្នុងក្រុមហ៊ុននោះ។ លើសពីនេះ អ្នកក៏ត្រូវដឹងដែរថា ជម្លោះផ្ទៃក្នុងរបស់ក្រុមការងារ ឬការដែលធ្វើឱ្យក្រុមការងារបែកបាក់សាមគ្នីគ្នា វាជាហានិភ័យខ្ពស់បំផុតសម្រាប់ក្រុមហ៊ុន ដូចជាបុគ្គលិកម្នាក់ៗគ្មានផលិតភាពការងារ បុគ្គលិកនឹងគ្មានភាពរីកចម្រើន អាត្រានៃអ្នកឈប់លាឈប់ក៏ច្រើន និងមិនងាយឆាប់សម្រេចនូវគោលដៅក្រុមហ៊ុនឡើយ។

ម្យ៉ាងវិញទៀត ប្រសិនបើអ្នកជាម្ចាស់អាជីវកម្ម ជាថ្នាក់ដឹកនាំនៅក្នុងក្រុមហ៊ុន ឬនៅក្នុងផ្នែកណាមួយរបស់ក្រុមហ៊ុន អ្នកច្បាស់ជាមានទំនួលខុសត្រូវដ៏ធំមួយក្នុងការដឹកនាំក្រុមការងារដើម្បីឆ្ពោះទៅរកការសម្រេចនូវគោលដៅរបស់ក្រុមហ៊ុន ព្រមទាំងជួយពួកគេឱ្យរីកចម្រើនទាំងអាជីពការងារ និងនៅក្នុងជីវិតរស់នៅប្រចាំថ្ងៃ។ ហេតុដូចនេះហើយ ខ្លឹមសារអត្ថបទមួយនេះ នឹងបង្ហាញនូវការយល់ដឹងមួយចំនួនដើម្បីឱ្យអ្នកត្រៀមដំណោះស្រាយ ក៏ដូចជាឈ្វេងយល់បន្ថែមលើកត្តាសំខាន់មួយចំនួនដែលអាចធ្វើឱ្យក្រុមការងាររបស់អ្នកមានការបែកបាក់សាមគ្នីគ្នាក្នុងការបំពេញការងារឱ្យបានល្អ។

កត្តាសំខាន់ដែលធ្វើឱ្យក្រុមការងារភាគច្រើននឹងត្រូវបែកបាក់សាមគ្នីគ្នាក្នុងការបំពេញការងារឱ្យបានល្អសម្រាប់ក្រុមហ៊ុននោះរួមមាន៖

1. ថ្នាក់ដឹកនាំអសមត្ថភាព

ថ្នាក់ដឹកនាំ គឺជាផ្នែកមួយសំខាន់ណាស់សម្រាប់ការដឹកនាំក្រុមការងារឱ្យសហការគ្នាក្នុងការបំពេញការងារ និងអាចធ្វើឱ្យបុគ្គលិកម្នាក់ៗរីកចម្រើនលើវិស័យអាជីពការងាររបស់ពួកគេ។ ប៉ុន្តែប្រសិនបើថ្នាក់ដឹកនាំអសមត្ថភាព ដោយមិនដែលចេះជំរុញលើកទឹកចិត្តក្រុមការងារ ខ្វះភាពជាអ្នកដឹកនាំ គ្មានជំនាញច្បាស់លាស់មួយ និងមិនចេះវាស់វែងលើសមត្ថភាពបុគ្គលិក ឬអាចនិយាយបានថា មិនចេះមើលពីសមត្ថភាពបុគ្គលិក ដោយមិនដឹងថាបុគ្គលិកណាមានទេពកោសល្យល្អ ហើយបុគ្គលិកណាគួរពង្រឹងសមត្ថភាពបន្ថែម និងបុគ្គលិកណាដែលចេះតែនិយាយយកមុខមាត់ប៉ុន្តែមិនដែលចេះធ្វើអ្វីឱ្យចេញជាលទ្ធផលការងារពិតប្រាកដ។ល។ ហេតុដូចនេះហើយ ការដឹកនាំបែបនេះ នឹងធ្វើឱ្យក្រុមការងារមានភាពច្រណែនគ្នា បុគ្គលិកមានការធុញទ្រាន់ជាមួយនឹងការងារ បុគ្គលិកគ្មានការរីកចម្រើន ហើយបុគ្គលិកដែលមានសមត្ថភាព ក៏ដូចជាខិតខំប្រឹងប្រែងខ្លាំងក៏បាក់ទឹកចិត្ត ព្រមទាំងទទួលបានភាពអយុត្តិធម៌នៅកន្លែងការងារជាដើម។ អ្នកត្រូវដឹងថា ការដឹកនាំរបស់ថ្នាក់ដឹកនាំ ក៏ជះឥទ្ធិពលលើការសហការគ្នាធ្វើការងារជាក្រុមដែរ ដូច្នេះប្រសិនបើអ្នកជាម្ចាស់អាជីវកម្ម ត្រូវពិនិត្យឡើងវិញលើសមត្ថភាពដឹកនាំផ្ទាល់ខ្លួន និងពង្រឹងសមត្ថភាពថ្នាក់ដឹកនាំផ្សេងៗទៀតឱ្យបានល្អ។

2. គោលដៅក្រុមហ៊ុនគ្មានភាពជាក់លាក់

គោលដៅ គឺជារឿងសំខាន់ណាស់សម្រាប់ក្រុមហ៊ុននីមួយៗ ដោយជាក់ស្ដែងដូចយើងបានដឹងស្រាប់ហើយថា គ្រប់ក្រុមហ៊ុនធំៗទូទាំងពិភពលោកសុទ្ធតែមានទស្សនវិស័យ និងបេសកកម្មច្បាស់លាស់ ដែលជាគោលដៅក្រុមហ៊ុនមួយយ៉ាងជាក់លាក់។ ហេតុនេះ ប្រសិនបើក្រុមហ៊ុនគ្មានការចែងគោលដៅឱ្យបានជាក់លាក់នោះទេ ក្រុមការងារក៏មានភាពវង្វេងគោលដៅដែរ ដោយមិនដឹងថាត្រូវធ្វើអ្វីឱ្យពិតប្រាកដដើម្បីសម្រេចជូនដល់ក្រុមហ៊ុន ព្រមទាំងនឹងធ្វើឱ្យពួកគេមានអារម្មណ៍ថា ចង់លាឈប់ពីការងារ ដើម្បីស្វែងរកក្រុមហ៊ុនណាដែលនាំពួកគេឱ្យរីកចម្រើនក្នុងភាពច្បាស់លាស់ណាមួយដែលពួកគេចង់បានយ៉ាងពិតប្រាកដ។

ម្យ៉ាងវិញទៀត ការដែលគ្មានគោលដៅជាក់លាក់នៅក្នុងក្រុមហ៊ុន ក្រុមការងារនឹងមានការប្រចាំគ្នា ដោយសារតែគ្មានការបែងចែកគ្នាដើម្បីសម្រេចឱ្យបានជាក់លាក់ ហើយពួកគេក៏គ្មានការសហការគ្នាក្នុងការជួយជ្រោមជ្រែងគ្នាឱ្យសម្រេចនូវការងារណាមួយបានជាក់លាក់ដូចគ្នា ដោយពួកគេគិតតែធ្វើការងារណាដែលពួកគេកំពុងធ្វើរាល់ថ្ងៃ ដោយមិនសូវខ្វល់ខ្វាយពីភារកិច្ចការងាររបស់បុគ្គលិកផ្សេងទៀតឡើយ សំខាន់ឱ្យតែការងាររបស់ពួកគេបានសម្រេចបានផែនការ។ កត្តានេះ ក៏ជាផ្នែកធ្វើឱ្យបុគ្គលិកឃ្លាតឆ្ងាយគ្នានូវទំនាក់ទំនងធ្វើការរួមគ្នាឱ្យបានល្អ ដើម្បីសម្រេចនូវគោលដៅរួមរបស់ក្រុមហ៊ុនផងដែរ។

3. ការមានភាពទទួលខុសត្រូវលើតែកិច្ចការងារផ្ទាល់ខ្លួនពេក

ភាពទទួលខុសត្រូវលើការងារផ្ទាល់ខ្លួននៅក្នុងក្រុមហ៊ុន វាជារឿងដ៏ល្អហើយសម្រាប់ក្រុមបុគ្គលិកម្នាក់ៗ ប៉ុន្តែវាក៏មានភាពមិនល្អដែរ ប្រសិនបើបុគ្គលិកម្នាក់ៗគិតផ្ដោតលើតែការសម្រេចគោលដៅផ្ទាល់ខ្លួន ឬទទួលខុសត្រូវតែការងារផ្ទាល់ខ្លួន ដោយមិនខ្វល់ពីការងារអ្នកផ្សេងឡើយ ដែលជាហេតុធ្វើឱ្យក្រុមការងារគ្មានការចេះជួយជ្រោមជ្រែងគ្នាក្នុងការសម្រេចកិច្ចការងារ និងមិនអាចឆាប់សម្រេចនូវគោលដៅរួមរបស់ក្រុមហ៊ុន។

មនុស្សគ្រប់គ្នា តែងតែមានក្ដីប្រាថ្នារៀងៗខ្លួននៅក្នុងជីវិត ដូច្នេះសំណួរសួរថា តើត្រូវធ្វើបែបណាដើម្បីសម្រេចបាននូវក្ដីប្រាថ្នាដែលចង់បាននោះឱ្យជោគជ័យនៅក្នុងជីវិត? ហេតុអ្វីសួរបែបនេះ? ព្រោះមនុស្សមានក្ដីប្រាថ្នានៅក្នុងជីវិតដូចគ្នា ប៉ុន្តែអ្នកខ្លះក៏អាចសម្រេចបាន ហើយអ្នកខ្លះទៀតក៏មិនអាចសម្រេចបាន។ ហេតុនេះ ខ្លឹមសារខាងក្រោមនេះ នឹងបង្ហាញនូវគន្លឹះមួយចំនួនដើម្បីជួយអ្នកបន្ថែមទៀត ប្រសិនបើអ្នកកំពុងមានក្ដីប្រាថ្នាអ្វីមួយដែលចង់សម្រេចឱ្យបានប៉ុន្តែមិនដឹងធ្វើបែបណា ឬកំពុងតែជួបបញ្ហាស្ទើតែធ្វើឱ្យអ្នកចង់បោះបង់ជាដើម។

1. ផ្តោតលើការតាំងចិត្ត មិនមែនការលើកទឹកចិត្តទេ

មនុស្សមួយចំនួននៅពេលមានគោលដៅដែលចង់សម្រេចនៅក្នុងជីវិតផ្ទាល់ខ្លួន ភាគច្រើនចូលចិត្តតែផ្ដោតលើការលើកទឹកចិត្ត ដោយមិនបានធ្វើយ៉ាងណាឱ្យខ្លួនឯងមានការតាំងចិត្តខ្ពស់ និងមានឆន្ទៈដើម្បីសម្រេចឡើយ។ ការផ្ដោតលើការលើកទឹកចិត្ត វាមិនសូវទទួលបានប្រសិទ្ធភាពនោះទេ ប៉ុន្តែក៏មិនមែនមានន័យថា យើងមិនត្រូវការការលើកទឹកចិត្តនោះដែរ គ្រាន់តែចង់ឱ្យអ្នកផ្ដោតខ្លាំងលើការតាំងចិត្តរបស់អ្នកដើម្បីសម្រេចអ្វីមួយដែលអ្នកចង់បាននៅក្នុងជីវិត។ ការតាំងចិត្ត ឬអាចនិយាយបានថាការប្ដេជ្ញាចិត្តរបស់អ្នកក្នុងការធ្វើអ្វីមួយដែលអ្នកចង់បាន អាចធ្វើឱ្យអ្នកមិនងាយឆាប់បោះបង់ អាចជំនះគ្រប់បញ្ហាទាំងអស់ ហ៊ានលះបង់គ្រប់យ៉ាង និងមានកម្លាំងចិត្តក្នុងការរិះរកវិធីថ្មីៗដើម្បីសម្រេច ប៉ុន្តែបើផ្ដោតលើការលើកទឹកចិត្ត នោះនៅពេលដែលគ្មានការលើកទឹកចិត្តជាប្រចាំពីបុគ្គលផ្សេងៗ នោះអ្នកនឹងឆាប់អស់កម្លាំងចិត្តក្នុងការធ្វើសកម្មភាពបន្តមិនខាន។ ហេតុដូចនេះ ប្រសិនបើអ្នកចង់សម្រេចអ្វីក៏ដោយដែលអ្នកចង់បាននៅក្នុងជីវិត អ្នកត្រូវតែមានការប្ដេជ្ញាចិត្តក្នុងការសម្រេចវា ហើយរកឱ្យឃើញថា តើអ្នកហ៊ានលះបង់អ្វីខ្លះដើម្បីសម្រេចវានោះ? ហើយហ៊ានលះបង់កម្រិតណា? នោះអ្នកនឹងដឹងថា អ្វីដែលអ្នកចង់បាននោះ វាពិតជាមានគុណតម្លៃ និងមានសារៈសំខាន់ខ្លាំងសម្រាប់អ្នក ដូច្នេះនៅពេលអ្នកមានការប្ដេជ្ញាចិត្តពេញលេញហើយ នោះការលើកទឹកចិត្តនឹងដើរមកតាមក្រោយ។

2. ស្វែងរកចំណេះដឹង មិនមែនលទ្ធផល

បើអ្នកចង់សម្រេចអ្វីមួយដែលអ្នកចង់បាននៅក្នុងជីវិត ចូរកុំព្យាយាមកំណត់គោលដៅដោយផ្ដោតលើលទ្ធផលពេក ពីព្រោះកម្លាំងចិត្តរបស់អ្នកនឹងថយចុះ ប្រសិនបើអ្នកមិនបានសម្រេចដូចលទ្ធផលដែលបានគ្រោងទុកនោះ។ ហេតុដូចនេះ បើចង់បានអ្វីមួយនៅក្នុងជីវិត ត្រូវតែចុះសិក្សាស្រាវជ្រាវបន្ថែម ដើម្បីរៀនសូត្រអំពីដំណាក់កាលរបស់វា ចេះកែលម្អ និងពិសោធន៍ឱ្យបានច្រើន។ ធ្វើបែបនេះ អ្នកនឹងមានចំណេះដឹងច្រើនដើម្បីអាចសម្រេចនូវអ្វីដែលអ្នកចង់បាននោះ ដោយអ្នកនឹងដឹងពីវិធី និងដំណើរការដើម្បីសម្រេចវាបានយ៉ាងល្អ។

3. ឈប់រស់នៅក្នុងតំបន់សុខស្រួលរបស់អ្នក

តំបន់សុខស្រួល (Comfort Zone) សំដៅលើការព្យាយាមធ្វើឱ្យជីវិតខ្លួនឯងរស់នៅបែបស្រួលៗ។ ហេតុដូចនេះ ប្រសិនបើអ្នកចង់សម្រេចអ្វីមួយដែលអ្នកចង់បាននៅក្នុងជីវិត អ្នកត្រូវតែចាកចេញពីតំបន់សុខស្រួលរបស់អ្នក ដោយហ៊ានប្រឈបមុខនឹងបញ្ហា  ហ៊ានជួបស្ថានភាពលំបាកៗ មិនរងចាំពេលវេលាដ៏ល្អឥតខ្ចោះដើម្បីធ្វើអ្វីមួយឡើយ ប៉ុន្តែត្រូវហ៊ានចាប់ផ្ដើមឥលូវ។ ចូរចងចាំថា បើអ្នកចង់បានអ្វីមួយនោះក្នុងជីវិត អ្នកនឹងទទួលបានប្រសិនបើអ្នកហ៊ានធ្វើសកម្មភាពគ្រប់បែបណាដើម្បីសម្រេចវា មិនមែនគ្រាន់តែនឹកគិតស្រមៃ និងចូលចិត្តធ្វើអ្វីបែបស្រួល ហើយទទួលបានដែរ គឺវាមិនអាចទៅរួចនោះឡើយ ដូចពាក្យមួយឃ្លាគេបាននិយាយថា “នៅលើលោកនេះ គ្មានអ្វីទទួលបានដោយស្រួលៗឡើយ”។

4. កុំពឹងផ្អែកលើអ្នកដទៃ

ជីវិតរបស់អ្នក គឺជារបស់អ្នក ហើយអ្វីដែលអ្នកចង់បាននៅក្នុងជីវិតរបស់អ្នក គឺមានតែអ្នកប៉ុណ្ណោះជាអ្នកសម្រេចវា ដោយមិនមែនអង្គុយរំពឹងថាអ្នកដទៃមកធ្វើជំនួសអ្នក ឬផ្ដល់អ្នកឱ្យទទួលបានអ្វីដែលចង់បាននៅក្នុងជីវិតនោះទេ។ ហេតុនេះ អ្នកត្រូវចងចាំថា គ្មាននរណាម្នាក់សូម្បីតែសមាជិកគ្រួសារ មិត្តភត្តិ ដៃគូជីវិត ឬចៅហ្វាយរបស់អ្នក គឺពួកគេមិនអាចសម្រេចគោលដៅដែលអ្នកចង់បាននៅក្នុងជីវិតបានឡើយ គឺមានតែអ្នកប៉ុណ្ណោះដែលអាចសម្រេចបាន។ ម្យ៉ាងវិញទៀត អ្នកចូរកុំយល់ច្រលំថា កុំពឹងផ្អែកលើអ្នកដទៃដើម្បីសម្រេចគោលដៅ ដោយមិនមែនមានន័យថាឱ្យអ្នកសម្រេចតែម្នាក់ឯងនោះទេ ប៉ុន្តែអាចស្វែងរកជំនួយពីអ្នកជុំវិញដើម្បីជួយបាន គ្រាន់តែថាអ្នកគឺជាមនុស្សតែម្នាក់ដែលត្រូវរក្សាគោលជំហផ្ទាល់ខ្លួនដើម្បីសម្រេចគោលដៅនោះ មិនមែនរងចាំតែអ្នកដទៃមកដាស់តឿន ឬធ្វើគ្រប់យ៉ាងដើម្បីឱ្យអ្នកសម្រេចនូវគោលដៅដែលអ្នកចង់បាននោះទេ។

5. ធ្វើផែនការ

ការដែលមានផែនការ ប្រៀបដូចជាមានផែនទីបង្ហាញផ្លូវជាជំហានៗដ៏ជាក់លាក់ដល់អ្នក ដើម្បីឱ្យអ្នកដឹងថាអ្នកត្រូវធ្វើបែបណា និងត្រៀមលក្ខណៈបែបណាដើម្បីសម្រេចនូវអ្វីដែលអ្នកចង់បាននោះ។ បន្ថែមពីនេះ ផែនការ នឹងធ្វើឱ្យអ្នកកាន់តែដឹងថា រឿងណាខ្លះត្រូវធ្វើ និងមិនត្រូវធ្វើ ហើយអ្នកនឹងកាន់តែដឹងថាកិច្ចការណាជាអាទិភាពដែលត្រូវបំពេញជាប្រចាំថ្ងៃ។ ធ្វើបែបនេះ ទើបអ្នកអាចឆាប់សម្រេចនូវគោលដៅដែលអ្នកចង់បាននោះលឿន និងមិនងាយធ្វើឱ្យអ្នកវង្វេងគោលដៅ ហើយពិបាកផ្ដោតលើអ្វីមួយនោះទេ។ លើសពីនេះ ជីវិតប្រចាំថ្ងៃរបស់អ្នកក៏ពោរពេញដោយភាពរីករាយ ពីព្រោះអ្នករស់នៅជាមួយជីវិតដែលមានការចង់បានពិតប្រាកដក្នុងជីវិត ហើយក៏កំពុងធ្វើសកម្មភាពឆ្ពោះទៅកាន់ក្ដីស្រមៃនោះ។

6. ចេះការពារខ្លួនឯងពីការអស់កម្លាំងចិត្ត

ជាធម្មតាទេ មនុស្សម្នាក់ៗតែងតែអាចមានពេលវេលាមួយបាក់ទឹកចិត្ត អស់សង្ឃឹម នឿយហត់ មានភាពស្រ្តេស ស្មុគស្មាញ និងអស់កម្លាំងចិត្តនៅក្នុងជីវិតទៅតាមស្ថានភាពជាក់ស្ដែង។ ម្យ៉ាងវិញទៀត ការប៉ងប្រាថ្នាចង់សម្រេចអ្វីមួយនៅក្នុងជីវិត មិនមែនសុទ្ធតែជាការងាយស្រួលទទួលបាននោះទេ ជាពិសេសក៏មិនប្រាកដថាជោគជ័យដែរ ពីព្រោះវាត្រូវឆ្លងកាត់ដំណាក់កាលច្រើន ដោយក្នុងនោះក៏មានភាពស្រួល និងភាពលំបាក ព្រមទាំងអាចទទួលរងផលប៉ះពាល់ពីពាក្យសម្ដីខាងក្រៅជាដើម ហេតុនេះអ្នកច្បាស់ជាអាចមានពេលវេលាណាមួយដែលអស់កម្លាំងចិត្ត និងអស់សង្ឃឹមជាដើម។ ហេតុផលនេះ ហើយអ្នកត្រូវត្រៀម និងដឹងថា បើស្ថានភាពនោះកើតឡើងចំពោះអ្នក តើអ្នកនឹងត្រូវធ្វើបែបណាដើម្បីការពារ ក៏ដូចជាធ្វើឱ្យអ្នកចាកចេញពីភាពអស់សង្ឃឹមនោះបាន? ធ្វើបែបនេះ ទើបអ្នកអាចរក្សាកម្លាំងចិត្តបន្តដើម្បីធ្វើដំណើរទៅមុខ