ក្រុមហ៊ុនពាណិជ្ជកម្មអេឡិចត្រូនិកយក្សមួយរបស់ប្រទេសចិន Alibaba និងភាពជាដៃគូជាមួយក្រុមហ៊ុន Perennial Holdings ព្រមទាំងរាប់បញ្ចូលមហាសេដ្ឋីសិង្ហបុរី  លោក Kuok Khoon Hong និងលោក Ron Sim បានជាប់ឈ្មោះក្នុងការយល់ព្រមពីរដ្ឋាភិបាលក្នុងការសាងសង់អគារខ្ពស់កប់ពពកនៅក្នុងទីក្រុង Lion ប្រទេសសិង្ហបុរី ដែលជាទីផ្សារដ៏ល្អបំផុតមួយនៅក្នុងតំបន់អាស៊ី និងតំបន់ប៉ាស៊ីហ្វិក។

ចំពោះការសាងសងនោះ ត្រូវបានអាជ្ញាធរអភិវឌ្ឍន៍ទីក្រុងយល់ព្រមលើសំណើរកាលពីថ្ងៃទី7 ខែកក្កដា ឆ្នាំ2022នេះ ដើម្បីសាងសង់អគារពាណិជ្ជកម្ម សណ្ឋាគារ និងលំនៅដ្ឋានដែលមានកម្ពស់ 63 ជាន់ នៅលើទីតាំង 8 Shenton Way ក្នុង Tanjong Pagar នៅជិត Raffles Place ដែលជាតំបន់ពាណិជ្ជកម្មកណ្តាល។ អចលនទ្រព្យនេះត្រូវបានសាងសង់ឡើងដំបូងក្នុងឆ្នាំ 1986 ជាអគាររតនាគារ ធ្លាប់ជាទីស្នាក់ការកណ្តាលរបស់ក្រុមហ៊ុនវិនិយោគរដ្ឋ Temasek Holdings។

បន្ថែមពីនេះ អគារដែលសាងសងនឹងមានកម្ពស់អតិបរមា 305 ម៉ែត្រ ព្រមទាំងអាចក្លាយជារចនាសម្ព័ន្ធខ្ពស់ជាងគេក្នុងប្រទេសសិង្ហបុរី នៅពេលអគារនេះត្រូវបានបញ្ចប់ការសាងសង់អំឡុងឆ្នាំ 2028 ដែលខ្ពស់ជា Guoco Tower ដែលមានកម្ពស់ 284 ម៉ែត្រ ដែលបច្ចុប្បន្នជាអគារខ្ពស់ជាងគេបំផុតរបស់ទីក្រុង Lion។ គួរបញ្ជាក់ផងដែរថា​ អគារខ្ពស់ទាំងពីរនេះ ត្រូវបានភ្ជាប់ទៅនឹងស្ថានីយ៍រថភ្លើងក្រោមដី Tanjong Pagar។

ក្រៅពី Alibaba និងភាពជាដៃគូជាមួយក្រុមហ៊ុន Perennial ក៏មានក្រុមហ៊ុន Chip Eng Seng និងការបណ្តាក់ទុនរួមគ្នារវាង SingHaiyi Group និង Haiyi Holdings ដែលគ្រប់គ្រងដោយមហាសេដ្ឋីអចលនទ្រព្យលោក Gordon Tang និងប្រពន្ធរបស់គាត់ បានយល់ព្រមទិញភាគហ៊ុននៅក្នុង 8 Shenton Way កាលពីដើមឆ្នាំនេះផងដែរ។

ការរកស៊ីអ្វីក៏ដោយ មិនថារកស៊ីលក្ខណៈគ្រួសារ ខ្នាតតូច ឬមធ្យមនោះទេ វាតែងតែមានឧបសគ្គនានា ក៏ដូចជាត្រូវប្រឈបមុខនឹងបញ្ហាជាច្រើនផងដែរ ដូចជាបញ្ហាក្រុមការងារ បញ្ហាសេដ្ឋកិច្ច បញ្ហានយោបាយ បញ្ហាហិរញ្ញវត្ថុ បញ្ហារកស៊ីខាត បញ្ហាដៃគូប្រកួតប្រជែងច្រើនពេកក្នុងទីផ្សារ និងជាច្រើនទៀត។ ហេតុដូចនេះ សួរថាបើប្រឈមមុខនឹងបញ្ហាច្រើនយ៉ាងហ្នឹង ច្បាស់ណាស់នឹងមានអារម្មណ៍អស់សង្ឃឹម និងចង់បោះបង់ការរកស៊ីនោះនៅថ្ងៃណាមួយមិនខាន។ ដូច្នេះតើគួររកស៊ីបែបណា ទើបមិនឆាប់បោះបង់ ទោះបីជាជួបស្ថានការណ៍បែបណាក៏ដោយ?

នៅក្នុងខ្លឹមសារខាងក្រោមនឹងបង្ហាញនូវរបៀបចាប់ផ្ដើមរកស៊ីមួយចំនួន ដែលធ្វើឱ្យអ្នកមិនងាយបោះបង់ឡើយ ទោះបីជាជួបស្ថានភាពបែបណាកដោយ ក៏អ្នកនៅតែមានកម្លាំងចិត្តក្នុងការបន្តរហូតទទួលបានភាពរីកចម្រើនជាបន្តបន្ទាប់។

1. រកស៊ី ដោយកើតចេញពីក្ដីស្រលាញ់

ក្ដីស្រលាញ់ នឹងធ្វើឱ្យអ្នកមិនងាយបោះបង់ឡើយ ដូច្នេះការរកស៊ីដោយកើតចេញពីក្ដីស្រលាញ់ក្នុងការធ្វើអ្វីមួយដែលជាគំនិតអាជីវកម្មរបស់អ្នក ហើយអ្នកចង់បង្កើតវាឱ្យមានរូបរាង និងដំណើរការល្អនោះ ច្បាស់ណាស់អ្នកនឹងចាប់ផ្ដើមមានឆន្ទៈ និងការប្ដេជ្ញាចិត្តខ្ពស់ក្នុងការធ្វើឱ្យគំនិតអាជីវកម្មដែលជាក្ដីស្រលាញ់របស់អ្នកនឹងកើតឡើងនាពេលខាងមុខមិនខាន។ បន្ថែមពីនេះ ការរកស៊ីដោយកើតចេញពីក្ដីស្រលាញ់ អ្នកនឹងមានគោលបំណងជាក់លាក់ក្នុងការរកស៊ី ដោយមិនមែនត្រឹមតែចង់រកស៊ីដើម្បីតែលុយមួយមុខឡើយ ប៉ុន្តែអាចជាការចង់ដោះស្រាយបញ្ហាសង្គម ចង់ជួយសេដ្ឋកិច្ចជាតិ និងជាច្រើនទៀតដែលជាផលប្រយោជន៍រួមសម្រាប់ខ្លួនឯងនិងសង្គមជាតិ។

អ្នកត្រូវដឹងថា គ្រប់សហគ្រិនជោគជ័យទាំងអស់ សុទ្ធតែចាប់ផ្ដើមជាមួយគំនិតអាជីវកម្មដែលកើតចេញពីក្ដីស្រលាញ់ដែលពួកគេចង់ធ្វើខ្លាំងបំផុត ពីព្រោះការដែលធ្វើអ្វីដែលជាក្ដីស្រលាញ់ គឺវាមិនឆាប់បោះបង់ងាយៗឡើយទោះបីជាជួបបញ្ហា ឬជួបស្ថានការណ៍យ៉ាងណាក៏ដោយ ក៏យើងនៅតែព្យាយាមជំនះ និងរិះរកគ្រប់វិធីដើម្បីដោះស្រាយដែរ។ ប៉ុន្តែប្រសិនបើអ្នកចាប់ផ្ដើមជាមួយគំនិតអាជីវកម្មតាមគេតាមឯង ឬតាមតែគេណែនាំ ហើយរកស៊ីគ្រាន់តែចង់បានប្រាក់ចំណេញ និងចង់បានភាពល្បីល្បាញ នោះអ្នកនឹងឆាប់បោះបង់នៅពេលអ្នកជួបនឹងបញ្ហាធំណាមួយ។

ជារួមមក អ្នកត្រូវស្វែងរកគំនិតអាជីវកម្មណាមួយដែលកើតចេញពីក្ដីស្រលាញ់ដែលអ្នកចង់ធ្វើបំផុត ដើម្បីបន្តដំណើរក្នុងការធ្វើឱ្យគំនិតអាជីវកម្មនោះចេញជារូបរាងពិតប្រាកដស្របតាមក្ដីស្រមៃដែលអ្នកចង់ឃើញ។

2. រកស៊ី ដោយកើតចេញពីចំណេះជំនាញដែលមាន

ការរកស៊ីកើតចេញពីក្ដីស្រលាញ់ វាជារឿងសំខាន់ដំបូងគេ បន្ទាប់មកអ្នកក៏ត្រូវដឹងដែរថា តើអ្នកមានចំណេះជំនាញគ្រប់គ្រាន់ឬនៅដើម្បីធ្វើអាជីវកម្មនោះឱ្យមានដំណើរការ? ក្ដីស្រលាញ់ពិតជាសំខាន់ ប៉ុន្តែក៏មិនអាចខ្វះចំណេះជំនាញក្នុងការរកស៊ីផងដែរ ពីព្រោះចំណេះជំនាញនឹងធ្វើឱ្យការរកស៊ីរបស់អ្នកអាចដំណើរការរលូនទៅមុខបាន ហើយអ្នកក៏អាចជឿជាក់លើខ្លួនឯង និងមានភាពក្លាហានគ្រប់គ្រាន់ដើម្បីស្វែងរកជំនួយបន្ថែម។ ​

3. រកស៊ី ដោយការសម្លឹងមើលឃើញឱកាសពង្រីកអាជីវកម្មនាពេលអនាគត

ទោះបីជាអ្នកមានក្ដីស្រលាញ់ និងមានចំណេះជំនាញក្នុងការរកស៊ីក៏ដោយ វាក៏ទាមទារឱ្យអ្នកសម្លឹងមើលថា តើថ្ងៃអនាគតអាច 5ឆ្នាំទៅមុខ អាជីវកម្មរបស់អ្នកមានឱកាសពង្រីកខ្លួនបានកម្រិតណា? ប្រសិនបើអាជីវកម្មរបស់អ្នកមិនអាចមានឱកាសពង្រីកខ្លួននោះទេ វាក៏ជាបញ្ហាមួយផងដែរ ពីព្រោះបើធ្វើអាជីវកម្ម ហើយវានៅតែដដែល ដោយគ្មានការរីកចម្រើនទៅមុខ នោះការរកស៊ីក៏មិនល្អផងដែរ ហើយអាចថ្ងៃណាមួយអ្នកនឹងនឿយហត់ជាមួយការរកស៊ីដែលមិនរីកចម្រើនទៅមុខនោះដែរ។ ហេតុនេះ អ្នកត្រូវតែសម្លឹងមើលពីអនាគតអាជីវកម្មរបស់អ្នកក្នុងថ្ងៃអនាគត ដោយអាចកំណត់ពី 2ឆ្នាំ 5ឆ្នាំ ឬ10ឆ្នាំទៅមុខ តើអាជីវកម្មរបស់អ្នកអាចពង្រីកខ្លួនបានទេ? ហើយពង្រីកខ្លួនដោយរបៀបណា?

4. រកស៊ី ដោយមានផែនការអាជីវកម្មច្បាស់លាស់

នៅក្នុងចំណុចចុងក្រោយជាចំណុចកាន់តែសំខាន់ ពីព្រោះវាជាចំណុចដែលអាចធ្វើឱ្យគំនិតអាជីវកម្មរបស់អ្នកអាចក្លាយជាការពិត និងមិនអាចក្លាយជាការពិត ពីព្រោះវាជាផែនទីបង្ហាញផ្លូវថាអ្នកនឹងត្រូវធ្វើបែបណាដើម្បីឱ្យអាជីវកម្មនោះដំណើរការ ព្រមទាំងអាចស្វែងរកប្រភពចំណូល និងការវិនិយោគបានយ៉ាងល្អ។

អ្នកអាចឈ្វេងយល់បន្ថែមពីផែនការអាជីវកម្មតាមតំណរភ្ជាប់ខាងក្រោ​ម៖

• ឈ្វេងយល់អំពី Business Plan
• តិចនិកសរសរផែនការអាជីវកម្ម
• ភាពខុសគ្នារវាង Business Plan VS Business Model

នៅពេលអ្នកចូលផ្សារទំនើបម្ដងៗដើម្បីទិញគ្រឿងទេស ភាគច្រើនអ្នកបានកត់សម្គាល់ដែរឬទេថា តើនៅទីនោះមានបង្អួចនៅតាមជញ្ជាំងដែរទេ? ចម្លើយច្បាស់ជាមិនដែរបានឃើញ ឬក៏អ្នកមិនបានយកចិត្តទុកដាក់ក្នុងការសង្កេតមើលឡើយ សំខាន់អ្នកចូលផ្សារទំនើបដើម្បីដើរស្វែងរកអាហារ និងគ្រឿងទេសផ្សេងៗតាមតម្រូវការរបស់អ្នកប៉ុណ្ណោះ។ ទោះបីជាយ៉ាងណា តើអ្នកឆ្ងល់ដែរឬទេថា ហេតុអ្វីបានជាផ្សារទំនើបជាទូទៅមិនមានបង្អួចនៅតាមជញ្ជាំង ដោយគ្រាន់តែមានទ្វារធំៗនៅពីមុខហាង? តើវាគ្រាន់តែជាចិត្តសាស្រ្តមួយដើម្បីទាក់ទាញអតិថិជនឱ្យចូលមកមើល និងទិញឬយ៉ាងណា? ហេតុដូចនេះ ដើម្បីស្រាយចម្ងល់របស់អ្នក ខ្លឹមសារខាងក្រោមនឹងបង្ហាញនូវហេតុផលមួយចំនួន។

1. ចង់រក្សាមនុស្សឱ្យនៅខាងក្នុងបានយូរ

ការដែលផ្សារទំនើបភាគច្រើនកម្រនឹងមានបង្អួច វាមិនមែនជារឿងចៃដន្យនោះទេ ប៉ុន្តែវាជាចេតនាក្នុងការរចនាឡើងដើម្បីព្យាយាមរក្សាមនុស្សដែលបានចូលមកឱ្យនៅបានយូរប៉ុណ្ណោះ។ បន្ថែមពីនេះ បើយោងតាមប្រសាសន៍របស់លោក Andrei Vasilescu អ្នកជំនាញការដើរទិញឥវ៉ាន់ដែលសិក្សាពីអាកប្បកិរិយា និងចិត្តវិទ្យានៃការទិញទំនិញ គឺគាត់បានពន្យល់បកស្រាយថា “ម្ចាស់ហាង ចង់បង្កើតបរិយាកាសដាច់ដោយឡែកមួយនៅក្នុងហាងរបស់ពួកគេ​ ដោយគ្មានការរំខានពីមជ្ឈដ្ឋានខាងក្រៅ ដើម្បីធ្វើឱ្យអតិថិជនអាចមានអារម្មណ៍ផ្ដោតលើបទពិសោធន៍ក្នុងការទិញអីវ៉ាន់របស់ពួកគេ ដោយគ្មានការរំខានពីពន្លឺព្រះអាទិត្យ ឬមេឃកំពុងភ្លៀង ឬក៏ឃើញទិដ្ឋភាពផ្សេងៗនៅខាងក្រៅដែលមិនសូវអំណោយផល ជាហេតុធ្វើឱ្យពួកគេនឹងមិនបន្តការដើរទិញទំនិញទៀតឡើយ ឬក៏អាចភ្លេចដោយសារកត្តាផ្សេងៗដែលបានសម្លឹងឃើញនៅខាងក្រៅបង្អួច។ល។”

2. រក្សាផលិតផលទាំងឡាយក្នុងហាងបានល្អ

ការដែលផ្សារទំនើបមិនមានបង្អួច ដោយសារតែវាអាចរក្សាគ្រប់ផលិតផលទាំងអស់ដែលមាននៅក្នុងហាងបានល្អ តាមរយៈការគ្មានពន្លឺព្រះអាទិត្យចូលមកខ្លាំង ពីព្រោះផលិតផលខ្លះអាចខូចបានលឿន និងអាច​ធ្វើ​ឱ្យ​ស្លាក​សញ្ញា​នៃ​ការ​វេច​ខ្ចប់​បាត់​ទៅ​វិញ​។

3. កាត់​បន្ថយ​តម្លៃ​សំណង់

ប្រសិនបើផ្សារទំនើបមានបង្អួចវិញ នោះច្បាស់ជាអាចនឹងកាត់បន្ថយទំហំទំនេរសម្រាប់ដាក់តាំងផលិតផលនានាមិនខាន។ ជាពិសេស វាក៏ត្រូវចំណាយលុយច្រើន ពីព្រោះការធ្វើជញ្ជាំងខាងក្រៅត្រូវតែមានរចនាសម្ព័ន្ធរឹងមាំដែលអាចផ្ទុកវត្ថុធ្ងន់ៗនៅលើធ្នើរជញ្ជាំងទាំងនោះ។ ម្យ៉ាងទៀតតម្លៃបង្អួចនិងមុខហាង គឺមានតម្លៃថ្លៃ ដូច្នេះបើដាក់បង្អួចទៀត វាអាចត្រូវចំណាយលុយបន្ថែម ហើយនេះជាហេតុធ្វើឱ្យម្ចាស់ហាងមិនចង់ចំណាយច្រើន និងចង់កាត់បន្ថយតម្លៃសំណង់។

ជំនាញជាច្រើនដែលម្ចាស់អាជីវកម្មខ្នាតតូចត្រូវមាន ដើម្បីជួយធ្វើឱ្យអាជីវកម្មកាន់តែរីកចម្រើនជាបន្តបន្ទាប់ ប៉ុន្តែទោះបីជាយ៉ាងនេះក្ដី មានជំនាញកាន់តែល្អបំផុតដែលម្ចាស់អាជីវកម្មខ្នាតតូចចាំបាច់ត្រូវតែមាន និងត្រូវតែអភិវឌ្ឍន៍សមត្ថភាពផ្ទាល់ខ្លួនលើជំនាញទាំងនោះឱ្យកាន់តែខ្លាំង ដើម្បីអាចជួយក្រុមការងារ និងក្រុមហ៊ុនកាន់តែមានសំទុះនៃភាពរីកលូតលាស់បានកាន់តែលឿនស្របតាមការគ្រោងទុក។ ជំនាញសំខាន់ៗទាំងនោះ រួមមាន៖

1. ជំនាញភាពជាអ្នកដឹកនាំ

អ្នកដឹកនាំល្អ តែងតែព្យាយាមដឹកនាំអ្នកនៅក្រោមបង្គាប់ដើម្បីសម្រេចបាននូវគោលដៅរួមរបស់ក្រុមហ៊ុន និងជួយជ្រោមជ្រែងពួកគេឱ្យទទួលបានភាពរីកចម្រើននៅក្នុងអាជីពការងារផ្ទាល់ខ្លួន មិនមែនគ្រាន់តែតាំងខ្លួនឯងជាចៅហ្វាយនាយ និងព្យាយាមឱ្យអ្នកនៅក្រោមបង្គាប់ដើរតាមប៉ុណ្ណោះនោះទេ។ ម្យ៉ាងវិញទៀត អ្នកដឹកនាំល្អ តែងតែមានជំនាញភាពជាអ្នកដឹកនាំ ពីព្រោះជំនាញនេះអាចជួយឱ្យអ្នកដឹកនាំកាន់តែក្លាយជាមនុស្សល្អនៅក្នុងក្រសែភ្នែករបស់អ្នកនៅក្រោមបង្គាប់ទាំងអស់ និងជាគំរូដ៏ល្អសម្រាប់ពួកគេ តាមរយៈការយកចិត្តទុកដាក់ ការចេះស្ដាប់យោបល់អ្នកនៅក្រោមបង្គាប់គ្រប់ឋានៈទាំងអស់ មានសមត្ថភាពក្នុងការចែករំលែកសារច្បាស់លាស់ និងធ្វើឱ្យគំនិតស្មុគស្មាញក្លាយជាគំនិតងាយយល់សម្រាប់មនុស្សគ្រប់គ្នា ចេះលើកទឹកចិត្តក្រុមការងារ មានភាពច្នៃប្រឌិត មានភាពបត់បែន អាចគ្រប់គ្រងផែនការការងារបានយ៉ាងល្អ ចេះគ្រប់គ្រងពេលវេលា ស្ថិតនៅភាពវិជ្ជមានជានិច្ច មានទស្សនវិស័យច្បាស់លាស់ និងជាច្រើនទៀតដែលបង្ហាញពីភាពជាអ្នកដឹកនាំដ៏ល្អបំផុតដើម្បីជួយអ្នកនៅក្រោមបង្គាប់ឱ្យរីកចម្រើន និងជោគជ័យទាំងអស់គ្នាលើគោលដៅរួមដែលបានកំណត់។

ហេតុដូចនេះហើយ ម្ចាស់អាជីវកម្មខ្នាតតូចមិនគួររំលងនូវការអភិវឌ្ឍជំនាញមួយនេះឡើយ ដើម្បីធ្វើឱ្យការដឹកនាំរបស់ខ្លួនកាន់តែទទួលបានប្រសិទ្ធភាពជាងមុន។

សិក្សាជំនាញភាពជាអ្នកដឹកនាំ៖ https://alison.com/courses?query=leadership%20skills

2. ជំនាញទំនាក់ទំនង

ជំនាញទំនាក់ទំនង ពិតជាសំខាន់ណាស់សម្រាប់ម្ចាស់អាជីវកម្មខ្នាតតូច ពីព្រោះជំនាញនេះនឹងជួយធ្វើឱ្យអាជីវកម្មរបស់អ្នកកាន់តែពង្រីកខ្លួនបានកាន់តែធំ តាមរយៈការមានបណ្ដាញទំនាក់ទំនងច្រើន ក្នុងការជួយជ្រោមជ្រែងបន្ថែមលើតម្រូវការនានានៅក្នុងអាជីវកម្ម។ លើសពីនេះ ជួយបង្កើនទំនាក់ទំនងរវាងម្ចាស់អាជីវកម្មជាមួយនឹងក្រុមការងារបានយ៉ាងជិតស្និតជាងមុន ដែលជាហេតុធ្វើឱ្យពួកគេអាចបំពេញការងារបានយ៉ាងមានប្រសិទ្ធភាព។

ហេតុដូចនេះ ម្ចាស់អាជីវកម្មខ្នាតតូចទាំងអស់ ត្រូវតែចាប់ផ្ដើមពង្រឹងសមត្ថភាពផ្ទាល់ខ្លួនឱ្យបានខ្លាំង ដើម្បីអាចយកជំនាញមួយនេះក្នុងការបង្កើនប្រសិទ្ធភាពនៃការប្រាស្រ័យទាក់ទងជាមួយក្រុមការងារ សម្រួលដល់ការច្នៃប្រឌិតរបស់ក្រុម ជួយជំរុញលើការសហការគ្នារបស់ក្រុម ព្រមទាំងជួយធ្វើឱ្យក្រុមការងារ និងក្រុមហ៊ុនកាន់តែរីកចម្រើនជាបន្តបន្ទាប់។

សិក្សាជំនាញទំនាក់ទំនង៖ https://alison.com/courses?query=Communication%20Skills

3. ចំណេះដឹងផ្នែកហិរញ្ញវត្ថុ

ការមានចំណេះដឹងផ្នែកហិរញ្ញវត្ថុសម្រាប់អាជីវកម្ម គឺវាមានសារៈសំខាន់ណាស់សម្រាប់ម្ចាស់អាជីវកម្មខ្នាតតូច ពីព្រោះវានឹងជួយឱ្យម្ចាស់អាជីវកម្មដឹងថា តើដំណើរការអាជីវកម្មនឹងត្រូវចំណាយបែបណា? ហើយចំណាយលើអ្វីខ្លះ? បន្ថែមពីនេះ នឹងអាចបង្កើនលំហូរសាច់ប្រាក់ឱ្យបានល្អជាប្រចាំ ជាពិសេសនឹងជួយឱ្យមានផែនការបន្តទៀតកាន់តែល្អនាពេលអនាគត។ បន្ថែមពីនេះ វាក៏ជួយម្ចាស់អាជីវកម្មពីការកេងប្រវ័ញ្ឌដោយមិនដឹងខ្លួនពីសំណាក់បុគ្គលិកដែលកាន់ផ្នែកគ្រប់គ្រងហិរញ្ញវត្ថុ និងគណនេយ្យ។

ហេតុនេះ ម្ចាស់អាជីវកម្មខ្នាតតូច បើចង់ធ្វើឱ្យលំហូរសាច់ប្រាក់នៅក្នុងក្រុមហ៊ុនកាន់តែមានចរន្តល្អ អាចត្រៀមទុកមុននូវហានិភ័យលើការជាប់គាំងសាច់ប្រាក់ ការរៀបចំផែនការអាជីវកម្មឱ្យល្អសម្រាប់អនាគត អាចវិនិយោគលើរឿងសំខាន់ផ្សេងៗសម្រាប់អាជីវកម្ម និងអាចគ្រប់គ្រងសាច់ប្រាក់បានយ៉ាងរលូនជាដើម។

ពង្រឹងសមត្ថភាពលើចំណេះដឹងផ្នែកហិរញ្ញវត្ថុ៖ https://alison.com/courses?query=Financial%20Literacy

4. ជំនាញលក់

ជំនាញលក់ ជាជំនាញមួយដែលម្ចាស់អាជីវកម្មចាំបាច់ត្រូវតែមាន ពីព្រោះវាជាផ្នែកមួយនៃការបង្កើនចំណូលដ៏ធំជាងគេ ព្រមទាំងជាផ្នែកមួយដែលអាចបណ្ដុះបណ្ដាលដល់ក្រុមអ្នកលក់ផ្សេងទៀតឱ្យកាន់តែខ្លាំងផងដែរ។ អ្នកត្រូវដឹងថា ម្ចាស់អាជីវកម្មមានជំនាញលក់ខ្លាំង នោះក្រុមអ្នកលក់ក៏ខ្លាំងផងដែរ ហើយបើក្រុមហ៊ុនសម្បូរដោយអ្នកលក់ខ្លាំង នោះក្រុមហ៊ុននឹងកាន់តែមានលំហូរសាច់ប្រាក់ចូលកាន់តែច្រើន។ ប៉ុន្តែបើម្ចាស់អាជីវកម្ម មិនពូកែលក់ផង នោះច្បាស់ជាគ្មានឥទ្ធិពលខ្លាំងដល់ក្រុមលក់ឡើយ ព្រមទាំងនឹងធ្វើឱ្យផ្នែកលក់នឹងមិនពូកែដូចគ្នា បន្ទាប់មកក្រុមហ៊ុននឹងទទួលរងនូវភាពលក់មិនដាច់ជាក់ជាមិនខាន។

សិក្សាជំនាញលក់៖ https://www.linkedin.com/learning/topics/sales-skills

5. ជំនាញសេវាកម្មអតិថិជន

ជំនាញសេវាកម្មអតិថិជន ជាផ្នែកមួយដ៏សំខាន់ក្នុងការចូលរួមចំណែកធ្វើឱ្យអាជីវកម្មទទួលបានភាពរីកចម្រើន និងជោគជ័យបានយ៉ាងឆាប់រហ័ស ពីព្រោះជំនាញនេះអាចបង្កើនអតិថិជនថ្មីៗបានច្រើន ជួយជំរុញផ្នែកធ្វើទីផ្សារ បង្កើនចំនួនអតិថិជនដ៏ស្មោះត្រង់បានច្រើន និងអាចរក្សាអតិថិជនទាំងថ្មី ទាំងចាស់ឱ្យប្រើប្រាស់ផលិតផលសេវាកម្មនៅក្រុមហ៊ុនរបស់អ្នកជានិរន្ត។ បន្ថែមពីនេះ វាក៏ជាផ្នែកមួយក្នុងការជួយបន្ថែមគុណតម្លៃលើផលិតផលឬសេវាកម្មរបស់អ្នក តាមរយៈការចេះដោះស្រាយជាមួយអតិថិជន ចេះណែនាំផលិតផលសេវាកម្មដ៏ល្អជូនអតិថិជន ចេះឆ្លើយតបរាល់ចម្ងល់ ឬបញ្ហានានារបស់អតិថិជន និងតែងតែផ្ដល់នូវបទពិសោធន៍ល្អៗជាមួយអតិថិជន។

សិក្សាជំនាញសេវាកម្មអតិថិជន៖ https://www.linkedin.com/learning/topics/customer-service-3

6. ជំនាញទីផ្សារឌីជីថល

សម័យនេះ គឺជាសម័យឌីជីថល ហេតុនេះប្រសិនបើម្ចាស់អាជីវកម្មខ្នាតតូចនៅតែមិនទាន់មានការយល់ដឹងផ្នែកទីផ្សារឌីជីថលទៀត ហើយព្យាយាមប្រើប្រាស់យុទ្ធសាស្រ្តបែបប្រពៃណី នោះអាជីវកម្មនឹងមិនអាចដើរទាន់សម័យកាល និងមិនរីកចម្រើនបានលឿនឡើយ។ បន្ថែមពីនេះ មនុស្សបច្ចុប្បន្នក៏កំពុងមានភាពពេញនិយមក្នុងការប្រើប្រាស់ប្រព័ន្ធអនឡាញ ហើយក្នុងនោះសុទ្ធសឹងជាសម្រុកអតិថិជនរបស់អ្នក ដូច្នេះប្រសិនបើនៅតែរឹងរុសមិនបំម្លែងខ្លួនឯងឱ្យមានជំនាញនេះ ឬប្រើប្រាស់ទីផ្សារឌីជីថលនោះទេ នោះអាជីវកម្មរបស់អ្នកនឹងបាត់បង់ឱកាសរីកចម្រើនជាច្រើន។ បន្ថែមពី ម្ចាស់អាជីវកម្មត្រូវមានចំណេះដឹងផ្នែកទីផ្សារឌីជីថលមួយចំនួនដូចជា SEO ទីផ្សារប្រព័ន្ធផ្សព្វផ្សាយសង្គម ការផ្សាយពាណិជ្ជកម្មតាមអ៊ីនធឺណិត និងអ្វីៗជាច្រើនទៀតដើម្បីដឹកនាំអាជីវកម្មឱ្យឆ្ពោះទៅកាន់ភាពរីកចម្រើន។

សិក្សាជំនាញទីផ្សារឌីជីថល៖ https://olympus.mygreatlearning.com/courses/11107

និង https://www.linkedin.com/learning/search?keywords=Digital%20Marketing%20